"عيادة طب الاطفال للإستشارة

[د.محمود صلاح]

الإخوة الأعزاء أعضاء المنتدى ...
السلام عليكم ورحمة الله وبركاته ..
استكمالاَ لخدمات المنتدى البناءة والمثمرة بين السادة الأعضاء أتشرف - أنا ومن يرغب من الزملاء الأطباء فى المنتدى - بتقديم خدمة استشارات وردود عن استفسارات فى مختلف المجالات الطبية , مستعينا بالله ثم بالمراجع الطبية الموثقة والأبحاث المنشورة فى النت .
كما يشرفنى الرد عن أى استفسار عن ترجمة مصطلحات طبية أو تفاعلات الأدوية وآثارها الطبية و الأدوية ذات المصدر الطبيعى - الأعشاب -
علما بأن هذا لا يغني بتاتا عن زيارة الطبيب المعالج , ما سأقدمه بإذن الله معلومات استرشادية وفى أقرب وقت ,
والله الموفق
د.محمود صلاح حاصل على الزمالة المصرية لطب الأطفال Fellowship of Egyptian Board FEB

[tarekkasaby]

شكرا جزيلا يا دكتور و برجاء التثبيت من الادارة
انا ابنى عنده شهر و نص و شكلى هاهريك يا دكتور بحكم تخصصك استشارات مجانيه
:d:D

[ibrahimsaad]

بارك الله فيك يادكتور محمود

[د.محمود صلاح]

بارك الله فيكم وفى أطفالكم ... ومستعد لتقبل الرسائل والرد على الخاص حفظا على خصوصية المرضى ...

[اسلام المصرى]

جزاك الله خيرا يا د. محمود و بارك فيك.
شكرا جزيلا على هذا العطاء الجميل و كل عام و حضرتك بخير و صحة و سعادة أنت و من تحب :)
ربنا يخليك لينا :)

[mostafabakry]

شكرا جزيلا يا دكتور محمود علي تعاون حضرتك و اسأل الله سبحانه و تعالي ان يجعل ثواب هذا العمل في ميزان حسناتك
و لي استشارة طبية

انا لي بنت مولودة من 45 يوم بالظبط من 11/1 /2007 و بتابع عند دكتور اطفال عندنا في قنا و المشكلة هي ان البنت بتشخفر كتير بالذات بالليل و بالليل بتصحي كتير و الدكتور كتب لها نقط للأنف اسمها اوتريفين عشان تنظيف الأنف و احنا ماشيين بالنقط دي من ساعتها و لكن المشكلة البنت بتقلق بالليل كتير و دايما تنام بعد عصبية و بكاء و دا بالليل فقط مش عارف ان كان دا ماغص ولا هي بتحب تتشال عشان تسكت فعرضتها علي الدكتور اللي بتابع عندة و كتب لها علاج اسمه Dentinox ودا علاج للماغص علي ما اظن و قاللي ان ممكن يكون ودنها (اذنها ) بتتعبها و قاللي اعرضها علي اخصائي انف واذن و حنجرة عشان نتأكد من ودنها و من حكاية الشخفير دي لانه ممكن يكون عندها اللحمية
رحت بيها لأخصائي انف واذن و قاللي ان ودنها كويسة بس الودن اليمين عاوزة تتنظف و فعلا نضفها بجهاز بيشفط وبالماء و بصراحة انا كنت مضايق جدا و قلقان عشان هيلعب في ودن البنت و كنت خايف تحصل حاجة للبنت و اكون السبب و اندم و الدكتور لاحظ القلق دا عليا فقالي ما تخافش ادا شئ عادي و سالته علي موضوع الشخفير دا قاللي دا شئ عادي جدا و كل الأطفال كدا و ما يقلقش طالما لا يؤثر علي رضاعة البنت و كتب لي قطرة للأنف اسمها اوداكس وقطرة للفم اسمها تريامينيك نقط للفم لعلاج البرد قال لي اديها نقطتين بالفم مريتن في اليوم و قال لي ما تديهاش من الأوتريفين تاني و قالي مش كويسة مع اني قلت له ان الكتور فلان اخصائي الأطفال هو اللي كاتبهلها قالي لا ما تديهاش منها
انا بقي اتصلت بالدكتور بتاعها اخصائي الأطفال و قلت له ان الدكتور اخصائي الأنف و الأذن كتب لها علاج كذا و قالي ماتديهاش الأوتريفين
راح الدكتور اخصائي الطفال قال لي لا ما تديهاش ال تريامينيك ابدا لانه وحش و خليك مع الأوتريفين لان دا محلول ملحي و ما يعملش حاجة
بصراحة انا مشيت علي كلام الدكتور اخصائي الأطفال و نفذت كلامه مع اني ملاحظ اني البنت كانت بتنام كويس بالليل لما خدت من التريامينيك وكانت ما تصحاش بالليل الا مرة واحدة في الفجر عشان ترضع و تنام تاني مع انها قبل كدا كانت تصحي بالليل 3-4 مرات ترضع و تنام تاني و كمان حسيت ان الشخفير قل شوية

