الموضوع: اشمعني السيفيك

السلام عليكم,
الحمد لله أنا لسة راجع من المصيف عقبال عندكم جميعا و يادوب لسة شايف الكلام المكتوب دلوقتي,
بسم الله,

المشاركة الأصلية كتبت بواسطة abo samra

يعنى حضرتك عاوز تقنعنى ان السيفيك افضل من الجيتا والفانتزيا والبى ام 316i كمان
طب لو صدقنا كلامك انها افضل من الجيتا والفانتزيا (مع انها طبعا اقل) كنا قلنا ماشى انما بى ام 316i !!!!!!!!!!
انا عاوز حضرتك تمشى بالبى ام على سرعه 180 فى يوم شديد الرياح والعواصف وفى نفس الوقت تركب السيفيك بس على 140 بس وانت تعرف انا اقصد ايه
ويعنى ايه موتور جيتا مخروم ويعنى ايه كمبيوتر مش راضى يشتغل مش فاهم
ويعنى ايه كورولا mmt بتفصل فى نصف التانى !!!!!!!
ويعنى ايه ناس بتشتكى من ثبات السيراتو السىء انا معاك ان ثبات السيراتو مش رياضى ولكن مش سىء ابدا لدرجة الشكوى هى ثباتها جيد جدا بالنسبه لسعرها
بالنسبه للعفشه الناشفه هو مين قال ان السيفيك عفشتها ناعمه الموضوع مش عفشه ناشفه بس الموضوع ان عفشتها صوتها عالى قوى قوى واى نقره فى الطريق بتسمع ترزيع العفشه بشكل مبالغ فيه
حضرتك اركب فانتزيا او جيتا وشوف الفرق الشاسع فى الموضوع ده
انا مقتنع ان السيفيك افضل اليابانى ولكن معلش مع احترامى صعب قوى العربيه دى تتقارن بالالمانى مش علشان العربيه بتجرى شويه يبقى هى احسن حاجه فى الدنيا اكيد لا
كفايه الصاج والتقفيل ودقة الصناعه مش السيفيك اللى مع احترامى مع كل لمسة رصيف الكلبسات تقع والرفارف تتفك
كل ده وتقول سيفيك بالله عليك الكلام ده يعقل !!!!!!!
ياريت حضرتك قبل ما تهاجمنى تجرب العربيات اللى قولتلك عليها وعلى فكره انا برده كنت راكب يابانى بس صعب اقتنع ان اسيب الالمانى واركب يابانى
تحياتى

أنا لا عايز أقنعك ولا أقنع أي حد بأي حاجة ... و أقنعكم ليه ؟!!!
بس للعلم إن واضح إن حضرتك مش فاهم كلامي ... أنا قلت إني كنت بقارن بين الأربع عربيات دول بما فيهم ال بي إم المستعملة الفاضية ... أكيد مش بقارن و أنا على السرير ... أكيد جربتهم ... أنا مش فاهم إزاي إنت فهمت إني كنت بقارن على الورق ... هو فيه حد كدة؟!!!
و بي إم إيييييييييييييييييييه ال 316 الفاضية إللي ثباتها أعلى من السيفيك ال VTi إللي فيها VSA كامل؟!!!!!!!! ... حد يقول كدة؟!!!! .... والبي إم ال 316 ال Run-flat tyres صوتها واطي؟!!!!!!!! أوطى من السيفيك كمان؟!!!!! .... يا راجل يا طيب ... ده الناس دابت من المشكلة دي ... وإنت جاي تبدأ من الأول.
وجيتا إيه إللي ثباتها أعلى من السيفي .... بقى فيه حد في الدنيا يقول إن العربية إللي عافشتها ناعمة (زي الجيتا) أثبت من العربية إللي عافشتها ناشفة (زي السيفيك)؟!!!!!! .... طب إزاي؟!!! ... إزاي بتقول الكلام ده عن شركة فولكس واجن وشركة فولكس واجن نفسها بتقول عكس كلامك؟!!!! ... شوف اللينك ده للجولف فيها حاجة إسمها Adaptive Chassis Control ده بيغير أداء هيكل وتعليق العربية لثلاث أوضاع Sport, Comfort or Normal suspension settings
Optional Adaptive Chassis Control : Experience : Golf : Volkswagen UK Chassis Control
تحياتي,

