الموضوع: قول رأيك او حل ينفع فى مصر لزحام المرور

كل اللى قلتوه جميل
لكن ما حدش فى المرور المبجل رد علينا
ال يعنى هما مش بيشوفوا الحجات اللى بنكتبها دى
ما حدش فيهم اختشى على دمه واعلن انة هيستقيل لانه فشل فى عمله
ابدا كله متبت وبياكل فلوس الشعب سحت فى كرشة وهو فى مكتبة او فى عربيتة الفخمة او فوق موتوسيكله الفخم الضخم بيشخط وينطر ويضرب فى خلق الله كانهم عبيد عنده
محدش من المرور عنده دم ورد علينا كلنا ولا قال كلمة ولو وعد زائف
ده ليه معنى واحد بس
ازا لم تستحى فافعل ما شئت

المشاركة الأصلية كتبت بواسطة memo_hefnawy

مبدأيا الأمل من عند ربنا لأن بجد كل يوم عمالة من أسوأ لأسوأ و محدش عايز يحلها رغم إن الحلول متاحة بس لأسباب أمنية و لأسباب فسادية محدش عايز يحل

شوف هاقولك:

1- تعديل قانون المرور و جعله قانون صارم عقوباته قاسية رادعه

2- قبل تعديله لازم نحط قانون مكافحة فساد وحدات المرور و أمناء الشرطة و نعمل جهاز كامل مهمته هى الرقابة على المرور

3- ممكن أوى نجيب شركة محترمة تمسك موضوع التخطيط و النقل و يكون عليها رقابة محترمة برده

4- عمل تفتيش مفاجئ و دورى فى الشوارع على أى سيارة مخالفة لشروط الأمن و المتانة تتسحب ويتم عمل تقدير لتكلفة إصلاحها و إذا كان عايز صاحبها يستلمها يروح يستلمها بدون نمر ولا رخص و يدفع غرامة

5- أى سيارة راكنة صف تانى تتشال و لو كانت بتاعت وزير الداخلية

6- سحب كل الأوتوبيسات و كل وسائل المواصلات القديمة و فتح قسم جديد فى شركة النصر تحت إدارة أجنبية من شركة عالمية لتجديد و ترميم السيارات المتهالكة أو تحويلها لخردة أيهما أوفر

7- منع وسائل النقل الثقيل من صعود كوبرى أكتوبر

8- عدم إعطاء تراخيص بناء بأى شكل من الأشكال داخل القاهرة منذ الآن و حتى عام 2030 و فى المقابل أى أرض فضاء تؤجر من أصحابها و يتم تحويلها لجراج متعدد الطوابق على أن يكون تكلفة البناء على شركة مسؤلة عن إدارة و إقامة الجراجات و فقط و فى المقابل صاحب الأرض تعطى له الدولة أرض بديلة فى أحد المناطق الجديدة التى يختارها و يكون له نسبة من أرباح هذا الجراج

9- يتم تكهين أى سيارة فات على عمرها أكثر من 25 عام مع إعطاء صاحبها إعفاء جمركى كامل على سيارة أخرى يتم إستيردها و عمرها لا يزيد على 8 أعوام و سعة الموتور لا تزيد على 1600 سىسى

10- يتم وضع ضوابط صارمة على الورش و مراكز الخدمة للسيارات و معايير جودة صارمة

11- إنشاء مدينتين كاملتين للصيانة و لقطع الغيار

12- إلغاء مدارس المرور الحالية و إنشاء مدارس جديدة صارمة مشابهة لمدارس التعليم فى أمريكا ذات قواعد صارمة

13- تدريس سلوكيات القيادة السليمة فى المدارس الإبتدائى و الإعدادى

14- إنشاء جهاز رقابى كامل على مرور و شوارع القاهرة بكاميرات المراقبة و من خلاله يتم محاسبة أى سائق أرعن أو أمين شرطة متسيب و أيضا توجييه الطرق نحو الطرق الأقل إزدحاما

15- عمل محطات للميكروباس و الباص و التاكسى و منعهم من الوقوف فى أى مكان بمخالفات رادعه و كله متصور


