والله دى هاتكون اجمل مشاركة
لانها من واحد اتعلم بالاعتماد على نفسه
يعنى الجميع سوف يستفيد إن شاء الله
شاكرين جدا لحضرتك
وفى اتظار سماع آرائك وافكارك القيمة
فى رعاية الله
مع اطيب التمنيات
اخوكم حسين غزالة
بالأمس كنت نازل اشترى اكرة للعربية من الوكالة
المهم وجدتها
وبعد ما ركبتها ماعرفتش اركب "التيش" او السيخ المسئول عن فتح الباب
المهم رحت لبتاع الابواب هههههههههههههه
الراجل ماكنش موجود
ابنه بالصلى على النبى
فتح الباب وفى خمس دقائق كان مركب الأكرة
عايز كام يا استاذ
طلب 10 جنيه
قلت مافيش مشكلة
طيب ممكن نغير كاوتش الزجاج
او نتأكد انه مابيسربش مياه
قال لى: اللى عنده الكاوتش فلان الفلانى
يعنى من الآخر موش عايز يتعب نفسه
عشان اوريكم شغل الصنايعية
ماشى النهاردة
وجدت الاشارات بطلت تشتغل
قلت ايه الحكاية دى
امبارح عداد البنزين هبط لتحت الصفر
وعداد الحرارة هبط هو كمان اكن العربية خارجة من الثلاجة
حاولت افك الكونتاكت انا واخويا
وجدت ان الموضوع موش سهل
قلت له نروح لكهربائى وخلاص انا زهقت
رحت للكهربائى
الكهربائى عايز يريح دماغه
يقول لك: روح بيها عند بتوع قطع الغيار وغيره هناك عشان لو اشتريت كونتاكت وطلع بايظ تلحق ترجعه
هههههههههههههه
يعنى من الآخر الراجل موش عايز يتعب نفسه فى الفك والتركيب ووجع الدماغ
عايز الشغل السهل وخلاص
قلت لاخويا: نروح لكهربائى تانى "كنت ضبط عنده الفوانيس والانوار"
رحت للراجل وقلت له على عدادات البنزين والحرارة والاشارات
الراجل فى ثوانى طلب مفك
وراح نزل فى الدواسة
وفك غطاء من احد الاجناب
والمفاجأة
ان تحت الغطاء ده كان فيه علبة فيوزات
وعمرى ما كنت اعرف ان فيه فيوزات اضافية غير الموجودة داخل حوض الموتور
غير الفيوزات فى ثوانى
عايز كام
10 جنيه
نفس الحكاية هههههههههههههههههههه
المهم وانا ماشى
كل حاجة شغالة تمام
افتح الباب
وجدت نور الصالون اشتغل
وجدت لمبة بيان بتنور لما المروحة بتشتغل
الحاجات دى ما كانتش بتشتغل الاول
قلت يا مسهل
لعل المشكلة تكون فى الفيوزات والواحد يرتاح من حوار الكونتاكت ده
تحت دواسة الدبرياش
وجدت بعض الزيت خفيف
بكره ان شاء الله
هاغسل العربية كويس
وهامسح الزيت
وهاشيك على زيت الدبرياج
لانى عرفت انه لو الزيت نقص جامد الدبرياج هاياخد هواء ومرة واحدة هالاقى دواسة الدبرياج على الارض
وطبعا العربية موش هاتتحرك
بعد فترة هاتابع
لو فيه زيت بيتسرب لسه
يبقى لازم اكيد زى ما عرفت ان كاوتش ماستر الدبرياج يتغير
فيه ناس قالت لى: ده موضوع بسيط وياخد 10 دقائق لكن مهم جدا
معلهش الحاجات دى ملهاش علاقة بالسواقة
لكن حبيت اقولها
عشان المبتدئين اللى زى حالاتى
لازم يعرفوا اهمية فحص علبة الزيت الخاصة بالدبرياج وعلبة الزيت الخاصة بالفرامل وكمان فحص المياه داخل الراديتير وزيادتها بالمياه الخضراء
لكن النهارده زودت الرايديتير مياه عادية من الحنفية
