نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

**lela** · 07-07-2011 01:06 PM

انا متشكرة يا A.saad على مشاركتك ليا وعلى فكرة فى صديق لى قالى على اولاد سليمان فى شارع وادى النيل وان شاء الله هروح واشتريها منه النهاردة متشكرة جدااااا ليك وفرصة كويسة لمعرفتك

**husseinoo** · 12-07-2011 03:28 PM

بسم الله الرحمن الرحيم
اللهم صل على محمد وعلى آله وصحبه أجمعين

النزول الى الشوارع الرئيسية

للحصول على الموضوع
ابحث عنه فى موقع 4shared

استخدم النص التالى فى البحث:
النزول الى الشوارع الرئيسية

مع اطيب التمنيات
اخوكم حسين غزالة

**husseinoo** · 14-07-2011 01:51 PM

المشاركة الأصلية كتبت بواسطة lela

ازيك يا استاذ حسين اخبار حضرتك ايه

اهلا وسهلا بحضرتك

نصيحة النزول الى الشوارع الرئيسية مهمة جدا وانا على فكرة بعمل اللى حضرتك بتقوله ده علشان انا لسه مبتدئة فى السواقة بحاول اخد بالى كويس وانا بسوق ومن التقاطعات

هو فيه فرق بين ان الواحد يكون جرىء ... وبين ان الواحد يكون فاهم ... اللى فاهم بيشوف بعينيه ويحلل الموقف ويتخذ القرار السليم ...
يعنى مثلا: لو انا شايف ان فيه عربية قادمة ومسرعة فى الحارة اللى انا ناوى انزل فيها
ببساطة هاكبر دماغى ... واصبر شوية
حتى ولو كان ورايا الرئيس المخلوع ههههههههههههه

اما لو شاهدت ان السيارة القادمة بعيدة عنى ... على طول هانزل الشارع الرئيسى ولكن بجوار الرصيف
وعملية انك تنزل بجوار الرصيف هههههههه وماتطلعشى بالعربية على الرصيف ههههههههه او تخبط اى عربية راكنة صف تانى ... او اى مشاة فى الشارع

كل ده فى لحظة واحدة
محتاجة ان اللى سايق يكون نظره سريع ... وخاطف
يعنى موش يفضل ينظر الى السيارة القادمة ... وينزل الشارع الرئيسى ... هههههههه ومرة واحدة يفاجىء بأى حاجة فى الشارع

طبعا الموضوع ظاهره سهل ... ده بالنسبة للناس القديمة فى السواقة
لكنه خطير جدا ... بالنسبة للناس الجديدة

اهم حاجة الاتزام بجوار الرصيف

بس ده دائما مش بيعجب الناس الل وراك انا من يومين خرجت بالعربية بعد ما اشتريت البطارية الجديدة

مبروك على البطارية
يا ترى نوعها ايه ؟
كام امبير ؟
سعرها كام ؟
الضمان مدته اد ايه ؟
ومنين اشترتيها ؟

وانتظرت واحد كان خارج من البنزينة لكن واحد كسر على ودخل فى النص ومستناش حد لكن صاحب العربية كان مبسوط انى انتظرته وقالى عشرة على عشرة كنت مبسوطة ان فى حد قدر اللى عملته عكس غيره اللى ممكن يشتم ويغلط

طبعا انت اتصرفت صح جدا
وكل ما يقابلك مواقف وتتصرفى فيها بحكمة وصح ... كل ما ثقتك فى نفسك تزيد
وكمان الواحد بيكون سعيد قوى .. لما قائد السيارة الآخر يقدر لك موقفك ويشكرك عليه ... ده بيعطى لك احساس ان انسان عاقل وبتفهم ... وان الدنيا موش هاتطير ... وطول ما انت ماشى فى شوارع المحروسة لازم يكون عندك صبر وعقل فى نفس الوقت

لكن فيه فرق بين
انك تكونى ماشية فى الحارة الاولى ... فى الحالة دى لو انا شايف ان فيه فرصة للسيارة اللى خارجة من البنزينة انها تخرج الاول ... عادى هاكبر دماغى ... وهاحط دماغى فى الثلاجة هههههههه واصبر شوية
وكمان اشاور له بإيدى ... عشان اشجعه على النزول بسرعة وبدون خوف

اما لو كنت ماشى فى الحارة التانية
يبقى هنا مافيش داعى لكل الإجراءات دى
كل اللى هاعمله
انى هاضرب له كلاكس عشان يحترس شوي
ورجلى هاتكون فوق الفرامل وجاهز للتوقف
وعينية هاتكون مصحصحة للعربية اللى خارجة من البنزينة
واضع احتمال ان العربية وهى خارجة من البنزينة موش هاتلتزم بالسير بجوار الرصيف .... بسبب انه سائق جديد او عربيته جديدة وقوية وهو فرحان بها وشايف انه هايقدر يجرى بها زى الصاروخ