- بجد مش فاكر حاجة تانى دلوقت بس دوول إللى جم على بالى بس إحنا نطبق نصهم

و اللة انت لميت كل المشاكل و لو طبقو نص رسالتك بس المشكلة اكيد هتتحل

المشاركة الأصلية كتبت بواسطة مصراوي جدا

هو مما لا شك فيه ان الوضع دلوقتي في موضوع زحام المرور في مصر وصل لمرحلة حرجة جدا تنذر بمشكلة كبيرة مش عايز أقول كارثة مرورية بمعنى اننا لو استمرينا كده بدون حل وكل واحد بيعمل اللي هو عايزه والعربيات الجديدة نازلة الملعب 100 ألف كل سنة (أعتقد حسب تقارير أميك 85000) والعربيات القديمة بنطرد منها من الملعب بالكتير 100 عربية كل سنة (دي ملهاش تقارير) يبقى اكيد هتحصل مشكلة كبيرة.


وطبعا كل الحلول المساعدة اللي عاملة زي الأدوية المهدئة معادتش تنفع نهائي زي كوبري هنا ونفق هناك والشارع ده يتحول اتجاه واحد .. كل ده خلاص معدش نافع نهائي


يبقى فعلا لازم يكون فيه هناك حل .. وحل جذري .. وحل يكون مفاجأة للجميع .. وناس كتير تعترض عليه .. مش مهم .. وناس تسب وتلعن وتقول انت مش عارف انا مين.. برضه مش مهم .. المهم ان نتيجة الحل ده ان الشوارع محتاجة نص العربيات اللي فيها تقف .. ايوة نصها 50% منها مش أقل


ايه هو بأه الحل ده .. اعتقد هو تشجيع الاتجاه للنقل الجماعي يعني المترو والاتوبيسات والميكروباصات والتاكسيات لكن طبعا مع تحسين الخدمة بها لتكون لائقة ومحترمة وآدمية



لكن ده يتم ازاي .. مش عارف .. اعتقد مثلا

(1)
- مناطق كتير جدا من القاهرة الكبرى يمنع دخول السيارات الملاكي لها نهائي ، والاكتفاء فقط بسيارات النقل العام الأوتوبيسات والميكروباصات والتاكسيات

وهي مناطق الزحام الشديد
وممكن يتعمل بادجات ملونة تعلقها العربية الملاكي اللي ساكنة في المنطقة للسماح لها بدخولها

يعني مثلا :

سكان المهندسين يضعوا بادج دائرة خضراء (مثلا) فلا يسمح بملاكي يدخل المهندسين الا الدائرة الخضراء يعني ساكن في شارع في المهندسين وهكذا

وتتحول معظم تحركاتنا الى النقل العام أو نستخدم عربياتنا في الأحياء الفاضية فقط زي المدن الجديدة



(2)

زيادة سعر البنزين بشكل كبير لكن فقط للسيارات الملاكي يعني كل عربيات النقل العام والاتوبيسات والميكروباصات والنقل والتاكسيات تستخدم بنزين رخيص (حتى لا تزيد اسعار سلع أخرى علشان البنزين غلي وعلشان الناس تتجه للنقل الجماعي)

الحقيقة دي الأفكار اللي عندي وطبعا فيه ناس كتير ممكن تعترض عليها انما احنا هنا بنناقش مشكلة هامة جدا ولازم نطرح جميع الأفكار لعلنا نوصل لحل

