الموضوع: نصائح سائق جديد .. وخوفه قل شوية من موضوع السواقة .. والبركة فيكم تعلمونا الباقى

المشاركة الأصلية كتبت بواسطة Bright

[OVERLINE]السلام عليكم

وعليكم السلام ورحمة الله وبركاته

انا جديدة هنا فى المنتدى ومتابعة الموضوع من اول صفحة

اهلا وسهلا بحضرتك

وبجد الموضوع تحفة ومفيد جداااا واهم احجة تطبيق المعلومات دى ونفسى كل حد بيسوق يقراه عشان نبقى كلنا ماشين على قواعد ومفاهيم واحدة ((بحلم طبعا : D

عندك حق ... طبعا ده حلم كبير قوى ... اننا نسوق بفهم وأدب قبل كل شىء

انا بقالى يجى سنتين اخويا بيعلمنى السواقة ومبسوقش غير وهو جنبى مش عيب منى بس هو على طول بيخوفنى ويتعصب عليا
لحد ما فى اتهورت من اسبوع و سر... قصدى اخدت العربية و رحت بيها الكلية ورجعت سليمة الحمد لله انا والعربية

هايل

بس برده خايفة جدااا يحصلى اى موقف او تتعطل بيا و برده فى البيت كده وبيقولولى العربية كبيرة عليكى بس انا زهقت من بهدلة المواصلات

هو موضوع ابعاد السيارة يعتبر من مشاكل المبتدأين .... يعنى دائما المبتدأ يخاف من الاماكن الضيقة ... واللى يزيد المشاكل لما يسمع كلاكسات من الخلف اثناء عبور منطقة ضيقة ... ببساطة لو المكان انت حاسة انه ضيق ما تدخليش فيه .... حتى ولو اللى ماشى وراكى ... مشى على الحيط ... اهم حاجة سلامتك فى الاول والآخر ... ومع مرور وقت قصير هاتشعرى بشكل جيد بأبعاد العربية بدون اى مشاكل

وانا سايقة بقى بركز على الحارة بتاعتى عشان الناس اللى جنبى تعدى براحتها وغالبا بمشى على الشمال عشان الميكروباصات والاتوبيسات و ابقى مركزة على العربيات اللى على يمينى بس انا عارفة انه غلط عشان ساعات ببقى بطيئة شوية بالنسبة لبعض الناس بس هما بيعدونى ويجوا قدامى

بعد فترة ... انت هاتمشى اسرع شوية من نفسك ... وموش هاتتركى فرصة لحد يدخل امامك ههههههه ... لكن اهم حاجة تحافظى على مسافة كافية بينك وبين السيارة التى تسير امامك

فيه ملف فى طريقى بس مشكلته انه منزل بجد بشششششع و بدعى اد كده وانا بعديه عشان العربية مترجعش منى لورا او تبطل

ادخلى فيه مافيش اى مشاكل ... ايدك على فرامل اليد ... واول ما العربيات تتوقف تماما ... ارفعى فرامل اليد ... وانقلى الغيار الاول ... واول ما تضغطى بنزين ... نزلى فرامل اليد واستمرى فى السير عادى جدا ... عمر العربية ما هترجع للخلف ... ماتخافيش


انا قلت اعرفكوا بنفسى بسرعة واقلكوا شكررررررررررا جدا على معومات بجد استفدت منها انا فى صفحة 25 ومكملة ان شاء الله ....ادعولىىىىىى


احنا سعداء بمعرفة حضرتك ... وإن شاء الله كل اللى جاى يكون خير

مع اطيب التمنيات
اخوكم حسين غزالة[/OVERLINE]

المشاركة الأصلية كتبت بواسطة aboyosouf

السلام عليكم ورحمة الله وبركاته

وعليكم السلام ورحمة الله وبركاته

هذه هي أول مشاركة لي في هذا المنتدى الكريم

اهلا وسهلا بحضرتك

بصراحة يعجز لساني عن الشكر لكل من ساهم في هذا الموضوع الرائع

فقدر كنت أبحث عن نصائح للسائق الجديد في جوجل فجاء بي البحث إلى هنا حيث هذا الموضوع القيم

ده من حظنا اننا نتعرف على حضرتك

فأحببت أن أسجل معكم في المنتدى ، وقد ظللت قرابة الساعتين ونصف فقرأت من أول الموضوع الذي أنشأه الأخ الفاضل

حسين غزالة الذي حتى الآن لا أعلم هل هو يعمل في مجال التدريس أم لا لإني قرأت في بغض ردوده أنه يخاف من وزير التعليم

أنه ينقله أسوان ههههههههه لسؤاله عن كلمه المبتدأين التي تكتب هكذا ( المبتدئين ) فأقول له لا تخف فمعك أخوك أبو يوسف

ههههههههه هو عم ذكى بدر كان عامل "فتوه" ... لكن مالحقش ينفذ الدور المطلو ب منه ... عشان اصدقاءه فى "بورتو طره" ....هههههههههه ايوه كلمة المبتدئين كانت فى امتحانات كادر المدرسين هههههههههه لكن انا شغال فى وحدة برمجة ههههههههه

