بصوا هو أنا تابعت كل المشاركات اللي في الموضوع بس حسيت أن فيه ناس سحبت براه ، بنتكلم علي جنسية أجنبية وتنازل عن مصرية ،طبعاً ديه package دين وطباع وأصول وغربه وتقاليد وعيشة مختلفه.مايجيش حد يمسك نقطة وحدة ويتكلم فيها بسهاب شديد وينسي الباقي.داه ميزان شوف أنهي كفة هطب بعد متضيف كل المميزات مقابل العيوب .
أنا يمكن يكون ليا راي وخاصةً اني أميركي الجنسية و لازلت محتفظ بالمصرية كنوع من العرفان والجميل لمصر فقط لا غير ،يعني من غير ما يكون لي أي مصلحة للإحتفاظ بها حتي مع نزولي لمصر ،يمكن الحاجة الوحيدة هي اني اتعامل باسعار مخفضه في مصر لما أنزل اتفسح المهم يعني هقدر اقولكم علي شعوري الحقيقي .
أنا مبحترمش أي بلد تطلب منك التنازل عن جنسيتك مقابل جنسيتها ، لو بصيت في اللستة اللي عضو نشرها ، كلها دول عربية أو إفريقية فقيره اللي بتطلب كدة .طبعاً خوفاً علي مراكز الحكم لحسن يحصل إختراق لحركه القمع المركزية اللي الدول ديه بتتبعها. إيه اللي هيخلي أمريكا وأوروبا كلها بتسمح بكدة والسعودية والسودان لأ . يمكن مصر طلعت برا اللستة اللي بتسمح بالإزدواج علشان أسباب مالية بحتة ،ولمساعدة الاقتصاد المنهار علي إستقبال أموال صعبة من الخارج .في المقابل لا يسمح بالتعين في الجيش أو الحكومة لهم،يعني ناخد منكم اللي احنا عايزينه وغورو بعيد عننا
ثاني مبدأ اللي بيقول إن المصريين برا بيشتغلو عبيد ،الكلام دة صح في الدول العربية الاسلامية ، وغلط تماماً في أوروبا وأمريكا .فيه ناس بتشتغل هنا في أمريكا أشغال متواضعة علشان امكانيتهم كدة و راضيين بكدة ، والدليل اني هنا دكتور ومعنديش كفيل ، وبقبض أعلي فئه مرتب في أمريكا بعد رئيس الجمهورية اوباما .اللي هو مش أعلي مرتب في أمريكا أصلاً .اللي هو أنا مش مواطن درجة ثانية ذي ما ليبيا والسعودية ما بتعمل للي أبوه سعودي وأمه جنسية ثانية. أروح انتخب الرئيس زيي ذي أي مواطن أميركي ولو عايز مقابلة معاه ممكن بردو .
أضف حاجة عن موضوع العبودية ، هنا مش مسموح بالموضوع داه ،بمعني اني لو لقيت بنت مصرية مستعدة تيجي تشتغل في أمريكا عندي خدامه ب-3000 جنيه الشهر وداه يمكن حلم بنات غلابة كتير .أمريكا نفسها مش هتوافق، عارفين ليه ،لأن أقل أجر في أمريكا هو 10$ الساعة وساعات شغلها 8 ساعات بس في إليوم وأكتر من كدة الساعة ب-20 $ وماينفعش تعمل أكتر من 30 ساعة إضافي في الأسبوع حتي لو هي راضية.يعني في الإسبوع تعمل حوالي 1000$ في الشهر 4000$ يعني أكتر من 22000 جنيه مصري دة بلاضافة لمصاريفها وتذاكرها وتأمين طبي كمان . يعني لما أوروبا وأمريكا يخافوا علي بنات بلدي الغلابة مش البنات ولد الناس أكتر من مصر والدول العربية يبقي لسة فيه حد بيقول إن أمريكا وأوروبا وحشين و-.، و،، بالعكس دول خيرهم علينا واللي ينكر كدة يبقي* * * * * *
لما البنات يروحو السعودية عند شوية رعاة أغنام حفاه ، ولا بلاش بنات نتكلم علي دكاترة ومهندسين شغالين بالسخره وعندهم نظام كفيل هل ديه دول الواحد يفكر حتي يروحها زيارة مش إقامة ، لا و في الاخر إيه مش بيسمحو انك تتجنس عندهم ولو سمحو لازم تسقط جنسيتك الاصلية ،شايفين فرق المعاملة
حكاية حصلت مع بنت عمي ،مش ذي ماناس بتحكي عن إبن خال عم صاحب صاحبه، كانت عايشة في الإمارات بجنسيتها المصريه ،مرتب زبالة ،بتدفع نصه إيجار والباقي يدوبك أكل وشرب ،والإسم غربة و-16 ساعة شغل في إليوم.قعدت وراها زن لغاية ما قدمت علي الإقامة في أمريكا وأخدت الجنسية، ولقينا مدير الشركة اللي عمرها مشفتو بيكلمها في أمريكا وعرض مرتب 3 أضعاف اللي كانت بتخدو ومميزات سكن وعربية مكنتش تحلم بيهم. طيب ما البنادم هو البنادم اللي كان شغال عنده من شهر ولا اتنين ،اللي جد الجنسية والباسبور الازرق
اللي بيقول إن التعليم والمعيشة غاليه ، داه صح بس لما يبقي عليك 150,000 $ مصاريف تعليم وبتعمل 160,000$ في السنة مش هيبقي كتير خالص،مش عايز حد يقولي إن مش كل الامريكان بيعملو 160,000 ودة صحيح لان اللي بيعمل كده مبيكنش عليه 150,000 مصاريف. أنا بتكلم عن نفسي .المحاسبين بيعملو 90.000 وبيكون عليهم مصاريف تعليم 40,000-50,000
، لما تبقي الفرخة ب-1.5$ وكرتونة البيض ب-2 $ وكيلو اللحمة ب-3 $ والعربية ال-4x4 أميركاني أو ياباني علي الزيرو ب-15,000 $ يبقي داه بردو مش غالي لما يبقي ليك رعاية وتأمين صحي ،وبسبور يخليك تدخل أي دولة في العالم بكل الاحترام يبقي الموضوع جايب همه أوي
لما نيجي للناحية الدينية علشان فيه ناس هنا تهمها الموضوع داه ،هتعرف تصلي وتمارسه كل شعائرك الدينية مسيحي ،مسلم أو حتي بوذي أكتر من مصر .وداه لانهم فصلين الدين عن الدولة،يعني لو بصينا هنلاقي الاغلبية مسيحيين كاثوليك ،بس التشريع مبيقلش إن المسيحية هي المذهب الرئيسي للتشريع.مفيش أمن هيقفل المساجد بعد التراويح ويحقق مع اللي بيصلي الفجر و يمارس أي ضغوط علي الأئمة، مفيش مسلمين هيقتلو مسيحين بعد صلاه العيد ولا يقولك موافقة رئيس الجمهورية علشان نبني كنيسة . مفيش أمن هيقف قدام معبد يهودي يحرسه ولا يأمن أفواج يهود بيمارس شعائرهم في سلام . مفيش بهايئين هيولعو فيهم وفي بيوتهم علشان دينهم مش دين سماوي. كل واحد وص علي نفسه والحساب داه شغل ربنا بعد ما كل واحد يموت..
وكفاية باقي علشان أنا تعبت من الكلام
ـــــــــــــــــــــــــ ـــــــــــــــ
برجاء الانتباه لعدم خروج الحديث عن الشكل المناسب
تلقيت تحذير للمخالفة
مشرف عام 3
المفضلات