فايه راي حضرتك في المشكلة دي

اسف جدا علي الإطالة يا دكتور محمود

[meza]

د. محمود
لو ينفع ترد على العام يبقى كويس ... ده طبعاً بعد إذن حضراتكم ... و لو الرد مش هيمس خصوصية المرضى.

أصل أكيد هستفاد من الرد ... :)

[د.محمود صلاح]

البنت ما فيهاش حاجة بإذن الله دى افرازات الجهاز التنفسى العادية ولا تحتاج الا لقطرة أنف المحتوية على أملاح فسييولوجية مثل التى وصفها لك أخصائى الأطفال ( أوتريفين بيبي ) حيث يمكن استخدامها قبل كل رضعة أما التريمينيك ففيه مادة قابضة للشعيرات وبالتالى تفتح مجارى الأنف ولكن لها آثار جانبية غير مرغوبة فممكن يقتصر استعمالها فى الليل وقبل النوم فقط ولمدة لا تزيد عن اسبوع
وبالنسبة للنقط فهى للمغص فعلا حيث أن الأطفال فى هذا السن وحتى الثلاث أشهر الأولى من العمر يعانون من بكاء مستمر وصراخ طوال الليل يفسر - خطأ شائع - بأنه مغص ولكن لم يجد العلماء سببا لهذا البكاء أو تعريفا له وأن هذا البكاء يتحسن بالهدهده والرضاع الجيد والهدوء وعدم ازعاجه وعدم تداوله من يد لأخرى ولا يوجد علاج سحرى له لأن سببه الى حد الآن غير معروف ويختفى على الشهر الرابع .
الطفل من طبيعته فى هذه السن أن ينام فى أى وقت ويستيقظ فى أى وقت ومدة الفترة الواحدة متوسط 4 ساعات ... فمعلش استحملوها شويه وبرمجوا حياتكم عليها ..
أنصح بالرضاعة الطبيعية أول 6 شهور بدون أى مكملات أخرى وبأن يكون الطفل فى زاوية 45 درجة أثناء الرضاعة حتى لايدخل اللبن الى أذنه أثناء البلع وبإخراج الهواء - تكريع - بالربت على ظهر الطفل وسط وآخر الرضعه وحمله قليلا بعد الرضعه فى وضع قائم وتركه لينام جوار أمه على ظهره

[mostafabakry]

شكرا جزيلا لحضرتك يا دكتور محمود و ربنا يبارك لك

انا فعلا توقفت عن اعطائها نقط التريمينيك و هظل ماشي علي الاوتريفين و علاج الماغص زي ما حضرتك قلت لأن كلام حضرتك مطابق لكلام الدكتور اللي بتابع عنده بالبنت

متشكر جدا يا دكتور محمود
جزاك الله خيرا

[hanyfarrag]

شكرا يا دكتور محمود على مجهودك الكبير ده وربنا يجازيك خير بإذن الله
أنا ابنى عمرو 7 شهور دلوقتى وابتدينا نأكلوا من السادس
بطاطس وجزر مسلوقين مهروسين
سيريلاك بالقمح
عصير برتقال - تفاح
زبادى
ده طبعا تبعا لارشادات الطبيب
وما هو رأى حضرتك فى الفول المهروس طبعا بكمية صغيرة جدا حيث انى سمعت أنه غير مطلوب
خصوصا للأولاد قبل العام الأول
وياريت تكتبلنا قائمة بالأكل من 6 شهور الى سنتين . أنا عارف انه مجهود كبير
بس ربنا حيجازيك خير انشاء الله

[د.محمود صلاح]

