هي فعلا البلد مافيهاش شغل؟

**elassar2010** · 07-06-2010 10:35 AM

المشاركة الأصلية كتبت بواسطة OlaOsman

يا درش.. إنت مصر تتكلم في نقطة غير اللي انا طول الصفحات اللي فاتت دي باتكلم فيها.

انت بتتكلم عن الوظيفة "المناسبة" و انا باتكلم عن وظيفة بدل القعدة في البيت، و على هذا الأساس بيتمحور كلامي و على هذا الأساس باقول ان فيه شغل. طبعا ده غير الشغل المناسب للشهادة الجامعية اللي برضه موجود في البلد. طبعا مفروغ منه إن مش كل الشركات بتوظف طول الوقت، فيه شركات و حتى الكبيرة منها بييجي عليها وقت في السنة بتعمل freezing لأي تعيينات و تقضي نفسها باللي عندهم لحد ما يعملوا unfreezing للتعيينات تاني. إنما في المجمل آه في وظايف كويسة في شركات كبيرة، و إلا ماكنتش أنا و غيري من اللي شغالين في شركات توظيف مالية البلد كان زمانا عارفين ناكل عيش، و كنت زماني غيرت كارييري من زمان على أساس يعني ان المجال ده مش بيأكل عيش على أساس ان مافيش وظايف في البلد.

الخلاصة تاني يا درش عشان ما نبقاش بنعيد نفس الكلام هو هو تاني:
1- فيه شغل في البلد؟ آه فيه
2- متخرج و مش لاقي شغل:
- عايز تشتغل في تخصصك يبقى تأهل نفسك لسوق العمل و تشوف ايه المطلوب منك من مهارات
و تحصل عليها. شوف اللي اتخرجوا و اشتغلوا في تخصصاتهم عملوا و اعمل زيهم
- عايز تشتغل و مش لاقي في تخصصك و لسه شوية على ما تقدر تأهل نفسك، يبقى تشتغل أي
حاجة على ما تلاقي و زي ما قال أخونا الكريم هنا في الموضوع: الشغل بيجيب شغل
3- كنت بتشتغل و سبت الشغل و مش لاقي شغل تاني: يبقى تحاول تشوف مشكلتك فين و تحاول تحلها باستشارة متخصصين أو سؤال السوق دلوقتي محتاج إيه و أقدر أوصل لده إزاي؟ و اللي عندهم تلات أربع سنين خبرة و بياخدوا مرتبات محترمة عملوا أيه عشان يبقوا كده (طبعا كله أرزاق، إنما بالتأكيد فيها حتة إجتهاد) و يا ترى السي في بتاعتي فيها مشكلة؟ طيب لما باروح اعمل انترفيو هل باعمل حاجة غلط انا مش عارفها؟ ممكن تروح تحضر محاضرات و ورش عمل عن كتابة السي في و حضور الانترفيوهات و دول كتير و عشان ماحدش يقول لي طيب و انا مش باشتغل هاصرف عليهم منين، هاقول له فيه جهات بتديها مجانا أو بأجر رمزي جدا زي زدني مثلا.
4- اللي بيسعى بجد و عايز يتشغل بجد و يبقى حاجة بجد ربنا بيساعده.
5. اللي بيسعى بجد و عايز يتشغل بجد و يبقى حاجة بجد ربنا بيساعده.
6. اللي بيسعى بجد و عايز يتشغل بجد و يبقى حاجة بجد ربنا بيساعده.

بس إنت خبط على كل الأبواب.. أكيد فيه باب منهم هايفتح.. ربنا هايخليه يتفتح لك.. و مافيش باب هايفتح لك من غير ما تخبط عليه.

