الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

بسم الله الرحمن الرحيم
اللهم صل على محمد وعلى آله وصحبه أجمعين

كيف تواجه المشاعر السيئة

1- الخوف من زحمة المواصلات ...
الأعراض: تفضل تقول لنفسك "احنا لو فضلنا ماشيين بالشكل ده موش هاوصل ابدا فى ميعادى" .... هههههههههه .... انا حاسس انى موش بتحرك من مكانى ... دلوقتى انا "لازق" للعربية البطيئة دى كمان .... الخ
العلاج: انزل مشوارك بدرى شوية ... اشغل نفسك مع شوية موسيقى .. او الاستماع الى الراديو ... استمتع بالمناظر المحيطة ... اتمرن على طريقة صحيحة للتنفس .... فيه تمارين للتنفس خصوصا للناس اللى تمارس "اليوجا" التمارين دى يا جماعة ممتازة جدا ... بتخليك متحكم فى نفسك وتجعلك اهدأ فى تصرفاتك ... هى طريقة بسيطة بس انا كل اللى فاكره هو انك بتاخد نفس عميق وتحتفظ به داخل صدرك مدة طويلة ... ثم تخرج النفس ده بالكامل ... والموضوع ده له زمن ... يعنى الاحتفاظ بالهواء له مدة معينة ... وبعد كده بتخرج الهواء من داخل صدرك له مدة معينة ... يعنى الخلاصة بتخضع عملية التنفس اللا إرادية ... إلى تنفس إرادى .. افتكرت حاجة ... مرة وانا فى الجيش كان عندنا تدريب قوى .. وهانجرى مسافة كبيرة جدا ... النتيجة كنت آخر واحد فى الكتيبة ههههههههههههه وصلت ونفسى مقطوع ... تانى مرة افتكرت موضوع التنفس اليوجى ده .. وطبقته وانا بجرى ... وسبحان الله كنت من اوائل الناس ههههههههههههه.



2- حاسس انى عايز اضرب حد ... ههههههههههههه
الأعراض: انا ما بحبش الناس اللى بتعمل حركات ... موش انا اللى يتعمل معايا كده ... تفتكر انى هاسيبك يعنى والله هاوريك ههههههه
العلاج: قلد بعض اصوات الحيوانات المضحكة ههههههههه ... فكر فى اعذار للسائق الآخر ... فكر فى اسرتك فكر فى والدك او اخواتك اللى ممكن يعملوا نفس الشىء وهما بيقودوا سيارتهم ... تذكر ان السائق الآخر موش "شيخ" معصوم من الخطأ.



3- الاحساس بالمنافسة الجامدة جدا
الاعراض: الله يخرب بيت الواد ده ... ازاى ينور نوره فى "وشى" .. طيب ما انا اقدر انا كمان انور النور واعميه ... ازاى العربيات دى ماشية بسرعة فى الحارة دى واسرع مننا.
العلاج: خليك كبير وقول لنفسك كفاية شغل العيال ده .. احنا موش فى المدرسة ... وانى لازم اكسب على طول ... مافيش مشاكل لو انا مشيت متأخر شوية عن باقى العربيات ... المهم انى اكون انسان مهذب وعاقل ومتحضر موش متخلف عمال اخبط فى اللى حواليه.



4- نفسى اعلمه حاجة
الاعراض: تقول لنفسك "شوف الواد ده دخل ازاى ونسى يستخدم حتى الإشارة" ... هو عمال يعمل حركات عمال على بطال ... مرة يجرى بسرعة زى المجنون ومرة يقف جامد بدون داعى ... موش عارف ازاى هاينتبه للطريق وهو عمال يكلم فى المحمول
العلاج: قول لنفسك "البنى آدمين هما اللى بيعملوا اخطاء" ...... افتكر شوية الاخطاء اللى انت كنت بتعملها ... تذكر ان الصبر فضيلة ... حاول تبعد عن العربية اللى عاملة مشاكل دى او حتى تعدى منها لو فيه فرصة.