مشكلة الفول ما يسمى انيميا الفول وهى من أنواع الأنيما التكسيرية وتظهر على الأطفال فى أى سن منذ الولادة وحتى السنين الأولى من العمر وهى شائعة فى الذكور ولكن ممكن تصيب الإناث - نادرا - طبعا لازم يكون فيه تاريخ مرضى فى العائلة لأنه مرض وراثى تحمله الإناث فى شجرة العائلة وتعطيه للذكور . وأعراضه هى صفراء وليدية فى حديثى الولادة أو شحوب الوجه والكفين واغمقاق لون البول الى لون الشاى فى الأكبر سنا وهو مرض ليس بخطير أو مزمن ويختفى تدريجيا عند سن ال12 سنة
بالطبع يجب اعطاء عمرو قول مقشور بكميات قليلة بدون تخوف بإذن الله لأن مرض الفول نسبته قليله والحمدلله .
بالنسبة لمواصفات التغذية السليمة لسن ما بعد 6 أشهر فهى كالتالى :
رضاعة طبيعية كلما أراد + 3 وجبات من الأغذية الغنية المنزلية , مثل شوربة الخضار والخضار المهروس والزبادى وعصائر الفواكه الطبيعية , بالطبع كله مهروس فى الفترة الأولى وابتعد عن البيض خلال السنة الأولى لأنه هناك آراء مختلفة عن فوائده ومضارة كذلك ابتعد عن لبن الحليب - البقرى والجاموسى خلال السنة الأولى من العمر
أ أما لو كانت رضاعة الطفل صناعية فيجب زيادة الوجبات المكملة الى 5 مرات يوميا مما سبق ذكره
وبعد سن السنة بإذن الله يستطيع الطفل أكل طعام البيت العادى 5 مرات يوميا
نتنصح منظمة الصحة العالمية بإعطاء الأطفال جرعة حديد وقائية من سن 6 شهور الى 30 شهر بمعدل ملعقة صغيرة اسبوعيا ( متوفر فى الأسواق باسم سيترون شراب sytron )
ويارب أكون أفدت

[msmm122]

السلام عليكم

السلام عليكم د محمود واعضاء المنتدى الكرام كل عام وانتم بخير وجزاك الله خيرا د محمود على المجهود الرائع ونتمنى منك المزيد من سعة الصدر لاسئلتنا انا عندي بنت عمرها 4 شهور الحمد لله كما وصفت في المشاركة الاولى اعطيها اوتريفين لتنظيف الانف ولكن المغص يوقظ البنت من النوم حتى بعد الشهر الرابع وصف لي اخي- وهو دكتور اطفال- سبازموتال ولكن بعض الاصدقاء قالوا انه له اثار جانبية سيئة فماذا تنصحنا جزاك الله خيرا
والسلام عليكم
محمد
طوكيو

[د.محمود صلاح]

مرحبا بك عضوا جديدا فى المنتدى من أقصى الشرق ومرحبا بأول مشاركة لك باستفسار عن صحة ابنتك شفاها الله وحفظها من كل مكروه
بالنسبة لسبازموتال بتاع المغص هل هو موجود فى اليابان ؟ أنا اللى أعرفه ان دى أدوية مصرية مصنعه خصيصا للآباء القلقين بشدة على صحة أبناؤهم بينما هم فى أفضل حال ....

عموما لا تقلق من مغص الأطفال فهو كما ذكرت لا يعكس ألم لدى الطفال أو مرض انها ظاهرة طبيعية تحدث فى كل الأطفال وتختفى مع الوقت
ولو كنت قلقان جدا من المغص فهناك قطرة مغص مستوردة اسمها دينتينوكس Dentinox تلاقيها عندك فى اليابان فيها مواد تمتز - adsorb - الهواء الزائد من أمعاء الطفل
والسلام عليكم

[msmm122]

السلام عليكم شكرا على الافاده اذا لن استخدم السبازموتال كما وصفه لي اخي وهذا الدواء قادم من مصر حيث انه الاطباء هنا مقلين بشده من اعطاء ادويه للاطفال حديثي الولاده وجزاك الله خيرا
والسلام عليكم
محمد
طوكيو

[hanyfarrag]

شكرا يا دكتور محمود على سرعة ردك وعلى تغطيتك لجميع الأسئلة
بس يتبقى سؤال
حضرتك قولت نبتعد عن اللبن البقرى والجاموسى
طيب بالنسبة للزبادى هل من المفضل أن يكون الزبادى المحفوظ جهينة مثلا
أم الزبادى المصنوع فى البيت وهل من المستحب أن يتم عمله باستخدام لبن جهينة أم لبن عادى
جزاك الله كل خير