الموضوع: قول رأيك او حل ينفع فى مصر لزحام المرور

مافيــــش فـــايـدة, مش تشاؤم بس هي دي الحقيقة لأنهم مش عاوزين يريحوا الشعب ومش هيريحوا, عارفين ليه ؟!

انا حاسس ان المشكلة فى اخلاق واداب المرور يمكن لو اتصلحت الاخلاق ممكن يكون فية نتيجة كل الحلول الي الناس قلتها جميله بس في حل اخر من ضمن هذه الحلول ممكن يكون قريب ممكن علي الاقل الرتب العليا مثلا الي احنا بنشوفهم مسكين الشارع صح لما بتبقي في تشريفه معديه ممكن الرتب دي تقف في الشوارع العامه مثلا الي عليها الضغط وبعد كده اتفرج علي الشارع هيبقي منظره ايه اسف للاطاله

نعيب زماننا والعيب فينا وما لزماننا عيب سوانا

يعنى لما يكون واحد عارف ان عربيته فى مشكلة تتحل بعشرة جنيه ويكبر دماغه ويخرج بيها وتعطل به فى السكة ويحسسك انه اتفاجأ بيها ويوقف شوارع باكملها ويعطل عباد الله اللى رايح شغل واللى وراه مصلحة واللى رايح مستشفى او حتى رايح يتفسح مش كان يقعد فى بيته احسن لحد ما يحل مشكلته او ياخد تاكس مثلا ويتقى شر دعوات الناس عليه دى واحدة

واحدة تانى متقدرش تقول العربيات اللى عدى عليها مدة معينة لازم تتكهن لان فيه ناس عربياتها جديدة وفى منتهى الاهمال وحالتها اسفت من القديم الف مرة وفيه ناس عربياتها قديمة ومبتسكوتش على الهوا فيها وذى الفل وحاجة كمان برضه انت كده بتحرم اللى ممعهوش فلوس يشترى جديد انه يركب عربية ذيه ذيك وهو مواطن ذيك بالضبط له نفس الحقوق التى لك وعليه نفس الواجبات التى عليك

حاجة كمان فيه ناس تلاقيها بلطة وتشل بصراحة ودول انا بشوفهم فى الشوارع الجانبية اللى مفيهاش مرور تلاقى الشارع رايح جاى وده راكن زى الطور قافل اللى رايح او قافل اللى جاى وخانق الشارع وفى منتهى البجاحة والبرود ولا اكنى فى حاجة
حاجة اخرى ام الفذلكة اللى فى عباد الله تلاقى شارع رايح جاى ( اتجاهين يعنى ) اتقفل الذهاب مثلا لاى سبب واللى جاى شغال يروح واحد حاسس انه هو اللى بيفهم والباقى بقر ( فى حين العكس هو الصحيح ) ضارب غرزة ويمشى فى العكس لحد ما يقابله حد جاى من العكس يقفل العكس كمان
والله يا جماعة مع احترامى لكل ارائكم القيمة المشكلة ليست مشكلة زيادة سكانية او تحديد نسل او مصالح حكومية يجب نقلها وخلافه اد ما هى مشكلة اخلاق واداب عامة ونقص ثقافة وانا اقترح تدريس مادة للوعى المرورى والثقافة المرورية تشتمل على كل هذه الاشياء للحفاظ على انسيابية الشارع المصرى واسف على الاطالة

انا بقول ان جزأ من مشكله في اللينك ده
http://www.nilemotors.net/Nile/showt...t=84127&page=4

انا قريت كتير من الاقتراحات ومبسوط اوي من الناس اللي بتحاول حتى بالافكار الغريبة وزعلان جدا ومتالم من الناس اللي بتقول مفيش فايدة وشايف ان الزحمة اقل حاجة يستحقوها ويستحقوا اوحش من كده بكتير

رايي المتواضع كالاتي
ايه سبب المشكلة الاكبر او السبب الرئيسي؟؟؟
كترة الناس على الارض اللي عليها بالرغم من ان البلد لسة واسعة اوي
احنا عايشين على 4 في المية من مساحة البلد !!!!!!
لازم لازم لازم نتوسع في البناء وفي المدن الجديدة ونوظف المليارات اللي مع رجال الاعمال دي صح ونعمل رقابة على الناس اللي مبتتعبش خالص من السرقة فينا وللاسف كل ده دور الحكومة والمسؤولين وللاسف هما اللي بيسرقونا بنفسهم فينا

طيب الحكومة مش ناوية تتوسع ولا حاجةن ومرتاحين كده!!!!
خلاص يعملو حاجة تريحنا ويفضلو زي ماهما زي مثلا كالاتي
فيها ايه لو تبقى 40 في المية من المصالح الحكومية بتبدا من الساعة 11 بالليل وبتخلص 4 الصبح
هوا ليه لازم يبقى كل حاجة الصبح؟!!!!!!!!!!!!!!!!
اليوم فيه اربعة وعشرين ساعة نستغلهم لغاية اما نقدر نتوسع في البناء والعمران في البلد