الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة shetoos2009

بصراحه الفيديو مرعب وقد ازدات حده الخوف عندي لان هناك بعض الحالات القدريه بالفعل مثل السيده التي كانت متوقفه وقد اندفع من ورائها سياره مسرعه ما ذنبها فيما حدث "والله خير حافظا وهو ارحم الراحمين"
كفانا واياكم شر الغفله والبلاء والابتلاء
امين


أنا فعلا آسف جدا على المشاهد المتعبة دى ... لكن للأسف غصب عنى انا كنت ناوى انزل الفيديو ده من زمان من اكثر من شهرين ثلاثة ... وكل مرة اقول مافيش داعى ازعل الناس واضايقها ... لحد ما سمعت ان فيه عربية وقعت من فوق الكوبرى على عربيات فى الشارع ... وناس تانية تقول عربية نقل وقعت من فوق الكوبرى .... يعنى بسمع كلام فى منتها الغرابة .... اذا كان السائقين القدماء بيعملوا كده ... طيب شبابنا الجميل هايعمل ايه .... خصوصا عندما يحصل على عربية جديدة وبالنسبة له هى حلم وتحقق .... ربنا يسترها مع الجميع وشكرا لحضرتك على الدعاء الجميل
مع اطيب التمنيات
اخوكم حسين غزالة

المشاركة الأصلية كتبت بواسطة shetoos2009

الاستاذ : حسين
ارجو الا اكون قد اثقلت عليك باسئلتي وسوف اكررها
اولا: ارجو اعطائي النصيحه فى مساله التخلص من الضغط على الدبرياج اثناء المشي وذلك محاوله مني الا تهرب السرعه من تحت قدمي وما اضرار ذلك على السياره


ما دام العربية اتحركت ... لازم ترفع رجلك تماما عن الدبرياج .... وتضغط خفيف على البنزين للتحكم فى سرعتها ... الحالة الوحيدة اللى غصب عنك وعن الجميع هى الزحام والتقاطعات ... لازم اضغط على الدبرياج ورجلى التانية تكون فوق الفرامل على استعداد للتوقف فى اى وقت ... خلاف كده كل الناس بتقول لك لازم تريح العربية فى الغيار ... يعنى اول ما العربية تاخد راحتها وسرعتها المناسبة ... انقل الغيار التالى مباشرة ... ومافيش داعى بالسير على نفس الغيار مدة طويلة ... أنا عن نفسى اول ما اجد منطقة مزدحمة امامى .. على طول "امور" الفتيس وامشى على سرعة العربية التلقائية واتركها تتوقف تلقائى ... بالنسبة لأخويا مثلا اول ما العربيات تتوقف "يمور " الفتيس ... واول ما تمشى العربيات حتى ولو متر واحد ينقل الغيار الاول ثم التانى على طول ويرجع "يمور" الفتيس على طول اول ما العربيات تتوقف .... انا ممكن "امور" الفتيس لو العربيات انا شايف انها هاتتوقف مدة طويلة ... لكن لو كان المشى بطىء ... يبقى غصب عنى هافضل دايس الدبرياج خفيف ... عشان اتحرك بانتظام وراء العربيات .... والافضل لو كان فيه فرصة انى ما ادخلش فى مجموعة عربيات ... يبقى افضل .... يعنى الاحسن انى امشى وراء مجموعة عربيات براحتى ... افضل من انى احشر نفسى معاهم واضطر انى امشى غصب عنى ويمكن بطريقة تضايقنى ....


وكمان لازم تاخد بالك كويس جدا جدا من انك لازم تضغط الدبرياج كويس قوى لما تنقل الفتيس ... يعنى احيانا الواحد من كتر الثقة ينسى انه يضغط الدبرياج او ينسى انه يضغط الدبرياج بالكامل وطبعا هاتسمع اصوات موش كويسة فى الفتيس .... لا قدر الله ممكن يحصل له حاجة ...

