النصابون في بيع المستعمل

**zomzom11** · 04-02-2010 01:21 PM

والله موضوع مفيد جدا عن نفسى انا بقالى اسبوعين بنزل السوق يوم الجمعه والاحد بدور على لانوس وبصراحه مش عارف اجيب بسبب التجار وبسبب عدم الثقه بصراحه مفيش حد موافق يروح معايا التوكيل عشان نفحص العربيه الى مش واثق فى العربيه بيرفض والى واثق فى العربيه ومتاكد منها مش بيوافق كل ما اتوصل لحد بسعر يرضيه ويرضينى يرفض يخرج معايا من السوق للتوكيل ولو وافق يقولى هات عربون هاتخسرنى السوق لغاية ما بقيت اقوله بص انا وافقتك على سعر كذا وانت موافق هاستناك او هاجيلك اخر السوق لو جالك فيها زى سعرى او اعلى ربنا يباركلك ويبارك للى هايشترى ولو محدش جالك تبقى نصيبى ونتفق على كده اجيله اخر السوق اما مالقاهوش او الاقيه ويغير كلامه بردو بقالى 15 يوم مش عارف الاقى حاجه نضيفه والنضيف اما مبالغ فى السعر او مش راضى يرفعها فى التوكيل او مركز معتمد
ده بقى غير النت الى اتكملى فهلويه انا بفرح لما الاقى ناس بتحاول تشتغل وتكسب لكن بحزن لما الاقى ناس بتنصب وللاسف هما طبقه كويسه وشريحه عاليه فى المجتمع يعنى تلاقى ضباط وبيتاجرو فى السيارات عالنت
شكرا للموضوع وشكرا لكل من شارك

**eng_a_raouf** · 15-02-2010 03:01 PM

متابع باهتمام
ويا ريت يا شباب قصص نصب اكتر عشان كلنا نستفيد ونتعلم من بعض

**pedro732000** · 16-02-2010 04:20 AM

برده كان هايحصل معايا
لقيت واحد عارض من فترة اوبل كورسا موديل 2005 وكلمتة استفسرت منه على شوية حاجات وقفلت معاه لحد ما احدد معاد اروح اعاين العربية وافحصها بالتوكيل وبعدين كلمته عشان اطلب اذا ما كان اقدر نروح بيها للتوكيل فرد عليا على طول لا دى اتباعات شوية وخليت حد من صحابى يكلمه واتفق معاه عشان يروح يخلص فيه انهاردة رد عليه اتفضل انس وشرف " مع العلم انه ساكن فى حته رقيه جدا وكان برده مغيرلها كوتش؟"

**banky** · 16-02-2010 06:28 AM

طيب انا كنت بفكر اشترى عربية honda civic ex 1992 من السوق ....
بس بعد اللى سمعتة دة مابقتش عارف اعمل اية عشان الاقي عربية نضيفة مع العلم انى مليش اوى في العربيات و كنت باقول هاكشف عليها في التوكيل هو اللى هايجبلى قرارها بس مين هاينزل التوكيل .... والحرفيين نفس الكلام رغم انهم مش هيبقو زي التوكيل ....اعمل اية انا بقى ؟؟؟

**mgasser** · 16-02-2010 12:57 PM

طيب نقول بسم الله الرحمن الرحيم في الأول

انا طبعا مهتم جدا بالموضوع ده ... بالذات لأني ممكن اكون حاله من الحالات ديه و انا مش عارف ... انا احكيلكم القصه كامله و احكيلكم قصة واحد اعرفه برده اشتري من علي النت بس يا رب تكون قصص ايجابيه ...

انا في الاول كنت ناوي اشتري نيو اكسنت جديد و قلت "ماروتي زيرو و لا فيراري عامله كيلو" زي ما شفت واحد في المنتدي كان قايل. بعد كده بصراحه استحرمت ... يعني اركب كوري بـ 75 الف جنيه يا ناس ... و عربيه مش عاجباني خالص ... المهم قررت ان انا اشوف حاجه كسر زيرو.