المشاركة الأصلية كتبت بواسطة medo_2060

قبل ما اتكلم عن الموضوع احب اوجه تحيه لكل الاعضاء المحترمين الى اتناقشوا هنا بصدر رحب وبدون انفعالات لانى نادر لما اشوف مناقشه فى المنتدى ما بتخلصش بايقافات وتجريح... وسلام حار لحبيبى سا مح باشا لانك واحشنى بجد اتمنى تكون فى تمام الصحه والعافيه.
بالنسبه للموضوع انا متفق مع الاغلبيه الى بتقول ان السيفيك عربيه يعتمد عليها والاحسن فى فئتها طبعا بس عندى عتاب على الاستاذ horsepower لانى مش شايف الجيتا والسكودا والبى ام عربيات كلها عيوب كدا بالعكس عربيات فولكس كلها لاغبار عليها وسكودا طبعا نفس تقنيه فولكس فاجن والبى ام مش محتاج اتكلم عها والمشاكل دى بتحصل فى كل العربيات ولو لفيتوا هتلاقوا شكاوى من اى عربيه بس دا ما يقللش من اى ماركه لان الكمال لله وحده يعنى لو اس كلاس عطلت منقولش بقى مرسيدس اهى فيها عيوب وسيبك منها ..... يعنى مش هختار اشترى سيفك عشان عيوب فى الجيتا والفانتازيا لا هختارها عشان هى الى تستحق لان لو حسبتها كدا انا عندى اسبرانزا (الى حضرتك اتريقت عليها فى اخر كلامك) العربيه الحمد لله معايا بقالها تقريبا سنتين والله ما بتصرف غير البنزين والصيانه لو قسنا الموضوع بالعيوب بقى اقول اه اسبرانزا بتاعتى احسن من الجيتا لانها موتورها مخروم واحسن من الكورولا عشان الفتيس والشكاوى وهكذا طبعا الكلام دا ما يدخلش عقل الخلاصه اننا نشوف العربيه الى فيها احسن قيمه مقابل سعرها والاهم انها توفى احتياجتنا

السلام عليكم,
أهلا بحضرتك,
ربنا يباركلك في عربيتك طبعا زي ما حضرتك بتقول عربية تقعد سنتين بدون أعطال دي نعمة .... لكن ... حضرتك عارف كام واحد بيشتكي من الإسبرانزا؟ .... ومشاكلها؟ ... أكيد عارف لأنه مش سر ... في فرق بين لما نتكلم عن عربية ولما نتكلم عن شركة.
تحياتي,

-------------------------------------------------------------------------------------------------------------------------

أحب أعرف الإخوة الأعضاء المهتمين بإضافات الشركات في صناعة السيارات بإن بعد الله سبحانة وتعالى شركة هوندا هي الشركة ذات الفضل في وجود عداد ال RPM في السيارات .... أيوة شركة هوندا هي أول شركة تحط عداد ال RPM في عربية ... أيوة قبل مرسيدس كمان ... وبعد كدة كل العربيات بقى فيها جنب عداد السرعة عداد RPM.
شركة هوندا هي الشركة التي طورت تصميم شنطة العربية من إنها تتفتح من فوق بس للتصميم إللي أضاف الجانب الخلفي (إللي بيتعلق عليه النمر) للجزء المتحرك من الشنطة ... طبعا كلنا فاكرين الموديلات القديمة للسيارات إللي شنطها بتتفتح من فوق بس بما فيهم مرسيدس ... بس ماحدش فكر من إللي غير التصميم ده ... هوندا.
يعني كل واحد لما يركب عربيته و يلاقي عداد ال RPM منور قدامه يدعي لهوندا و مهندسيها ... ولما يفتح شنطة عربيته و يعرف يملاها و ينظفها بسهولة يفتكر هوندا.