وقلت كفاية مياه خضراء عمال على بطال ممكن "تاكل" الراديتير
يعنى اعتقد ان المياه الخضراء موش لازم كل مرة تزود منها على طول
شوية كده وشويه كده
ولا ايه رايكم ؟
وطبعا فى المشى البطىء والحرارة العالية لازم الواحد يراقب ويتأكد ان المروحة شغالة وعينه على عداد الحرارة باستمرار
لسه من شوية واحد صاحبى قال لى: ان اخوه كان مهمل فى عربيته "لادا" وكانت العربية زيرو
تخيلوا ان الموتور "انكسر" واضطر انه يغيره بالكامل وركب موتور "ريجاتا"
كل ده بسبب الإهمال
فيه راى بيقول "لا تنتظر على اى شيىء يظهر فى السيارة"
بعد شوية العربية "هاتتكهن"
وفيه ناس تانية بتقول "موش كل حاجة تجرى على الميكانيكى" ما دامت العربية ماشية
هههههههههههههههه
ايه رايكم فى الكلام ده كمان ؟
وربنا يسترها مع الجميع
مع اطيب التمنيات
اخوكم حسين غزالة
أولا أنا من المبتدئين اللى انت بتفيدهم بالدوره الجامده دى :verygood:
ثانيا لو تعرف مقدار إمتنانى ليك وإحساسى إنك هيبقى ليك فضل جامد جدا فى تعليمى السواقه باللى كتبته فى الصفحات السابقه مش هتصدق أنا لسه داخله النهارده على الموضوع وبجد إنت كاتب كل حاجه بالثانيه واللحظه أنا لسه مجربتش الكلام ده عملى ومن بكره إن شاء الله هنسى كل اللى إتعلمته فى مدرسة السواقه :shyy:(هو كده كده إتنسى لأنهم بيعلموك تدوس إزاى وخلاص مش بيوصلو المعلومه زى ماانت عامل كده) وكإنى أول مره هاسوق عربيه وأنفذ اللى بتقوله ومن أهم المشاكل اللى انت حليتها بسلاسه جدا حكاية الدبرياج :majd(4):وأتعود عليه إزاى وأخفف قد إيه .
بجد مش عارفه أقولك إيه ربنا يحقق لك كل اللى تتمناه :B4_388:
ثالثا أحلى حاجه فى اللى بتكتبه برضه بتعلم فى النص الحركات الروشه الجريئه زى حكاية تنطيط العربيه مثلا :B4_388:
رابعا أنا لى عندك رجاء نفسى على ايديك الواحد يوصل لدرجة الإحتراف - السواقه المجنونه (طبعا بالمقرده على التحكم ) الغرز فى الطرق بس ده طبعا مش دلوقت فياريت ماتسيبش الموضوع ده خالص :ask:
خامسا وده أهم حاجه أنا جيبت الprenter (الطابعه) وطبعت الموضوع علشان أخلى الورق فى العربيه وأنا باتدرب ولما أحتاج لحاجه أبص على الورق :driving::hurray::prove:
ومستنيين جديدك ومتشكره جدا ليك وطبعا ميرسى جدا لصاحب الموضوع الأصلى اللى أتاح لنا الفرصه للتعرف بيك وللإستفاده من معلوماتك الدقيقه والقيمه :satelite:
السلام عليكم ورحمة الله وبركاته
والله الواحد بيكون سعيد كل يوم اجد فيه حد يستفيد معايا من المشاركات دى
واتمنى من اخوانا فى المنتدى اللى عندهم خبرة جامدة فى موضوع القيادة انهم يشاركوا معانا بعلمهم ومعرفتهم عشان نستفيد كلنا
والاهم ربنا يسترها مع الجميع
انا جت لى فكرة بسيطة عملتها
عبارة عن موقف رسمته على الكمبيوتر وعايز بعض الإجابات عليه
http://www.nilemotors.net/Nile/attac...1&d=1270298465
