خطيبتى خانتنى...موقف صعب أتمنى المساعدة

[نور القمر]

لازم تتقرص وتعرف ان خسارتها لراجل زيك مش قليلة
لازم ابوها بس يعرف ولو بصورة مخففة
تنفصل عنها عشان تتقرص وتحس بالندم والخسارة وتتربى من اول وجديد وتثبت بكل الطرق انها اتغيرت واتعلمت الدرس وبعد كدة لك مطلق الحرية بدون اي احراج من عمك تقرر اذا كانت تصلح لك زوجة ولا كل واحد يروح لحاله لاننا مش لازم ننسى ان كل ابن ادم خطاء وخير الخطائين التوابون

[mrghost]

انا لو مكانك وهموت من غيرها ومش هعرف اعيش حتى هسيبها فورا وبدون نقاش دى خيانه

[خالد]

صدقنى سيبها ومش هتندم
لو أرتبطت بيها هتفضل شاكك فيها طول العرم وهتندم

[shaddadfalcon1]

المشكله فعلا في بعض النساء اللي ممكن تكون فعلا بتحب شخص معين لكن بتحب تسمع كلام حلو تعيش قصة حب ودلع مع حد تاني وتلاقيها متقدرش تستغني عن الأتنين
واحد يصرف ويحسسها بالامان وضل راجل والتاني تعيش عاطفيا معاه
الأسود من كده لما تبقي الست دي مش مقدره الراجل اللي معاها ومتحاولش حتي تاخد الجزء العاطفي ده منه

[Samah AbdAllah]

السلام عليكم إخوانى الكرام

أنا عضو زميل ليكم من فترة بس دخلت بإسم جديد وذلك لخصوصية الموضوع وأقدم إعتذارى للإدارة.

