الياريس إتخبطت.... قدر الله وماشاء فعل!

**goodwave** · 12-03-2008 10:38 AM

السلام عليكم

بدون الخوض في تفاصيل مملة.... العربية بتاعتي إتخبطت أول إمبارح باليل والحمد لله.... كنت لسة مركب فرش للأرضية وكسوة للكراسي وراجع علشان أشتري دواسات... رجعت بالدواسات لقيتها إتخبطت!

الخسائر:
1- فانوس يمين خلفي
2-الإكصدام إتكسر منة كليبس وبقى مفارق (مش عارف حيعرفوا يرجعوة زي ماكان ولا لأا في التوكيل)
3- الباب اليمين الامامي إتخبط ومحتاج يتعدل ويترش هو والإكصدام

التكلفة في حدود 1500-2000 جنية

العربية النهاردة يبقى بقالها معايا أسبوع وكانت دي تالت طلعة بيها .... لسة عليها البلاستيك.... لسة ما ركبتش الطاسات..... بس الحمد لله!

وديتها توكيل الرزق إللي في الصحراوي وسيبتها وجه الخبير من شركة التأمين وشافها ووافق على الإصلاحات بس رفض تغيير الإكصدام بالكامل وقال إنة يتصلح! الإكصدام كله سليم ماعدا الكليبس اليمين عند اخر الإكصدام ودة إتكسر.... مش عارف ممكن يتغير ولا لأ..... أسأل الله إنهم يقدروا يرجعوها زي الأول.

في ناس تقولي صلح بس بلاش ترش علشان بوية الفابريكة.... فابريكة إية؟؟؟؟؟؟؟ العرببة ما لحقتش أتهنى بيها وأمشي بيها محكوكة وشكلها وحش!؟ هو أنا لحقت أركب لما حفكر فيها لما أجي أبيع!

طبعا يوم الحادثة زعلت جدا جدا جدا جدا وكانت دماغي بتغلى وكنت بجد حتعب !

ولكن

1- لما روحت التوكيل وشوفت العربيات الموجودة للإصلا وكلها موديل 2008 قلت ربنا قدر ولطف و على رأي المثل "إللي يشوف بلاوي الناس......" فالحمد لله بس كنت بردة زعلان على عربيتي.

2- الدرس الحقيقي والعبرة جاتللي باليل إمبارح لما صديق ليا بيتصل وبيقولي "إية بقالك مدة مش بتسأل" قلتلة معلش مشاغل وهموم .... قالي خير؟.... قلتله غلى الحادثة وشرحتلة مدى حزني.... قالي قدر الله وما شاء فعل وفي صوتة نبرة حزن! سألتة مالك؟؟؟؟؟ قلي أخويا الصغير 20 سنة توفاه الله في حادث سيارة من 40 يوم وانا بتصل بيك علشان أوصيك بالصلاة والذكاه وأعمل لأخرتك ولا تغرك الدنيا!

نزل عليا الخبر كالصاعقة...... لية!

- اخوة صغير .... بس الموت مش بيفرق بين صغير وكبير!
- صاحبي ما كنش بيصلي وواخد الحياة بفكر علماني وعقلاني بحت بعيد عن الدين
- أنا بقالي فترة مقصر في حق ربنا ووخداني الدنيا (الدنيئة) ونسيت الأخرة
- أنا كنت زعلان ومتحسر على قعة حديد ونسيت إن فية مصائب أكبر من الحديد
- من ساعة ما جبت العربية وأنا شايلها في عيوني كأنها بنتي وأصبحت انا خادم السيارة وليست هي خادمتي! ونسيت أنها قطعة حديد والمهم هو الإنسان.
- نسيت أن المهم هو ما عمل الإنسن لأخرتة وليس ما جمع في الدنيا.

صدقوني إرتحت دلوقتي ومش زعلان على العربية لأنها متاع زائل وقد سخرها الله لي وليس العكس فما دام الإنسان وأهلة بخير.... فيهون كل شئ أخر!

في النهاية أوصيكم ونفسي بعمل الخير قبل ما نلاقي أنفسنا أمام الله ويسألنا ولا ندري ماذا نقول.......

**islamnabil** · 12-03-2008 10:47 AM

قدر الله و ما شاء فعل
اهم حاجة انك تحمد ربنا على انها جات لحد كده
و اكيد الخبطة دي شالت عنك حاجة تانية

**Islam_galal** · 12-03-2008 10:49 AM

الحمد لله علي كل حال و ألف سلامة

مش حقولك أكتر من كده ، إنت قولت أحسن من أي كلام ممكن يتقال

ربنا يعوض عليك

**أبو عبدالله** · 12-03-2008 10:58 AM

كل ما يبعد عن ذكر الله فهو شؤم على ابن آدم

تذكر انك اذا احببت شئ وأبعدك عن ذكر الله فسوف تعذب به
وهذا للأسف ما حدث لك ولي ولأي شخص اذا احب شئ كثيرا ونسى ان الحافظ هو الله
ولا تنسى اننا مسافرون في هذه الدنيا
وقدر الله وماشاء فعل
انصحك نصيحة لنفسي ولك
لا تحب شئ يبعدك عن ذكر الله او يفقدك قدر من ايمانك ان الحافظ هو الله وان الرازق هو الله

