الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

السلام عليكم ورحمة الله وبركاته

بالامس خرجت مع اخويا الكبير فى جولة تعليمية

اخويا للاسف ... عصبى المزاج
وعايزنى فى يوم وليلة اكون ماشى مية مية

واى ملحوظة منه بتكون بعصبية

لكن المرة دى بالذات ... شعرت ان عصبيته قلت شوية ويمكن قلت كثيير

المرة دى هو تعمد انى اطلع كوبرى الكلية الحربية
لكن النتيجة انى نزلت بجوار الرصيف الايسر

طبعا كان استحالة انى فى الزحام ده انى اانقل نفسى الى اليمين لتجنب طلوع كوبرى العروبة
خصوصا انى خايف اطلع الكوبرى
اريح على حد .. ويحصل مشكلة

المهم فضلنا ماشيين براحة قوى لحد الكوبرى
والحمد لله السير على الكوبرى فضل ماشى بشكل جيد لحد مرحلة الهبوط وظهر الزحام الشديد

قلت لنفسى: موش مشكلة اهم حاجة ان الصعود عدى على خير

طبعا الى حدا ما حسيت ان "الكلاكسات" قلت كثيير عن الاول
يعنى الاول كان كل شوية واحد يعمل لى كلاكس تحذيرى


انا راى الشخصى
ان طبعا المشى الكثيير بيقلل الخوف
لكن اللى يقلل الخوف اكثر هو انك تكون متعلم من واحد فاهم وموش عصبى
وتكون متعلم القواعد السليمة صح


السؤال اللى جه فى دماغى دلوقتى هو
ايه هى قواعد الدخول على الميادين
مثل ميدان تريومف
او ميدان سفير
او ميدان ابن الحكم قبل محطة الحلمية


متى ادخل من الحارة اليمين للميدان
او الوسطى
او الحارة اليسرى المجاورة للصينية الموجودة فى وسط الميدان


عايز منكم كلام سليم وعلمى
طبعا لو المواصلات كانت رايقة ومافيش زحمة اساسا مثلا يوم الجمعة ماكانش هايبقى فيه مشكلة

طيب الافضل للمبتدأ ايه

مع اطيب التنميات
اخوكم حسين غزالة

المشاركة الأصلية كتبت بواسطة nadeen

السلام عليكم ورحمة الله وبركاته

انا كمان لسة بتعلم و جديدة فى موضوع السواقة واللى هقوله دلوقتى عارفة انه كلام ساذج وبديهى بس حبيت اقوله علشانه بيفرق معايا فى الراحة النفسية ومالوش علاقة بالسواقة نفسها
1 أول ما بركب العربية بسمى الله وأقول دعاء الركوب
2 بادور العربية وارفع فرامل اليد( لأنى عادة بنساها) وارجع ارفع المرايات اللى كنت منزلاها وانا بركن
3 البس الحزام
4 ادعى وأقول ( يا رب ما كونش السبب فى أذية حد أبدا سواء اللى معايا أو الناس فى الشارع) لأن هو ده الشئ اللى مش هسامح نفسى عليه أبدا .. وبتوكل على الله واطلع

كلام عشرة على عشرة

تصدقى بالله
والله العظيم احيانا يكون المبتدأ ماشى بالأصول وعشرة على عشرة

والمفاجأة من الناس اللى المفروض قدام فى علمية القيادة

والمفاجأة اكثر لما تشوفى حاجات عجيبة من ناس المفروض انهم معاهم رخص ودرجة اولى

المفاجأة من السيارات النص نقل "بيمشى فى الشارع موش مهم عنده اللى حواليه"
وكمان السيارات الميكروباس "خصوصا ماركة الترامكو" .. يمشى ومافيش اى حد عنده ليه "ديه" موش فارقة معاه اى حاجة

والناس اللى موش فارقة معاها تعدى من اليمين او الشمال موش مهم عندها

والناس اللى فى منتهى الغباء ويعملوا حركات عشان يمشى مترين ولا تلاثة
برغم ان الشارع واقف تماما

والناس اللى حاسه وعارفة ان اللى ماشى جنيه جديد فى القيادة ورغم ذلك عمال يضرب كلاكسات ويعمل حركات "فى منتهى قلة الادب"


اللى ممكن يخفف على الواحد
هو انه يمشى بالاصول
يعنى مثلا لو داخل يمين وبجوار الرصيف وملتزم بالحارة اليمين حتى بعد الانتهاء من الملف
وبصيت قبل ما ادخل الملف على السيارت اللى جاية من اليسار
وكمان دخلت الملف على مهلى وبراحة
وكانت رجلى على الدبرياش
والفرامل عشان اتحكم فى سرعة العربية
ولو ظهر حاجة انا اصلا داخل ورجلى على الفرامل يعنى موش هاعمل اى حاجة غير انى هافرمل العربية
ومادام رجلى على الدبرياش اساس يبقى العربية موش هابتطل
واثناء الملف مادام السكة فاضية امامى
اقدر اختار الغيار المناسب سواء كان الاول اول الثانى حسب سرعة العربية
وطبعا قبل كل حاجة اشارة يمين قبل الملف بوقت كافى

