نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

**husseinoo** · 28-09-2011 03:03 PM

المشاركة الأصلية كتبت بواسطة cheetos1

الله يبارك فيك ياريس

الاختبار الحمدلله كان سهل وبسيط الاول امتحنت نظرى اشارات كانت سهله

ههههههه انا مامتحنتش اشارات من اصله هههههههههه
لكن بالنسبة للعملى
كان "لازق الاقماع" تحت عجل العربية ... يعنى من الآخر كان عايز "يسقط" الرجالة كلهم ههههههههه
اما بالنسبة للسيدات ههههههههههههه كان قلبهم حنين جدا
وكل السيدات نجحوا ........... تخليل
مع ان معظمهم "داس" على قمع او قمعين على الاقل هههههههههههه

عارف احيانا لو وجد انك ماشى بشكل بطىء ... يسقط السائق
حسب مزاج المهندس اللى بيمتحنك
انا من حظى كان يوم فيه عاصفة ترابية هههههههههههههه والمهندس الرخم فضل قاعد فى مكتبه .... وواحد تانى هو اللى امتحنا على ايديه ......... وعدت الحمد لله

بعد كده العملى بقى يدوب تطلع للامام وتكسر شويه مع الاقماع بعد كده
تعمل المارش على نفس الخطوات وتكسر خفيف عشان مطيرش اى قمع
لحد ما بتلاقى فاتحه على يمينك اول ماتحس انك ممكن تدخل منها
وقفت ولفيت الدركسيون ودخلت يمين من بين اخر قمعين وده نهايه الاختبار

يعنى الاختبار على تلاته مراحل الامام والخلف لحد ما تظبط على فتحه الخروج من اليمين

وكنت ماشى براحتى خالص يعتبر ع السلانسيه والفنى مستعجلنى عشان ورايا طابور
وانا ولا الهوا ماليش دعوة بيه عملت كل حاجه بهدوء بعد كده ورقى راح للنقيب وكاتبلى لائق الحمدلله
وطلعت اتصورت

رحت الصبح على الساعه 8 ونص كده خلصت كل حاجه ع الساعه 1 الظهر

يا خبر ابيض من الساعة 8 لحد الساعة 1 .... ده انت كان ممكن تروح اسكندرية وترجع
ايامهم بيضة .... اعوذ بالله من اشكالهم

,,, انا أجرت عربية بـ 50 جنيه ( استغلال طبعا ) بس الراجل وعدنى انى ادخل اول واحد قبل الزحمة
وصدق معايا فعلا
وفعلا القياده ملهاش كبير ربنا يستر علينا

المهم مبروك تانى يا مان

مع اطيب التمنيات
اخوكم حسين غزالة

**lela** · 29-09-2011 01:11 PM

هى مسالة وقت وتعدى لان كل الناس كانت كده وكمان لحد دلوقتى انا كده كنت بخاف اخرج بيها لكن الخوف بقى قليل مع الوقت فاكيد ان حد يكون جنبك دلوقتى لكن مع الوقت هتكون لوحدك زى اى حد خلى عندك ارادة ربنا سترها معاك بالتوفيق 0

**husseinoo** · 30-09-2011 02:28 PM

المشاركة الأصلية كتبت بواسطة ahmdmagdy

دلوقت انا عندي مشكله م لاقي حل ليها اني مش بعرف اسوق كويس غير اما حد يكون جنبي يعني لو حد مش راكب جنبي العربيه بتبطل مني و بضرب لخمه

اهلا وسهلا بحضرتك
بالنسبة لموضوع الخوف ... ده طبيعى جدا
وموجود عند معظم المبتدأين فى القيادة
والغريب واللى انا متأكد منه .... ان فيه ناس كثير قديمة فى موضوع القيادة ومازالت بتخاف

لو كان الخوف فى حجمه الطبيعى ... يعنى نتيجة الخوف فيه حرص شديد وتركيز فى الطريق ... ده يبقى خوف ايجابى ... ومافيش اى مشكلة
اما لو كان الخوف مرضى .... ههههههههههههه يعنى فيه هواجس وبتنام هاتحلم بالسيارة و"قرف" ركوب السيارة فى الزحام ... فى الحالة دى الموضوع يبقى موش طبيعى

على العموم مافيش اى مشكلة إن شاء الله
بالنسبة انك محتاج وجود حد يركب معاك .... ده طبيعى جدا ومطلوب ... وممكن تستمر على الحكاية دى لحد ما تشعر انك خلاص تمام التمام

لكن لازم تحاول
تخرج بالسيارة لوحدك فى اوقات موش زحمة خالص
مثلا يوم الجمعة الساعة 7 حتى الساعة 9 او 10 الصبح
2 او 3 ساعات مشى لوحدك فى شوارع المحروسة
حوالين البيت ... وفى الاماكن اللى انت احتمال هاتروح بالعربية فيها

او حتى مشوار صغير حوالين البيت
وترجع تانى
مافيش اى مشاكل ... المهم انك تتحرك بالعربية لوحدك ... حتى ولو هاتلف حوالين البيت وترجع تانى
بالطريقة دى هاتكسر حاجز الخوف

