"عيادة طب الاطفال للإستشارة

[hossam_elwani]

عايز استشارة بخصوص دواء لتهدئة طفلة

مساء الخير يادكتور محمود

انا عندى بنتى عندها سنة وشهرين وابنى 3 شهور المشكلة ان امهم بتعانى منهم بالليل لانهم بيسهرو وخصوصا بنتى شقية وبتلعب وبتبهدل امها عايز اسأل حضرتك عن دوا يهديا ويخليها تنام بدرى عشان امها تعرف تراعى الطفل التانى

هل فيه دوا آمن للحالة دى ؟؟

مع جزيل الشكر

[د.محمود صلاح]

أدوية مهدئة , صعب جدا حد يوافقك فى اللى بتقوله , معلش الصبر شوية على تربية الأطفال , الموضوع عايز صبر وسعة صدر .

طبعا البنت غيرانه جدا من المولود الجديد , وده أمر طبيعى ويجب على الأم مراعاة ذلك .

بالتعويد والمداومة يتعلم الأطفال ما تريد أن تعلمه لهم

[hossam_elwani]

مش قصدى حاجة تضر يا دكتور ايه رأيك فى ماء غريب وما يشابهه

[lido_pink2000]

شكرا جزيلا يا دكتور محمود علي تعاون حضرتك و اسأل الله سبحانه و تعالي ان يجعل ثواب هذا العمل في ميزان حسناتك
و لي استشارة طبية

انا لي بنت مولودة من 45 يوم بالظبط من 11/1 /2007 و بتابع عند دكتور اطفال عندنا في قنا و المشكلة هي ان البنت بتشخفر كتير بالذات بالليل و بالليل بتصحي كتير و الدكتور كتب لها نقط للأنف اسمها اوتريفين عشان تنظيف الأنف و احنا ماشيين بالنقط دي من ساعتها و لكن المشكلة البنت بتقلق بالليل كتير و دايما تنام بعد عصبية و بكاء و دا بالليل فقط مش عارف ان كان دا ماغص ولا هي بتحب تتشال عشان تسكت فعرضتها علي الدكتور اللي بتابع عندة و كتب لها علاج اسمه dentinox ودا علاج للماغص علي ما اظن و قاللي ان ممكن يكون ودنها (اذنها ) بتتعبها و قاللي اعرضها علي اخصائي انف واذن و حنجرة عشان نتأكد من ودنها و من حكاية الشخفير دي لانه ممكن يكون عندها اللحمية
رحت بيها لأخصائي انف واذن و قاللي ان ودنها كويسة بس الودن اليمين عاوزة تتنظف و فعلا نضفها بجهاز بيشفط وبالماء و بصراحة انا كنت مضايق جدا و قلقان عشان هيلعب في ودن البنت و كنت خايف تحصل حاجة للبنت و اكون السبب و اندم و الدكتور لاحظ القلق دا عليا فقالي ما تخافش ادا شئ عادي و سالته علي موضوع الشخفير دا قاللي دا شئ عادي جدا و كل الأطفال كدا و ما يقلقش طالما لا يؤثر علي رضاعة البنت و كتب لي قطرة للأنف اسمها اوداكس وقطرة للفم اسمها تريامينيك نقط للفم لعلاج البرد قال لي اديها نقطتين بالفم مريتن في اليوم و قال لي ما تديهاش من الأوتريفين تاني و قالي مش كويسة مع اني قلت له ان الكتور فلان اخصائي الأطفال هو اللي كاتبهلها قالي لا ما تديهاش منها
انا بقي اتصلت بالدكتور بتاعها اخصائي الأطفال و قلت له ان الدكتور اخصائي الأنف و الأذن كتب لها علاج كذا و قالي ماتديهاش الأوتريفين
راح الدكتور اخصائي الطفال قال لي لا ما تديهاش ال تريامينيك ابدا لانه وحش و خليك مع الأوتريفين لان دا محلول ملحي و ما يعملش حاجة
بصراحة انا مشيت علي كلام الدكتور اخصائي الأطفال و نفذت كلامه مع اني ملاحظ اني البنت كانت بتنام كويس بالليل لما خدت من التريامينيك وكانت ما تصحاش بالليل الا مرة واحدة في الفجر عشان ترضع و تنام تاني مع انها قبل كدا كانت تصحي بالليل 3-4 مرات ترضع و تنام تاني و كمان حسيت ان الشخفير قل شوية