5- بحب المخاطرة
الاعراض: نفسى اجرى لكن انا حريص شوية ... انا ممكن اعمل الحركة دى لو كنت سريع شوية ... انا لو شديت شوية ممكن اوريك مقامك هههههههه
العلاج: افتكر الناس اللى بتحبهم ولو حد عمل معاهم الحركات دى ممكن يحصل لهم ايه ... لازم تقول لنفسك انك لازم تكون انسان ناضج وحكيم ومهذب




مع اطيب التمنيات
اخوكم حسين غزالة

المشاركة الأصلية كتبت بواسطة abeeron

السلام عليكم

وعليكم السلام ورحمة الله وبركاته

الف شكر لك يا استاذ حسين ربنا يجازيك كل خير... حضرتك تغطي كل شيء تقريبا... والله ما قصرت..على راي الاخوة السعوديين اللي كنت عندهم

ههههههههههه .. لا شكر على واجب المهم ان حضرتك تكونى بخير وبسلامة

انا كنت انقطعت لفترة لظروف السفر لكن افتقدت المنتدى وخصوصا هذا الموضوع ونصائح حضرتك المميزة جدا
وطبعا كنت نسيت السواقة شوية لاني سقت 3 اسابيع ثم سافرت مثلهم وعدت من اسبوع سقت 3 ايام اعتقد عملت فيهم غلطات ال3 اسابيع اللي قبلهم!!!

هو فعلا الممارسة مطلوبة ومهمة ... انا حتى الآن ما زلت انزل يوم الجمعة بانتظام ... والحمد لله احسن بكثيير من الأول ... ومرة خرجت نزلت مصر الجديدة عشان اقدم لابنتى فى الحضانة واجهز شوية اوراق ... الموضوع تقريبا اصبح عادى الى حد ما ... بنزل بالعربية عند اللزوم .. واللممارسة مع الوقت يعنى موش لازم كل يوم ولا حاجة ... المهم الاستمرارية والانتظام ... طبعا ممكن مسافة 3 اسابيع انقطاع تؤثر فى ثقتك فى نفسك شوية ... معلهش ... المهم حمد لله على سلامة حضرتك .. وكل شىء هايكون تمام مع الوقت إن شاء الله

ومنها اني بامشي في حارة اليوترن قبلها بمسافة كبييييرة باعدي فيها على 3 مثلا قبل ما اوصل لليوتيرن اللي عايزة ادخله

طيب يعنى انت اصلا ماشية كويس جدا وصح تمام التمام كل الحكاية انك نسيتى مكان اليوتيرن ... معلهش ... لكن الأًساس انى ابعد عن الحارة اللى فيها اليوتيرن ... من يومين كنت راكب ميكروباص ... وسائق الميكروباس كان بيقول لى امشى عادى فى اليوتيرن وقبل ما توصل لليوتيرن بشوية ارجع امشى مرة تانى فى الحارة الوسطى مادام انت موش داخل اليوتيرن
قلت له: طيب وليه العذاب ده من اساسه خصوصا انى مبتدأ ... ما الصح انى امشى فى الحارة الوسطى لا يمين ولا شمال ... واللى عايز يعدى من يمينى يعدى واللى محتاج يقف فى الشمال مافيش اى مشاكل انا ماشى بانتظام فى الحارة الوسطى وزى الفل ... ولو كنت عايز ادخل اليوتيرن ... يبقى قبله بمسافة كافيه انقل نفسى للحارة اللى فيها اليوتيرن ... وطبعا نصيحة: بلاش تستخدم الفرامل إلا لما تمشى فى الحارة اللى فيها اليوتيرن ... وقبل اليوتيرن تبدأ تهدى بالتدريج
يعنى بلاش تضغط الفرامل وانت فى الحارة الوسطى .. كده هاتعمل مشاكل ... بعد ما تنقل نفسك للحارة اللى فيها اليوتيرن ... ابدا فى استخدام الفرامل بالتدريج

وكل دا عشان ما اضطرش اغير حارتي لان الشارع سريع وانا باترعب...