ربنا يحفظ الجميع

ثانيا : مشكله ابعاد السياره لم احفظها بعد فهل هناك طريقه عمليه لذلك بعيدا عن مساله التعود


والله النصيحة الوحيدة هى لا تدخل فى اى مكان ضيق ... او اى مكان انت موش حاسس انه هايكفى مرور سيارتك ... هى المشكلة فعلا بتظهر فى العربيات الحديثة خصوصا انك لا ترى "كبوت" العربية خالص نهائى .... ههههههههههه طبعا هما بالنسبة لهم فى بلاد بره الشوارع واسعة ... ومافيش مشاكل خالص انه مايشوفش الكبوت ... اما بالنسبة لنا والمشى فى الشوارع المزدحمة العملية دى بتكون "رخمة" قوى ... يعنى بالنسبة لى عشان العربية تويوتا موديل "الثامانينات" ... يعنى تقدر تقول الى حد ما بشوف الكبوت ... اما فى الموديلات الحديثة كلها انسى الحكاية دى ههههههههههههههه .... يعنى غصب عنك محتاج شوية تقدير .... الخلاص اوعى تدخل فى اى مكان انت حاسس انه موش هيكفيك ... لحد ما تتعود ... هو الخوف ليس من طول العربية ... لانك كده كده محتاج انك تشوف عجل السيارة التى امامك خصوصا فى الزحام او على الاقل هاتترك مسافة متر او مترين بينك وبين السيارة التى امامك ... المشكلة فى عرض العربية ...
يعنى انا مثلا كنت ماشى تمام التمام ... اخويا يقول لى ادخل انت واقف ليه ... انا حاسس ان المسافة موش كويس وموش واسعة كفاية ... وفعلا النتيجة هى انى "حكيت" خفيف قوى فى مراية سيارة متوقفة ... طبعا خاجة بايخة ... لو كنت انا سمعت كلام نفسى وصبرت ثوانى كان كل العربيات مشيت وماحصلش كده
ما دام المكان ضيق او انت موش واثق ان العربية هاتعدى بسلام خلاص مافيش داعى تدخل المكان ده ...

ثالثا: مازلت اتاخر فى موضوع اعطاء السياره الغيار المناسب فما علاج ذلك
وشكرا

مافيش مشكلة انك تنقل الغيار براحتك شوية ... لكن المهم ان العربية سرعتها لا تنخفض بشكل جامد ... يعنى مثلا انت نقلت الغيار الثانى وماشى على 60 كيلوا ... لو نقلت الفتيس براحتى وبدون عصبية مثلا السرعة هاتوصل الى 50 مافيش مشاكل هانقل الغيار الثالث وهامشى على مهلى وبراحتى ... المشكلة طبعا لو السرعة نزلت الى مثلا 40 يبقى كده غلط جدا ... انى عايز انقل الغيار الثالث على سرعة 40 كيلوا ....
وعلى العموم الموضوع بسيط لكن محتاج تدريب فى مكان خالى تعمل فيه ايه:
تتوقف ثم تنقل الغيار الاول والثانى ورا بعض بسرعة ... واول ما تعطى الغيار الثالث ...
ترجع تانى تتوقف تماما بجوار الرصيف ... وتعيد التدريب على التحرك بسرعة مع نقل الغيارات بسرعة
ومراعاة النظر فى المراية قبل ما تركن بجوار الرصيف
وقبل ما تتحرك بالعربية من الثبات
ممكن الاستعانة بشخص يجلس بجوارك ... وانت ماشى يطلب منك التوقف فى اى مكان .. وتشوف درجة استجابتك وسرعتك مع الامان طبعا فى المقام الاول والنظر فى المراية على طول الخط..
لحد ما تتعود نقل الفتيس بسرعة والتوقف التام والتحرك من الوضع واقفا والوصول الى السرعة المناسبة فى اقل وقت ... لكن هاتحتاج مكان يكون فيه شارع طويل وخالى عشان تتدرب فيه كويس
انا بعد ما عملت التدريب ده لوحدى ... كان صديقى عايزنى انقل بسرعة واجرى شوية ...
بعد مدة من السير بالعربية حسيت ان الجرى مافيش منه فايدة مادام انا ماشى فى شوارع المحروسة .. عشان كده رجعت تانى انقل الفتيس براحتى شوية لكن موش بطىء قوى ... اما فى الطريق الطوالى السريع مسموح بالجرى شوية اقل سرعة هى 70 او 80 كيلوا .. ممكن اكثر لكنى لا افضل السرعة تزيد عن 80 كيلوا