فايه راي حضرتك في المشكلة دي

اسف جدا علي الإطالة يا دكتور محمود

على فكرة انا ابنى كان بيعانى من مشكلة الانف دى و لكن كل ما يكبر بتتحسن بس كنت بديلة نقط اسمها رينوستوب نقط بالفم كانت بتريحة و بالنسبة للمغص كان الدكتور كاتبلة دوا اسمة اكوابلس كان ممتاز للمغص و ربنا يشفيها بس متكترش من الاوتريفين عشان متتعودش علية

[amro_abuabdo]

انا عضو جديد و اول مرة اشوف الموضوع بتاع حضرتك ده
و طبعا موضوع مفيد جدا و ربنا يكرمك يا دكتور و يجعله في ميزان حسناتك

[د.محمود صلاح]

مش قصدى حاجة تضر يا دكتور ايه رأيك فى ماء غريب وما يشابهه

ممكن ماء الغريب والبيبي كالم كلها ادوية أعشاب من الطب الشعبى قد تفيد ولن تضر ( ولكن غير مذكروة بتاتا فى كتب طب الأطفال )

[د.محمود صلاح]

انا عضو جديد و اول مرة اشوف الموضوع بتاع حضرتك ده
و طبعا موضوع مفيد جدا و ربنا يكرمك يا دكتور و يجعله في ميزان حسناتك

أعلا بيك معانا فى أكبر وأول منتدى سيارات متخصص

كلنا هنا بنبذل أقصى جهد ممكن لخدمة بعض وهتلاحظ ده فى المشاركات

[د.محمود صلاح]

على فكرة انا ابنى كان بيعانى من مشكلة الانف دى و لكن كل ما يكبر بتتحسن بس كنت بديلة نقط اسمها رينوستوب نقط بالفم كانت بتريحة و بالنسبة للمغص كان الدكتور كاتبلة دوا اسمة اكوابلس كان ممتاز للمغص و ربنا يشفيها بس متكترش من الاوتريفين عشان متتعودش علية

لا أنصح برينوستوب لفترة طويلة لإحتوائة على مواد ضارة وذات آثار جانبية خطيرة برغم من ازالته لأعراض الزكام , وأمثاله مثل الفلورست والنوفلو

نقط الأنف الآمنة للأطفال وبأى عدد من المرات هى اوتريفين بيبي المحتوية على محلول ملحى فقط

اما المحتوية على مواد كيميائية مثل اوتريفين أطفال فهى ضارة وتؤدى لإلتهاب كيميائى فى الأغشية المخاطية

[lido_pink2000]

يا دكتور انا ابنى عمرة سنه و 3 شهور عايزة اعرف اية التطعيمات الاضافية اللى ممكن ياخدها و بتبقى فين فى اسكندرية و هل غالية اوى؟

[lido_pink2000]

معلش سؤال تانى هو من المفيد انة ياخد فيتامينات فى السن دة مع العلم انه بيمشى و طلع 8سنان و درسين

[lido_pink2000]

السؤال التالت انا ابنى تقريبا كل شهر يجيله دور سخونية و بيطلع عنده التهاب فى الحنجرة و الاذن الوسطى و بياخد مضاد حيوى و مش عارفة اية الحل و كمان عندة حساسية انف وراثية هل zyrtecمفيد؟

[lido_pink2000]

:b4_611:

[lido_pink2000]

[lido_pink2000]

هو الدكتور مش بيرد عليا ليه؟

[meza]

جايز لإنشغالة شوية ... لكن أؤكدلك أول ما بيشوف الموضوع بيرد على طول ...