اللهم صل على محمد وعلى آله وصحبه أجمعين
الاخ الفاضل الاستاذ/ عصام
انا رأى الشخصى كالتالى :
1- عدم النزول فى الازدحام إلا بعد التمكن من اساسيات القيادة ... يعنى تستمر فى التدريب وبدون استعجال فى اماكن خالية وفى اوقات يكون السيارات فيها قليلة جدا
بالطريقة دى هاتاخد ثقة ممتازة
2- التدريب ثم التدريب
التدريب على الأساسيات ... نقل الغيارات .. اليوتيرن .. التقاطعات ... المطبات الصناعية ... الصعود على الكبارى .. الهبوط من على الكبارى ... التوقف على شوارع مرتفعة ثم السير مرة ثانية ... ركن السيارة ... استخدام المرايات ... الخ
3- بالنسبة لموضوع الازدحام
هو موش مشكلة قوى .... المشكلة ان العربية بتسخن
والمبتدأ رجله تقيله شوية على الدبرياج والبنزين "طبعا ده موش كويس على العربية"
4- بالنسبة لموضوع أن العربية توقفت بسبب الميكروباس
هانرجع تانى لقصة استخدام المرايه
وكمان التوقع ... انك مادام انت ماشى وراء ميكروباص اوتاكسى او اوتوبيس ... توقع انه هايقف ... وكان لازم تترك مسافة بينك وبينه كافيه
وتكون رجلك ضاغطة على الدبرياج فى الزحمة خصوصا والرجل الثانية على الفرامل تتحكم فى السرعة
لو وقفت مرة واحدة العربية عمرها ما هاتبطل منك
5- بالنسبة لموضوع الركن
اوعى تركن فى مكان ضيق
بعد التمكن من الركن اكثر من مرة فى اماكن واسعة
ممكن تجرب انك تركن فى مكان اضيق "على اد حجم العربية"
اوعى تركن فى مكان فيه زحمة
عشان ما تعطلش العربيات اللى ماشية وترتبك
هاقول لك على حاجة تضحك
مرة فكرت انى انزل ادفع فاتورة الانترنت
روحت داخل على جوجل عشان اشوف المواصلات والمكان المناسب للركن هايكون فين
صدقنى استفدت جدا
عشان احدد الطريق اللى هادخل منه والطريق اللى هارجع منه والمكان اللى هاركن فيه كله ده كان فى الصباح الباكر والموضوع تم على خير والحمد لله
لانى ممكن اروح المشوار وادخل من مكان عشان اخرج منه الف الكرة الارضية ههههههههه
6- بالنسبة لموضوع الحفرة والبلاعات والكلام ده
دى ابوخ حاجة بتحصل للمبتدأ
الواحد بيشوف حاجات عجيبة ... البلد الوحيدة اللى تلاقى بلاعات فى منتصف الشارع موش تحت الرصيف زى بلاد العالم كله
وكمان نفسى اتعلم ازاى اعدى فوق البلاعة او الحفرة من غير ما عجل العربية ينزل فى الحفرة
كان صديقى نصحنى وقال لى: ممكن تنزل فى مطب احسن لك من انك تفادى المطب وتغير حارتك وتحدف على اللى جنبك
وأن كل العربيات بتاكل مطبات مافيش مشاكل احسن ما تخبط عربية قادمة من الخلف عشان عايز تفادى المطب
على فكرة افتكرت كلام الاستاذ محمد فوزى لما قال لنا : اضغط على الفرامل خفيف قوى عشان اللى وراك يشوف نور الإشارة الاحمر ويعمل حسابه انك هاتقف فى اى وقت
الفكرة دى ممتازة قوى وبعملها على طول خصوصا:
لو مثلا داخل على "قضيب مترو" وعايز اعدى عليه بالراحة
او نازل من على كوبرى وعايز اللى ورايا يهدى شوية ويعمل حسابه
او داخل على ملف
يعنى موش لازم قبل المكان المطلوب ادوس فرامل بشكل مفاجىء حتى ولو اعطيت اشارة
طبعا ثقة حضرتك هاتزيد اكثر
لما تتدرب اكثر خصوصا على الاساسيات
ومافيش مشاكل انك تنزل دائما مع الاسرة الكريمة ربنا يبارك لك فيهم يا رب
لحد ما انك هاتنزل لوحدك آجلا وعاجلا
لكن النصيحة عدم الاستعجال والتدريب
مع اطيب التمنيات
اخوكم حسين غزالة