"عيادة طب الاطفال للإستشارة

[د.محمود صلاح]

علب الزبادى من المصانع المعتمدة وعليها رقابة أفضل من تلك المصنوعة فى مصانع محلية ... وجبة الزبادى هى وجبة واحدة فقط أما عن ما ذكرته بالأبتعاد عن اللبن البقرى والجاموسى فهما غير مناسبان من حيث التكوين لسن ما قبل السنة ولكن جرت العادة للتحايل على ذلك بتخفيف اللبن البقرى بالماء ليصبح مماثل فى التركيب بلبن الإنسان - آخر توصيات النؤتمرات العلمية فى هذا الشأن :-
Let the cow milk for the cow & let the human milk for the human

[mostafabakry]

دكتور محمود كل ستة وحضرتك طيب
حضرتك ما علقتش عب موضوع نقط سبازموتال هل كويسة ولا لها اثار جانبية
لاني بستخدمها لبنتي عند اللزوم

شكرا جزيلا

[د.محمود صلاح]

السلام عليكم ورحمة الله وبركاته
كل عام وأنتم بخير
بالنسبة لنقط سبازموتال فهى مكونه من مادتين
المادة الأولى عبارة عن مادة ماصة للغازات التى تتكون داخل الأمعاء
والثانية عبارة عن مخدر بنسبة ضئيلة تساعد على تنويم - تخدير أو ارداخ - الأطفال ولها آثار جانبية كثيرة تماثل الآثار الجانبية للمواد المخدرة , ممكن تستخدمها فقط فى الضرورة القصوى
توجد نقط بديلة ليس بها تلك المادة المخدرة مثل baby rest أو ماء غريب , وكما ذكرت سابقا لابد من تكريع الطفل مرات عديدة أثناء وبعد الرضعة لإخراج الريح التى قد تسبب مغصا للأطفال وحدوث قئ
وما تنساش مرهم الزنك zinc olive الذى يدهن فى منطقة الحفاظ لعمل طبقة واقيه بين البول وجلد الطفل لمنع التسلخات

[ramyfawzy]

مشكلة وعايز حل ضروري

السلام عليكم ورحمة الله وبركاته
دكتور محمود
احمد ابني عنده سنتين ونصف ولسه لحد دلوقتي ما بيعرفش يتحكم في نفسه (بيعمل ميه ويغرق نفسه وهوه صاحي) مع اننا من حوالى 6 شهور او اكتر بنعلمه يقعد على البوتي
هل المشكلة دي دلع زي ما ناس كتير بتقول ولا لسه قدامه فترة عقبال ما يتعود
ارجو الرد السريع
ولك جزيل الشكر

رامي (ابو احمد)

[mostafabakry]

شكرا جزيلا يا دكتور محمود علي ردك

بالفعل انا حريص جدا علي استخدام ال Zinc Olive باستمرار و فعلا هو ممتاذ جدا بالنسبة للتسلخات و الحمدلله لم تظهر اي تسلخات بالرغم من اننا في الشتاء و الحمدلله
بس بصراحة اللي مضايقني هو صوت الشخفرة اللي في البنت و خصوصا بالليل و مش عارف ان كان دا بداية لحمية ولا دا شئ عادي زي ما اخصائي الأنف و الأذن قال
شكرا لحضرتك

[د.محمود صلاح]

السلام عليكم ورحمة الله وبركاته
دكتور محمود
احمد ابني عنده سنتين ونصف ولسه لحد دلوقتي ما بيعرفش يتحكم في نفسه (بيعمل ميه ويغرق نفسه وهوه صاحي) مع اننا من حوالى 6 شهور او اكتر بنعلمه يقعد على البوتي
هل المشكلة دي دلع زي ما ناس كتير بتقول ولا لسه قدامه فترة عقبال ما يتعود
ارجو الرد السريع
ولك جزيل الشكر

رامي (ابو احمد)