انا فى مشكلة كبيرة وبصراحة فوق طاقتى...أنا شاب عندى 30 سنة من القاهرة مهندس عائلتى عائلة لها تقاليد وتحترم كبيرها أبى كان كبير العائلة فمات رحمة الله عليه وتولى القيادة عمى الكبير ...أحببت إبنه عمى هذا وتقدمت لخطبتها منذ 3 سنوات لإنها كانت فى الكلية (كان لايمكن أن يسمح بهذا لولا أنى إبن عمها)...المهم بعد الثلاث سنوات من الخطوبة طبعا أصبحت لايمكن لى أن أفكر فى الفراق ففى عقلى وكيانى انها زوجتى الموضوع كله موضوع وقت وكان فاضل 3 أشهر لعقد القران.........المشكلة بدأت حين إشتريت لها خط تليفون فاتورة كنترول علشان نكلم بعض ونججز موضوع الكروت وكده وحصل إنى فوجئت إن 650 دقيقة اللى فخطها خلصوا فى أقل من 3 أسابيع....طبعا ده من غير مكلماتى علشان انا مكلماتى مجانية ..فسألتها قالتلى صحباتى وكده انا قلت اكيد فرحانة بالفاتورة ورغى البنات وكده....المهم بحسن نية والله العظيم طلبت تسجيل تفصيلى للفواتير الخاصة بية ...وجت إمبارح وطبعا كانت الصاعقة.
فى رقم بتكلمه أكتر منى بتبعتله رسايل باليل بعد الساعة 12...بتكلمة فى أوقات غريبة الساعة 7 الصبح والساعة 12 باليل يعتبر معاها طول اليوم وهى رايحة الشغل لحد متنام....وانا فى النص j. رحت مكلم الرقم وطبعا المفاجأة المتوقعه إنه طلع ولد. وكأنك ألقيت على رأسى حجرا والله أقسم بالله انا ماعارف اوصفلكم مشاعرى.أكيد حاسين بيه.
المهم رحتلها البيت وخدتها ونزلت قعدت معاها فى العربية وشايفها وهى فرحانه (أو عامله نفسها فرحانة)إنى جتلها علشان أشوفها وانى واحشها ورحت ورتلها الفاتورة...طبعا موقف لايمكن هاعرف أوصفه وهى بتبصلى وبتبص للورقه...والمهم قالتلى ده واحد زميالها فى الشغل وهو بيحبها وهى لفترة بسيطه إستريحتله بس عمرها ماشافت غيرى ولا تتخيل حد غيرى جوزها والكلام الفاضى ده....المهم هزقتها ورميت الورق فى وشها وقلتلها كدابة وقعدت اهاجمها علشان اعرف العلاقة وصلت لحد إيه منا الشكوك وصلتنى لحد ليس له نهاية...حلفتلى وطبعا الموبايل فاضى مفهوش أى حاجة...ونزلتها من العربية زق ومشيت وأحمد الله إن يوم المطرة ده عدى على خير والله ياجماعة ماكنت شايف انا كنت ماشى بقدرة ربنا بدور على الحتة الزحمة وامشى فيها علشان خايف أجرى...
ومش عارف أعمل إيه...أروح أقول لعمى؟؟؟؟؟؟؟ هايقتلها ومش بعيد يحصلوا حاجة وهو كبير وانا بحبه بصراحة قوى هو ومراة عمى وهما بيحبونى جدا..وعلاقتى بإخواتها الولاد قوية...طبعا إستحالة أقول لأمى علشان إنتوا عارفين الامهات ممكن تعمل إيه هاترفع سماعة التليفون تخربلى الدنيا....بجد مش عارف أعمل إيه ومحدش يقولى شوف إنت غلط فى إيه بوظت العلاقة او سمحت لحد تانى يلعب بيها وهى صغيرة....علشان انا إديتها كل حاجة ممكن يعملها مهندس عنده شغل وطول النهار واليل شقيان فى مشاكل شغله وكان عندى مكتب صغير فاتحه بعد الضهر كان مكمل عليه بس قفلته بعد الثورة. المشكلة إنها رومانسية جدا وانا فعلا الوقت اللى بدهولها لايكفيها وطبعا الوقت ده اللى هو مكالمتين فى اليوم منهم مكالمة طويلة وحبة مكالمات صغيرة طول اليوم.
بجد لو حد عنده حل علمى أقدر أنفذه ياريت متسبونيش لإنى بجد مش لاقى حد أعرفه ممكن أقوله على الموضوع ده دى بنت عمى وخطيبتى.

(طبعا انا بكتب الكلام ده علشان انا ورا الكيبورد لكن فى الحقيقة انا عمرى ماهقدر أقول الكلام ده لحد غيركم)

