بسم الله الرحمن الرحيم
يا باشا ألف شكر على الرود الجميلة دى والله الموضوع دى انا حاطه عند على favorites وكل ما اعوز اعرف معلومة برجع لية علشان تثبت عنى وانا مش عاوز اكون اعرف اسوق عربيتى وخلاص لا أنا بحب اقرا واشوف واتعلم وارجع للمعلومة مرة واتنين وثلاثة وممكن لو فيه معلومة عرفتها من حضراتكم انفذها واشوف اية اللى هيحصل بعد كدة
السلام عليكم ورحمة الله وبركاتة
وعليكم السلام ورحمه الله وبركاته
أخوانى اعضاء المنتدى المحترمين جدا
أنا بقالى اسبوع بمشى بالعربية من فيصل لوسط البلد وارجع بيها بس راكب جنبى اخويا
ممتاز جدا وعشرة على عشرة
بس ببقى خايف قوى قوى ومرعوب بس والله بقالى يومين الخوف ابتدى يقل والرهبة والغلطات اصله شارع زحمة جدا جدا
اخويا معاه عربيته بس من ساعة ما جبت العربية وهو راكن عربيتة وبينزل معاى كل يوم ويرجع معايا هو برضوا شغله فى وسط البلد
المهم ان الواحد كل يوم بيتعلم جديد وكل ما اعمل حاجة غلط المرة الثانية بحاول معملهاش بس لسة برضوا الواحد عنده خوف وتوتر هو ابتدى يقل بس فى فى حاجات ممكن تحصل تخلى الواحد يكره نفسه هل دى طبيعى ولا الواحد بطئ فى التعليم
طبيعى جدا جدا ... وكلنا فى اول يوم مشينا بالعربية قررنا اننا نبيعها فى نفس الاسبوع هههههههههه
انا مرة كنت جاى من التحرير من على كوبرى اكتوبر فاخدت الحارة الشمال ولما طلعت الكوبرى كنت فى الحارة اللى فى النص اترعبت ، اخويا قالى ادى اشارة شمال وخذ الحارةالشمال سنة سنة بس بص فى المرايات علشان محدش يضايقك ، اديت اشارة شمال وبصيت فى المرايا الشمال كان ورايا ميكروباس بس حسيت انه بعيد وانا داخل على الحارة الشمال لاقيتة جاى على شمالى وكابس عليا وهيخش يمين علشان ينزل وهيخبط فيها من الخوف والخضة رميت شوية يمين كل العربيات اللى ورايا كلاكسات وشتايم اخويا قالى انت كنت ماشى صح بس هو اللى غلطان لانك اديتله اشارة شمال ساعتها كرهت نفسى!!
تانى مرة كنت طالع كوبرى الدقى اللى عند وزارة الزراعة وكان الكوبرى زحمة جدا جدا
طلعت شوية على الكوبرى ووقفت لاقيت العربية بتريح على اللى ورايا دوست فرامل لما الطريق اتحرك حبيت امشى لاقيت كل ما ارفع رجلى من على الفرامل علشان ادوس بنزين العربية ترجع لورا ومش عايزة تمشى راح اخوياشد فرامل اليد وقلى دوس بنزين العربية بقت تطنطط راح منزل فرامل اليد ومشيت العربية بس ساعتها كنت متلخبط اوى وصوت العربية بقى عالى واللى ورايا كلاكسات يخلوك تتلخبط بس برضوا فى ناس محترمة ، الراجل اللى كان ورايا عدى من جنبى واتسفت له قالى مفيش حاجة بس على مهلك وهدى نفسك !!!!!!!!!!!!!