انا دلوقتى خريج حقوق 2008
والى حدا ما عندى خبرة لانى اشتغلت فى مكتب محاماة(خبرة فى المحاماة)
حاليا باخد كورسات icdl وباذن الله همتحن فيها

دى خطتى حاليا
شغال فى المحاماة وعينى على الشركات
اية ملاحظات حضرتك عليها
واية الشغل المناسب ليا

**hesham_tawfiq** · 07-06-2010 11:35 AM

المشاركة الأصلية كتبت بواسطة ams

'intelligence plus character - that is the goal of true education.' - dr. Martin luther king, jr
هو ده اللى المفروض تطلع بيه من الكلية
مش النظريات او التكنولوجيا
لااااااااء ابدا
انت بتتعلم ازاى تفكر ؟

فتح الله لك بالظبط كده زى الواحد اللى بيسأل فالمدرسه احنا بنتعللم رياضيات مثلا ليه واحنا مش هنعمل حاجه بالرياضيات انما هو مش واخد باله انو بيتعللم العلاقات المنطقيه والاستنتاج مش مجرد جمع وضرب

**Cutevampire** · 07-06-2010 11:49 AM

المشاركة الأصلية كتبت بواسطة OlaOsman

و حضرتك لو متابع كويس كنت عرفت إني كنت عاملة موضوع من فترة باطلب فيه من كل اللي عنده أسئلة في مجال الوظايف أو التوظيف أو كتابة السي في أو حضور الانترفيوهات يسأل و انا أجاوبه، و قد كان و كنت نشطته أكتر من مرة عشان اللي عايز يسأل عن حاجة

أما بالنسبة لقسم الوظائف الخالية فزي ما قلت قبل كده انا مش عارفة الإدارة رأيها ايه، و بصراحة بعد ما اتحط لي تنبيه بالأحمر في توقيعي مش عايزة أحط نفسي في موقف آخد فيه إنذار و اللي عايز حاجة بيسأل و اللي محتاج حاجة فعلا هايدور عليها بنفسه و مش هايستنى حد يجيبها له حد عنده و لو ما جتش يقول أصل مافيش وظايف

معلش، نسيت أقول إني خلاص خلصت كلام في الموضوع ده لإن مافيش جديد تاني ممكن يتقال و هانبقى بنعيد الكلام كله تاني.. و شكرا

يعني ايه اللي محتاج حاجة بيدور بنفسه ... متهيألي اللي محتاج ناس تشتغل هو اللي بيعمل اعلان و لا المفروض كل واحد مش لاقي شغل في المنتدي يبعت لكل عضو في المنتدي يسأله اذا كان عنده شغل و لا لأا !!!!!!!!
بالمناسبة انا فعلا عملت موضوع لأخويا و سألت اذا كان حد عنده وظيفة مفيش اي حد رد عليا ...رغم ان البلد مليانة شغل
علي العموم كويس انك خلصتي الكلام .. لأن كلامك بيستفز ناس كتير طالع عينها و نفسها تشتغل اي حاجة .. و عمالة تسمع ان البلد ملياااااااااااانة شغل و هما اللي كسلانين

**AhmedGen2** · 07-06-2010 02:04 PM

المشاركة الأصلية كتبت بواسطة 3mr farrag

معلش مين قال ان التعليم بره كله بفلوس و كثيره كمان!!!
ماتبصش علي امريكا و كندا و استراليا و بريطانيا

شوف مثلا سويسرا ولا هولندا و بالاخص المانيا
المانيا فيها كليات ببلاش حكوميه ...علشان ناس عايزه تساعد فعلا المحتاج يتعلم
و كمان جامعات ليها ترتيب علي العالم و في الاوائل كمان

مش احنا ولا بنتعلم ولا بنتنيل حاجه مفيده و اسمنا متعلمين وخلاص

السويد "كل" -مش متأكد بالظبط- الجامعات فيها ببلاش ، مبتدفعش مليم ، إنما العدد محدود ومتطلبات التفديم مش سهلة زائد إن الحكومة بتدعم الجامعات هناك بفلوس كتير جداً.

انت هنا لا بتدفع فلوس ولا الحكومة بتدفع فلوس ، وعدد الطلبة كبير جداً ، فالمؤسسات التعليمية العليا هتلاقيها فقيرة فى كل حاجة.

