اللهم صل على محمد وعلى آله وصحبه أجمعين
النهارده انا خرجت الصبح الساعة 10 مع صديقى اللى بيعلمنى
المهم انا مشيت معاه بالسيارة وكانت ملاحظاته كالتالى:
قال لى: انت ماشى كويس بس محتاج تمارس يعنى عايزك تمشى بالعربية حوالى 3 ايام كل اسبوع
بالنسبة للاسف ماقدرش امشى بالعربية إلا يوم الجمعة والسبت وصباحا فقط فى الصباح الباكر على ما اتعود شوية ... انا عن نفسى اشعر انى اتحسنت كثيير عن الأول والخوف قل شوية
كمان كانت ملاحظاته
ما دام الشارع فاضى ومافيش حد عامل زحمة معاك او ماشى خلفك .... ورغم ذلك لازم تمشى بالعربية فى احد الاجناب يعنى مافيش داعى انى امشى فى وسط الشارع ... عشان فى لحظة واحدة هاتلاقى عربية وراك فى ثوانى وعايزة تعدى منك ... وانت فى نفس الوقت موش ملتزم بأى حارة فى الشارع
يعنى نرجع تانى للاساسيات موش عشان الشارع فاضى تمشى على مزاجك ... لازم تلتزم بحارة تمشى فيها
كمان لو كان الشارع فيه زحمة فى الحالة دى انت ملتزم بالحارة اللى بتلف فيها موش هاتغيرها
لكن
لو كان الشارع فيه فرصة انك تقرب مثلا من الرصيف عشان هاتدخل ملف يمين او شمال .. ده يكون احسن وافضل انك فى الملف تكون داخل بجوار الرصيف
اما لو كان الشارع زحمة خلاص خليك فى الحارة الثانية وادخل الملف خصوصا لو كان "يو تيرن" والتزم الحارة بتاعتك
قال لى : كمان فيه ملحوظة مهمة
لما تاخد الملف... قبل ما تبدأ تلف لازم تختار الغيار المناسب للعربية ... عشان العربية وهى بتلف ... بتكون فى نفس الوقت بتمشى على طول بدون توقف
الخطأ بالنسبة لى
انى اكون بلف بالعربية وطبعا ماسك الدركسيون وعمال الف
وفى نفس الوقت ماسك الفتيس وعايز اختار الغيار المناسب
الافضل هنا
انى اقترب من الملف ببطء شديد قوى وبحرص جامد
رجلى على الدبرياج "ضاغطة عليه"
رجلى الثانية بتدوس على الفرامل وبتحكم فى سرعة العربية فى منتهى البطء فى الملف
وقبل ما ابدأ الف بالعربية اكون اخترت غيار الفتيس المناسب ... يعنى لو كانت العربية ماشية يبقى خلاص هاختار الغيار الثانى
لو العربية شكلها هاتقف يبقى خلاص هادوس على الفرامل واقف بالعربية تماما
ثم اختار الغيار الاول وابدأ فى الدخول على الملف وانا مختار الغيار الاول
الخلاصة
اختار الغيار المناسب للعربية قبل الدخول على الملف توفيرا للوقت
الملاحظة التالية
ههههههههههههههههههههههه
مافيش داعى للارتباك
ما دام العربية ماشية الدركسيون هايكون خفيف فى ايدك
يعنى ممكن تلف العربية فى اتى اتجاه "حتى ولو بيد واحدة"
ونفس الكلام
بعد الانتهاء من الملف
ما دامت العربية ماشية
الدركسيون هايرجع لوحده للوضع الطبيعى
ما فيش داعى للخوف ومسك الدركسيون جامد
كل المطلوب المساعدة فى رجوع الدركسيون "بخفة"
يعنى ممكن ترجعه بيد واحدة موش لازم ايديك الاثنين
الحاجة الغريبة وموش غريبة اللى قالها لى صاحبى:
انه عايزينى انقل الفتيس بسرعة
بيقول لى: انت مافيش عندك اى مشاكل والحمد لله ... عايزك تنقل بسرعة بلاش البطء ده
سؤال: هل نقل الفتيس ببطء يؤثر على العربية فى اى حاجة
قال لى كمان حاجة كويسة قوى
قال لى: ما دام انت شايف ان فيه شارع جانبى "ملف"
يبقى انت تمشى بعيد شوية عن الملف عشان العربيات اللى وراك تعرف انك موش داخل الملف وهاتمشى على طول