أستاذ رامى أبو أحمد
كل عام وأنت بخير
موضوع التبول الاارادى ده مش مشكلة لحد سن 5 سنين وممكن يستمر بنسبة بسيطة لحد 12 سنة - 10 % من الأطفال -
ابن حضرتك سنه لسه لا يسمح بالتحكم الكامل فى المثانة حيث أن الجهاز العصبى المتحكم فى عملية الأخراج بيبقى غير مكتمل النمو , لا تحاول معاقبته بتاتا فقط استمر فى عملية التعليم كما ذكرت مقترنا بنظام المكافأة و شويه شويه تلاقى الموضوع اتحسن
بالطبع الحالة النفسيه تتسبب فى التبول الاإرادى وبالذات الغيرة والخوف مثل الإنتقال لمكان آخر الغيرة من مولود جديد ولكن كل هذا نهتم به بعد سن 5 سنوات

[د.محمود صلاح]

بس بصراحة اللي مضايقني هو صوت الشخفرة اللي في البنت و خصوصا بالليل و مش عارف ان كان دا بداية لحمية ولا دا شئ عادي زي ما اخصائي الأنف و الأذن قال

دى أصوات الإفرازات الطبيعية من الجهاز التنفسى العلوى وهى عبارة عن دخول وخروج الهواء خلال تلك الإفرازات , دى مش لحمية ولا حاجة اللحمية ما نعرفهاش الا لما تسمع الصوت بتاعها المميز أثناء الكلام وبتخلى الطفل نايم وهو فاتح فمه وتخليه يستيقظ مذعور من النوم
ممكن لو الموضوع مسبب قلق لكم استعمل نقط نيو ترايمينيك ليلا فقط ولمدة بسيطة حتى لا تتعود عليها وحتى تتجنب آثارها الجانبية

[mostafabakry]

مش عارف اقول لحضرتك ايه يا دكتور محمود
جزاك الله خيرا و جعل ثواب هذا العمل في ميزان حسناتك
لي استفسار اخر و ليس اخير و انا اسف جدا لكثرة اسالتي بس اعذرني لان بصراحة دي اول مولودة لي و انا خايف جدا عليها خصوصا واحنا في زمن كلة تلوث و امراض
الإستفسار هو اني ملاحظ ان البنت ليها دلوقتي 3-4 ايام بترجع اللبن اللي بترضعه حوالي مرة واحدة يوميا ولسه حالا مرجعه اللبن اللي رضعته كلة و رجعت مرتين النهاردة مافيش ساعة ما بين المرتين
مش عارف ايه السبب هل دا طبيعي ولا لا مع ان البنت حرارتها كويسة بس انا ماعندبش ترمومتر بس جسمها كويس و الحمد لله هي النهاردة مزاجها كويس يعني كانت هادية و احسن من ايام سابقة كتير
بس هي مشكلة الترجيع دي اللي ظهرت من يومين تقريبا م مش عارف ايه سببها يا ريت حضرتك تتعب و توضح لي السبب ان امكن

مرة تاني يا دكتور انا اسف جدا للإزعاج و لكن اعذرني انت بالنسبة لي فرصة رائعة لفهم كل ما يخص الأطفال حديثي الولادة و انا بعرف حاجت كتير من حضرتك مش بعرفها من الدكتور اللي بتابع عنده ة وربنا يعلم ان انا بثق في كلام حضرتك جدا و بنفذ كل اللي حضرتك تقوله

ربنا يباركلك يا دكتور محمود

[ramyfawzy]

دكتور محمود
الف شكر ليك يا فندم وارجو دوام التوفيق لسعادتك

رامي (ابو احمد)

[د.محمود صلاح]