**ams** · 07-06-2010 02:07 PM

المشاركة الأصلية كتبت بواسطة hesham_tawfiq

فتح الله لك بالظبط كده زى الواحد اللى بيسأل فالمدرسه احنا بنتعللم رياضيات مثلا ليه واحنا مش هنعمل حاجه بالرياضيات انما هو مش واخد باله انو بيتعللم العلاقات المنطقيه والاستنتاج مش مجرد جمع وضرب

ربنا يكرمك و يعزك :)

**ahmed4000** · 07-06-2010 02:51 PM

للاسف غالبية الجيل الجديد مش عايز يتعب وفى نفس الوقت بيدور على الشماعة

يعنى يقولك "انا عملت كل حاجة ومفيش فايدة"

تقوله عملت ايه؟ يقولك خدت كورس انجليزى وتنمية بشرية واى سي دى ال

طيب وايه يعنى ماكل الناس عملوا كده فايه اللى بيميزيك عنهم وليه اخدك مدام انت خص "عادى"

حد بيدور فى اعلانات الجرايد؟

طبعا دلوقتى نص الناس بتتريق عل كلامى

لام كل الناس مقتنعة انها اعلانات وهمية؟

طيب ليه ياعم وهمية؟ يقولك لان الناس بتبقى مختارة من قبل الاعلان

طيب لو مختارة من الاول بتنزل اعلان فى الجرنال ليه

يقول دعاية...دعاية ايه وثلاثة اربع الشركات مبتكتبش اسمها فى الاعلان

اقوله طيب حتدفع كام عشرة الاف جنيه-قوليلهم يا استاذة علا سعر السم كام فى اهرام الجمعة- ليه؟ يقولك علشان القانون بيلزمهم بكده؟

طيب جبتها منين المعلومة الغريبة دى؟ ولا فى اى قانون يجبر شركة انها تنزل اعلان توظيف فى الجرنال

يقولك دى كلها مندوبين مبيعات...وماله مندوبين مبيعات ولكن طبعا مليانة مهندسين ومحاسبين وخدمة عملاء وبعدين هو انت حتنقى فى الاول؟

والله انا بشتغل فى مكان كويس وساعات بنقلب الدنيا علشان نلاقى واحد مناسب وبشوف العجب
- اللى لسه متخرج امبارح وداخل بيتنك ويقولى حشتغل من كام لكام وبكام؟
-اللى داخل عمال يضحك ويهزر
-اللى مش فاكر اى كلمة من اللى درسها فى الكلية

دانا قبل مكنت بروح اى انرتفيو كنت اقعد اقلب الدنيا واجهز معلومات عن المكان اللى انا رايحه

وفى الاخر لما ميعجبناش حد يقولونا انتوا بتشغلوا الناس بالواسطة ويخرجوا يلعنوا فى البلد وحالها

**m4th** · 07-06-2010 03:05 PM

يا جماعه الموضوع ابسط من كده بكتير جدا
مشكله البلد سهله اكتشافها , صعب حلها
ان الوظائف الموجوده مش متناسبه مع التوزيع التعليمى للشعب اللى فى البلد
يعنى عندك 5000 طالب فى حقوق و 4000 و فى هندسه و مش عارف كام الف فى طب
و مفيش ربع الاماكن دى شغل فى هذه التخصصات
و عندك الدبلومات اللى بتطلع عماله عددها قليل جدا جدا جدا جدا مقارنه بالتعليم العالى
طبعا واخد خريج جامعه مش هيشتغل يقف فى محل يقطع و يعمل .. مركزه الاجتماعى ميسمحلوش .. صحابه يشوفوه يقولوا عليه ايه
الغلط مش عليه , و فى نفس الوقت مش عيب فى السوق
انا بدور بقالى 3 شهور على واحد يشتغل نص شفت فى محل فراخ
اه شغل مش ظريف و ظفاره و بتاع و ب 500 جنيه فى الشهر
يعنى دلع
و مش لاقى , محدش راضى
عنده حق مش هيبقى طلع عينى 4 سنين فى كليه و فى الاخر اشتغل فى محل زى اللى معاه اعداديه
بس للأسف دى مشكله مش هتتحل غير لما نزود الوعى فى البلد و نغير نظام التعليم