المهم نزلت و دورت و شفت ... نزلت سوق الجمعه بتاع مدينة نصر علشان هو جنب البيت ... نزلت مره كده مع نفسي ... و بالرغم من اني لا افهم اي شيء في موضوع العربيات ده الا ان انا فهمت كويس قوي ان السوق مسيطر عليه التجار ... بس فيه فلتات .... نادره .

المهم نزلت الجمعه اللي بعدها و معايه واحد فاهم ... ما عاجبتنيش حاجه ... و كان معانا واحد برده بيدور علي حاجه في حدود 17 - 18 ... المهم انا ما اشترتش ... و معرفتنا ده كان شاف علي موقع ... عربيه دايهاتسو ميرا ... و اتصل بالراجل و الراجل مشكور جالنا ... و اتفرجنا علي العربيه ... و كان ما شاء الله تحفه ... و من هنا لهنا خلصنا علي 17 ... بس الراجل قال نخلص كمان اسبوع مش فاكر ليه ... بس العربيه اتباعت ...

المهم اكملكم قصتي انا بقي ... كلمني واحد معرفه قالي انا عندي عربيه ايههههه طلقه ... لانسر موديل 2008 هاف سبورت حكايه ... رحت يوم الاحد اتفرجت عليها انا و الراجل اللي معايه ... بيني و بينكم كان عدادها عامل 34 الف .. بس كانت زباله ... و نفسيا ما كنتش مستريح .. لأن كان فيها توكيل من توكيل ...

سيبنا الراجل ده و رحنا اتفرجنا في سوق الاحد ... لفينا لما رجلينا ورمت ... و لاقينا راجل معاه لانسر موديل 2008 خليجي كلاسيك ... الراجل بصراحه كان منشي قوي ... و نقوله كام يقول 87 الف ... و انا قلتلهم لا يا جماعه كده كتير قوي ... المهم ... لفينا .... و اخويه قالي تعالي نرجع للراجل ده و ما لكش دعوه ... رجعنا للراجل زي ما قال اخويه ... و اخويه ركب جنب الراجل قدام و انا و صاحبنا اللي فاهم في العربيات ده ورا ... العربيه فووووره ... ما فيهاش و لا الهوا ... عارفين احساس البيتي !!!! المهم ... نخلص من هنا لهنا ... و استقرينا علي سعر ... و هو الراجل قالنا يا جماعه العربيه متحظره ... بس انا هافك الحظر ... و فعلا كان هو المالك علي الرخصه و كانت متحظره ... و كتبنا عقد بيع ابتدائي و اخد 60 الف ... و الباقي لما يفك الحظر ... و فعلا تاني يوم قالي ممكن تودي الرخصه لبنك كذا .. علشان فك الحظر ... و هو طلب مني 20 الف كمان تاني يوم بالرغم من ان الحظر لسه ما اتفكش و انا طبعا بطيبتي الزياااااده قوي ( انا اخدت كلام كتير قوي من كل الناس ... فأبوس ايديكم بلاش كلام تاني انا جنابي وجعتني ) اديته الفلوس ... بس انا رحت المحل بتاعه و هو كان تاجر موبيليا و جايب سيراتو موديل السنه ... يعني تقريبا كده مطمنله ... و ان شاء الله اروح دلوقتي اسأل في المرور علي جواب فك الحظر علشان اعمل العقد النهائي بقي و قلبي يستريح ... بس انا قلت اضيف قصتي هنا يمكن تنفع اي حد ... بس انا عايز اتم قصتي علي خير .. علشان اثبتلكم ان البلد لسه فيها خير و ان في ناس لسه كلمتهم سيف علي رقبتهم .. هو ده اقتناعي الشديد في البني ادمين ... ان الدنيا لسه بخير ... و فعلا عمار يا مصر