إحساس جميل إنك تبقى عارف إن الشركة إللي عاملة العربية إللي إنت راكبها مش بتنقل بس زي شركات كتير ... لأ ... دي لها إضافات في الصناعة الشركات كلها نفذتها.
أخيرا,
أنا مش باقنع أي حد بأي حاجة .... أنا بقول إللي أعرفه ... فقط.

المشاركة الأصلية كتبت بواسطة m_nabil

يا أبو سمرة الأستاذ ميدو مايقصدش وحصل خير، عجبك كدة يا أبو هشام ولاعتها أنت و مشيت أنا هبلغ هيشو بالكلام ده جبتلو التايب أر ولا لسه :))

محمد باشا أخبارك إيه؟ .... واحشنا يا كبير ... يا باشا والله أنا كنت بابلبط في المياه شوية رجعت لاقيت الموضوع داخل في الحيط ... يرضيك كدة وعلى مين؟!! .... هوندا؟!! ... ده زي إللي يخبط في مرسيدس ألمانيا ... و إللي بيقارن الياباني كله ببعضه ... زي ما يجي حد يقارن مرسيدس ب أودي ب بي إم دابليو ب فولكس واجن ب أوبل ... ويقولك ماهم كلهم ألماني ياعم الحاج ... كله ألماني واللا مش ألماني؟ ... كله يا بيه ألماني ... يبقى ليه بقى مرسيدس غالية؟!!! ... واللا أودي .... على راسها ريشة يعني في أسعار عربياتها دي ؟؟؟

سيبك يا باشا ... السخنة مولعة ... نزلت في قرية هناك و في يوم يا معلم خارج أجيب حاجة من عربيتي لاقيت خير اللهم إجعله خير .... بسم الله ما شاء الله ... شلة شباب معاهم 4 عربيات من إللي مرمين في الشارع ببلاش دول ... أرخصهم شيروكو و التانية حتة تشارجر والتالتة كمارو والرابع الغلبان إللي فيهم معاه slr والله العظيم أنا كنت عايز أسأله بس سؤال واحد (دخلت بالعربية لحد باب القرية إزاي؟ الطريق كله مطبات عالية) ... بس على مين ... روحت جيبت حاجتي من العربية ورجعت الأوضة ونمت ودعيت ربنا إنه يكون حلم ... بس للأسف طبعا كانو حاجزين في القرية و بقيت كل ما أطلع من باب الفندق ألاقي الحلوين منورين ... بس إكتشفت ميزة في العربيات دي ... إن كل شباب القرية بطل يبص على الأجانب والمايوهات و بقو قاعدين على باب الفندق والقرية بقيت فاضية والبحر رايق وحمام السباحة فاضي ... ربنا يبارك لهم في في عربياتهم بس العيال يتحسدو باللي كانو عاملينه

المشاركة الأصلية كتبت بواسطة horsepower

السلام عليكم,
الحمد لله أنا لسة راجع من المصيف عقبال عندكم جميعا و يادوب لسة شايف الكلام المكتوب دلوقتي,
بسم الله,

حمدلله على السلامة يا هندسة

المشاركة الأصلية كتبت بواسطة mshamy

حمدلله على السلامة يا هندسة

الله يسلمك يا باشا ... عايزين نرتب طلعة للسخنة سوا إن شاء الله :))

المشاركة الأصلية كتبت بواسطة Horsepower

السلام عليكم,

أنا لا عايز أقنعك ولا أقنع أي حد بأي حاجة ... و أقنعكم ليه ؟!!!

و بي إم إيييييييييييييييييييه ال 316 الفاضية إللي ثباتها أعلى من السيفيك ال VTi إللي فيها VSA كامل؟!!!!!!!! ... حد يقول كدة؟!!!! .... والبي إم ال 316 ال Run-flat tyres صوتها واطي؟!!!!!!!! أوطى من السيفيك كمان؟!!!!! .... يا راجل يا طيب ... ده الناس دابت من المشكلة دي ... وإنت جاي تبدأ من الأول.