كده اكون اخذت بالاسباب
وعملت الاصول فى كل شىء

لو لا قدر الله جالى واحد من على شمالى ودخل فى الحارة اللى انا بلف فيها
ده يبقى اسمه الغباء
او تقدرى تقولى عليه "النصيب"
خلاص ده يبقى قدر


لكن لو الواحد داخل الملف بسرعته
ونزل الشارع الرئيسيى فى منتصف الشارع
وبدون اشارات او مقدمات
وخبط اى حد لا قدر الله
طبعا ده يبقى خطأ كبير من اللى بيقود السيارة


يا ريت نعرف من حضرتك
تجربتك مع القيادة
انت فى اى مرحلة "مبتدأ’ .. متوسطة ... متقدمة"
مين اللى علمك .. وهل استفدتى منه كويس
يا ريت تكبى لنا ايه اللى كان بيقولوا لكى عشان نتعلم احنا كمان

هل اتمرنتى على صعود الكبارى
هل شمل التمرين المشى فى الزحام
والهبوط من على الكبارى
والدخول على الميادين

ايه هى النصائح اللى قالها لحضرتك

يا ريت نتعلم من حضرتك ومن اصدقاء النايل موتورز

مع اطيب التمنيات
اخوكم حسين غزالة

[QUOTE=nadeen;3872421762]

المشاركة الأصلية كتبت بواسطة husseinoo

السلام عليكم ورحمة الله وبركاته
أولا شكرا لحضرتك لأنك فى كل مرة بترد بتتكلم وبتفصل قوى الكلام وطبعا ده بيفيدنا..
بالنسبة ليا أنا حاسة إنى لسة مبتدئة لأن لسة مسوقتش كتير يدوبك مطلعة الرخصة من حوالى 15 يوم ومش بطلع بالعربية كل يوم علشان خوافة شوية..

وانا ايضا نفس الحكاية
بعد ما طلعت الرخصة اكتشفت ان اغلب اللى اتعلمته عشان اجتاز اختبار المرور
ولكن بعد ما امتلكت سيارة ... وجدت انى خايف جدا .. وطبعا خايف على العربية كمان

لحد ما خرجت مرة او مرتين مع صديقى "لكن الشهادة هو فاهم كويس جدا" ... عشان كده اتعلمت منه حاجات مهمة ومفيدة ومريحة اعصابى الى حد ما


انا اتعلمت مع مدرب خاص على عربيتى ودربنى على الصعود والنزول من الكبارى ونزل معايا مرة فى الزحمة وكان دايما بيقول لى افرشى عينك لقدام مسافة وخلى رجلك قريبة من الفرامل وكلاكساتك فى الزحمة ، ده أكتر الكلام اللى انا فاكراه .

بالنسبة لطلوع الكوبرى ... اعتقد اسؤ حاجة فى الموضوع ده هو "لو توقف الكوبرى اثناء الصعود" ههههههههههههه ... هاتبقى مشكلة
طبعا الواحد ممكن يشد فرملة اليد .. ويبدأ التحرك لحد ما يحس بأن العربية "بتترج" وعايز تتحرك فى الحالة دى هاينزل فرملة اليد ... والعربية هاتتحرك للامام بدون مشاكل وبدون ما تريح على العربية اللى فى الخلف
المشكلة ان العربية اللى فى الخلف "تصبر على الواحد شوية" هههههههههههههه
مع شوية تدريب ممكن الواحد يكون سريع شوية فى الحركة لدرجة انه لا يحتاج الى رفع فرملة اليد ... قولى يا رب هههههههههههههه



المشكلة الغريبة عندى انى مش عارفة اتعامل كويس مع المرايا وبالذات المراية اليمين

المراية اليمين بالذات وجدت ان اغلب اصحابى بيقولوا انهم "لا يستعملوا المراية اللى على اليمين الا فى ركن السيارة فقط"

،يعنى مثلا امبارح كنت نازلة الكوبرى وعايزة ادخل يمين مش بعرف اقدر إذا كان العربية اللى انا شايفاها فى المرايا دى مسافتها بعيدة عنى كفاية يعنى اعدى ولا لأ وبالتالى بطول فى القرار ده شوية لغاية ما الطريق يفضى ( حاجة غبية شوية بس هعمل ايه) هو ممكن ابص من فوق الكتف ناحية اليمين وخلاص ولا لازم المراية