هاسأل بعض الأسئلة وارجوا من حضراتكم الإجابة:
1- افرتض ان السيارة الخضراء ترغب فى الاتجاه على طول وهى نازلة اصلا من على كوبرى
ايه اللى المفروض يعمله السائق ويراعيه فى الموقف ده
2- افترض ان السيارة الخضراء ترغب فى الدخول على اليوتيرن
3- افترض ان السيارة الصفراء ترغب فى الدخول على اليوتيرن
4- افترض ان السيارة الصفراء ترغب فى السير على طول
5- افترض ان السيارة الحمراء ترغب فى الاتجاه الى اليمين طوالى
6- افترض ان السيارة الحمراء ترغب فى الاتجاه الى اليمين ثم الى اليوتيرن
7- افترض ان السيارة الحمراء ترغب فى الاتجاه الى اليمين ثم الانتقال الى الحارة اليسار
ملحوظة هامة:
طبعا انا ذكرت ان ده منزل كوبرى يعنى العربية نازلة بسرعة
وفيه عربيات احيانا تركن صف ثانى وعلى الناصية "سورى حاجة فى منتهى الغباء"
لو فيه اى سؤال تانى انا ماكتبتوش يا ريت نشارك كلنا عشان نتعلم مع بعض
وشاكر مقدما كل الاصدقاء المشاركين فى الموضوع ده
على فكرة موقف السيارة الخضراء ده حصل معايا بالأمس وكنت نازل من على الكوبرى وكان بجوارى سيارة ميكروباس بتجرى بسرعة ومرة واحده وجدت اليوتيرن وكمان عربية داخله عليه زى الرسم بالضبط
المهم ربنا ستر
فى انتظار التواصل
وإن شاء الله بعد الإنتهاء من الموضوع ده
لو حقق نجاح وقبول
هارسم لكم مواقف تانية بتقابلنى كل ما اخرج بالعربية
مع اطيب التمنيات
اخوكم حسين غزالة
انت برضه ياأستاذ حسين عليك شوية أسئله بجد :shine[1]:بتدل على إنك إن شاء الله هتبقى سواق محترف بجد :shyy::verygood: وحاسه كده إن شاء الله إنك قريب جدا اللى هتقولنا نعمل إيه علشان نسوق كويس (ده باين جدا من أسئلتك الموضوعيه جدا ) ماشاء الله اللهم لاحسد ربنا يوفقك وتساعدنا على تخطى التعليم بسرعه للأمام:36_1_34[1]:
1- افرتض ان السيارة الخضراء ترغب فى الاتجاه على طول وهى نازلة اصلا من على كوبرى
ايه اللى المفروض يعمله السائق ويراعيه فى الموقف ده
يدى اشارة يمين
يراعى اللى نازل من يمينه وهوة بيكسر يمين ويراعى اللى بيدخل من يمينه يروح اليوتيرن
او ميكسرش يمين ويدى الاشارة ويكمل ويكون متاهب لو اظطر يهدى سرعته
2- افترض ان السيارة الخضراء ترغب فى الدخول على اليوتيرن
يدى اشارة شمال ويحاول ياخده على الضيق لان اللى فى الحارة اللى يمينه غالبا هياخده على واسع
3- افترض ان السيارة الصفراء ترغب فى الدخول على اليوتيرن
المفروض يحاول يكسر شمال من بدرى
بس قانونا ممنوع التجاوز والتخطى على الكوبرى
يعنى الفضل انه ياخد شمال من اول ما يطلع الكوبرى
طيب لو معرفش
يدى اشارة شمال
ياخد باله من اللى فى شماله
4- افترض ان السيارة الصفراء ترغب فى السير على طول
دى اسهل
يحاول يبعد عن اليوتيرن لو زحمة علشان ما يتعطلش او حد يكسر عليه يزنقه
ممكن ياخد الحارة اللى على يمينه
5- افترض ان السيارة الحمراء ترغب فى الاتجاه الى اليمين طوالى