اهم حاجة ان صوت الموتور مرتاح ... وانك مريح العربية فى الغيار ... يعنى موش تفضل ماشى على غيار واحد لحد ما تسمع صوت الموتور عمال يقول "الحقونى" .. وبيبوس ايديك انك تنقل الغيار التالى ههههههه
وبالتوفيق إن شاء الله
مع اطيب التمنيات
اخوكم حسين غزالة

المشاركة الأصلية كتبت بواسطة nouranwar

الفيديو وهمي بجد و مؤثر جدا جدا
و بيبين اهمية التركيز و عدم الاستهتار في السواقة علشان ديه ارواح ناس فلازم نحافظ عليها
استاذ حسين بنشكرك علي المجهود الرائع و ياريت دايما تخليك فاكرنا بالجديد

رايك رائع ويعكس شخصية عاقلة ومحترمة ... يا ريت كل الناس تسمع كلامك وشكرا لحضرتك على الكلام الجميل ده
مع اطيب التمنيات
اخوكم حسين غزالة

المشاركة الأصلية كتبت بواسطة ahmedsameir

و الله صاحبك ده بيحبك قوى و كتر خيره انوا قالك على كل ده و يا صبره على التعليم اساسا لان الشوارع بتخنق اللى بيعرفوا يسوقوا فما بالك باللى ميعرفوش
ربنا معاك و يعينك على شوارع و عربيات و سواقين مصر


عندك حق فعلا
موش كل اللى بيعرف يسوق كويس يعرف يعلمك صح
هى دى اساس المشكلة للمبتدأين
تحتاج سائق ممتاز يعلمك ويفهمك ويصبر معاك وماتستعجلش
وكل شى يكون تمام التمام

شكرا لحضرتك جدا

المشاركة الأصلية كتبت بواسطة Meroo2008

بسم الله الرحمن الرحيم
الأخ husseinoo
شاهد الفيديو
أنا مبتدئ فى القيادة وأمتلك سيارة جديدة والحمد لله
لقد أرعبنى هذا الفيديو وزاد من خوفى
أنا معك فى أن أسلوب القيادة الدفاعية العاقل هو الأمن للسائق ولمن حوله
والله هو الحافظ

انا آسف جدا لحضرتك
وفعلا انا كنت خايف من تأثير الفيديو على المبتدأين فى القيادة ... لكن عسى ان تكرهوا شيئا وهو خيرا لكم.
المشكلة تتلخص فى التالى:
شباب متحمس لنزول الشارع والاستعراض
كثير من الحاصلين على رخصة جديدة ... يعتقدوا انهم كده اصبحوا تمام التمام
بعض المدربين يوهم السائق المبتدأ انه اصبح تمام التمام
كثير من السائقين القدام لا يعرف اساسيات القيادة الآمنة
اخطر حاجة ان اى اصابة لا قدر الله تكون فى انسان مسكين ليس له ذنب

اخيرا لو كان الخوف هايكون دافع لتدريب زيادة .. وحرص اكثر ... ووعى وفهم لمهارات القيادة الآمنة .. كده يبقى الفيديو ده استفدنا منه بشكل ايجابى .. وفى الاول والآخر زى ما حضرتك بتقول ربنا هو الستار بس احنا ناخد بالأسباب ونتدرب كويس قوى وبدون استعجال

وربنا يبارك لحضرتك فى السيارة الجديدة
ويعطيك خيرها ويكفيك شرها

مع اطيب التمنيات
اخوكم حسين غزالة