يا ست الكل ما تخافيش من اى حاجة
ما دام حضرتك ماشية فى الحارة الوسطى ... مافيش اى مشاكل
ما دام حضرتك ماشية فى خط مستقيم ... يعنى العربية موش بتحدف يمين او شمال ... مافيش اى مشاكل
ما دام حضرتك محافظة على المسافة بينك وبين السيارة التى امامك ... يبقى عشرة على عشرة
مافيش داعى لاى خوف ... انت كده مية مية ... اللى عايز يجرى ... يتفضل يجرى ... اللى عايز يعدى من اليمين زى ماقلنا يعدى مع انه غلط لكن مافيش مشاكل ... الى عايز يعدى من الشمال يتفضل يجرى مافيش مشاكل
ده انا كان الشمال فاضى ورغم ذلك مارضيتشى امشى فى الشمال ... عشان عارف شغلانة اليو تيرن .. وهافضل انقل نفسى يمين وشمال .. على ايه ... انا ماشى فى الحارة الوسطى زى الفل وميت فل وعشرة
ده غير كمان لما تيجى تعدى من إشارة وانتى ماشية فى الحارة الوسطى ... عربيتك بتكون بعيد عن السائقين الغلسين .. اللى بيخرجوا "ببوز" عربيتهم امامك ... يعنى تيجى تعدى الإشارة تلاقى عربية خرجت بالعرض امامك ... يعنى خرج ببوز عربيته ... لما اكون ماشى فى الحارة الوسطى ... بكون ماشى بعيد عن المشاكل بصراحة
يعنى مادام الشارع كله يوتيرن ... يبقى الحارة الوسطى افضل ... حتى ولو مافيش يوتيرن ... انا راجل بمشى 70 او 80 كيلوا داخل المدينة ... فيه ناس تانية عايزة تجرى ... اترك له الشمال يجرى زى ما هو عايز
النهارده كنت ماشى فى الحارة الوسطى .. جه ورايا واحد آسف "متخلف" راكب نص نقل ... وعمال يضرب كلاكسات ... لاول مرة ... صحكت مع ام الاولاد .. وقلت لها .. شايفة المتخلف .. ما انا تارك لك الشمال عايز تجرى اجرى ... موش مطلوب منى اجرى لك عشان حضرتك تعدى ... الغلطة هنا غلطة مين
الغلطة غلطة العربية اللى ماشية شمالى ... عامله "بلوك" مع عربيتى ... يعنى ماشى شمالى لكن موش بالسرعة المطلوبة .. وصاحبنا عايز يجرى ... خلاص تروح للشمال وتضرب كلاكس زى ما انت عايز هههههههههههه

لكن النتيجة طبعا ومع صغر عربيتي ان في احدي ال"يوترنات" كل العربيات زنقتني واتعدتني وفين لما سمحوا لي اكمل مع باقي الشعب اللي مش هايلف اليوتيرن وكنت هادخل في الرصيف الموجه لي من كتر الزنقة بس ربنا ستر

فعلا رصيف اليوتيرن ... ممكن الواحد يخبط فيه لو موش واخد باله ... لان فى الوقت ده بيكون مركز مع العربيات اللى خارجة من اليوتيرن او اللى ماشية حوالين العربية
شوفى ... لو انت داخلة الشارع ... ووجدت ان فيه عربيه داخلة معاكى ... مافيش مانع انى انتظر شوية لحد ماالعربية دى تدخل امامى ... المهم ان العربية دى لا توجه سيارتك الى الحارة اللى فيها اليوتيرن ... خليكى فى الحارة الوسطى على طول الطريق ... مادام انت موش داخلة اليوتيرن ... ومتخافيش من اى عربية تانية هاتخافى ليه ... انت تاركة الحارة اليسرى والحارة اليمنى ... هما اللى يمشوا ويسلكوا نفسهم بعيد عنك .. وانت تمشى فى الحارة الوسطى زى الباشا ... لكن طبعا برده لازم تزودى سرعتك شوية ... يعنى موش امشى فى الحارة الوسطى بشكل بطىء زيادة عن اللزوم ... الكلام ده ممكن فى الحارة اليمنى فقط .

