النيو سيراتو...ما لها وما عليها

**NoRmAl** · 16-06-2010 04:18 PM

المشاركة الأصلية كتبت بواسطة M7amD_7amDy

يخرب عقلك يانورمال

دانت ولللللللللللد

تسلم إيدك ودماغك والله وأنت خلصت كل الكلام فى حبيبة الكل ( سوسو )

ومفيش قول بعد قولك ياكبير

حمدى باشا والله منورنى
وشكرا على كلامك يا كبير
ودايما رافع من معنوياتى كدا

المشاركة الأصلية كتبت بواسطة morasystem

لو سمحت لو سمحت لو سمحت ... روح اقف قدام المراية ... دور على أى حد معدى من جنبك ... خليه يبوسك على خدك بالنيابة عنى ... اييييييييييييييه الجمال ده ... تسلم دماغك و ايدك على الموضوع ده - الموضوع ده متثبتش ازاى لحد دلوقتى ... بغض النظر عن إنه فيه مواضيع كتييرة من اللى متثبتة فوق دى مينفعش تتثبت على حساب الموضوع الجميل ده

احب بقى أديك انطباعى و انا برضه EX زيك بس خليجى

أولا الجنط: انا الجنط بتاعى 15 Alloy مش عارف لو فيه فرق بين ال 15 Alloy و ال 15 العادى ولا لأ فى الثبات و النشوفية... بس عايز أقول إن ده أحلى جنط نزل للسيراتو كحجم لأنى بصراحة مش شايف إن أى جنط أكبر من كدة يبقى ماشى على شكل العربية حتى لو هيجى على حساب بعض الكماليات اللى كنت أتمنى حاجة أو 2 منها اللى هم فتحة السقف و السمارت كى ... بس الحمد لله كدة فلة أوى ... و بالمناسبة أحب أقولك ليه والدى رفض يجيب سيراتو بفتحة سقف ... لأن عربيته فيها فتحة سقف و مش بنستعملها فقاللى بلاش أحسن ... بالإضافة لصاحب المعرض اللى نصحنا بإنه بلاش الجنط ال 16 ولا 17 .... إلا إنى لازلت أحمل ضغينة من بتوع ال SX علشان اللهب المتوهج بتاع العداد اللى انا كمان زيك بتمناه و فى يوم من الأيام هوصله بإذن الله

ثانيا العفشة الخلفية: بص هقوللك على حاجة ... المرة الوحيدة اللى حسيت فيها إن العفشة دى ناشفة و بنت ستين تيييييييييييييييييت هى يوم لما العربية جت لأنى كنت لسة مظبتش الكاوتش ... إنما بعد كدة - و انا على مشارف ال 8700 كيلو دلوقتى - العفشة طرية بشكل مختلف تماما ... و العفشة دى مش بيبان حسناتها إلا بعد أما تعدى ال 100 .... زمان لما كان معايا لانوس كنت أوصل لل 110 أقول كدة حلو أوى 120 ماشى إنما أكتر من كدة يبقى غشومية و تبدأ بقى تتشاهد على روحك .... إنما دلوقتى انا بقيت بوصل ل 140 و 150 و محدش من اللى راكبين حاسس بحاجة ... و العربية - لهواه الجرى يعنى - حلوة أوى لحد 160 ... ممكن تجيب أكتر من كدة بس هتبدأ تقلق بس ده مش معناه إن الثبات بيبقى أوحش و دى قد تكون ميزة الجنط السبور Alloy

ثالثا الباور: المفروض - و مش عارف إذا كان افتراضى ده صح ولا غلط - إن الجنط بتاعك عادى لأن ال 15 Alloy مش بينزل غير للسيراتو الخليجى ... يعنى المفروض الدركسيون عندك يكون أخف من عندى ... بس انا شايف إنه مش عبء مطلقا على ذراعى ...بس هو مش خفيف زى الباور الكهرباء اللى بينزل فى معظم العربيات بس هو يمتاز بإنه أكثر ثبات و خصوصا مع الجنط الثقيل و مش بتحس بيه غير لما تيجى تركن العربية و بتفادى الموضوع ده إنى محركش الدركسيون إلا مع حركة العربية إنما عمرى ما أحرك الدركسيون و العربية واقفة