وطرح الأفكار مهما كانت غريبة افضل من اليأس وترديد مقولة مفيش حل لأن أكيد فيه حل

انا مش هعترض انا هتخانق
ازاى نركب النقل الجماعى انا امبارح كنت نازل وسط البلد قولت بلاش عربيه على شان الزحمه وخليها مواصلات احسن وكان يوم اولا مفيش اتوبيس فاضى الناس على الباب وقفه قولت بلاش اركب الى بعده المهم ركبت اتوبيس بعد ساعه على المحطه ونزلت المحطه الى بعدها وركبت العربيه برده على شان احترم نفسى ليه؟
اولا مفيش مكان للجلوس حتى الناس الكبيره وقفه والعيال الصغيره هى الى واخده الكراسى .
ثانيا روائح عمرى ما شمتها قبل كده غير احيانا بالصدفه لما يكون حد ماشى ورائحه العرق بتفوح منه كالعطر مع الكتمه بتعمل شوغل حلو اوى.
ثالثا لا يمكن ان يصدر قانون كده لئن باختصار شديد مصر مفيش فيها مواصلات تكفى شعبها والاهم من كده مفيش مواصلات اداميه تصلح ان شخص يركبها وربنا مع الناس الى مجبره على الاتوبس.
رابعا ازاى ادخل كل منطقه بالبدج الى ليه لون ده يعنى مثلا انا شوغلى فى المطار وانا فى الطريق بمر على كذا منطقه اعلق بدج لكل منطقه الكلام ده بيتعمل مع المكروباص مش مع الملاكى.
خامسا واخيرا لو البنزين وصل اللتر بى 5 جنيه مش مهم اكرملى من انى اركب اتوبيس غير ادمى زى الى انا ركبته ده وحتى لو هدفع 20 جنيه فى اللتر.
واسف على الكلام الكتير

يا جماعه الحل الوحيد هو:

1- انشاء طرق جديده وتقسيم الطرق يعنى مثلا التريلات ممنوع دخولها المدينه ويكون فيه بديل داخل المدن زى مثلا السوزوكى الى هى الربع نقل مثلا بحيث ان التريلات دى تنقل لمدخل المدينه فقط ويكون ليهم محطات وكمان ليهم طرق خاصه على سبيل المثال مثلا تتمنع من دخول الطرق الصحراويه والطرق دى تكون للسيارات الخفيفه الى هى زى الملاكى والحجات دى.
والاتوبيسات نفس الكلام تتعوض داخل المدن بوسائل اخره زى المترو لازم المترو يغطى مصر كلها مش بس القاهره ومش شرط انه يكون مترو انفاق يعنى ممكن يكون زى الترام القديم كده انا شوفته فى تركيا عامل زى الترام الى كان عندنا برده بالكهرباء بس شكله زى المترو ومكيف وجميل جدا وسريع لازم نغير شويه ولا ايه.

2-لابد انه يكون فيه دراسه عمليه للمناطق يعنى كل منطقه فيها عدد معين من السيارات لازم يتوافر لكل سياره مكان انتظار فى المنطقه دى السيارات الخارجيه اوى الى مش من المنطقه دى يتم انشاء جراج او ساحه انتظار ليهم فى كل منطقه .

3-لابد من ابعاد المكروباص الى من ساعه ما انتشر سلوكيات الناس انتشر فيها الفوضى هى كمان يعنى ممكن يكون الى سايق المكروباص ده شخص متعلم على الاقل على شان يكون مهزب شويه عن كده يعنى ممكن نلزم الاجره كلها سواء كانت تاكسى او مكروباص او حتى نقل عام بقائد متعلم زى مشروع تاكسى العاصمه كده او شركات السياحه والناس القديمه دى تشوف ليها شوغله تانيه توفرها ليهم الدوله بدراسه.

4-لازم العربيات القديمه كلها تتكهن مش بالموديل لا كل واحد عنده عربيه وعاوز يغيرها بعربيه جديده بدل ما تتباع تتكهن زى ما قال احد الاعضاء فى احد الردود ممكن يكون التعويض عن التكهين اعفاء من الجمارك يعنى تشترى عربيه جديده مثلا بى 35000 وكده يبقى حلينا موضوع العربيات القديمه وكمان كده كل واحد لازم يكون معاه عربيه وحده ولو مش عاوز يكهن القديمه يبقى لازم يلغى ترخيصها بمنعنى يكون لكل مواطن الحق فى ترخيص سياره واحده فقط.

5-وضع خطه من مهندسين متخصصين فى الطرق فى تحسين الطرق ووضع رادارات بكاميرات فى الطرق والاستغناء عن الردارات الى بيتم التبليغ بيها عن طريق الاسلكى والكلام ده وتطوير جهاز المرور بالكامل ولازم يكون فيه تصوير فى الاشارات .

وبكده نكون حلينا شويه ازمه المرور