الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة prof1990

أنا أن شاء الله ناوي أجيب عربيه جديده بس هروح أتعلم سواقه الاول في أماكن تعليم السواقه

ده كلام مضبوط ... وعلى فكرة موش شرط مدارس القيادة تعلمك مضبوط .... يعنى ممكن اى صديق بيفهم كويس يعلمك ... او سائق تاكسى محترم ممكن يعلمك ... المهم انك تشعر بالإستفادة ... الشىء الوحيد المتوفر فى مدارس القيادة وبيكون مفيد فعلا ... هو تواجد الاقماع الخاصة بالمرور والتدريب على اختبار القيادة ... خلاف كده اهم حاجة هو المعلم انه يكون فاهم عشان يقدر يوصلك المعلومة بدون عصبية وبشكل سهل وبسيط

بس انا كنت بفكر أجيب عربيه زي مازدا 3 أو سيفيك بس كله قعد يخوفني جدا من أني أشتري عربيه من الفئه ديه علشان خاطر مخبطهاش و أندم عليها و أزعل و أنا مش ناوي خالص أن شاء الله أشتري مستعمل

هو فى الاول والآخر كل شىء نصيب ... يعنى موضوع الخبطات فى العربية ده احنا موش بإيدينا حاجة ... انت تتوكل على الله وتشترى العربية اللى تعجبك ... لكن بالنسبة للمبتدأين فى القيادة ... بيكون الافضل لهم السيارات الصغيرة .... من 900 الى 1000 سى سى ... سهلة فى القيادة .. وحجمها صغير ... ومفيدة جدا خصوصا لو اللى هايركبها هايكون فى الغالب لوحده وموش هايركب حد معاه ... وموفرة فى البنزين طبعا ... وموضوع البنزين ده يظهر فى شوارع المحروسة المزدحمة ... خصوصا لو كانت المشاوير كثير ... وحجم العربية الصغير بيسهل المشى فى الزحام بدون اى مشاكل وفى منتهى الجمال ... اما لو كان هايركب معاك ناس كثير وبشكل مستمر والموضوع فيه سفر ومشاوير كبيرة ... يبقى الافضل طبعا تكون العربية كبيرة و الاحسن تكون 1600 سى سى وابعد عن الـ 1300 سى سى

فا أيه نصيحتكم ليا أنا كنت ناول أتعلم كورس كبير شويه بحيس أنه يعلمني كويس و كل حاجه و أمارس عليه و لما أجيب العربيه أبقي أنزل الفجر ولا حاجه أمارس شويه و حبه حبه أبقي تمام

عايز رأي أهل الخبره من فضلكم

طبعا خلاصة الكلام: التدريب ثم التدريب ثم التدريب
يعنى طبعا موش معقولة تشترى سيارة ثمنها كبير جدا ... ربنا يبارك لحضرتك فيها مقدما ويسترها معاك
موش معقولة تشترى سيارة غالية ... وتستخسر تتعلم كويس
يعنى الحصة فى الغالب بتكون بحوالى 25 جنيه مثلا
تشوف انت محتاج كام حصة
وتصبر شوية مع اللى بيعلمك خصوصا لو انت حاسس بالإستفادة من المعلم ولو حاسس انه تعبان على طول تغيره ... ومافيش داعى تدفع له حسابه بالكامل ... لان جربه الاول حصة او حصتين ... لو وجدته انسان فاهم وبيوصل المعلومة كويس ... خلاص استمر معاه ... لو وجدته تعبان وعصبى وموش فاهم حاجة ... على طول غيره بواحد تانى

المهم تاخد معاه حصص كثير قوى ... مافيش اى مشاكل
المهم انك بعد التدريب
تنزل الشارع معلم
وبمنتهى الثقة تركب اى عربية تعجبك ... جديدة ... قديمة ... مانيوال ... اوتوماتيك ... مافيش اى مشاكل
وطبعا هاتحافظ عليها لانك هاتكون اتعلمت كويس جدا
لكن التعليم الكويس هايحتاج فلوس ... وهايحتاج صبر ... وهايحتاج حصص كثير
سيبك من اللى بيقول خد لك 5 او 6 حصص واتعلم على الباقى على عربيتك

لا طبعا

فانوس واحد من عربيتك .... بثمن الكورس المحترم اللى كان لازم تاخده
مراية واحدة من عربيتك ... بثمن الكورس
يعنى من الآخر ... تاخد 20 حصة او اكثر اذا لزم الامر ... وطبعا موش على عربيتك حتى ولو تعدى ثمن التدريبة الـ 500 جنيه او اكثر


