الموضوع: تعمل إيه لو طلبوا منك تتنازل عن الجنسية المصرية علشان تتجنس ؟

ده الموقف اللي أخويا فيه بالضبط حيث يعيش في ألمانيا منذ ست سنوات، هو رافض الجنسية الألمانية (التي لا تسمح قوانينها بازدواج الجنسية) لأنه هايرجع مصر ومش هايكمل هناك!!! ولكن وجهة نظري إنه ياخد الجنسية الألمانية ويعيش في مصر كألماني وياخد حقه تالت ومتلت، وبكدة ينال الحسنيين، بس هو محكم دماغه، للأسف :(

وجهة نظري إن الأجنبي على الأرض المصرية واخد حقه أكتر من المصريين، ولو فيه شبهة أني سأعامل كـ "مواطن درجة تانية" في البلد الذي تجنست بجنسيته فعلى الأقل أنا أعرف لماذا أُعامل كمواطن درجة تانية (وده مابيحصلش في الدول الغربية)، بس ياريت حد يفسر لي لماذا أعامل داخل وطني العزيز الغالي كمواطن درجة تالتة وبلا حقوق !!! بل ويمكن أدنى من هذا .. وكفاية كلام لحد كدة عشان الدمعة هاتفر من عيني
ياريت تعديل الاستطلاع لأن كلمة "تغور" دي برضه تقيلة ولذلك لم أجد ما يناسبني في الاختيارات، أنا موافق اتنازل وآخد الجنسية المناسبة التي تضمن لي حقوق ومعاملة آدمية ومصر في قلبي وهاعيش فيها بجنسيتي التانية إمبراطور ماحدش له حكم علي.

طب إيه المانع أنتمي لمصر بس ماكونش مصري؟!! أنا مش شايف أي تعارض. والتنازل عن الجنسية المصرية في سبيل جنسية دولة آدمية -في نظري- واجب شرعي طالما ستكون حقوقي الإنسانية محفوظة في حالة الحصول على الجنسية الجديدة، والتمسك بجنسية دولة تهينني ولا تقيم لحقوقي وحياتي ولا أأمن فيها على نفسي أو مالي -طالما أنني لست أحد الباشاوات الجدد- شيء لا مبرر له ولو حتى بداعي الانتماء.

طب إيه المانع أنتمي لمصر بس ماكونش مصري؟!! أنا مش شايف أي تعارض. والتنازل عن الجنسية المصرية في سبيل جنسية دولة آدمية -في نظري- واجب شرعي طالما ستكون حقوقي الإنسانية محفوظة في حالة الحصول على الجنسية الجديدة، والتمسك بجنسية دولة تهينني ولا تقيم لحقوقي وحياتي ولا أأمن فيها على نفسي أو مالي -طالما أنني لست أحد الباشاوات الجدد- شيء لا مبرر له ولو حتى بداعي الانتماء.

خلاص أنا أقدم هجره لأمريكا و إنت لألمانيا و نبقى زي يهود الشتات

ربنا إدانا بلد نعيش فيها و ننتمي ليها حتى لو كان حكام البلد دي ودوها في ستين داهيه إسمها بلدنا برضه

كلامك غير منطقي لأن لو إطبق على الجماعه يبقى البلد راحت

فكره المواطنه فكره تقوم عليها الأمم و تتطور
حتى الحضارة المصرية القديمه و فكره الإنتماء لكيميت الأرض الخصبه بدون إنتماء ما وجدت الحضارة
بدون إنتماء لا توجد حضارة و مش هنتقدم أبدااا

للأسف أنا يائس بجد من التصويت للدرجة دي في ناس مستعده تتخلى عن جنسيتها لصالح بلد تاني يكون هو عليها دخيل فكريا و إجتماعيا و ثقافيا و ممكن دينيا !

الجنسية الأمريكية تعطيك امتيارات متحلمش بيها ، يكفى انك فى أمريكا لو عندك طموح ومهارة كفاية هتعمل فلوس بالهبل ولو انت طموحك على قدك هتعيش فى مستوى مادى مريح جداً.

وبعدين التعليم هناك افضل تعليم على مستوى العالم ، يعنى بجد لو عندك طموح وعندك نسبة ذكاء فوق الطبيعى ، خلاص كدة انت عديت.

وبعدين لما يكون معاك الجنسية الأمريكية وعايش هناك هتقرف تنزل هنا أصلاً ، أنا كل اللى أعرفهم هناك بينزلوا مضطرين ، دة اللى بينزل ! ، مش عشان سواد عيونها ولا حاجة ، كلهم بلا استثناء ، ويوم ما ينزل ، يوم بس ما يفكر ينزل ، كل مصالحه بتنجز فى ثوانى وأخره شهر اتنين ويرجع من حيث أتى.

وكل اللى أعرفه فى الخليج بقاله كتير ، مش بيفكر أبداً يرجع مصر ، خطة التقاعد فى أى دولة غير مصر استراليا كندا امريكا نيوزلندا!! ، محدش أبداً شفته بيفكر يرجع مصر وجو الحنين لترابها دة مش بسمعه أبداً.

التنازل عن الجنسية دة عامل زى فكرة الانتقال من حارة شعبية فى عشوائيات لفيلا فى جاردن سيتى!! مفيش مقارنة أصلا دة لو جت الفرصة بس هتلاقى كل الناس اللى بتقول مش هتنازل دى أول ناس هتتنازل!! :)