الموضوع: الى كل مالكى الفيلشيا ... ايه مزاياها وعيوبها وايه انطباعتكم عنها .. محتاج نصائح

معجزة الفيليشيا :
مدوخه الناس من 1995 لحد النهارده بيتناقشوا هى كويسه و لا وحشه ؟؟؟
طبعا مش هاقدر أحكم على كل العربيات الى نزلت السوق من الموديل ده لكن أقدر احكم على عربيتى بس
و فعلا مشكله السخونه كانت موجوده فيها لكن بسبب إهمال مالكها قبل منى بدليل إن العربيه بعد ماعرفت ايه فيها محتاج تغيير و تصليح كل شىء طبيعى و السخونه زيها زى اى عربيه تانيه يبقى العيب م شعيب موديل العيب إهمال مالكى السياره ليها و ده بسبب إنها عربيه حمالة قسيه و بالتالى صاحبها بيعتقد انها هاتصلح نفسها لوحدها و هاتستحمل اللى بيعمله فيها لأنه ملاحظ انها شغاله بالرغم من كل اللى شايفه فيها حتى السخونه ..
ده بيديله الدافع انه يطنش
العربيه دى ممتازة جدا و من أفضل العربيات اللى نزلت السوق المصرى و مش محتاجه اكتر من متابعه و عناية و عمرها ماتتعبك
على فكره عمرنا ماشوفنا إعلان و لا دعايه للعربيه دى و مش بس هى و معظم موديلات سكودا ماعدا الموديلات الجديده و اللى بيعملها إعلان مش وكيلها دول التجار .. اقصد ان العربيات التانيه اللى واخده سمعه لمجرد انم وكلائها ماليين الدنيا دعايه و إعلان و ده اللى بيخلى المصريين يجروا وراها و يعملولها سوق ده طبع فينا مش جديد ..
لدرجة ان فى موديلات تانيه كتير من العربيات نمره واحد فى العالم كله لكن فى مصر الناس تسمع الإسم يقولك لا يا عم دى مش بتاعتنا و ماتنفعش و مش حلوه لمجرد ان مالهاش وكيل و مافيش دعايه
الفيليشا مش كيميا و لا ذرة عربيه مافيش اسهل منها و بسيطه جدا افتح كبوتها و بص عليها هاتجمعها كلها بعينك .. انزل تحتها و بص على عفشتها و شغلها مافيش ابسط منه و لا انشف
صحيح هى عربيه ناشفه يعنى صوتها عالى سواء موتور او عفشه بس ده مش عيب .. لأن عصر مركبات الفضاء لسه ماجاش ..
و بعدين الإستغناء عن بعض الأجزاء اللى بتخفض الصوت و لا تؤثر على الأداء مش عيب هو أوبشن مش أساسى
بالنسبه لوش السلندر الأنتيمونيا .. انا بس عايز حد يقولى هو فيه عربيه فى مصر وش السلندر بتاعها مش ألومنيوم ؟؟
و ايه معلومات اللى بيتكلم عن سبيكه الأنتيمونيا ؟؟ اى عربيه فى العالم سخونتها تزيد عن الطبيعى وش السلندر يتأثر مش بس الفيليشيا و مش بس هى اللى ألومنيوم .
من 1995 لحد 2009 .. السخونه السخونه ... ده مجرد ثرموثتات و مروحه و دورة تبريد و خراطيم وش سلندر سليم يبقى عمرها ماتسخن .. مش بعد ماتسخن و كل ده يبوظ الناس تشتكى انها سخونتها عاليه
صلح و بعدين لاحظ .. مش تسيب العربيه خربانه و تشتكى