انا اول ما ركبت العربية كان فى 6 أكتوبر يوم جمعة كنت كل يوم جمعة اروح انا واخويا والمدام والاولاد انزل المدام والاولاد فى النادى وابدا انا وهوا كنت بركب وهوا جنبى وامشى بالعربية فى كل اكتوبر وشواراع المصانع منطقة خالية وتتعلم فيها
وانا لى احد اقاربى ساكن فى 6 اكتوبر ... وفضل يتعلم فى الشوارع الخالية هناك ...لحد ما قرر انه يزور احد الاقارب فى مصر الجديد ... ركب العربية فى الصباح الباكر جدا يوم الجمعة ووصل مصر الجديدة بالسلامة ... وفى العودة نفس الحكاية ... لحد ما اتعود والخوف قل ودلوقتى كويس والحمد لله
الجمعة اللى فاتت انا ركبت العربية من الجراج الصبح ورحت بيها اكتوبر بس كان اخويا قاعد جنبى ولفت بيها ف اكتوبر ورجعت بيها لحد البيت ومحصلش اى مشاكل على فكرة لما تسوق فى الزحمة وترجع تسوق فى الاماكن الهادية بتبقى الاعصاب هادية والسواقة متعة .
وبعد كدة حب يعلمنى اركن ازاى فذهبنا لجراج جنب دار الفؤاد وفى حارات فى الارض وقعدت اتعلم بس الرجوع لورا كان صعب على ومازال
الركن زى ما اتعلمته ... ولسه انا محتاج تدريب فيه شوي باختصار شديد:
1- توازى السيارة اللى هاتركن بجوارها
2- تبعد عن السيارة حوالى نصف متر "اذا كان المكان اللى هاتركن فيه واسع" وإذا كنت مبتدأ اوعى تجرب فى مكان ضيق عشان ما تخبطش فى عربيات الناس وإذا حاولت تركن فى مكان على اد حجم السيارة يبقى لازم تقرب على قدر المستطاع من السيارة اللى هاتركن بجوارها
3- تحاول ان اكصدامك يكون سابق العربية الموازية بحاجة بسيطة
4- هافترض انك هاتركن فى ناحية اليسار:
- فك الحزام عشان تاخد راحتك
- امسك الكرسى اللى جنبك وانظر فى الزجاج الخلفى
- لف الدركسيون بالكامل ناحية العربية الموازية "ناحية الجانب اللى هاتركن فيه"
- اول ما نص العربية يدخل الملف "ودى اهم خطوة"
- تنظر امامك على كبوت العربية وتاخد بالك انك ما تخبطش العربية اللى امامك
- وتلف الدركسيون عكسى وانت داخل ببطء شديد
- وعند الاقتراب من السيارة اللى فى الخلف
- تبدأ تعدل الدركسيون ناحية الرصيف " وتحضن الشوية اللى فاضلين"
لما بتعلم الركن المشكلة اخويا يقول لى لم شامل وادخل الاقى العربية راحت يمين ، لم يمين الاقى العربية راحت شمال يقول لى انزل وبس انت عامل اية، انزل الاقى العربية مش مظبوطة ، انا بركن بوش العربية كويس بس المشكلة لما تحب ترجع بضهرك لورا !!!!!!!!!
هاحاول اشرحها مرة ثانية بالرسم إن شاء الله
المشكلة عندى المرايات مش عارف اتعلمها كل ما افكر ابص فيها الاقى العربية حدفت منى ودايما اخويا يقولى المرايات هية عينك التالتة الموضوع دا مضايقنى اوى وانا قريت الموضوع دى كله وخصوصا المرايات بس برضوا حاسس ان فى حاجة غلط !! دى طبيعى ولا ايه !!