عادة مش بحب اتدخل فى المشكلات اللى من النوع ده
لكن استفزنى طريقة سردك للموضوع ويمكن طيبتك الزائدة
اولا حضرتك بتقول طلبت الفاتورة بحسن نية اعتقد ان ده غير صحيح وان الفضول والشك كان تسلل لقلبك لانك اكيد اقدر مننا انك تقارن بين 650 دقيقة اللى خلصتهم وبين الدقائق المجانية اللى بتكلمهالك واللى اكيد اقل من 650 دقيقة واكيد طبعا اللى اثار قلقك وفضولك هو انها تهدر الدقائق دى مع اى شخص اخر حتى لو كانت صديقة فى حين انك اولى بكل دقيقة خاصة انكم فى فترة تجهيز شقة الزوجية واكيد ممكن تتكلموا اكثر من الدقائق دى بكتير
ففكرة حسن النية دى مرفوضة ولازم تعترف بينك وبين نفسك ان هناك ما اثار ريبتك ودفعك للبحث
لان لو هى قالت انها مش بتتكلمهم وان اكيد فى غلط فى الفاتورة كان ممكن نصدق انك طلبتها بحسن نية عشان تتاكد ان مفيش غلط فى الفاتورة لكن هى قالت انها بتتكلم ومستبعدتش انهم يخلصوا يبق انت شكيت .
ثانيا يعنى فترة الخطوبة والاستعداد للزواج وتميل لآخر ومع ذلك تستمر فى الاستعداد للزواج عادى جدا فسامحنى ده تصرف غير سوى ويعطى انطباعات غير مقبولة
ربما كنت احترم مصارحتها لك بتحول مشاعرها وطلب الانفصال لكن من غير المقبول نهائيا الاستمرار فى الزواج وتمضية الوقت مع اخر ...لا وكمان على حسابك مش هو اللى بيتصل بيها لا دى بتوفرله وبتكلمه على حسابك !!!!
لاحول ولا قوة الا بالله
وهى اعترفت انه بيحبها وهى ارتاحتله لانها مش هتقدر تقولك ان هى كمان بتحبه مثلا رغم انك ماسك فى ايدك ما يثبت مين بيحب مين !!
لو هو اللى بيحبها وبيحاول يتقربلها وهى لا مكنش اصلا المفروض تسمحله يكلمها مش هى اللى تتصل بيه .
ولو بتحبه ومكنتش عارفة تنفصل عنك ازاى كانت هتستغل فرصة انك اكتشفت الموضوع وتصارحك انها بسبب القرابة اللى بينكم مكنتش عارفة تقولك ازاى او تنفصل عنك ازاى
لكنى لا اجد تفسير لطيف لاصرارها عالاستمرار معاك واستكمال ترتيبات الزواج رغم كل الوقت اللى كانت بتقضيه فى الحديث مع الاخر هاتفيا ده طبعا غير الوقت الطويل اللى فى العمل
فهذا التصرف غير مقبول ولا اجد له اى تبرير لطيف او منطقى
على فكرة البنت لما تحب ومهما كان سنها صغير لو بتحب بجد مش هتشوف فى الدنيا غير الشخص اللى بتحبه ومهما كان بعيد او مشغول عنها مش هتقدر تتكلم مع غيره مش بس عشان احترامها وتقديرها له لكن عشان مش هيكون عندها نفس اصلا تسمع صوت غيره واى كلمة حب او اعجاب من غيره هتستفزها مش هتسعدها
ارى من طريقة سردك انك تبحث عن امل فى الاستمرار وعن من يساندك فى هذا القرار ويبث فيك الاطمئنان لصلاح احوالها فيما بعد وهذا هو حال المحب للاسف
دائما ما افضل التسامح ولكن فى حالتك لا سبيل لاى تسامح دخل الشك قلبك لمجرد انتهاء دقائق الفاتورة فما بالك بعدما تيقنت من هذا الامر كيف ستحيا معها ؟
انهى الموضوع فى اسرع وقت لانك بتقول انك بتجهز لعقد القران قريبا فاى لحظة تأخير ستصعب الامر وتزيد من اندهاش و حدة رد فعل الاهل
خليها هى تحاول تنهى الموضوع بطريقتها لو مقدرتش او اتهربت والحت عليك فى فرصة اخرى انهى انت الموضوع وحاول برضه تنهيه بدون ما تخبر عمك باى شئ اتلكك باى حاجة او انك فجاة مش مرتاح ومش قادر تكمل وحاسسها زى اختك والكلام ده
اترك الضعف البشرى والعاطفة التى هى من طرف واحد جانبا فالحياة بعد الزواج مختلفة تماما
اساسها الثقة والاحترام والحب وكلهم مش متوفرين فى حالتك

[medo_2060]

كلمه ونص : انهى الموضوع بدون تردد ولكن بالطريقه الاقل ضرر الى تقدر توصلها عشان صله القرابه بينكم

[hossam_elwani]

من الاخر انت من سكه وهيا من سكه ................ ودور على حجه ذكيه مدروسه

[MaZaGAngeE]

حط ديلك في سنانك و قول يا فكيك و انت كده خسارتك بسيطة و قليلة و مفيش داعي تقول لعمك او اخواتها حاجة .
اخلع من سكات حتى لو همه زعلوا منك شوية لكن دي بنت و مينفعش يحصل شوشرة حوالين سمعتها

[bmw323]

الشخص اللى بتحبه ومهما كان بعيد او مشغول عنها مش هتقدر تتكلم مع غيره مش بس عشان احترامها وتقديرها

فكرتيني بالذى مضي ......... !