رابعا استهلاك البنزين:هى على الطريق لمسافات طويلة و سرعات عالية فوق ال 120 حلوة و معقولة و ممكن توصل بيها لمعدلات عبيطة زى 6 و 7 لتر فى ال100 كيلو .... إنما جوة المدينة انا معاك إنها بتستهلك بنزين بس متنساش إنك سايق - زى ما قلت - وحش ... و الوحوش مش بياكلوا فول زينا

لأ دا موتور الله أكبر Gamma DOHC 124HP يعنى رفاهية عالية ... و ليكن إن شركة كيا مش عاملة تكنولوجيا لتوفير البنزين زى بى ام و مرسيدس .... لو هنتكلم على الزمن فالتفويلة بتقعد معايا اسبوعين تتضمن مشاوير كل يوم فى المدينة و على الطريق لو هنعتبر كوبرى اكتوبر و المحور الصبح بدرى قبل الزحمة دول طريق ... بتعمل حوالى 510 كيلو ... و انا أعترف إنى بحرق و ممكن أجيب أقل من كدة بس زى ما قلت العفريت بينزل على الواحد مننا يخليه مش بس يحرق لأ دا يولع فى أم الموتور

والله يا مورا مشاركه جميله وتقرير جميل
وشكرا جدا على على كلامك يا باشا دا بس من ذوقك

المشاركة الأصلية كتبت بواسطة tamernor

تسلم ايديك يا هندسة من زمان مشوفناش تقييم متكامل عن العربية زى ال انت عملته
أنا معاك فى أن ال يقدر ينقل تجربة العربية لازم يكون ساقها فترة موش مجرد خدها مشوار من واحد صاحبة ويرجع يقول رايه حتى لو الراى دا لصالح العربية
وفاضل ع الحلو تكه ونبقى من ملاك كيداهم انشاء الله
عموما ربنا يوفقك ف امتحاناتك

ربنا يخليك يا فندم
وإن شاء الله نباركلك قريب على العربيه إن شاء الله

المشاركة الأصلية كتبت بواسطة medociv

معلش ليه في حدة جامدة وانت بتعمل التقييم متقول المميزات والعيوب وخلاص ليه اعضاء السيراتو حتى وهو بيعمل تقييم لازم يعمله بحدة ويمنع منعا باتا اي حد يقول رايه في العربية لمجرد انه ممتلكهاش لازم تتقبل الراي الاخر برضه
وشكرا

طيب أولا أذا كان قصدك على التقييم نفسه فيه حده فأنا مش شايفها
فى مهاجمه منى على الى بيهاجموا العربيه ودا طبيعى
لكن لو قصدك على كلامى الى فى الاخر فأنا معاك فى حده منى أعتذر عنها

بخصوص تجارب غير الملاك أنا قلت قبل كدا
الموضوع دا بالذات الى أحنا فيه دا مخصص فقط لتجارب الملاك
أيه الى يخلى الى مش مالك وعنده تجربه لازم يتكلم هنا
ميعمل موضوع لوحده حتى أفضل ليه
هو موضوع واحد داخل القسم الى هو دا مخصص فقط لتجارب الملاك
ليه
علشان أنا عايز الى ميعرفش حاجه عن العربيه أو عايز يعرف عنها
يبقى فيه موضوع يفتحه يلاقى كلام واقعى مبنى على تجربه لأشهر فى ظروف شتى
ميلقيش تجربه منقوله لا يعلم صحتها إلا الله
أنا بقول لو واحد ساق العربيه يوم وعايز يشكر فيها مليون مره
بردو ميقولش تجربته هنا علشان دا للملاك فقط
يعنى ميهمنيش هيخش يهاجم ولا يمدح
أنا عايز غير المالك ميتضللش
لا يلاقى واحد بيهاجم على تجربه يوم ولا حتى واحد يشكر على تجربه يوم
نورت

المشاركة الأصلية كتبت بواسطة as_samman

الله ينور عليك يا normal من خلال متابعتي للمنتديات و تتبعي للسيارة - ان شاء الله اكون من ملاكها - تقرير وافي شافي كامل مكمل