وممكن كمان انظر فى المراية اللى فى الصالون
لو وجدت ان فيه فرصة انقل نفسى فى الحارة اليسرى بعيدا عن مشاكل السيارات اللى خارجة من البنزينة ... طبعا يكون افضل واحسن للجميع

كل ده بالممارسة
المهم انتقل الى اى حارة بهدوء وحرص شديد جدا ... واذا كان مافيش فرصة للابتعاد عن مخرج البنزينة ... يبقى الافضل التوقف عن انى اسبب مشاكل للسيارات القادمة من الخلف

وربنا هو الستار فى الاول والآخر

وشكرا لنصائحك الجميلة

شكرا لحضرتك على مشاركتك الجميلة
اللى عن طريقها فى كثير من الاصدقاء بيستفادوا اكيد من الكلام ده
وياريت نسمع من حضرتك كل جديد

مع اطيب التمنيات
اخوكم حسين غزالة

**husseinoo** · 15-07-2011 06:54 PM

المشاركة الأصلية كتبت بواسطة lela

اذيك يا استاذ حسين اخبار حضرتك ايه يا رب تكون بخير وكل عام وانت بخير بمناسبة شهر رمضان الكريم اعادة الله علينا جميعا بالخير والبركات ولكل اعضاء نايل موتورز

بالنسبة للبطارية انا اشتريتها واسمها supereme ونوعها كورى بس بيبقولوا نوع نظيف والله اعلم لانها حظوظ وانا عارفة حظى ههههه واشتريتها من موزع ليها قريب من البيت عندى علشان يبقى الكشف الدورى سهل عليها
وهى بمبلغ 360 جنيه بالبطارية القديمة بعد ما خصم حوالى 70 جنيها منها وضمانها سنة مجانى وشكرا لسؤال حضرتك وربنا يسهل وما يحصلش فيها اى حاجة على فكرة البطارية 70 امبير ده مشكلة لان العربية عندى 1600 سىسى ده مناسشبة ليها ولا ايه وشكرا

كل سنة وحضرتك طيبة واعضاء نايل موتورز

70 امبير مناسبة جدا لعربية قوتها اكبر من 1300 سى سى
طيب انت ماقلتيش هى البطارية دى جافة ولا لأ

على العموم هو نوع اول مرة اسمع عنه
لكن اعتقد ان اى نوع جديد لسه نازل ... بيكون ممتاز إن شاء الله

وبعد ما الناس ما تعرفه كويس ... هههههههههه تظهر البشائر

المهم ربنا يبارك لحضرتك فيها

وشكرا على الرد

مع اطيب التمنيات
اخوكم حسين غزالة

**husseinoo** · 19-07-2011 03:26 PM

بسم الله الرحمن الرحيم
اللهم صل على محمد وعلى آله وصحبه أجمعين

تغيير مكانك من حارة الى حارة اخرى

تغير مكانك الى حارة اخرى يجب ان يتم فى توقيت مناسب ... بمعنى ان بعض السائقين الجدد .. بمجرد ما يفكر فى تغير مكانه الى حارة اخرى ... على طول ... يلف الدركسيون وينقل نفسه الى الحارة الاخرى ... ههههههههههه اكنه ماشى فى الشارع لوحده

اخطر حاجة ممكن تحصل اثناء تغير مكانك من حارة الى حارة ... انك تهدى سرعتك بشكل مفاجىء ... وفى نفس الوقت بتحرك عربيتك الى حارة اخرى ... طبعا النتيجة ان السيارات القادمة من الخلف ... فى الغالب لازم هاتصطدم بسيارتك ... والافضل هنا انك تنقل نفسك وانت بتجارى السيارات الاخرى فى سرعتها ... بالطريقة دى السيارات القادمة من الخلف لن تفاجىء بتوقفك امامها بشكل خطير

وطبعا لازم تنظر جيدا فوقك كتفك .. يعنى تحاول تلمح السيارات القادمة بجوار عربيتك ... تقريبا عند الباب الخلفى لسيارتك .. تحاول تنظر نظرة خاطفة على المنطقة العمياء التى لا تظهر فى المراية ... الكثير من السائقين الجدد لا يعلموا اى شىء عن مصطلح المنطقة العمياء ... وببساطة احب اوضح لهم ان المقصود بالمنطقة العمياء المنطقة التى لا تظهر فى مراية السيارة ... يعنى ببساطة ممكن تلاقى عربية ماشية بجوارك وانت موش شايفها فى المراية ... عشان كده لازم تنظر بعينيك على المنطقة الخلفية لعربيتك قبل ما تنقل نفسك من حارة الى حارة .... والحل المثالى للمشكلة دى ... انك تستخدم مراية صالون كبيرة او زاويتها واسعة .. المراية دى هاتوضح لك كل ما يدور حول عربيتك وهاتريحك كثير جدا.