فى الحقيقة موضوع المراية ده فى منتهى الاهمية والخطورة
لدرجة انى نزلت اشترى مراية من التوفيقية .. لم اجد مراية كويسة ... كلها مرايات سيئة جدا وثمنها لا يزيد عن 20 جنيه والموجودة فى العربية احسن من اللى كنت هاشتريها ... ده غير انها كانت بتغير الابعاد
يعنى انا كنت واقف خلف اخويا بمسافة متر .. رجعتنى حوالى 4 متر ... يعنى العربية لو كانت ورايا بحوالى 3 متر هاتبعدها بالشكل ده حوالى 10 متر وتسبب للسائق خداع كبير

سألت صديقى ... قال لى سيبك من التوفيقية عشان المرايات هناك كلها تعبانة ... حاول تشترى مراية من احد التجار الاستيراد لسيارة تكون ماركة محترمة وتركبها فى العربية هاتريحك قوى

اما بالنسبة للمراية اللى فى النص كان رأيه ... ان الواحد يحاول يضبطها بحيث انها تميل ناحية اليمين شوية عشان اشوف اللى جاى من الجانب "من ناحية الباب الايمن الخلفى"

وكمان قال لى: يا اخى الواحد موش بيجلس فى السيارة زى التمثال
اطلع بجسمك الى الامام وانظر فى المراية اللى فى النص .. من قريب قوى "يعنى قرب وشك من المراية" .... وشوف مين اللى جاى من وراك من ناحية الباب اليمين قبل ما تدخل يمين
وطبعا حاول تلمح بطرف عينك من فوق كتفك .. "ناحية الباب اليمين الخلفى" وشوف فيه عربية ماشية جنبك ولا لأ
طبعا علشان العربية فى المكان ده لا تظهر فى المراية
طبعا بالنسبة لى انا اتعمد استعمال الاشارات حتى ولو كنت هاغير من حارة الى حارة
واكتشفت حاجة مهمة قوى قوى .... ان الواحد يتحرك من حارة الى حارة بمنتهى البطأ وبراحة قوى قوى ... يعنى زى ما بيقولوا "سنة سنة" ... ولو فيه حد فعلا انا موش شايفهة كويس ... أكيد هايضرب كالاكس
طبعا كده افضل من انى اغير اتجاهى مرة واحد وبدون مقدمات وانقل نفسى من حارة الى حارة اخرى

طبعا ده موضوع مهم جدا جدا جدا ... ومحتاج حرص وعناية جامدة
وربنا يستر والواحد يقدر فعلا يحس ويقدر العربيات اللى جاية من الخلف
ويقدر يشوفها فى المراية بشكل صحيح
ولو فيه اى حد فى المنتدى يقدر يقول لنا ايه الصح فى موضوع المرايات ده يبقى هايل

وكمان حضرتك بتعمل ايه لما تكون طالع من تقاطع على شارع رئيسى وفى عربيات كتير راكنة فى الرئيسى على اليمين لدرجة انك مش شايف اللى جاى ؟

ده انا اتعقدت من شارع عندى جنب البيت
وبطلت امشى فى الشارع ده
اجد سيارات راكنة على ناصية الشارع "عربيتين على الناصية"
طبعا الواحد لما يدخل ناحية اليمين على شارع رئيسي بالمنظر ده لازم يدخل على الحارة رقم 3 فى الشارع
تخيلى شارع حجمه 4 حارات
2 منهم فيه عربيات راكنة فيهم
خلاص مافيش حل غير انى انزل بالعربية امام العربيات اللى جاية بسرعة وما بالك ولو كانت جاية ونازلة من على كوبرى
واحيانا اجد سيارات ميكروباص "بتنزل ركاب او بتحمل ركاب"
وطبعا العربية واقفة على الناصية

طيب اعمل
فضلت انى اقف خلفه ناحية اليمين ... وافضل فى السليم لحد ما سعادته يمشى بالسلامة
افضل من انى احاول ادخل يمين وانزل بالعربية الى منتصف الشارع

لكن اعتقد ان الصح ان الواحد لما يشوف حاجة زى كده يحاول من بدرى يسيب مسافة كافية تسمح له بالمناورة وانه يعدى من اللى واقف على الناصية
لكن لازم ياخد باله من اللى جاى من خلفه ويحاول ينبهه انه هايعدى من اللى راكن على الناصية
طبعا موضوع بيبقى صعب قوى على المبتدأ

وكمان صديقى قال لى: اول ما الاكصدام بتاعك يوصل ويقرب من اكصدام السيارة اللى امامك تحاول "تعدل اتجاه العربية" على طول عشان ما تنزلش بالعربية الى منتصف الشارع

يقصد مثلا "فانوس عربيتك اليمين اول ما يقرب من اكصدام السيارة اللى امامك من الناحية اليسرى" لازم نعدل عجل السيارة على طول قبل ما العربية ما تنزل نص الشارع

طبعا كل ده عايز حرص وتدريب وشغلانة وربنا يستر