تجارب الاعضاء مع شركات التأمين ؟ ( هام للغاية )

[Megane]

شكرا مقدما .... و حضرتك ارفعلنا صوره البنود لما تكون فاضى . مش عاوزين نعطلك:)

السلام عليكم
دى scan لبند تحمل 15% و 20 %


دى scan لبند دفع قيمة الأقساط بالكامل

[fiatmomo]

الف الف الفففففففففففففففففف مليون شكر لحضرتك .......

انا مستغرب على الجزئية بتاعت حق كونتاكت فى الغاء اى عضوية ... وعدم التجديد للعضو بدون ابداء اسباب !!!!

و الجزئية بتاعت ان العميل يدفع 200 جنية فى السنة الثانية و300 فى السنه الثاله !!!!!!!!!!!!!!!!!!!!
متهيألى ان كونتاكت ... كشركة تأمين مش مثاليه زى ماكنا متصورين

مره تانية شكرا لاهتمام حضرتك

[Ramy_Tantawi]

حكايتي مع التأمين

انا حكايتي مع التأمين حكايه غريبه جداً ولغاية دلوقتي مش فاهم ايه اللي بيحصل .....ما علينا هاحكي وانت احكموا.

عربيتي موديل 2007 استلمتها من سنه وعملت عليها تأمين شامل عند شركة كونتاكت التأمين كان وقتها 3.7 % من قيمة السياره تقريباً المهم فضل ربنا ساترها معايا الحمد لله حوالي 7-8 شهور كده ونزلت في يوم لقيت العربيه مخبوطه من ورا ومتدشدشه وحالتها صعبه المهم كلمت خدمة عملاء كونتاكت الحقيقه قمة في الأدب والمعامله الحسنه وده ما يختلفش عليه حد وبالفعل الموظف قاللي سلم العربيه التوكيل وروح بالسلامه ومالكش دعوه بأي حاجه المهم ده اللي حصل بالفعل وبمتابعه مني بسيطه جداً فهمت انهم بعتوا مهندس معاينه قبل الاصلاح صور العربيه واعطى امر الاصلاح للتوكيل وتم اصلاح العربيه الحمد لله وكله تمام والتوكيل بعد حوالي اسبوع من تسليم العربيه كلمني وقالي اتفضل استلم العربيه رحت وكان كله تمام والله ويشهد ليهم بكده انهم محترمين ومدفعتش حاجه ولا حد كلمني .........مر شهرين تلاته وجه ميعاد التجديد المهم في يوم الصبح لقيت واحد بيكلمني من كونتاكت قلتله ايوه شكراً على اهتمامكم وانا هاجيلكم أجدد بكره او بعده لقيته بيقوللي ( احنا اسفين جداً يا فندم بس التجديد اترفض ) فا انا الأول مافهمتش وقلتله تاني من فضلك عاد الجمله زي ما قالها الأول فانا ركبني عفاريت الدنيا كلها وقلتله طيب شكراً وأخدت بعضي تاني يوم الصبح ورحت افهم .....الحقيقه كانت الصدمه لما رحت واتكلمت مع المدير لقيته بيقوللي اصل احنا مش شركة تأمين فانا بسخريه قلتله امال شركة تجاره أدويه مثلاً أمال عاملين خدمات تأمينيه ليه وإزاي ؟ قاللي والله احنا مش شركة تأمين احنا شركة تجارة سيارات والتأمين بتاعنا ده تأمين عند المجموعه العربيه المصريه للتأمين حاجه كده وبالتالي هم اللي يقبلوا ويرفضوا التأمين................نهاية الموضوع انهم حرقوا دمي وتعبولي أعصابي ........صحيح يمكن ماتكونش خسارتي في مبلغ التأمين لئن بحسبه بسيطه اللي دفعته تأمين اترد اكتر منه في اصلاح السياره بس الخساره اللي حسيت بيها هي أد ايه في نصب ولعب كتير في المواضيع دي يعني سبحان الله المفروض شركات التأمين دي منتظره اللي يأمن عندها مايعملش حوادث ابداً ولا ايه مش فاهم ولا منتظرين الحوادث بس تكون خدوش وبس :) مش عارف والله أقول ايه كمان اللي جه في دماغي ومازال يطارد أحلامي الورديه اني لو فضلت سنه اتنين تلاته بادفع اقساط التأمين وفجأه أصحى الصبح ألاقيهم بيقولوا مش هانجدد !!!!

أنا آسف للإطاله لكن انا حابب بس الفائده تعم وحبيت اطرح حكايه حصلة معايا ..........وربنا معانا ومعاكم.

[OldVic]

Hi,

Did the car have one or two airbags? how much did the airbag(s) cost?

[Megane]

Hi,

Did the car have one or two airbags? how much did the airbag(s) cost?