استخدم الاشارة قبل التحرك الى حارة اخرى ... لكن لازم تنتظر شوية بعد استخدام الإشارة ... وتشاهد مدى استجابة السيارات القادمة من الخلف ............. هههههههه يعنى موش معنى انك استخدمت الإشارة انك تنقل نفسك الى الحارة التالية بسرعة ... لأ ... استخدم الإشارة ثم انتظر قليلا ... راقب السيارات القادمة من الخلف ... واذا ظهرت لك فرصة انقل نفسك بهدوء الى الحارة التالية

انقل نفسك بهدوء الى الحارة التالية ... ومن الممكن زيادة سرعتك قليلا اثناء الانتقال الى الحارة التالية .. ذلك لزيادة المسافة بينك وبين السيارات القادمة من الخلف و حتى لا تسبب مشاكل للسيارات القادمة من الخلف

انظر الى الصورة التالية

وفيها يتم تلخيص مراحل الإنتقال الى حارة تالية:

1- التأكد من وجود مساحة خالة من السيارات وآمنة ... يعنى لم الاقى مكان فى الحارة التالية ... الاقى مكان فاضى وواسع ... ابدأ فى الإنتقال اليه ... يعنى موش معقول تبقى الحارة التالية مليئة بالسيارات وانا مصمم انقل نفسى فيها بالعافية كده يبقى غلط

2- استخدم الإشارة وابدأ فى فحص المنطقة العمياء كما هو موضح فى الصورة الاولى .. عشان اشوف العربيات الموجود عند العجل الخلفى لعربيتى ... ويفضل الفحص يكون بالنظر من فوق كتفك

3- التحرك بشكل تدريجى وهادىء ... يعنى حتى ولو كان كل شىء تمام التمام ... لازم تنقل نفسك بشكل تدريحى وهادىء ... لأن فى لحظة واحدة يظهر لك شخص موش طبيعى وتلاقيه فوق دماغك ... لا قدر الله لو فيه حاجة انت لا تراها .. على طول او على الأقل هاتسمح كلاكس تحذيرى ... على طول تعدل نفسك وتأجل عملية الإنتقال وتشوف الكلاكس ده منين وايه السبب ؟

4- خلاص ما دام انتقلت الى الحارة التالية بشكل آمن ... يبقى مافيش داعى انسى الإشارات شغالة ههههههههه لازم اتأكد من انها توقفت ... الكثير من المبتدأين من شدة الخوف ... ينسى الإشارة تماما هههه ويفضل مركز فى العربيات فى الشارع .. وموش عارف انه عامل لخبطة بمقتاح الإشارة اللى هو ناسيه شغال

ارجوا ان اكون وفقت
مع اطيب التمنيات
اخوكم حسين غزالة

**husseinoo** · 20-07-2011 02:45 AM

المشاركة الأصلية كتبت بواسطة lela

ازيك يا استاذ حسين اخبار حضرتك يا رب تكون بخير

الحمد لله ازاى حضرتك وكل سنة وحضرتك طيبة

موضوع تغيير المكان من حارة لاخرى ضرورى جدا بس المشكلة ان احنا فى مصر مش بناخد باداب المرور والتزام كل سائق بالحارة الخاصة به

ده حقيقى ... لكن معلهش هو بيختلف من مكان الى مكان
يعنى كل ما اقترب من مصر الجديدة الاقى عملية القيادة اسهل شوية حتى ولو فيه زحام ... لان الناس هناك الى حد ما ما بيتصرفوش بشكل عشوائى ... ده طبعا باستثناء الكثير من سائقى الميكروباس والمينى باص والتاكسيات البيضاء

انا مثلا بيحصل معايا ان من الممكن وانا فى الطريق يكون فى مسافة بينى وبين العربية اللى امامى فجاءة ومن غير اى تنبيه الاقى واحد داخل بعربيته فى المسافة اللى بينى وبينه ويبقى مضايق منى انى سايبة مسافة بالرغم انه مفروض ترك مسافة

هههههههههههههه عندك حق ... هو المفروض طبعا انك تتركى مسافة لمصلحتك ولمصلحة السيارة التى امامك ... حتى ولو كنتى ماشية بشكل بطيء لازم تتركى مسافة كافية على الاقل متر او مترين ... مافيش اى مشاكل
شوفى لو كنتى ماشية بشكل بطيء انظر من خلال زجاج السيارة التى تسير امامك ... انظرى من خلال الزجاج على السيارة التالية ... عشان تقدرى تتحركى بشكل اسرع شوية ... وتقدرى تتوقعى ان السيارة التى امامك متى سوف تتوقف ومتى سوف تتحرك ... وبالتالى هاتحاولى تمشى وارها على طول وبدون ترك مسافة كبيرة بينك وبينها
فى الاول المبتدأ بيترك مسافة كبيرة قوى بينه وبين السيارة التى امامه .... لكن مع الممارسة بتتعرفى كويس على قدرة سيارتك ... وبتعرفى المسافة التى تحتاجها سيارتك للتوقف فى الوقت المناسب ... بتشعرى بالسرعة المناسبة للسير .... بعد كده .. لن تتركى فرصة لاحد للدخول امامك ... لانه سوف يشعر انك ماشية بشكل جيد جدا