شكرا يا فندم
وإن شاء الله نباركلك قريبا إن شاء الله
وربنا يوفقك للأفضل

**Atrees** · 16-06-2010 04:45 PM

ماشي يا نورمال اسيبك يومين الاقي الدنيا مقلوبة بسبب مواضيعك - هههههههههههههههه

ايه الجمال دة كلو يا معلم - انا بس مشغول يومين كدة وحرجعلك ونهيص

انا معنديش نص كلمة علي تقريرك الرهيييب دة بس ليا طلب

ممكن ابقي اعمل تقريري عن ال sx هنا معاك عشان يبقي الموضوع واحد ومرجع لكل الملاك ؟
دة طبعا بعد اذنك - انا ممكن اعمل موضوع منفصل بس انا بتمحك في موضوعك الجامد دة

**mohamed_7amo** · 16-06-2010 04:49 PM

برنس الانتاج الفنى فى المنتدى نورمال باشا

**NoRmAl** · 16-06-2010 04:55 PM

المشاركة الأصلية كتبت بواسطة atrees

ماشي يا نورمال اسيبك يومين الاقي الدنيا مقلوبة بسبب مواضيعك - هههههههههههههههه

ايه الجمال دة كلو يا معلم - انا بس مشغول يومين كدة وحرجعلك ونهيص

انا معنديش نص كلمة علي تقريرك الرهيييب دة بس ليا طلب

ممكن ابقي اعمل تقريري عن ال sx هنا معاك عشان يبقي الموضوع واحد ومرجع لكل الملاك ؟
دة طبعا بعد اذنك - انا ممكن اعمل موضوع منفصل بس انا بتمحك في موضوعك الجامد دة

عتريس بجد واحشنى جدا جدا
يا باشا دا أنا ليه الشرف أن تقريرك يبقى فى موضوعى
بجد مفيش حاجه هتخلينى أسعد من كدا
وأنا كدا كدا مستنى لما الموضوع يهدى وكل مالك يقول رأيه وتقريره
هطلب من الاداره أنها تنقل كل التقارير تحت بعضها
علشان الى داخل يقرا كل التقارير تحت بعضها كدا
منورنى دايما يا عتريس

المشاركة الأصلية كتبت بواسطة mohamed_7amo

برنس الانتاج الفنى فى المنتدى نورمال باشا

يا باشا ربنا يكرمك على كلامك الجامد دا
وشرفتنى بردك

**morasystem** · 16-06-2010 11:16 PM

المشاركة الأصلية كتبت بواسطة as_samman

السيد morasystem ممكن من خلال استعمالك اليومي للسيارة لو مشوار من اكتوبر الى مدينة نصر و تحديدا رابعة العدوية
العربية بتستهلك كام بنزين في زحمة متوسطة مع ملاحظة ان من اكتوبر الى ميدان لبنان طريق مفتوح

مع خالص تحياتي

بص يا باشا ... الأول هنصفر عداد الTrip ... دور العربية ... سخنها لمدة 30 ثانية زى ما الكتاب ما قال ... هتلاقى متوسط الاستهلاك بقى 13.8 لتر فى ال 100 كيلو و لسة مطلعناش .... بعد كدة اطلع على المحور هتلاقى المعدل عمال يقل يقل يقل لحد ما هيوصل على أخر المحور ل 9.2 لتر فى ال 100 كيلو هنبدأ ندخل فى الزحمة و المعدل ممكن يزيد لحد 9.8 لتر فى ال 100 كيلو ... هنرجع تانى على اكتوبر و المعدل هيبدأ يقل تانى لأننا على الرابع دلوقتى و لمسافة طويلة بسرعة عالية ... فى النهاية بعد ما هنوصل هتلاقى المعدل حوالى 9.5 لتر فى ال100 كيلو ... ده بالنسبة للاستخدام الشبابى للناس اللى بتحب تحرق و كدة

لو هنحرص قوى و نقرط أوى و بعد كل نقلة نرفع رجلنا من على دواسة البنزين علشان العربية تنقل للغيار الأعلى يبقى ممكن نعمل المشوار كله رايح راجع بمتوسط استهلاك حوالى 9 لتر فى 100 كيلو و هو حاجة قياسية جدا جدا جدا بالنسبة لموتور 1600 سى سى داخل شوارع القاهرة