thank you very much

يا باشا انا استعملت عربيات كتير جدا من ساعة ما بدات امتلك عربية لم اجد اسوا من الفليشيا اللي بيقولوا غنها ان عيبها عدم اهتمام مالكها بيها....اولا السخونة غير واضحة الاسباب اللي تخليك تغير رادياتير و تغير جوانات وش السلندر و تقشطه وتكشف على الشكمان اللي ممكن يكون مش سليم وتشوف الطنابير اللي ممكن يكونه قافشين وهلم جرجر وكل ميكانيكي يحسسك ان ده العيب ولازم يتحل لحد ما يحل وسطك ....وفيها مشط اليكتروني اللي بيوخرج ويقسم الكهربا للموبينة و الاسبيراتير بيبوظ باستمرار و يلفك حوالين نفسك.....والعفشة ناشفة جدا جدا المهم والله العربية دي وقفتني كل يوم عند صنايعي شكل كهربا. ميكانيكي. شكمان. واللي يجنن ان الاقتراحات كلها منطقية لكن دون جدوى....في نفس الوقت جربت اكسنت او اكسيل او لانسر وكلهم كانوا تمام وساترين ومروحش اصلح غير للتجديد او لتفويق العربية او العفشة و لم تتعطل وتقف فى الشارع و افتح كبوتها الف مرة فى اليوم

استاذي العزيز المدافع عن الفليشيا انا من ضمن العربيات اللي كنت باستعملها بالفعل مرسيدس وكلام حضرتك غير صحيح لاني مفتحتش كبوتها الا لتغيير الزيت فعلا والسيارات الالماني بالفعل ممتازة مش محتاجة شهادة مني لكن انا بقارن بين مدد امتلكت فيها العربيات دي و مواقفها معايا ...بكل امانة والله اسود ايام كانت مع الفليشيا كفاية اقولك ان اي سيارة تتعطل كانت ممكن تكون اصيلة تكركر بوجيه يقطع نور يفصل لكن توصلك لحد الصنايعي الا الفليشيا توقف وانا يا انت لو اتحركت من مكانها ااااهههه نسيت اقول لحضرتك مشاكل الاسبيراتير العقيم بتاعها كمان....كفاية احساسك لما تعطل وانت فوق كوبري 6 اكتوبر 3 مرات في شهرين و تططر تزقها لوحدك و مرة فى القاهره الجديدة منكرش ان الميكانيكا بتاعتها سهلة لانها عربية رخيصه تكاد تكون 128 يعني عربية شعبية تحتاج تعامل من نوع خاص يعني في حدود المكان اللي انت ساكن فيه زي تجيب بيها عيش لكن اعذرني لا يعتمد عليها و على فكرة انا اعز اصحابي تاجر سيارات و جاري ف نفس الوقت جربت معاه اكتر من 10 فليشيا في اقل من عام و العيوب عامة مش حالة نادرة اااسسف انا بوضح للي عايز يجيبها مش بهاجم ردود سيادتك ....ويجرب و يشوف بنفسة هي عموما متوفرة الان وسعرها نزل جدا ....* تقدر تقوللي حضرتك ايه رايك في تكيفها لو كان معاك مكيفة...فييييييهههها ميزه واحدة الثبات والصاج الناشف يعني كانك راكب فيات 132.... لاحظت استخفاف بالمقارنة بالهيونداي رغم اني راكب حاليا لانسر لكن عفوا لنعطي كل ذي حق حقه المقارنة في الحاة دي تقليل من كفاءة الكوري اللي افضل بميت مره من الفليشيا التشيكي اللي بتتمسح في مكونات الفولكس فاجن..... وعفوا القرار الاخير للمشتري و قدرته على الشراء

بالنسبة للاسعار .السوق المصري بيسعر العربية على اسس مختلفة اهمها مدى قربها من الفابريكة يعني بالعربي مغيرتش حاجات كتير من الاصلي خاصة بالنسبة للصاج والموتور يفضل يكون استانرد يعني احسن يكون متفتحش ولا حتى عمل جوان وش سلندر خاصة ان العربية تعتبر نوعا ما حديثة*انا اكرر يفضل لكن مش لازم*
لكن يجب مرافقة حد امين معاك ما يبيعكش للبائع
سعر الفليشيا 95 لكن افضل 96 او 97 بكتير تبدا من 27 الف فيما فوق للفابريكة بالكامل جوة *و رشة من برة والسعر بيزيد حسب حالة العربية ولا يمكن الحكم عليها من غير رؤية ...

اتفق معاك تماما يا دكتور هي زي اي عربية عايزه اهتمام زي كل العربيات لكن اللي يسوقها لازم يكون عنده خلفية بالسيارات وبنت حلال قطع غيارها موجوده و بتنوع في الاسعار وبتقبل بنزين 80 وشكلها معقول.