إية دخل دة بالموضوع

[MrRami]

واتكلمت مع المدير لقيته بيقوللي اصل احنا مش شركة تأمين فانا بسخريه قلتله امال شركة تجاره أدويه مثلاً أمال عاملين خدمات تأمينيه ليه وإزاي ؟ قاللي والله احنا مش شركة تأمين احنا شركة تجارة سيارات والتأمين بتاعنا ده تأمين عند المجموعه العربيه المصريه للتأمين حاجه كده وبالتالي هم اللي يقبلوا ويرفضوا التأمين................نهاية الموضوع انهم حرقوا دمي وتعبولي أعصابي




يعني كونتكت متلطعتش كونتكت .... طلعت المجموعه العربيه المصريه للتأمين ....إية عملين معهم شغل من الباطن ومضاعفين فيمة نسبة التأمين علشان الونش و العربية البيدهالى

[fiatmomo]

يعني كونتكت متلطعتش كونتكت .... طلعت المجموعه العربيه المصريه للتأمين ....إية عملين معهم شغل من الباطن ومضاعفين فيمة نسبة التأمين علشان الونش و العربية البيدهالى

بالظبط كدة ...

[aif]

واحد قريبي عمل تأمين في الجمعية المصرية للتأمين التعاوني لأنه يعرف ناس هناك
القسط 1.5 % ( بدل 1.6 % خدمة عشان المعرفة )المهم هو جايب عربية اوبل والمسكين حصلتله حادثة بعد الاستلام والتأمين بيومين والحمد لله انه كان لحق يأمن
بصراحة الناس عملوله معاينه وادوله جواب للتوكيل وغيروله الرفرف اللي كان اتخبط بدون مشاكل وكل اللي خدوه منه 20 جنيه ( كان المفروض 35 لكن معرفة بقي )
الخلاصة ان افضل مكان تأمن فية اللي لك فية معرفة .. والتجربة دي خير دليل

[Ghamrawy]

بالظبط كدة ...

لا هما مش مضاعفين النسبة و لا حاجة لان المجموعة العربية المصرية للتامين بتشتغل فى العادى ب 3.75% من قيمة العربية و ده من غير اى تحمل
ممكن تسألنى طيب ايه المكسب ؟؟؟
شركة التامين كسبانة القسط اللى انت بتدفعه
كونتكت كسبانة العمولة اللى بتاخدها من شركة التامين او جزء من عمولة المنتج التامينى

[Ramy_Tantawi]

صحيح فكرة التأمين عند كونتاكت زي ما الإخوه شرحوا هو تأمين ممكن نسميه تأمين لدى الغير أو تأمين من الباطن وبالفعل هيئة الرقابه على التأمين كونتاكت عندها مش شركة تأمين هي بالفعل شركة تجارة سيارات........برضه ده في نظري لا يعيب الشركه كونها هي نفسها طرف أول معايا في عقد التأمين أو طرف وسيط بيني وبين شركة التأمين وعلى حد علمي في شركات تأمين كتير في مصر بتكون زي كونتاكت كده بالظبط لكن المشكله هي الرفض المفاجئ بدون الرجوع للعميل والمشكله ان ده بند صريح عندهم في العقد كمان كنت قرأت أكتر من بوليصة تأمين زي شركة أليانز مصر مثلا برضه فيها البند ده وكمان بيتعمدوا يعملوا البوليصه سنويه تتجدد كل سنه وده طبعاً بعد اللي حصل معايا فهمت انه عشان وقت ما يحبش يجدد يقول مش هاجدد وخلاص..........طيب وبعدين انا برضه مش فاهم المفروض شركة التأمين دي بتقدم خدمه تأمينيه او تغطيه تأمينيه هل من المعقول العميل يصحى تاني يوم الصبح يلاقي الخدمه دي راحت كده وخلاص ! ببساطه شديده ده اللي خلاني آخد موقف من شركات التأمين واحس ان فيه حاجه مش مظبوطه .............................يعني ده رأيي طبعاً الشخصي.

[shady_elkady]

ياجماعة من الاخر موضوع التامين دة معرفة اى شركة هتامن فيها هتاخد حقك كامل لو تعرف حد انا مامن مصر للتامين 2% علشان اعرف حد هناك و على فكرة الشرق للتامين مبقتش موجودة لانها اضمت لمصر خلاص و الراجل الى انا اعرفة كان فى الشرق بس لما عملى الوثيقة طلعت مصر لان مبقاش فى حاجة اسمها الشرق خلاص و دة خطوة لخصخصة مصر بعض ادماج الشرق ليها من الاخر هتامن فى مكان امن مع حد تعرفة متعرفش خليك فى الشركات الى نسبتها اعلى لانك هتاخد حقك من غير معرفة انا الراجل الى اعرفة اى حاجة تحصلى بكلمة و هوا بيعمل كل حاجة

[qwertyqwerty]

يا ريت يا جماعة لما حد يكتب معلومة يكتب اسم شركة التأمين اولا
عشان الواحد محتار

[qwertyqwerty]

و يجب ان نستبعد اى شركة ياخذ العاملون بها اكراميات ورشوى

[tot]

بس اللي فهمته من حكاية ان كونتاكت بتاخد 15 % من تاني مطالبة و 25 % من تالت مرة ، الكلام ده مكتوب لعملاء التمويل ، متهيالي يقصدوا بيها اللي شاري العربية بالقسط من كوتاكت

[m_marmoush]

هي تكلفه تغيير الأير باج و التابلوه و الدركسيون فى حاله الحوادث كام؟؟

عشان أنا عرفت أن شركات التأمين مش بتتحمل كل التكلفه فى حاله التغيير

ياريت اللى عنده معلومة بخصوص الموضوع ده يفدنا و كام نسبه تحمل شركات التأمين لتكلفة الأيرباج و التابلوه فى حاله الحوادث لاقدر الله :(