يا راجل حرام عليك بقا السيفيك اثبت علشان vsa
هو حضرتك ما تعرفش ان اى بى ام بتنزل ب dsc حتى لو 116i مانيوال فاضيه
بقا مين فى الدنيا دى كلها هيصدق ان السيفيك اثبت من البيمر دفع خلفى توزيع وزن 50 %و 50% قاعدة عجلات اكبر وزن اثقل ده غير انظمة الثبات المعروفه فى البيمر !!!!!!!!!!
وبعدين عفشه عفشة ايه !!!!بقا حضرتك متاكد انك ركبت اى بيمر ولقيت صوت العفشه اعلى من السيفيك والله حرام اللى بيحصل ده الكاوتشات ال run flat صوتها عالى على الطريق علشان العزل جامد وبيكون الكاوتش صوته ملحوظ شويه ده غير انها بتبقى ناشفه شويه فى النقر والمطبات انما انا بتكلم عن عزل العفشه والترزيع الواضح جدا فى السيفيك مش موجوده فى البيمر نهائى العفشه ناشفه اه انما مفيش ترزيع فى العفشه مع كل نقره
يكفينى فقط تشوف فرق العزل بين العربيتين على السرعات العاليه واحساس السرعه!!!!!!!
ده غير 316i الفاضيه فيها كل انظمة الثبات و 6 ايرباجز كمان مش السيفيك اللى بتنزل من غير سماعات وراء
وبعدين الجيتا انعم علشان عزل العفشه احسن من السيفيك بكتير ومحدش برده قال ان عفشه الجيتا ناعمه والسيفيك اثبت !!!!!
الجيتا هى هى الجولف بس بشنطه يعنى اثقل فى الوزن كمان ومش كل الجولف بتنزل بالعفشه المتغيره ودى بتبقى الهدف منها هى الاستمتاع بالنعومه فى الطرق المكسره ولكن اللى بتنزل من غير الخاصيه طبيعى تكون ناشفه لان دى جولف ومش محتاج اتكلم عنها او اثبت لحد انها اثبت من السيفيك لان دى حاجه معروفه
وياريت حضرتك تقارن بين ا نتشار السيفيك vti والجيتا الكامله فى الشوارع

ده غير اصلا هو فيه حد بيقارن بين بى ام وسيفيك وفى الاخر السيفيك كمان احسن فى الثبات
يا جماعه يا ريت شويه حياديه وبلاش انحياذ كل واحد لعربيته ارجوكم
تحياتى

المشاركة الأصلية كتبت بواسطة medoakef

حضرتك انا مشفتش الردود اصلا لاني مدخلتش من الاول انا رديت علي صاحب الموضوع و بس

و هندا فعلا عربيتها كلها تحفه و لا غبار عليها و هي تتربع علي سعر ال200 الف في مصر طبعا جري و رفاهيه و امان و شكل و جوده تصنيع و ثبات عاوز ايه تاني بقا و طبعا حضرتك عارف التحفه اكورد عربيه لها حساب كبير اوي مع اي حد حتي لو انت 525 فهو اكورد!
احنا مش بنقول سفك دي مكلارن فورميلا ون التنيا بس بنقول فعلا انها عربيه جديره بالاحترام وسط سنه تنزل فيها كيا و تحاول امتلاك السوقو قلوب العملاء

اه احسن عربيه فى سعر ال 200 الف والدليل انتشار ال vti اللى ب 190 الف فى الشوارع والجيتا الهاى لاين اللى 200 مش موجوده خالص صح !!!!!!!!!!!!!!!
اساسا السيفيك الفئه اللى ب 150 هى اللى كانت منتشره السنه اللى فاتت ولكن لما سعرها وصل ل 158 محدش بيبصلها زى اللاول الا قليل جدا
158 ومفيش سماعات وراء ولا اى كماليات خالص والفانتزيا وكيل ب 163 وفيها كماليات اعلى بكتير وركوربه افضل وصاج امتن وجوده وتقفيل افضل
تانى حاجه بمقارنتك بين 525i بالاكورد هقولك لا تعليق خالص لما تعرف ان سعر ال 525i بره اكثر من ضعفين من الاكورد !!!!!!!!!!!!!