مدرس لغة عربية سابقا

وعشان ما أطولش في المقدمة

فإني قرأت من المشاركة الأولى التي كانت بتاريخ 24-02-2010, 09:00 pm

وحتى المشاركة االأخيرة التي تحمل رقم 749 كانت بتاريخ 11-06-2011, 12:11 am

فقرأت هذه المشاركات حرفا حرفا

فلا أملك بعد ذلك إلا أن أقول جزاكم الله خير الجزاء على إفادتي بمعلومات كنت لا أعلمها من قبل

ههههههههههه الله يبارك لك .... واحلى حاجة نسمعها هى الدعاء الجميل ده ... شكرا لحضرتك

وأقول لكم إني سائق مبتدئ

والحمد لله وشكم كلكم حلو علي واليوم إن شاء الله هو أول يوم لي في قيادة التاكسي

يبقى التعليم خسر معلم "محترم" ... والسائقين كسبوا رجل محترم عشان يتعلموا منه مكارم الاخلاق والقيادة

طبعا كنت بسوق من زمان لكن كار التاكسي لسه جديد شوية علي

طبعا هايكون جديد ... خصوصا انهم فاكرين ان بالجرى الشديد هاياخد اكتر من رزقه .... للاسف ... والنصيحة الغالية لحضرتك انك تشتغل مع حد مهم احسن ... يعنى مثلا توصله بشكل يومى مثلا 6 اكتوبر وترجعه تانى ... احسن من المشى واللف الكتير وارحم للعربية ... وربنا ييسر لك الاحوال إن شاء الله

فبارك الله فيكم جميعا وإن شاء الله أكون متابع معكم دائما

الله يبارك فى حضرتك

وأخيرا شكر خاص للأساذ حسين غزالة

وسؤالي له قبل أن أختم الموضوع

كيف حالك مع السواقة الآن بعد حوالي سنة ونصف تقريبا من كتابة هذا الموضوع القيم ؟؟

الحال الآن .. الحمد لله رب العالمين ... كويس جدا ... والفضل فيه لربنا قبل كل شىء ... وطبعا انى بحاول اذاكر بشكل يومى واعرف كل جديد واراجع دائما ... واسأل نفسى كل يوم انت غلط النهارده فى ايه ؟ .... وآخر معلومة عجبتنى مثلا على سبيل المثال ... ان الخط الابيض اللى بيفصل شارع ضيق والعربيات رايحة وجاية فيه ... الخط الابيض ده معمول عشان نبعد عنه ههههههههههههه موش عشان نقرب منه هههههههههههه .... طبعا احنا عندنا العكس ... نقرب من الخط ده ... ونعمل مشاكل للعربيات القادمة من الامام ... وفى الآخر ... انت ما تعديش ... والعربيات القادمة هى كمان ما تعديش هههههههههههههه .... وهكذا مسلسل الذكاء فى القيادة فى شوارعنا المحروسة ... كل يوم نتعلم الجديد

المشاركة الأصلية كتبت بواسطة lela

اذيك يا استاذ حسين اخبار حضرتك ايه
الحمد لله رب العالمين ... اهلا وسهلا بحضرتك


نصايحك كلها جميلة ومفيدة انا عن نفسى لقيت فرصة واشتريت عربية مستعملة بس استعمال كويس اشترتها وبعد كده بدات اتعلم السواقة فى البداية على 128 وبعد كده على عربيتى وانا بقالى شهرين دلوقتى بدرب بس بخاف اخرج لوحدى لازم حد يكون جنبى

عشرة على عشرة .... وكل تصرفاتك طبيعية جدا جدا ... مافيش اى مشاكل


بس انا عندى امل فى انى اخرج لوحدى بس امتى مش عارفة
اخرجى لوحدك الصبح ببدرى .... خصوصا ايام الاجازات ... يوم الجمعة الصبح الساعة 7 الصبح .... او اى يوم تانى الساعة 6 الصبح مثلا .... اخرجى امشى نصف ساعة وارجعة تانى ... لفى حوالين البيت ... وارجعى تانى ... لكن بشكل منتظم .... امشى فى شوارع خالية لوحدك والصبح بدرى .... امشى كتير .... لحد ما العربية تبقى جزء منك .... وممكن تكترى من المشى يوم الجمعة .... لكن الصبح بدرى وفى اماكن خالية


لكن بحاول يكون عندى صبر شوية شوية زى ما انت قلت وشكرا على نصائحك الجميلة

الشكر لحضرتك على المشاركة الجميلة
وكلامك عشرة على عشرة .... الموضوع محتاج شوية صبر ... ومافيش اى مشاكل ... فى مسألة الوقت ... انا عن نفسى الخوف انتهى من عندى .... لكن مازال موجود بنسبة لكن موش كبيرة .... ومع الوقت كل شىء هايكون تمام التمام
مع اطيب التمنيات
اخوكم حسين غزالة

المشاركة الأصلية كتبت بواسطة mud_alex

جزاك الله خير موضوع مفيد انا مبتدئ واستفدت جدا
وده احلى كلام احب اسمعه
ربنا ييسر لك الاحوال وتكونن من امهر السائقين