وعلى ذكر المرايات...عندي مشكلتين في المرايات يبقى كتر خيركم لو نصحتوني فيهم
الشمال واحد منه لله عدى زي الصاروخ في شارع ضيق ففتت زجاجها وهي في مكانها رجعت لقيت اخويا مغيره بس حاسة ان الرؤية اختلفت تماما يعني الاصلية كانت بتجيب مدى اعرض من السيارات خلفي..فهلا المشكلة في نوع الزجاج البديل وازاي اتاكد ان النوع اللي يركب يكون مضبوط زي الاصلي
المراية اليمين بقى اللي كان بيعلمني جه يعدلها طلعت في ايده وقالوا لي ان كلها عايزة تتسال وتتغير بواحدة كاملة جديدة

ابسط حاجة واجمل حاجة ... مشوار صغير للحرفيين ... انا رحت الاربعاء اللى فات .. من باب الفضول عشان اشوف حكاية الحرفيين ايه .. لو العربية حديثة يعنى خلال العشر سنوات الماضية تقريبا ... هاتلاقى كل حاجة زى ما حضرتك عايزة .. ووجدت عند محل منهم صندوق مليان مرايات اصلى وزى الفل .. المرايات الجانبية بالذات .. اشكال والوان .. وكلها فى منتهى الروعة
ولو نزلت "الوكالة" ... هما دول الاصل فى كل حاجة ... هاتلاقى كل حاجة من الإبرة الى الصاروخ
عشر دقائق وهاتلاقى اللى انت عايزاه


والبعض بيقول مالهاش داعي قوي واعتمدي على مراية الصالون

لأ طبعا المراية الجانبية مهمة جدا .. طيب ازاى هاغير من حارة الى حارة .. فى الحالة دى هاعتمد على انى انظر دائما فوق كتفى قبل ما اغير الحارة اللى انا فيها
النهار ده بالذات .. كنت مركز فى انى انظر فوق كتفى قبل ما اغير مكانى من حارة الى حارة ... لكن قبل اى حركة لازم انظر فى المراية الجانبية ...

بس هي عاملة فرق باسمعه كل ما اجي اركن يمين!!!..فهل حد يعرف حد في شارع احمد سعيد بالعباسية مثلا (المشوار الوحيد اللي باعرف اروحه) ممكن اعمل عنده الموضوع دا؟

موش عارف والله
لكن الافضل تشترى مراية مستعملة من الوكالة او من الحرفيين ولو كانت العربية فيات ممكن تلاقى فى عزبة شلبى
اكيد مهما كان سعرها هايكون رخيص
وممكن لو فيه حد من البيت قدر يفك المرايه الاصلية وياخدها معاه ... هايكون احسن ... زى ما بيقولوا "ادى الجمل وادى الجمال" عشان مايشتريش مراية غلط ... وطبعا يلف شوية ويفاصل معاهم هههههههه

مرة اخرى جزاكم الله كل خير يا ا. حسين..حضرتك وكل الاخوة والاخوات هنا..المتمرسين والمبتدئين..ربنا يحفظكم جميعا

احنا تحت امر حضرتك
وفى انتظار سماع اخبار جيدة إن شاء الله على طول

وحمدا لله على سلامة حضرتك مرة تانية


مع اطيب التمنيات
اخوكم حسين غزالة