[amrdessoky]

عفا الله عن ما سلف
ابدء حوار جديد بعقل وشوف هى عاوزة مين
واكيد انها مغلطتش بناء على تقاليد العائله وتربيتها ربما يكون اعجاب او انشغال فقط
اجلس معها وفكر جيدا
وربنا يوفقك لما يرضاه

مع احترامي لراي الاخ اوعي تعمل كدة الشك ها يقعد راكبك طول عمرك و هيحول حياتك الي جحيم توكل علي الله وشوف غيرها واحمد ربنا انك لسة علي البر وطبعا العلاقات الاسرية هتتاثر شوية بس مع الوقت ستتحسن

[Samah AbdAllah]

:copy of rfds: فكرتيني بالذى مضي ......... !

هههههههههههههه
انت جيت يا رمضان :-)
متبوظشى موضوع الراجل ابقا اعمل موضوع لوحدك :-))

[أحمد كمال]

مع احترامي لراي الاخ اوعي تعمل كدة الشك ها يقعد راكبك طول عمرك و هيحول حياتك الي جحيم توكل علي الله وشوف غيرها واحمد ربنا انك لسة علي البر وطبعا العلاقات الاسرية هتتاثر شوية بس مع الوقت ستتحسن

غير انها في اي مشكلة ممكن لسانها يفلت و تعايره و تقول له يا ريتني كنت اتجوزت فلان بدالك ساعتها ممكن يتجنن و يقتلها ........

[micromoud]

كان عمرو دياب بيغنى ويقول " عايزنى أنسالك بالساهل لا دا يبقى انا مبحسش وأستاهل" بص ياباشا دلوقتى مشكلة البنت عرفنا حلها وانت هتصرف نظر فيها المشكلة بقى فى عم حضرتك.... والنبى لو انتو الاتنين افتكستوا اى مشكله وحاولتوا انكم تمثوها عليه مش هتدخل عليه وهيغلطك فأنا رأيى واحد ملهوش تانى اقطع عرق وسيح دمه واشترى نفسك وقوله عاللى حصل ومتفكرش فى البنت ايكش تولع ومتنساش اللى ميعملكش اعتبار متعملوش اعتبار ... حضرتك عمك هيكسر دماغها بقى ويربيها تانى ويقولك انا ربيتها وانت زى ابنه والكلام ده لازم وقتها تصر على موقفك ومتنساش انك انت الصح ومحدش يقدر يغلطك فاوعى حد يجى يعيش دور المصلح الاجتماعى ويفضل يقنعك دا مستقبلك وحياتك وانت حر فيها وربنا يقدم اللى فيه الخير لحضرتك

[casperinoo]

بص ياباشا انا شايف ان الكلام خلص
..ومينفعش العلاقه ترجع تاني ...لأن خلاص مبقاش فيه ثقه وديه اهم حاجه بين اي اتنين متجوزين ...
تقول لعمك ولا متقولش ...ديه بتاعتك ...
علي الاقل هدور علي اكثر واحد هاديء وهاقوله

[فتح الباب]

بنت عمك كانت خطيبتك (كانت ) لكن هذا لا يمنع انك تخاف عليها كبنت عمك فقط وذلك لرصد تصرفاتها وابلاغها اولا بأول لعمك وقبل هذا تحذير لها اولا وربنا يوفقك لما فيه الخير لك . ده رأيى انت عليك قراءته فقط اما ان تعمل به فهذا رأيك انت تحياتى لك