ام بالنسبة للقضاء على الخوف تماما
ده يكون بالعلم والمعرفة والفهم الصحيح لقواعد القيادة

يعنى مثلا
لو انت عامل حسابك انك دائما ترى عجل السيارة التى امامك
ودائما تترك مسافة كافية بينك وبين السيارة التى تسير امامك حسب سرعة سيارتك طبعا
يبقى خلاص انت كده فى امان بالنسبة للتوقف فى اى لحظة

طيب لو احنا نظرنا من خلال زجاج السيارة التى امامنا على السيارات الاخرى التى فى المقدمة ... يبقى كده انا سوف اتوقع فى اى وقت سوف تتوقف السيارة التى امامى
يبقى خلاص انا اتعلمت حاجة جديدة ومهمة انى لا انظر الى السيارة التى امامى فقط ... لازم انظر الى السيارات الاخرى التى فى المقدمة

طبعا لو فضلنا نقول ونكتب على قواعد القيادة السليمة
هانكتب كثير قوى

لكن كل ما تعرف حاجة جديدة وتقتنع بها ... وتبدأ تعمل بالمعلومة الجديدة
هاتلاقى نفسك ماشى صح .. واعصابك هادئة ... وكل شىء تمام وبدون خوف

اما اللى موش فاهم حاجة ... وموش متعلم حاجة خالص
وكل اللى اتعلمه ينقل الفتيس ... ويدور العربية ...
ويمشى يخبط فى اللى حواليه
طبعا لازم يفضل طول عمره خايف

لازم نتعلم مع بعض كل يوم حتى ولو حاجة صغيرة
نتعلم حاجة جديدة
ونحاول نكسر الخوف ... بأننا نعمل خطوه واحدة صغيرة
لكن لازم الخطوة دى تكون صحيحة وسليمة
مثلا
يوم الجمعة لف حوالين المنزل وارجع تانى اركن السيارة فى نفس المكان ... كل ده فى الصباح الباكر

وبعد كده كرر الخطوات اللى اتعلمتها
واعمل خطوات جديدة
واهداف جديدة
اطلع كوبرى مثلا
ادخل فى نفق
عدى مطب صناعى
اتمرن على الركن الجيد من اول مرة

اعرف كل المهارات المطلوبة للقيادة الجيدة
وركز كل تفكيرك فى التعلم
افضل من التركيز فى الخوف

وتذكر كل التجارب الجيدة
واتعلم من التجارب السيئة السمعة هههههههههههههه

على فكرة فى موضوع كبير مكتوب بخصوص "التغلب على الخوف" فى نفس المشاركة لكن انا موش فاكر فى اى صفحة بالضبط

وربنا ييسر الاحوال إن شاء الله

مع اطيب التمنيات
اخوكم حسين غزالة

**tifa55555** · 15-10-2011 10:36 PM

وقف مرة واحده قدامى ولحقت نفسى ووقفت، ما كفاهوش ام جايب مارشدير بسرعه جدا وكأنه ماشى لوحده ع الطريق ، هربت منه وكسرت شمال بسرعه على قد ما اقدر ولكن صدم الرفرف الخلفى صدمه شديده، ونزل وقاللى انا اسف قولت له يا فرحتى

**magid1010** · 15-10-2011 10:55 PM

ازيك يا استاذ حسين وحشنى كتير و الله تخيل ان موضوعك واحد ابن حلال سرقه و نزل اول صفحه منه على منتدى تانى بنفس الاسم خد كوبى و بست من اول صفحه قال يعنى الموضوع بتاعه و الناس ابتدت تشكره على النصايح الجميله رحت انا مديله كلمتين فى جنابه الناس بطلت تشكره ناس غريبه فعلا حتى السرقه وصلت لكده

**AYMAN_19059** · 18-10-2011 10:19 PM

مشكور جدا يا استاذ حسين انا واحد من الناس اللى كانت متابعة الموضوع فى صمت و كنت حريص انى مسبقش الاحداث يعنى كنت بحاول امشى مع حضرتك ومع الموضوع بشكل متوازى مع التعليم العملى بالنسبالى لحد ما الحمد لله قدرت انى استخرج الرخصة واتحرك بالسيارة بشكلة شبة طبيعى الى حد ما مع قطع مسافات طويلة و طرق سريعة والسير فى الزحام و كبارى نزول وصعود بشكل تدريجى يعنى بردوة لسة فى مرحلة المبتدء المتقدم بعض الشىء والخوف قل بنسبة ولكن ليس كلياَ ومع الاحتكاك بالقيادة بصفة منتظم ظهرت بعض المعوقات والحمد لله فى جزء مثل زى الركنات انا رجعت تانى للمشاركات فى الموضوع بالنسبه للركنات للمراجعة والتاكيد لاانها محتاجة وقت زى محضرتكم عرفين اما مشكلتى الام واللى للاسف مقدرتش اتغلب عليها وهى للاسف محرجة جدا ولكنى لااجد حرج من انى اعرضها عليكم لاانة موضع انا اعتبرة لة كثير من الافضال على انسان تابعه وتعلم منة الكثير على مدار شهور مشكلتى باختصار انى مش قادر انى البس شوز اثناء القيادة ولو لبست لحظة واحد اقف فورا واحس انى مش حاسس بالدوسات وانى مفيش حاجة تحت رجلى باختصار بسوق حافى وكل محاولااتى انى اسوق وانا لابس الشوز او سورى يعنى شبشب حتى فشلت فشل تاااام ولكم ان تتخيلو مدى الاحراج اللى بكون فية