المرايت .. يا خبر ابيض على المرايات
دى اهم حاجة فى الدنيا كلها المرايات
عشان كده لو تقدر تركب مرايه ممتازة توضح لك الرؤيا كويس ركب ... بس ابعد عن المرايات اللى بتخدع النظر وتحسسك ان العربيات اللى خلفك بعيدة وهى فى الحقيقة قريبة جدا
المهم لازم تتعلم تضبط المرايا الشمال والمرايا اللى فى الصالون
والمرايا اللى فى الصالون دى بالذات حاول انك تضبطها بحيث تبين اللى جاى من ناحية الباب اليمين الى حدا ما
والاهم قبل ما تغير اتجاهك فى اى حالة من الاحوال ... لازم تنظر فوق كتفك نظرة سريعه وخاطفة عشان تتأكد ان ما فيش عربيات ماشية بجوارك عند الباب الخلفى "لانها موش هاتكون ظاهرة فى المرايا" موجودة فى المنطقة العمياء للمرايه
وزى ما استاذ محمد فوزى ما قال لنا: لازم تنظر فى المرايا كل 3 ثوانى ... يعنى خلى عينك شغالة على طول
واوعى تسرح وانت بتنظر فى المرايه وتنسى تنظر امامك هههههههههههههههههه
مشكلتى فى المرايات نفسى اتعلم ابص فيها صح
اللى عايز اعمله النهاردة انى اخرج مع المدام والاولاد لوحدينا من غير اخويا ما يكون قاعد جانبى بس بصراحة خايف جدا اصل فيصل والهرم وميدان الجيزة مأساة أعمل اية !!!؟؟؟؟
انزل معاهم فى الصباح الباكر ... ومافيش داعى للاستعجال
طبعا كلنا عايزين نستفيد من العربية
وعايزين نخرج بها فى كل مكان
لكن الصبر حلو
يكمن عاوز اجرى شوية وامشى بيها لوحدى واقول لنفسى هوا اخويا دى هيسيب عربيته وهيفضل معايا على طول ولا اية
وكويس جدا ان اخوك شغله معاك ... وانك كل يوم بتخرج بها
ده انت إن شاء الله هاتعلمنا كل يوم الجديد
لأنك هاتتعلم بسرعة
انا اول مرة نزلت بالعربية فى وسط الزحمة كان فى شارع محى الدين ابو العز وجامعة الدول والسودان كان زحمة جدا جدا وكنت خايف جدا جدا جدا
انت عايز الحقيقة هو خطأ كبير انك تنزل الشوارع المزدحمة وانت لسه بتتعلم
ده تحذير قالو لى صديقى وده فاهم كويس قوى
انا حسيت ساعتها انه رمانى فى البحر وقالى عوم بس كان بيوجهنى ، بس تصدق الواحد خد منها شوية ثقة ، وعلى فكرة موضوع السواقة بحس انه موضوع ثقة
والأهم ان اللى راكب بجوارك ما يكونش عصبى ... لأنه لو عصبى هايوترك زياده
انا حتى الآن اخرج يوم الجمعة صباح واحيانا يوم السبت وموش مستعجل
والعربية كل شوية تبطا منى والعربيات اللى ورايا مابترحمش بس الحمد لله دلوقتى يعنى الواحد كل يوم بياخد ثقة شوية وربنا يستر
فارجوا من اعضاء المنتدى المحترمين يعرفونى اعمل اية وانت ماشى صح ولا لا
اخوكم
حاول تقرأ موضوع استخدام الدبرياج والفرامل فى التقاطعات والازدحام
خلاصة الموضوع: اوعى تدخل على يوتيرن او تقاطعات او زحمة ورجلك على البنزين
لازم رجلك تكون ضاغطة على الدبرياج
والرجل الثانية بتتحكم فى سرعة العربية عن طريق الفرامل "احنا موش عايزين العربية تقف لكن عايزين ندخل فى هدوء ونستغل سرعة العربية ونتحكم فيها بالضغط على الفرامل"
لو ظهر اى حاجة لا قدر الله هاتضغط على الفرامل بالكامل
وعشان انت ضاغط اصلا على الدبرياج عمر العربية ما هاتقف منك
وفى نفس الوقت هاتقدر تختار الغيار المناسب فى اى وقت للانطلاق بدون خوف
ممكن تدرب نفسك
على السير ثم التوقف بالكامل
ثم السير مرة ثانية
عشان تاخد حساسية الدبرياج والفتيس
مع اطيب التمنيات
اخوكم حسين غزالة
وانا ان شاء الله كل ما هتعلم حاجة هنقلها ليكم ان شاء الله
والف شكر ليك يا باشا
م.عصام مهنى