والنتيجة إن شاء الله هاتكون ممتازة

المهم آخر حاجة تركبها عربيتك ... بعد ما تكون وصلت الى مرحلة ممتازة
مافيش خوف
فيه ثقة
فيه تركيز
فيه فهم وعلم
وشعور جيد ومافيش اى رهبة
وكل شىء يكون تمام التمام

وكل سنة وحضرتك طيب
مع اطيب التمنيات
اخوكم حسين غزالة

بسم الله الرحمن الرحيم


تغيير المكان من حارة الى حارة اخرى

قبل تغير مكانك من حارة الى حارة اخرى يجب ان تراعى التالى:

- اختيار الوقت المناسب لنقل السيارة الى حارة اخرى ... يعنى موش بمجرد انك فكرت تنقل سيارتك الى حارة اخرى ... تقوم تنقل سيارتك على طول او فى اى وقت

- المفروض انك لا تخفض من سرعة سيارتك اثناء الانتقال من حارة الى اخرى ... فى الحالة دى سوف تصطدم السيارات المسرعة من الخلف بسيارتك .... لازم تجارى سرعة السيارات فى الحارة التى ترغب فى الانتقال اليها .... تلاحظ ان الكثير من المشاكل تكون بسبب ان السيارة التى دخلت امامك من حارة اخرى ... كانت تسير بسرعة بطيئة ومرة واحدة تظهر امامك فى الحارة التى تسير فيها .... وتنتظر ... وتضرب كلاكسات ... ياعم اتحرك .... ههههههههه ... يا عم اعمل معروف .... هههههههههههههه ابوس ايدك ... "شد شوية" الله يكرمك ... وفى الآخر "بوووووووووووووم" يحدث الغير متوقع اصطدام من الخلف ... كل ده لان الباشا على سبيل المثال نقل نفسه فى حارة سريعة وهو اساسا ماشى بطىء .... وينظر فى المراية لا يجد اى سيارة خلفه ... ومرة واحدة وفى ثانية واحدة تجد سيارة مسرعة جدا خلفك ... ولا يتوقع احد انه يجد سيارة بطيئة اساسا تسير فى هذه الحارة ... والنتيجة مؤسفة ... والسبب قد يكون عدم م وجود خبرة ... او الاستاذ بيتكلم فى الموبايل ومشغول ... او اى حاجة سخيفة من اللى انتم عارفينها



- لازم تفحص حركة المرور حول سيارتك ... خصوصا فى المنطقة العمياء من السيارة ... انظر جيدا قبل ما تنقل نفسك ... لو كنت مافيش عندك المقدرة انك تنظر كويس ... خلاص استعمل مراية صالون بزاوية واسعة شوية ... هاتريحك وهاتظهر لك كل اللى بيحصل حوالين عربيتك ... واحترس كل الحرس من الموتسيكلات اللعينة .... خصوصا ان اصحابها اولاد صغيرين ... وعديمى الخبرة ... ودائما يسيروا بالموتسيكلات يا فى نص الشارع او فى الحارة اليمين ... يسيروا بسرعة وبدون تفكير ... ويضرب لك كلاكس بجوارك فقط .... ويعتقدك انك سوف تلاحظه بسرعة .... يا ريت تشغل "اذنك" شوية ... واول ما تسمع صوت الموتوسيكل اللعين ... حاول توسع له شوية عشان يبعد عنك ... خصوصا انه ماشى على عجلتين ... واى خبطة لا قدر الله هاتكون مشكلة


- استخدم الإشارة المناسبة .... لكن مهم جدا انك بعد ما تستخدم الإشارة ... مهم جدا انك تنتظر شوية ... وتنظر فى المرايات جيدا وتشوف "رد فعل" السيارات القادمة من الخلف ... هل عملوا حسابك ... وشايفين اشارتك جيدا ... فى الحالة دى انقل نفسك الى الحارة الاخرى بدون تردد .... لكن مهم جدا انك تعرف ايضا ... انه ليس معنى انك استخدمت الإشارة ... ان موقفك سليم ... هههههههههههه وان الإشارة لا تعفيك من المسئولية عن الخطأ لو وقع لا قدر الله.


- انقل نفسك بهدوء الى الحارة الاخرى ... وبدون حركات مفاجئة ... ولكن الافضل انك تزيد سرعتك تدريجيا ... حتى توسع او تزيد من المسافة بينك وبين السيارة القادمة من الخلف.




اتمنى ان اكون وفقت
مع اطيب التمنيات
اخوكم حسين غزالة