دى مشكلتها ان سرعته هتكون ابطأ من اللى نازل من الكوبرى
فلازم يبص فى مرايته كويس على اللى جاى من الشمال وما يدخلش عليه حارته ويحاول ياخد يمينه
6- افترض ان السيارة الحمراء ترغب فى الاتجاه الى اليمين ثم الى اليوتيرن
لو المسافة قصيرة وفيه عربيات كتير مسرعة
انصحه ياخد اليوتيرن اللى وراه
او يدخل على واسع مع ملاحظة اللى جاى من الكوبرى وماشى طوالى وبرده يدى اشارة
7- افترض ان السيارة الحمراء ترغب فى الاتجاه الى اليمين ثم الانتقال الى الحارة اليسار
الافضل اما تغير الحارة تدى اشارة للى وراك لان ممكن يكون فى المنطقة العميا او بيحاول يزيد سرعته
ويفضل يغير حارته اما ياخد سرعة مناسبة للى نازل من الكوبرى مش وهو ليه بطيء وطبعا ده كمان يتعمل بعد اليوتيرن
اتمنى اكون افدت
الله يكرمك يا رب على كلامك الجميل ده
والله ده كثيير عليا قوى
بالنسبة لموضوع القيادة ده
اعتقد انه مالوش كبير
يعنى كل يوم الواحد بيتعلم حاجة
لكن الافضل انه يتعلم بالأصول والعلم والمعرفة وليس بالتجربة والخطأ
ان الواحد يفهم المشكلة ويفهم الحل وليه بنعمل كده وليه مانعملش كده
حتى الآن اشاهد ناس واضح انها قديمة فى موضوع القيادة ده ورغم ذلك بعيملوا حاجات غريبة فى الشارع
النهارده بعد عرض الرسم التوضيحى لاحد المشاكل
كنت سعيد جدا لما قرأت مشاركة العضو الذهبى A saad وقرأت اجاباته
الاول انا بشكره جدا
واتمنى ان لو فيه اصدقاء آخرين لهم آراء تانية فى الرسم التوضيحى
يا ريت نعرف رأيهم ايضا
هو فيه بعض الملاحظات انا عرفتها من نفسى:
بالنسبة للسيارة الخضراء التى ترغب فى السير على طول
كان الأفضل انه يلتزم الحارة التى على اليمين على الكوبرى من الأول
عشان وهو نازل يبعد اصلا عن مشكلة اليوتيرن
وياريت نسمع كلام عن موضوع النزول من على الكوبرى
لان بصراحة اللى انقذنى من الأزمة دى انى نزلت من على الكوبرى ورجلى على الفرامل وكمان بسرعة بطيئة ... لأنى عارف ان النزول من على الكوبرى يغرى السائق بالجرى
والعربية بيكون صعب التحكم فيها
وحصل اللى انا متوقعه
ياريت نعرف بعض التفاصيل
اكيد فيه آراء قيمة بالإضافة الى مشاركة الأستاذ saad
بالنسبة للعربية الحمراء التى ترغب فى الدخول الى اليمين
الموقف ده حصل معايا برده
وعملت مشكلة بسبب انى دخلت الملف على الضيق
وفوجئت بعربية راكنة صف ثانى
من ساعتها اتعلمت التزم الحارة اليسرى وادخل الملف ببطء
طبعا دى موش قاعدة لكن بعمل كده فى الملف ده مخصوص عشان الناس اللى بتركن صف ثانى
لكن الطبيعى انى التزم الحارة اللى على اليمين
وادخل الملف وانا بجوار الرصيف
ده افضل لسلامتى وسلامة الآخرين
لو فيه لا قدر الله عربية راكنة صف ثانى هاعدى منها لكن طبعا هاراعى العربيات اللى نازلة من على الكوبرى
ولا استعجل فى الدخول
ولا اتهور بسبب الكلاكسات اللى ورايا
والدخول بيكون ببطء جدا وملتزم اقص اليمين لو جت فرصة
