الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة A.Saad

1-
الاول انا بشكر الاستاذ سعد جدا على مشاركته
واستأذن حضرته فى اضافة بعض التعليقات
وارجوا تصحيحها إذا كنت غلطان


افرتض ان السيارة الخضراء ترغب فى الاتجاه على طول وهى نازلة اصلا من على كوبرى
ايه اللى المفروض يعمله السائق ويراعيه فى الموقف ده
يدى اشارة يمين
يراعى اللى نازل من يمينه وهوة بيكسر يمين ويراعى اللى بيدخل من يمينه يروح اليوتيرن
او ميكسرش يمين ويدى الاشارة ويكمل ويكون متاهب لو اظطر يهدى سرعته

لا يوجد عندى تعليق غير انه كان من الأفضل لو جت فرصة انه يلتزم الحارة اليمين على الكوبرى قبل النزول من على الكوبرى
قبل ما يطلع الكوبرى يحاول يلتزم الحارة اليمين على الكوبرى
كده يبتعد عن اليوتيرن
وكمان اعتقد والله اعلم ... انه من الخطأ ان الواحد "يمور" الفتيس وهو نازل من على الكوبرى لان كده العربية تاخد وقت كبير عشان تقف ... هاتضغط على الفرامل وموش هاتحس ان العربية بتقف كويس ويسبب لك الارتباك والخطر

لكن لو العربية وهى نازلة بسرعة والفتيس متعشق مثلا على الغيار الثالث فى الحالة دى وانت بتضغط على الفرامل العربية هاتقف احسن واقوى لانك بتستعمل "الفرامل وكمان تعشيق التروس" فى فرملة العربية
ولما تبدأ العربية تهدى ممكن "تمور" الفتيس وتضغط على الفرامل وتنزل على المنطقة المزدحمة بهدوء وحرص

وكمان اراعى عدم التوقف المفاجىء وانا نازل عشان اكيد فيه عربيات نازلة ورايا من على الكوبرى بسرعة
ولو فوجئت العربيات اللى ورايا بآنى توقفت بشكل مفاجىء .. النتيجة العربيات اللى ورايا هاتخبطنى على طول

يعنى لازم التوقف او الفرملة تكون تدريجى وليست مفاجأة عشان العربيات اللى نازلة من خلفى على الكوبرى بسرعة
وعشان العربيات اللى داخلة اليوتيرن ببطء

وفيه رأى بيقول شغل "اشارة الإنتظار" ما دام انت شايف انه احتمال يحصل توقف مفاجىء بسبب الزحام عشان اللى خلفك ياخد باله


2- افترض ان السيارة الخضراء ترغب فى الدخول على اليوتيرن
يدى اشارة شمال ويحاول ياخده على الضيق لان اللى فى الحارة اللى يمينه غالبا هياخده على واسع
ده كلام ممتاز طبعا
واحب اضيف وده كلام صديقى اللى كان بيعلمنى الاسبوع اللى فات
ان الواحد يدخل بهدوء جدا
وقبل ما يدخل الملف لو العربية ماشية لازم ينقل الغيار الثانى
عشان وهو بيلف مايضربش لخمة بين الدركسيون وبين الفتيس
يبقى عايز يلف بالعربية وكمان عايز ينقل الغيار للفتيس
ويعطل الناس اللى وراه
كده هو بكسب وقت
وان العربية مادامت ماشية الدركسيون هايلف معاه بسهولة وبدون عصبية
ولازم يبص بطرف عينه على العربيات اللى فى الشارع المقابل ... يبص عليها بسرعة قبل ما يدخل على الشارع المقابل
وزى مااستاذ saad ما بيقول لازم تاخد بالك من العربيات اللى بتكون فى الحارة اليمنى اللى داخلة معاك فى اليوتيرن
يعنى لازم تفضل ملتزم الحارة اللى بتلف فيها عشان لو فيه عربيات بتلف معاك
حتى ولو العربية دخلت الملف .. لازم تفضل ملتزم بحارتك واوعى تنقل نفسك الى حارة ثانية بشكل مفاجىء ... حصلت معايا وربنا ستر ... طبعا ده كله نتيجة السرحان وكمان عدم الخبرة

الخطر فى الموضوع ده هو لو دخل معاك اوتوبيس مثلا فى اليو تيرن
او يكون اليوتيرن ضيق لا يسمح إلأ بمرور عربية واحدة ويظهر لك فجأة سائق تاكسى عايز يعدى من على يمينك ويدخل اليوتيرن قبلك
يا ريت نسمع رآى الاصداقاء فى خطورة اليوتيرن



3- افترض ان السيارة الصفراء ترغب فى الدخول على اليوتيرن
المفروض يحاول يكسر شمال من بدرى
بس قانونا ممنوع التجاوز والتخطى على الكوبرى
يعنى الفضل انه ياخد شمال من اول ما يطلع الكوبرى
طيب لو معرفش
يدى اشارة شمال
ياخد باله من اللى فى شماله



4- افترض ان السيارة الصفراء ترغب فى السير على طول
دى اسهل
يحاول يبعد عن اليوتيرن لو زحمة علشان ما يتعطلش او حد يكسر عليه يزنقه
ممكن ياخد الحارة اللى على يمينه

