نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

**husseinoo** · 05-06-2010 02:35 PM

بسم الله الرحمن الرحيم
اللهم صل على محمد وعلى آله وصحبه أجمعين

المراجعة النهائية .. فى القيادة الدفاعية

- افسح الطريق للسائق المتهور او الجرىء .... يعنى مثلا لو شايف سائق ميكروباص على سبيل المثال جاى وراك ... حاول توسع له فى اقرب فرصة من غير ما تعرض نفسك للخطر

- القيادة الدفاعية ... لا تفترض ان الآخرين هايحترموا قواعد المرور ... يعنى لازم تتعامل مع الآخرين بحذر على طول الخط وتوقع منهم اخطاء وعليك انت اكتشافها.

- لا تتحدى الآخرين .... يعنى لو كنت انت ماشى صح والطريق بتاعك .. وظهر لك سيارة اخرى بتتحداك ... وعايزة تعدى منك ... مافيش مشاكل اتركه يعدى منك ... ومافيش داعى بالبلدى كده زى ما بيقولوا "تسخن" والعملية تكبر فى دماغك ههههههههه وتصمم انك تجرى بجواره او انك تمنعه انه يعدى منك.

- وانت بتنظر فى المرايه خصوصا المرايه الوسطى ... لو شاهدت سيارة ماشية وراك ... بالبلدى كده بيقولوا عليه "لازق وراك" ... غير الحارة بتاعتك عشان تتركه يعدى منك ... مافيش اى مشاكل

- خليك مصحصح ... وخد بالك من اى سائق سيارة بيعمل حاجة داخل عربيته ... مثلا ممكن تلاقى سيدة هههههههه بتحط "مكياج" ... او سائق بيكلم اللى بجواره ... او سائق بيكلم فى الموبايل ... او سائق بيكتب حاجة .. او يقرأ ورقة .. ههههههههه أو بياكل سندوتش ....... او اى سائق عموما موش مركز فى الطريق.

- لو ظهرت عربية عايزة تدخل امامك مافيش مشاكل ... هدى نفسك شوية واتركه يدخل امامك ... مافيش داعى تقفل عليه ... وتعند معاه

- اوعى تنظر فى عين سائق آخر ....... هههههههههه يعنى مثلا لو قابلك فى الطريق سائق متهور او جرىء ... مثل سائق الميكروباص ... وعمل فى الطريق اى حركة موش عجباك ... اوعى تنظر فى عينيه ... على طول هايسخن اكثر .. ويمكن يقرفك فى الطريق ... ويعمل لك مشاكل ... واحيانا يقل ادبه ... بكلام مالوش لازمة ... فأرجوك لو قابلك اى سائق حتى ولو كانت عربية ملاكى وعملت معاك اى حركة اوعى تبص فى عينيه ... تجاهله تماما ... احد اصدقائى قال لى: انا اضحك ابتسامة خفيفة ... واشاور له بإيديه اتفضل ... ويمكن اعتذر له بلطف ... واترك الامور تسير بهدوء وده عين العقل موش عيب.

فى إنتظار التواصل

تابـــــــع

مع اطيب التمنيات
اخوكم حسين غزالة

**husseinoo** · 06-06-2010 04:52 PM

بسم الله الرحمن الرحيم
اللهم صل على محمد وعلى آله وصحبه أجمعين

شكرا يا ماجد على مجهودك بخصوص التثبيت
شكرا للاستاذة لبنى .. طبعا
شكرا للدكتور صلاح
وشكرا لكل الاصدقاء .. على مساعدتهم المخلصة لتثبيت الموضوع

وطبعا شكرا للإارة المحترمة على إستجابتها لرغبة الإعضاء

بصراحة الموضوع محرج جدا ... أنا بالنسبة لى متعود على ان اى مشاركة فى اى موضوع فى اى منتدى بتكون لوجه الله تعالى ... وعملية التثبيت دى اتركها حسب رغبة ورؤية الإدارة والمسئولين عن الموقع

طبعا عشان الموضوع يفضل فى الصدارة ... كان الواحد بيضطر أنه يضيف دائما كل جديد ... وده كان بيخوفنى انى اكون بصيف موضوع سخيف او اى حاجة لا تشد الأصدقاء ....