لكن لو كانت سيارتك مثل حالاتى ... سيارة قديمة بعض الشىء ... يبقى الطبيعى انى مازعلش لو دخلت امامى عربية حديثة ... لانه اسرع ... مع ان الحركات دى موش هاتقدم ولا هاتأخر لكن موش مشكلة
اتركى دماغك فى الثلاجة ... وهدى اعصابك على قدر الامكان

اما الاشارات فهى ضرورية بس الواحد مننا يفتكرها ويرجعها يقفلها المشكلة اننا مفيش حد بيستنى على حد الكل مستعجل وعايز يجرى وميهموش اذا كانت واحدة بتسوق غير الالفاظ اللى بتتقال

هههههههههه طيب هاقول لحضرتك حكاية حصلت معايا امبارح ... وانا راجع مع الاسرة وفى ميدان المطرية مساء قبل ماتش الاهلى ... ومتوقع ان الطريق حتى مصر الجديدة هايكون خالى وفاضى
لكن المفاجأة ان الميدان كان فيه زحمة رهيبة جدا
ومافيش اى شرطى مرور خالص
حاجة آخر لخبطة
المهم ان الطريق الجانبى كان خالى وفاضى
وفيه بعض السيارات محتاجة تدخل فى الطريق ده
وانا لو دخلت وراء العربيات التى تسير امامى ... سوف اتوقف مده طويلة وكمان هاقطع الطريق على العربيات التانية
بدون تردد وقفت
والعربيات دخلت فى ثوانى بشكل طبيعى
وبعدين استكملت السير متر ولا مترين ... الدنيا كلها واقفة
واللى ماشى ورايا عمال يضرب فى كلاكسات
والناس كلها عمالة تستغرب ... هو صاحب العربية دى مجنون ولا ايه ؟

وبعد قليل ... الاقى صاحبها شاب عمال "يزعق" ويقول لى: امشى يا عم الحاج ... يا عم الحاج امشى ههههههههه
انا ماحستش بنفسى
روحت مزعق فيه بشكل رهيب
وقلت له : اتفضل يا خويا امشى ... شغل الهليكوبتر وامشى فوق العربيات اللى امامنا ... انت شايف فيه منفس لعربية
المهم دخل امامى
روحت ضارب له كلاكس
وقلت لام الاولاد: احرق دمه ... واضرب له كلاكسات عشان اعقده شوية ... هو موش عامل فيها عشر رجالة ... يورينى هو هايمشى ازاى
سائق التاكسى اللى جانبى .. كان راجل متدين وملتحى ... بص لى وقال لى : معلهش ... كبر دماغك
الحمد لله انا هديت بسرعة
لكن انت عندك حق ... فيه ناس كثير مجانين ... وموش لازم يركبوا عربيات خالص ... دول مكانهم الطبيعى حتة تانية
والافضل ان الواحد يحاول يهدى اعصابه على قدر الامكان
لان العملية موش ناقصة ... ان بعد كل مشوار ... نرجع الشغل او البيت "متعكننين " ومتضايقين

كلام حضرتك جميل جدا اتمنى اننا نعمل بيه بس مين اللى هيعمل

طبعا فيه ناس كثير محترمة بتعمل به ... لكن للاسف فيه كثير قوى ... مايستهلوش انهم يطلعوا رخصة من اساسه ... إن شاء الله لو رجع الامن لحالته الطبيعية ... وعرف انه اتعمل عشان الناس وعشان سلامة الطريق ... كل الاشكال دى هاتختفى من حياتنا بإذن الله
وربنا يسهل ومصر الحبيبة تكون فى احسن حال

مع اطيب التمنيات
اخوكم حسين غزالة

الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

LinkBack

أدوات الموضوع

عرض

-

-

-

-

-

المواضيع المتشابهه

الى احلى اعضاء تعالو نقعد مع بعض شوية ....(موضوع جديد)..

يوميات سائق جديد ؟!

ارجو النصيحة لوجه الله انا لسه متعلم السواقة جديد اشترى مستعمل ولا جديد؟

استفسار من سائق جديد فى الغيارات

جديد في السواقة؟ اجيب جديد ولا مستعمل

الكلمات الدلالية لهذا الموضوع

المفضلات

المفضلات

ضوابط المشاركة