المهندس مصطفى بكرى :-
لا شكر على واجب ولا تتردد فى ارسال استفساراتك , ويارب يسلم أطفالنا من الأمراض
موضوع الترجيع لدى الأطفال متداخل بين كونه ترجيع طبيعى أو ترجيع مرضى والفرق بينهم شعرة بسيطه يصعب تحديدها
يسمى الترجيع الطبيعى ( بالقشط ) وهو عبارة عن أن عضلات فم المعدة غير مكتملة النمو فلا تحتفظ باللبن فيرجع عبر المرئ للخارج ولا يتدخل بتاتا فى زيادة وزن الطفل الطبيعى
وهذا تجنبه سهل وذلك بتحسين وضع الطفل أثناء الإرضاع ( جسده مستقيم ومواجه لجسد الأم وملاصق لها ومسنود بأكمله من التكتف والمؤخرة ) وبملاحظة فم الطفل أثناء الرضاعة ( بأن يكون مفتوح بإتساع وشفته السفلى مقلوبه للخارج ويلتقم أكبر جزء من الهالة ) و بتكريع الطفل مرارا أثناء وبعد الرضعة وحمل الطفل قائما لمدة بسيطة بعد الرضعه , وتنويمه على مخدة أطفال عالية قليلا
أما القئ المرضى الزائد عن حده والذى يؤثر على زيادة وزن الطفل والمسمى ب GERD disease والذى يشخص فى المراكز الطبية المحترمة برسم خريطة ال PH للمرئ - لا توجد فى مصر على حد علمى - فعلاجه متدرج حسب شدة المرض فيبدأ العلاج بتحسين وضع الطفل كما سبق بالإضافة للألبان الخاصة بالترجيع - ألبان سميكة القوام - ثم بالأدزية المنظمة لحركة الجهاز الهضمى ثم بأدوية منع حموضة المعدة ثم فى النهاية بعمليه جراحية لربط فم المعده , وهذا المرض يختفى تدريجيا مع بدء جلوس الطفل قاعدا .
مما سبق نجد أن حالة ابنتك هى من القئ الطبيعى والذى يتحسن بتحسين وضع الطفل وتصحيح تعلقه بالثدى لمنع دخول الهواء أثناء الرضعه
توجد نقط شهيرة بالصيدليات تتمنع القئ اسم مادتها العلمية ميتوكلوبرومايد ( برمبران ) ولها أثر جانبى خطير وهو حدوث تشنجات للطفل عشان لو اتوصفت لك تكون حريص فى استخدامها

[mostafabakry]

جزاك الله خيرا يا دكتورنا العظيم محمود علي هذا التبسيط الرائع و المفيد

ربنا يبارك فيك و يكرمك

شكرا

[msmm122]

توضيح بشأن التطعيمات

السلام عليكم د محمود
بارك الله فيك وفي مجهودك ولا تزعل من كثرة اسالتنا المتكررة ولكني في حيرة من أمري بشأن التطعيمات ابنتي الان في الشهر الرابع وقد اخذت تطعيم البي سي جي وهي في الشهر الاول وقد ذهبنا اليوم للكشف الدوري عليها فطلبت منا الدكتورة سرعة اخذ تطعيم الدي بي تي فما راي سيادتكم وهل هناك مضار من تأخير تطعيم الدي بي تي؟ نرجو الافاده
جزاكم الله خيرا
والسلام عليكم ورحمة الله وبركاته
محمد حرحش

[د.محمود صلاح]

المهندس محمد حرحش : التطعيمات الإجبارية تختلف من بلد لأخرى وعندنا فى مصر هنا الدى بى تى ( الثلاثى ) يؤخذ من الشهر الثانى والرابع والسادس ومنشطة على 18 شهر .
يجب الإسراع فى اعطاء الطفل التطعيمات حسب الجدول حتى تسرع فى بناء مناعة الطفل وحتى لا يتعرض لهذه الأمراض لا قدر الله , وأيضا تطعيم شلل الأطفال ( البوليو ) يؤخذ مع الثلاثى فى الثانى والرابع والسادس والتاسع ومنشطة
ال Dpt قد يؤدى لإرتفاع حرارة الطفله فلا تقلق اعطيها باراسيتامول لخفض الحرارة
والسلام عليكم ورحمة الله وبركاته

[د.محمود صلاح]

الأخوة الأفاضل أعضاء المنتدى الذين يراسلوننى على الخاص أرجو أن أكون قد لا تأخرت عليكم فى الردود وأتمنى لكم ولأبنائكم وافر الصحة والسعادة
:)

[msmm122]

السلام عليكم ورحمة الله وبركاته
اود ان استفسر عن سؤال
ابنتي الان اكملت الشهر الرابع ولكنها تفتح فمها وتصدر صوت انين مستمر ومتكرر (عادة نسميه في مصر الزن) لا ادري هل هذا بسبب الاسنان ام الجوع ام تريد ان تاكل طعام مع اللبن ام ماذا افيدونا افادكم الله ايضا اريد ان اعرف متى يجب علينا ان نعود البنت على الجلوس
وجزاكم الله خيرا ولا تبخل علينا بالردود ان شاء الله بعد السفر
وفقكم الله
والسلام عليكم
محمد حرحش