وكمان عشان لو فيه عربية خرجت من الملف ... يبقى انت بعيد عنها
وموش مطلوب انك تمشى اكثر من 60 كيلوا داخل المدينة دى السرعة القانونية
على فكرة انا اشتريت مراية من "التوفيقية"
شكلها مستطيل وليست بيضاوية
وكان سعرها 15 جنيه
وكمان اخترتها عشان لا تشوه الابعاد "يعنى العربية تكون قريبة منى وهى المرايا تبعدها عنى"
ركبتها وكانت كويسة قوى ومريحة كاشفة الدنيا ورايا بشكل جميل
اشتريت كمان علبة اسبراى wd 40
رشيت بيها الكاولين بتاعت العربية ... والزجاج ... اصبح بينزل ويطلع فى منتهى السهولة
والمفاتيح بتفتح وتقفل بشكل ممتاز
وكمان رشيته على كام استيكر وحليات كانت ملزوقة على العربية وانا ماكنتش عايزها شكلها "فلح" هههههههههههههههههههههه وكان ممتاز بصراحة فكها على طول
العلبة دى فى منها بـ 12 تقريبا الحجم الصغير
وفيه حجم بـ 14
وفيه حجم بـ 20
والحجم الكبير بـ 25
العلبة دى ضرورية جدا وبتنفع فى حاجات كثيير ... تزيل الصدأ وتزيت المكان كمان
ممكن ترشه على الكوالين والمفصلات وإزالة الاتساخات وخلافه
وللاسف غصب عنى اشتريت الشنطة الطبية
الله يسامحهم ولا ليها اى لازمة "ربنا يسترها مع الجميع" مصاريف على الفاضى
مخالفتها هى او مثلث الإشارة خمسين جنيه على طول وفورى اما لو انتظرت 3 ايام تدفعها فى النيابة 100 جنيه اما لو دفعتها مع مخالفات العربية عند التجديد تدفع ساعتها 300 جنيه تقريبا
فى موضوع مهم قوى عايز احذر فيه المبتدأين
ايه هو
الاسبوع اللى فات كان فيه عجلة "نايمة"
رحت اكشف على العجل
العجلاتى زود العربية هواء
نفخ العجل زيادة عن اللزوم
طبع العجلة اللى نايمة بالذات ... بدل ما كان فيها "خرم" واحد ... الهواء الزيادة فتح 3 او 4 اخرام جداد
المهم العجلاتى عشان يكسب له 20 جنيه منك عنده استعداد "يبوظ" عجلة العربية ويكلفك 200 او 250 جنيه كاوتش
الافضل للبمتدأ
انه دائما يكشف على عجل العربية عند واحد امين ويعرف عنوانه من الآن
والصح اللى انا عرفته
ان الافضل لحام العجل التيوبلس من الداخل
افضل من لحام الثقوب باستخدام "الخوابير"
ده طبعا لو كانت العجلة من نوع "التيوبلس"
اتأكد من الكلام ده
لما رحت اكشف على العجل عند محل تانى
الغريب ان العجلاتى قلل ضغط الهواء لكل العجلات الاربعة
وقال لى: العجل كان منفوخ كله على مقاس 33
والمفروض انه لا يزيد عن 30 او 29 بالكثيير
عرفت ان العجلاتى الاولانى للاسف كان "نصاب"
ده موضوع حصل لى
قلت اقول له لجميع الاخوة المبتدأين اللى زى حالاتى
لازم تروح لبتاع كاوتش تثق فيه
والاحسن من كده
لو كان الكاوتش فيه اكثر من خرم
الافضل انك تشترى "شنبر" للعجلة "جوانى" بـ 20 او 25 جنيه
وتخلى العجلاتى يركبه
عشان تحافظ على العجلة التيوبلس
لان كثر "الخوابير" هايبوظ العجلة التيوبلوس
بدل ما تخسر عجلة بـ 200 او 250 جنيه
صلحها بـ 20 جنيه
بالنسبة لركن السيارة
اتصل احد العملاء الاجانب بصاحبى على التليفون
صاحبى قال لى: وشك حلو عليا فيه شغل جالى وموش هاقدر اكمل معاك دلوقت معلهش نكمل مرة تانية
لو فيه احد الاصدقاء ليه تعليق على الكلام ده يا ريت نعرفه
فى انتظار التواصل
مع اطيب التمنيات
اخوكم حسين غزالة