و الحكم فى النهاية للمشوار ككل ... هو أخر قراية لمتوسط الاستهلاك بعد ما تنزل من العربية لأن الكمبيوتر بتاع العربية بيحسب اوتوماتيك معدل الاستهلاك فى كل كيلو العربية بتمشيه و يجمعهم على بعض أولا بأول إنما القراية بتاع العداد مش قراية لحظية

**Amr A.salam** · 17-06-2010 03:07 AM

هايل يا نورمال بجد

وبعدين انت زعلان من استهلاك 10 لتر لكل 100 كيلو

انا الفترة اللي فاتت بلاقي الاستهلاك 11.5 و12 وأرقام غريبة كدة

بس اجمالاً بعد استخدام 15000 كيلومتر

العربية ظريفة مش مدايقني غير العفشة (مدايقاني أوي بيني وبينك)

شكراً يا كبير على المواضيع الجامدة

**midosalah** · 17-06-2010 04:21 AM

توبك رائع ومشاركات اكثر روعة شكرا لمجهودك

**Khaled_Nowaihy** · 18-06-2010 01:51 AM

جميل جداً normal - تقرير وافى واسلوب جذاب فى الوصف والتعبير .... يا ريتنى أعرف اعمل وحد زيه للكارينز
طالما القلب واحد (الموتور) .... فالاستهلاك فى الحدود الطبيعية ولو ان الكارينز معايا بتوصل 13 كم / لتر

**NoRmAl** · 18-06-2010 07:38 PM

المشاركة الأصلية كتبت بواسطة amr a.salam

هايل يا نورمال بجد

وبعدين انت زعلان من استهلاك 10 لتر لكل 100 كيلو

انا الفترة اللي فاتت بلاقي الاستهلاك 11.5 و12 وأرقام غريبة كدة

بس اجمالاً بعد استخدام 15000 كيلومتر

العربية ظريفة مش مدايقني غير العفشة (مدايقاني أوي بيني وبينك)

شكراً يا كبير على المواضيع الجامدة

المشاركة الأصلية كتبت بواسطة midosalah

توبك رائع ومشاركات اكثر روعة شكرا لمجهودك

عمرو باشا منورنى والله
وعايزين تقرير منك كدا علشان الموضوع يكمل

المشاركة الأصلية كتبت بواسطة khaled_nowaihy

جميل جداً normal - تقرير وافى واسلوب جذاب فى الوصف والتعبير .... يا ريتنى أعرف اعمل وحد زيه للكارينز
طالما القلب واحد (الموتور) .... فالاستهلاك فى الحدود الطبيعية ولو ان الكارينز معايا بتوصل 13 كم / لتر

أستاذ خالد ربنا يخليك و والله أنت تعرف تعمل أحسن منه ومستنين منك تقرير عن الكارينز بقى من أكبر ملاكها

المشاركة الأصلية كتبت بواسطة sam_y

اية الجمال دة والحلاوة دية
بصراحة تسلم اديك وتفكيرك المنطقى
ودايما مواضيعك الجميلة لفائدة اعضاء المنتدى
ربنا يبارك فيك
اما بخصوص البنزين انا عندى داخل القاهرة بتعدى 12 لتر 100
اما خارج القاهرة / اسكندرية 10 لتر لكل 125

ربنا يبارك فيك يا باشا نورت الموضوع

الموضوع: النيو سيراتو...ما لها وما عليها

LinkBack

أدوات الموضوع

عرض

-

-

-

-

-

-

المواضيع المتشابهه

ايه الفرق بين النيو سيراتو الLx الاوتوماتيك والنيو سيراتو ال Ex الاوتوماتيك

الاشياء اللي هاشيك عليها وانا بستلم النيو اكسنت؟؟؟

النيو النترا ولا النيو سيراتو

مالكى النيو سيراتو وحاجزى النيو سيراتو

الكلمات الدلالية لهذا الموضوع

المفضلات

المفضلات

ضوابط المشاركة