على العموم انا هاقرأ مشاركة استاذ saad مرة ثانية بشىء من التفصيل
وفى انتظار سماع جميع آرائكم القيمة
مع اطيب التمنيات
اخوكم حسين غزالة
[SIZE="3"]2- افترض ان السيارة الخضراء ترغب فى الدخول على اليوتيرن
يدى اشارة شمال ويحاول ياخده على الضيق لان اللى فى الحارة اللى يمينه غالبا هياخده على واسع
ده كلام ممتاز طبعا
واحب اضيف وده كلام صديقى اللى كان بيعلمنى الاسبوع اللى فات
ان الواحد يدخل بهدوء جدا
وقبل ما يدخل الملف لو العربية ماشية لازم ينقل الغيار الثانى
عشان وهو بيلف مايضربش لخمة بين الدركسيون وبين الفتيس
يبقى عايز يلف بالعربية وكمان عايز ينقل الغيار للفتيس
ويعطل الناس اللى وراه
كده هو بكسب وقت
وان العربية مادامت ماشية الدركسيون هايلف معاه بسهولة وبدون عصبية
ولازم يبص بطرف عينه على العربيات اللى فى الشارع المقابل ... يبص عليها بسرعة قبل ما يدخل على الشارع المقابل
وزى مااستاذ saad ما بيقول لازم تاخد بالك من العربيات اللى بتكون فى الحارة اليمنى اللى داخلة معاك فى اليوتيرن
يعنى لازم تفضل ملتزم الحارة اللى بتلف فيها عشان لو فيه عربيات بتلف معاك
حتى ولو العربية دخلت الملف .. لازم تفضل ملتزم بحارتك واوعى تنقل نفسك الى حارة ثانية بشكل مفاجىء ... حصلت معايا وربنا ستر ... طبعا ده كله نتيجة السرحان وكمان عدم الخبرة
الخطر فى الموضوع ده هو لو دخل معاك اوتوبيس مثلا فى اليو تيرن
او يكون اليوتيرن ضيق لا يسمح إلأ بمرور عربية واحدة ويظهر لك فجأة سائق تاكسى عايز يعدى من على يمينك ويدخل اليوتيرن قبلك[/SIZE]
كلامك حلو
واحييك الاول على اسلوبك المنطقى والمنظم فى التفكير والعرض
الاتوبيسات دايما خطر
لو بيكسر عليك
بيكسر بغباء وممكن ما يشوفكش اصلا
وزيهم المينى باص خصوصا الاجرة منهم
كمان لو بيدخل شارع تانى - مش مجرد كسر عليك - او بياخد يو تيرن وانت فى اخر اتوبيسه دى مشكلة كبيرة
لان ديل الاتوبيس بيلف جامد ولو شفت مسار الكاوتش على الارض هتلاقيه بعد عن مساره وهوة ماشى طوالى كتير
فلازم تكون بعيد ان ديله وهوة بيلف خصوصا لو انت فى الناحية المعاكسة لاتجاه دورانه يعنى انت على شماله وهوة بيكسر يمين
وكلامى هنا عن منطقة الديل بالذات
وهوة غالبا فى الجزئية دى مش شايفك لانه بيبص على الملف او الشارع اللى بيروحه
4- افترض ان السيارة الصفراء ترغب فى السير على طول
................
انت ممكن تهدى بالاتى
فرامل بس - طبعا مش هتدوس بنزين هنا
دبرياج بس - طبعا مش هتدوس بنزين هنا
الاتنين سوا
تشيل رجلك من البنزين بس
انا بفضل انك تشيل رجلك من البنزين الاول وانت شايف الدنيا بتتزحم قدامك او انك ههتهدى بعدين وطريقتك كوبيسة بس ما تتعودش تمشى دايس على الدبرياج علشان غلط عليه
يعنى استعمله وشيل رجلك
سواء استعملته فى غيار او تهدئة
لان فيه ناس وغالبا السيدات بيسندوا رجليهم وهما ماشيين عادى عليه
باقى كلامك واضافتك احييك عليها