على العموم شكرا مرة تانية ... لجميع الأصدقاء فى هذا المنتدى الرائع

مع اطيب التمنيات
اخوكم حسين غزالة

**husseinoo** · 06-06-2010 05:31 PM

اللهم صل على محمد وعلى آله وصحبه أجمعين

المراجعة النهائية ... فى القيادة الدفاعية

- استخدم الكلاكس بإعتدال .... فيه ناس كثيير بتعتبر ان الكلاكش "شتيمة" ههههههههههه خصوصا لو كان زيادة عن اللزوم ... يعنى استخدم الكلاكس عند اللزوم فقط لا غير .. موش عمال على بطال ... واحنا للاسف عندنا متخصصين لعمل "الحان" بدل الشتيمة عن طريق الكلاكس والحدق يفهم ... خلينا احنا ناس مؤدبين ومالناش دعوه بالناس الوحشين.

- ممنوع تعمل "بلوك" فى الحارة السريعة ... يعنى لو كنت انت ماشى بطىء .. ابعد عن الحارة اليسرى السريعة وخليك احسن فى الحارة اليمين او الوسطى حسب سرعتك.

- ممنوع تغير حارتك بدون اى اشارات ... يعنى فيه ناس كثير قوى فاكرة ان لما تغير الحارة موش مشكلة انك لا تستخدم الإشارة .... لأ كده غلط ... الصح انك لو فكرت تغير حارتك استخدم الإشارات ...

- لو انت هاتقف فى الإشارة ... مافيش داعى تقف فى الحارة اليمين ... لأن فيه عربيات بتكون داخلة يمين اساسا وموش هاتتوقف فى الإشارة. .... عشان كده ابعد عن الحارة اليمين.

- اوعى "تلزق" للعربية اللى امامك ... فيه ناس عايزة فاكرة انه لما "يلزق" ورا العربية اللى امامه ... بالطريقة دى هايكون سواق مية مية ... لأ طبعا الكلام ده غلط جدا جدا ... لازم تترك مسافة بينك وبين السائق اللى امامك حسب السرعة.

- لا تشتت انتبهاك بالموبايل

- لا تستمع الى الكاسيت بصوت عال ومزعج

- خد وقتك اثناء السفر ... او اى مشوار انت هاترخج فيه بالعربية ... حاول تخرج بدرى شوية .. عشان تمشى براحتك وبدون استعجال

- قيادة السيارة .. هى وسيلة للنقل وليست وسيلة للتحدى .. إذا كنت عايز تجرى وتعمل حركات روح اشترك فى اى سباق من السباقات بس بعيد عننا.

- خليك مؤدب ... حتى ولو كان السائق الآخر غير مؤدب ... ومافيش داعى تفتكر ان السائق الآخر يتحداك ... ممكن يكون السائق الآخر عنده ظروف ومستعجل شوية وانت موش مقصود بأى حركة هو عملها ... يعنى موش بيغلس عليك انت بالذات .. كل الحكاية هو عنده ظروف ومستعجل شوية.

- موش شغلك انك عايز تعلم الآخرين السواقة ...... ههههههههههه يعنى مثلا ... ممكن تفكر تعمل "بلوك" يعنى تمنع السيارة اللى وراك من المرورعشان العربية اللى وراك تهدى سرعتها شوية ... انت كده بتدخل نفسك فى مشاكل مع العربيات الأخرى ... اترك قواعد المرور لضباط المرور ... وخليك فى حالك احسن لك.