لازم نغير الاعتقاد ان كل طفل صغير يكون امنيه حياته انه يدخل طب و هندسه
و لو مجوش يدخل على حسب مجموعه مش رغبته
ده لازم يتغير

**ahmed4000** · 07-06-2010 03:12 PM

المشاركة الأصلية كتبت بواسطة m4th

الغلط مش عليه , و فى نفس الوقت مش عيب فى السوق
انا بدور بقالى 3 شهور على واحد يشتغل نص شفت فى محل فراخ
اه شغل مش ظريف و ظفاره و بتاع و ب 500 جنيه فى الشهر
يعنى دلع
و مش لاقى , محدش راضى

مش لازم يكون محل فراخ ولا بنقول زبال والكلام ده
لكن على الاقل مندوب مبيعات- موظف استقبال- سكرتير

راجعوا القصة بتاع الاخ زميلنا اللى عايش فى ايطاليا دلوقتى وربنا كرمه وازاى كان بيشتغل نقاش وازاى بعد متخرج اشتغل موظف امن لغاية لما ربنا كرمه

**m4th** · 07-06-2010 03:16 PM

المشاركة الأصلية كتبت بواسطة ahmed4000

مش لازم يكون محل فراخ ولا بنقول زبال والكلام ده
لكن على الاقل مندوب مبيعات- موظف استقبال- سكرتير

راجعوا القصة بتاع الاخ زميلنا اللى عايش فى ايطاليا دلوقتى وربنا كرمه وازاى كان بيشتغل نقاش وازاى بعد متخرج اشتغل موظف امن لغاية لما ربنا كرمه

اصل ده شئ طبيعى و المفروض محدش يبقى مستنى انه يتقال له الكلام ده
انت خريج كليه و مش لاقى شغل فى مجالك
يبقى لازم تتنازل شويه و تشوف اى شغل زى ما حضرتك قلت كده
لحد ما ربنا يفرجها عليك و يجيلك شغل فى المجال بتاعك
مين عارف مش يمكن تنجح فى مجال تانى و ربنا يكرمك فيه اخر كرم
و ياما ناس اعرفهم مسافرين بره و شغالين احسن من احسن واحد هنا و هما خريجين معاهد و كليات غير اللى هما شغالين فيه خاااااالص

**Ahmed.Ali** · 07-06-2010 03:33 PM

المشاركة الأصلية كتبت بواسطة elassar2010

انا دلوقتى خريج حقوق 2008
والى حدا ما عندى خبرة لانى اشتغلت فى مكتب محاماة(خبرة فى المحاماة)
حاليا باخد كورسات icdl وباذن الله همتحن فيها

دى خطتى حاليا
شغال فى المحاماة وعينى على الشركات
اية ملاحظات حضرتك عليها
واية الشغل المناسب ليا

طبعا مدام علا ادري مني بس الـicdl دي بتعملوها ليه ؟؟؟؟ انا مش شايف ان ليها اي لازمه اساسا لانها مبسطه جدا جدا جدا
مش قصدي احبطك انت بتسعي بس اسعي في حاجه اكبر شويه

الموضوع: هي فعلا البلد مافيهاش شغل؟

LinkBack

أدوات الموضوع

عرض

-

-

-

-

-

-

-

المواضيع المتشابهه

هي البلد رايحه علي فين فوضي فعلا

هى الأفيو فعلا سيارة سيئة فعلا ؟؟؟؟ ( مشاركات خارج الموضوع )

مصر واهانة المواطن على جميع المستويات انا عايز اطفش من البلد دى البلد دى مش بتاعتنا

كارثه حقيقيه فعلا فى البلد

هل إحنا فعلا بنتطرد من البلد ؟!

الكلمات الدلالية لهذا الموضوع

المفضلات

المفضلات

ضوابط المشاركة