ده كلام ممتاز واحب ان اضيف
انك لازم تدخل ورجل على الفرامل وبسرعة هادئة
والرجل الثانية ضاغطة على الدبرياج وعلى استعداد بالتوقف فى اى وقت
طبعا الكلام ده مخصوص للمبتدء اللى زى حالاتى
لو لا قدر الله وقفت العربية موش هاتبطل منك لأنك اصلا ضاغط على الدبرياج وانت داخل على الزحمة ولو العربيات كانت ماشية مافيش مشكلة هاترفع رجلك عن الفرامل وهاتترك العربية تسير لوحدها
يعنى الخلاصة
اتحكم فى السرعة عن طريق الفرامل وليس البنزين
تحذير: اوعى تدخل على الزحام او التقاطعات او اليوتيرن ورجلك على البنزين


5- افترض ان السيارة الحمراء ترغب فى الاتجاه الى اليمين طوالى
دى مشكلتها ان سرعته هتكون ابطأ من اللى نازل من الكوبرى
فلازم يبص فى مرايته كويس على اللى جاى من الشمال وما يدخلش عليه حارته ويحاول ياخد يمينه

ولو كان فيه عربيات واقفة صف ثانى
يبقى لازم يدخل الملف على واسع
لو دخل على ضيق هايعطل كل العربيات اللى وراه وموش هايعرف يدخل
ولازم ينظر على العربيات اللى نازلة من على شماله بطرف عينيه "نظره سريعة" ويرجع يبص امامه على عربيته
عشان مايسرحش ويلاقى نفسه فى نص الشارع
وقبل ما يدخل يكون مختار الغيار المناسب زى ما قلنا قبل كده
ونفس الكلام نكرره للمرة المليون
رجلك ضاغطة على الدبرياج
ورجلك الثانية على الفرامل بتتحكم فى سرعة العربية
لو العربيات ماشية ادخل بهدوء
لو العربيات توقفت اضغط فرامل وماتخافش العربية موش هاتبطل منك لانك ضاعط على الدبرياج اساسا
وبسرعة اختار الغيار الاول واستمر فى السير عادى خالص بدون مشاكل
وكمان لا ننسى الإشارة اليمين "لازم نتعود على استعمال الإشارات" حتى ولو كان الشارع فاضى ورايا
ممكن فى ثوانى افاجىء بعربية من خلفى

6- افترض ان السيارة الحمراء ترغب فى الاتجاه الى اليمين ثم الى اليوتيرن
لو المسافة قصيرة وفيه عربيات كتير مسرعة
انصحه ياخد اليوتيرن اللى وراه
او يدخل على واسع مع ملاحظة اللى جاى من الكوبرى وماشى طوالى وبرده يدى اشارة

ودى معلومة فى منتهى الجمال والروعة
بشكر عليها استاذ saad جدا جدا
وعلى راى المثل امشى سنة ولا تخطيش آنه
يعنى امشى خمس دقائق وادخل على "اليوتيرن" التالى .... ولا تغامر فى الدخول على "اليوتيرن" المزدحم والخطر برغم انه قريب
والموضوع ده حصل معايا يا اخونا
ماكانش فيه "يوتيرن" ولا حاجة لكن كنت فى اقصى الشمال وعايز انقل نفسى اقصى اليمين عشان داخل يمين
النتيجة ان واحد دخل امامى وحك الرفرف اليسار بتاعى فى الازدحام
وطبعا صاحبى قال لى: نفس كلام استاذ saad
وهو انى كان لازم امشى على طول مافيش مشاكل لحد ما الاقى اى ملف وارجع تانى حتى ولو كان الملف بعيد عنى احسن ما ادخل فى زحام يعرضنى للخطر
بالامس حصل معايا الموضوع ده
وبسرعة قررت انى اغير من مسارى وابعد عن الزحام واتحلت المشكلة فى منتهى الهدوء واهو الواحد بيتعلم كل يوم وهايفضل يتعلم


7- افترض ان السيارة الحمراء ترغب فى الاتجاه الى اليمين ثم الانتقال الى الحارة اليسار
الافضل اما تغير الحارة تدى اشارة للى وراك لان ممكن يكون فى المنطقة العميا او بيحاول يزيد سرعته
ويفضل يغير حارته اما ياخد سرعة مناسبة للى نازل من الكوبرى مش وهو ليه بطيء وطبعا ده كمان يتعمل بعد اليوتيرن

وده برده كلام جميل جدا جدا
واكيد كلنا اتكلمنا عن المنطقة العمياء بما فيه الكفاية
واحب اضيف
ان برغم انى استخدم المرايات كويس الى حد ما
ولكن قبل ما انقل نفسى الى حارة اخرى افضل انى انظر فوق كتفى نظرة سريعة الى الخلف
نظرة خاطفة "زى الافلام" هههههههههههههههههههه
عشان اشوف اى عربية جاى من جنبى "بتكون مختفية عن الانظار عند الباب الخلفى" ولا تظهر فى المرايا
وده موضوع خطير جدا جدا يقع فيه اغلب المبتدئين
الخلاصة: احترس من المنطقة العمياء للمرايا



اتمنى اكون افدت

طبعا افدت
وربنا يكرمك على وقتك الثمين
وعلى مجهودك
ويسعدك دنيا وآخرة
ولو فيه جديد عند حضرتك فى انتظار معرفته بشغف سواء من حضرتك او من كل الاصدقاء الاوفياء فى منتدى نايل موتورز

ولو فيه يا جماعة اى تعليق على الكلام ده او تصحيح لاى معلومة او إضافة قيمة
ياريت نسمعه
الموضوع لسه لم ينتهى
قبل ما نطرح مشكلة اخرى

مع اطيب التمنيات
اخوكم حسين غزالة