الموضوع: الياريس إتخبطت.... قدر الله وماشاء فعل!

المشاركة الأصلية كتبت بواسطة goodwave

السلام عليكم

بدون الخوض في تفاصيل مملة.... العربية بتاعتي إتخبطت أول إمبارح باليل والحمد لله.... كنت لسة مركب فرش للأرضية وكسوة للكراسي وراجع علشان أشتري دواسات... رجعت بالدواسات لقيتها إتخبطت!

الخسائر:
1- فانوس يمين خلفي
2-الإكصدام إتكسر منة كليبس وبقى مفارق (مش عارف حيعرفوا يرجعوة زي ماكان ولا لأا في التوكيل)
3- الباب اليمين الامامي إتخبط ومحتاج يتعدل ويترش هو والإكصدام

التكلفة في حدود 1500-2000 جنية

العربية النهاردة يبقى بقالها معايا أسبوع وكانت دي تالت طلعة بيها .... لسة عليها البلاستيك.... لسة ما ركبتش الطاسات..... بس الحمد لله!

وديتها توكيل الرزق إللي في الصحراوي وسيبتها وجه الخبير من شركة التأمين وشافها ووافق على الإصلاحات بس رفض تغيير الإكصدام بالكامل وقال إنة يتصلح! الإكصدام كله سليم ماعدا الكليبس اليمين عند اخر الإكصدام ودة إتكسر.... مش عارف ممكن يتغير ولا لأ..... أسأل الله إنهم يقدروا يرجعوها زي الأول.

في ناس تقولي صلح بس بلاش ترش علشان بوية الفابريكة.... فابريكة إية؟؟؟؟؟؟؟ العرببة ما لحقتش أتهنى بيها وأمشي بيها محكوكة وشكلها وحش!؟ هو أنا لحقت أركب لما حفكر فيها لما أجي أبيع!

طبعا يوم الحادثة زعلت جدا جدا جدا جدا وكانت دماغي بتغلى وكنت بجد حتعب !

ولكن

1- لما روحت التوكيل وشوفت العربيات الموجودة للإصلا وكلها موديل 2008 قلت ربنا قدر ولطف و على رأي المثل "إللي يشوف بلاوي الناس......" فالحمد لله بس كنت بردة زعلان على عربيتي.

2- الدرس الحقيقي والعبرة جاتللي باليل إمبارح لما صديق ليا بيتصل وبيقولي "إية بقالك مدة مش بتسأل" قلتلة معلش مشاغل وهموم .... قالي خير؟.... قلتله غلى الحادثة وشرحتلة مدى حزني.... قالي قدر الله وما شاء فعل وفي صوتة نبرة حزن! سألتة مالك؟؟؟؟؟ قلي أخويا الصغير 20 سنة توفاه الله في حادث سيارة من 40 يوم وانا بتصل بيك علشان أوصيك بالصلاة والذكاه وأعمل لأخرتك ولا تغرك الدنيا!

نزل عليا الخبر كالصاعقة...... لية!

- اخوة صغير .... بس الموت مش بيفرق بين صغير وكبير!
- صاحبي ما كنش بيصلي وواخد الحياة بفكر علماني وعقلاني بحت بعيد عن الدين
- أنا بقالي فترة مقصر في حق ربنا ووخداني الدنيا (الدنيئة) ونسيت الأخرة
- أنا كنت زعلان ومتحسر على قعة حديد ونسيت إن فية مصائب أكبر من الحديد
- من ساعة ما جبت العربية وأنا شايلها في عيوني كأنها بنتي وأصبحت انا خادم السيارة وليست هي خادمتي! ونسيت أنها قطعة حديد والمهم هو الإنسان.
- نسيت أن المهم هو ما عمل الإنسن لأخرتة وليس ما جمع في الدنيا.

صدقوني إرتحت دلوقتي ومش زعلان على العربية لأنها متاع زائل وقد سخرها الله لي وليس العكس فما دام الإنسان وأهلة بخير.... فيهون كل شئ أخر!

في النهاية أوصيكم ونفسي بعمل الخير قبل ما نلاقي أنفسنا أمام الله ويسألنا ولا ندري ماذا نقول.......

مش عايز اضحكك و لا اضايقك و لا اي حاجة :) بس بمناسبة بلاوي الناس بس :)

انت بتقول بقالك اسبوع ؟ :)

انا شتريت عربيتي في ابريل 14 2006 الساعة 12:35 ظهرا و استلمتها و خرجت بيها من الاجانص في مكرم عبيد بدون نمر بالبلاستيك و الاستيكرات :)
صورة :

دي صورة السيارة في يوم 13 بليل قبل مستلم الصبح :)

- وصلت عباس العقاد ( كنت رايح المرور اطلع نمر ) الساعة 12:48 ظهرا .

--- حصل شوية حجات مش ظريفة كدة ------------
-------------------------------------
-------------------------------------
---------------------------------------
النتيجة :
الساعة 3:15 عصر كنت في سمكري عند سور مجرى العيون بشوف حعمل ايه في :
- الكبوت المدغدغ
-الاكصدام المرقع
-الرفرف المتني
-الفانوس الامامي المكسور
- الشبكة المكسورة
صورة السيارة بعد السمكرة و المعجون :

" لاحظ الاستيكر بتاع المصنع لو سمحت " :)

و بما ان التوكيل كان لسة منزل السيارة قطع غيارها مكنتش كلها موجودة ... و فضلت السيارة عند السمكري شهرين الا يومين .

---

ساعتها او يوميها عايز ( انا مكنتش عضو في نايل موتورز و مكنتش اعرف بوجوده ) بس انا حسيت الدنيا انتهت .. و قعد حزين و يوميها بكيت باليل فوق الساعة علشان يعلم ربنا انا دبرت فلوس المقدم بتاع السيارة ازاي و اشتغلت overtime اد ايه قبلها بكام شهر علشان اعرف احوش تمن المقدم .

المهم دلوقتي بفتكر و اشوف الصور و بعد اضحك والله بضحك و بحمد ربنا :)
انا بصراحة ضد موضوع ان السيارة تتقيم بحكاية فابريكا او لآ .
المهم استعمالها و تصليحها يكون كويس .

احمد ربنا و سيبها علي الله .. ساعة - اسبوع - شهر - سنة - كدة كدة حتتخبط ! المهم انت سليم و السيارة تتصلح .