- وفر وقتك ... اذا كنت هاتروح شغلك فى 25 دقيقة ... ليه تنزل قبل الشغل بـ 15 دقيقة ... انزل بدرى شوية .. ولو كنت بتزهق بسرعة من موضوع السواقة شغل شوية موسيقى خفيفة فى العربية او شوية قرآن عشان تهدى والوقت يعدى.

مع اطيب التمنيات
اخوكم حسين غزالة

**sara2001** · 06-06-2010 10:04 PM

الف مبروك يا استاذ حسين على التثبيت وشكرا للإداره لإستجابتها لنا
الموضوع يستحق التثبيت من زمان وحضرتك مش عارف كلنا بجد استفدنا منه
افي الأول دخلت دورت عليه تحت في القسم التعليمي وبعد كده اكتشفت انه اتثبت
انا لسه والله ما خلصتش الموضوع كله زي ما قلت لحضرتك (بذاكره) على مراحل مع التدريب وبرجع اشوف كل جزء انا محتاجاه معلشي بطيئه شويه
الف شكر لك وجزاك الله كل خير عنا

**husseinoo** · 07-06-2010 12:06 PM

بسم الله الرحمن الرحيم اللهم صل على محمد وعلى آله وصحبه أجمعين

انا سعيد جدا بمعرفتكم ... بصراحة انتم مجموعة مهذبة وفى منتهى الجمال .... اشكركم جدا على مشاعركم النبيلة
واتمنى اننا نفضل متواصلين حتى ولو اتعلمنا السواقة كويس هههههههههههه
شكرا لحضراتكم جدا

وداعا للغضب ... ومرحبا بالأذكياء

- تعلم الصبر ... لازم تصبر شوية وماتحاولش تستعجل الأمور ... لو صبرت شوية هاتقدر تفكر كويس ... وتتصرف كويس فى المواقف اللى هاتقابلك

- حاول تسوق عربيتك بذكاء ... وضع ابتسامة جميلة داخلك ... عشان اعصابك تهدى وتعرف تفكر صح

- اسأل نفسك سؤال ؟ ... هل صح انى افضل "لازق" للعربية التى امامى ؟ ... ما هو شعورك والعربية التى خلفك "لازقة" وراء عربيتك ؟

- لو كان اللى ورايا ماشى بسرعة جامدة ... وموش عجبانى طريقة قيادته ... هل صح انى اضرب له فرامل عشان "اخوفه شوية" ويهدى سرعته ههههههههههه طبعا الموقف ده بيحصل كثيير خصوصا بين الشباب .. وممكن يعرضنا للخطر

- هل اتحشرت فى زحمة المواصلات ؟ ... هههههههه وموش قادر تتحرك من مكانك ... وحاسس بالقلق لأنك موش قادر تخرج من الازدحام ده ... فى الحالة دى حاول تغير مزاجك شوية .... مثلا: "دندن" شوية مع اى اغنية هههههههه .... استمع الى شوية موسيقى هادئة ... شغل الراديو واستمع الى اى برنامج اذاعى ... شغل شوية قرأن ... او درس دينى ... ولو كنت مسافر على طريق سريع حاول تستمتع بالمناظر الجميلة التى تقابلك خصوصا وقت الغروب مثلا.

فى انتظار التواصل

تابــــع

مع اطيب التمنيات
اخوكم حسين غزالة

-

-

الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

LinkBack

أدوات الموضوع

عرض

-

-

-

-

المواضيع المتشابهه

الى احلى اعضاء تعالو نقعد مع بعض شوية ....(موضوع جديد)..

يوميات سائق جديد ؟!

ارجو النصيحة لوجه الله انا لسه متعلم السواقة جديد اشترى مستعمل ولا جديد؟

استفسار من سائق جديد فى الغيارات

جديد في السواقة؟ اجيب جديد ولا مستعمل

الكلمات الدلالية لهذا الموضوع

المفضلات

المفضلات

ضوابط المشاركة