وتذكر قال ابن القيم رحمه الله

من أحب شيئا غير الله عذب به

**Karim_Monir** · 12-03-2008 11:06 AM

معلش يا ابو كنزي
قدر الله وما شاء فعل
وكان صوتك يومها زعلان قوي وقولتلك هون عليك انا عارف انت كنت زعلان عشان جديدة
بس ارجع اقوللك انه بيبقي اختبار من ربنا
زي ماكنت جايب عربيتي جديدة وكل الناس بتلومني اني مامنتش وانا عمال ارفض اني امن للحرمانية
ويجي تاني يوم الزجاج اتشرخ بزلطة واتغير كله وانا ثابت تالت يوم تاكسي يخبط في الشنطة يعوجها ويكسرللي الفانوسين اللي ورا وبرضه خدتها اتعملت في الحرفيين وربنا كرمنى واتعملت على البارد وبرضه ثابت رغم ان الشيطان الله يلعنة قد يلعب في دماغي ويوقولي روح امن دي زيرو مش شايف الميكروباصات والتاكسيات واللي بيعملوها فيك
وكل يوم تنزل تلاقيها محكوكة ومخبوطة
بس فعلا عملت زي ما ابو عبدالله قال
قولت العربية دي انا جايبها لخدمتي وتريحني
مش جايبها اوجع دماغي بيها وتتعبني
الله جاب
الله خد
الله عليه العوض
مش على البني ادام
الحمد لله انك كويس وبخير

**SEATLOVER** · 12-03-2008 11:50 AM

مفيش كلام اكتر من اللى قالة ابو عبد الله ربنا يفتح عليك و يباركلك
انتو فعلاً اديتونا درس كبير اوى .
والف الف سلامة عليك صحتك بالدنيا

**معاذ الشرباصى** · 12-03-2008 11:58 AM

قدر الله و ما شاء فعل

ربنا يعوض عليك

**goodwave** · 12-03-2008 12:01 PM

islamnabil

شكرا لك وجزاك الله خير وكفاك شر الطريق

Islam_galal

جزاك الله خير.... انا قلت إللي حسيتة وقلت أذكر إخوتي في المنتدى لأني وجدت من يذكرني بفضل الله.

أبو عبدالله

جزاك الله خير.... كلامك أثلج صدري وهو إكمالا لسلسلة التذكرة التي نحتاجها جميعا.

karim_monir

الحمد لله يا كريم....وانا بجد كنت زعلان بس الحمد لله في فرق كبير دلوقتي وربنا بعتلى التذكرة في الوقت المناسب... إنت عارف وانا معاك على الموبايل وواقف على الرصيف قدام عيني عربية فرنا بتركن وجة سواق ميكروباص حاطط دفندر حوالي 40 سم خبطها في لمح البصر! بس دة بردة ما فتحش عنيا ساعتها عن الحقيقة!

Hassan Khalil

يا أخي كلنا نحتاج المواساة ولكن التذكرة أهم وربنا يقدرنا على تذكرة بعضنا بهادم اللذات .... مش علشان نقعد نندب ولكن لكي نجتهد ونعمل للأخرة كما نعمل للدنيا.

SEATLOVER

جزاك الله خير يا أخي وشكرا على شعورك الطيب.

**yasserayad** · 12-03-2008 12:01 PM

المشاركة الأصلية كتبت بواسطة Islam_galal

الحمد لله علي كل حال و ألف سلامة

مش حقولك أكتر من كده ، إنت قولت أحسن من أي كلام ممكن يتقال

ربنا يعوض عليك

انت فعلا قولت احست كلام ممكن يتقال
ربنا سبحانه وتعالى الكريم الحليم
خلاك فى وقت قليل تشوف عربيات احدث واغلى فى التوكيل عامله حوادث
وخلاك تسمع المكالمه دى فى التوقيت ده
عشان يهون عليك
سبحان الملك الرحمن الرحيم
دايما مع العسر يسران

الموضوع: الياريس إتخبطت.... قدر الله وماشاء فعل!

LinkBack

أدوات الموضوع

عرض

الياريس إتخبطت.... قدر الله وماشاء فعل! - انشر الموضوع فى :

-

-

-

-

-

المواضيع المتشابهه

قدر الله وماشاء فعل ..

قدر الله وماشاء فعل

قدر الله وماشاء فعل :العربية إتخبطت من تحت

قدر الله وماشاء فعل

قدر الله وماشاء فعل

الكلمات الدلالية لهذا الموضوع

المفضلات

المفضلات

ضوابط المشاركة