بجد انا فى ورطة وهى دى اللى طلعتنى من صمتى اللى فضلت محتفظ بية طيلة شهور متابعة الموضوع وتطبيقة بشكل عملى ... ارجو من الله ان اجد العون منكم واكرر شكرى للاستاذ حسين غزالة الانسان اللى بقى صديقى من غير ميعرفنى ولكنى لمعاشرتى ولموضوعه الهام وردودة الاكثر من رائعه اصبح بمثابة صديق شخصى واجد اجاباتة دائما حاضرة فى كل المواقف اللى عشتها فى مراحل تعلم القيادة

**husseinoo** · 18-10-2011 10:48 PM

المشاركة الأصلية كتبت بواسطة mhmdkhamis

تحياتى على الموضوع الرائع و الجهد المبزول فيه

ليا شويه استفسارات كقائد مبتدئ و ناوى اسوق اتوماتيك

يا ترى قايده الاوتوماتيك هتوفر كتير من العناء مع الطريق و الزحمه و هيكون تعلمى للقياده اسهل معاها

ولا اتعلم و اسوق مانيوال عشان الكل بيقول ان سواقه المنوال اسهل

و ياريت لو فيه نصايح او تعليمات لقياده الاوتوماتيك تفيدونا بيها

شكرا

قيادة الاوتوماتيك ... من اجمل واروع الاشياء ... يا ريت كل السيارات تكون اوتوماتيك ... لكن المشكلة ان السيارات الاوتوماتيك .. غالية شوية خصوصا الانواع الجيدة منها ... وطبعا احيانا لو لا قدر الله حصل اى شىء فى الفتيس .. فى الحالة دى يكون الافضل هو تركيب فتيس استيراد بالكامل ... وده بيكون افضل من تصليح الفتيس القديم ... خصوصا بعد تأكيد الكثير من فشل الصنايعية فى تصليح الفتيس القديم

لكن اعتقد ان اعطال الفتيس بتكون حسب الاستخدام
لكن السيارة الاوتوماتيك افضل كثير جدا فى الزحام وراحة للاعصاب وتوفير فى البنزين
يمكن السيارة المانيوال اسرع شوية ... فى الإنطلاق ... يعنى من السهل انك تقرص عليها وتجرى بها اسرع ... لكن فى الطوالى كل السيارات متشابهة

وعموما بعد ما تتعود على الاوتوماتيك
مافيش اى مشكلة انك تسوق المانيوال ... يعنى المشكلة كلها هاتنحصر فى استخدام وفهم الفتيس المانيوال ... اما بالنسبة للسير وابعاد السيارة والاحساس بسرعة السيارة ودى اهم حاجة فى القيادة

لا يعلى على الاوتوماتيك
خصوصا فى شوارع مصر المحروسة

مع اطيب التمنيات
اخوكم حسين غزالة

**husseinoo** · 18-10-2011 10:52 PM

المشاركة الأصلية كتبت بواسطة tifa55555

وقف مرة واحده قدامى ولحقت نفسى ووقفت، ما كفاهوش ام جايب مارشدير بسرعه جدا وكأنه ماشى لوحده ع الطريق ، هربت منه وكسرت شمال بسرعه على قد ما اقدر ولكن صدم الرفرف الخلفى صدمه شديده، ونزل وقاللى انا اسف قولت له يا فرحتى

ههههههههههههه
قدر الله وما شاء فعل
الايام دى كل يوم هاتشوف العجب
خصوصا اللى بيمشى عكس الطريق
ده شىء اصبح عادى
والواحد يحاول يشوف كل اللى ماشى امامه وامام السيارات التى بجواره واللى ماشى على الرصيف
شوف كل حاجة وتوقع كل حاجة
لا تنظر امامك فقط
وربنا يعوض عليك

مع اطيب التمنيات
اخوكم حسين غزالة

-

الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

LinkBack

أدوات الموضوع

عرض

-

-

-

-

-

المواضيع المتشابهه

الى احلى اعضاء تعالو نقعد مع بعض شوية ....(موضوع جديد)..

يوميات سائق جديد ؟!

ارجو النصيحة لوجه الله انا لسه متعلم السواقة جديد اشترى مستعمل ولا جديد؟

استفسار من سائق جديد فى الغيارات

جديد في السواقة؟ اجيب جديد ولا مستعمل

الكلمات الدلالية لهذا الموضوع

المفضلات

المفضلات

ضوابط المشاركة