الموضوع: Getz Club

المشاركة الأصلية كتبت بواسطة mido729

السلام عليكم ... ازيكوا يا جيتزاويه :d ... انا محمد ... معايا جيتز 2011 و عامله 48 الف كيلو ... ( محدش يقولى كتير عشان عارف و مخنوق :d ) و الحمد لله مغير الجنب اليمين قبل كده مرتين :d ... اول مره مرسيدس دخلت فى البابين اللى جمب السواق و اتغيروا فى التامين و اكتشفت بعد كده انهم متغيروش ( كارفان الرحاب ) و تانى مره نص نقل دخلت فى نفس البابين و عملتهم فى الحرفيين ... اشتريت باب امامى و الباب الخلفى اتسمكر ... و اتكلفت 1200 جنيه ساعتها ... بس الحمد لله طلعت زيرو ... و لسه مغير تيل الفرامل الامامى من اسبوع جبته من غبور شارع دمشق ب 320 جنيه ... و التركيب 15 جنيه ... عند المحل اللى قدامه ... و دلوقتى العربيه بتاكل بنزين كتير جدا ... مش زى الاول ... انا قبل كده كنت مغير البوجيهات ( فى صيانه ال 25 الف كيلو فى التوكيل فى فرع قليوب ) و لما سالت فى التوكيل دلوقتى قالى لازم تغير بوجيهات تانى و اغير فلتر البنزين و عرفت ان الفلتر بتاع البنزين فى التانك او فى العوامه مش فاكر بالظبط و فى ناس كتير خوفتنى من الموضوع ده فمش عارف اعمله فى التوكيل و امرى لله و لا فى حد مضمون بره حد منكوا غير عنده الفلتر قبل كده و لا لا ... و انا سالت عليه فى التوكيل غبور شارع دمشق برضو قالى ب 171 جنيه ... و عند البطل اللى فى دمشق برضو ب 160 و تركيب 40 جنيه ... على فكره اللى عنده اى مشكله فى المرايا ممكن يعملها عند البطل بيصلحها و بيخليها ميه ميه بصراحه ... المرايا اليمين ( مش عارف ايه المشكله بتاعت الجنب اليمين ديه عاوز ابخره :d ) بتاعتى كانت مكسوره من جوه الانتامونيا و هو خلاها زيرو و اخد 100 جنيه .... و ان شاء الله هاتابع معاكوا على طول و اللى محتاج اى حاجه خاصه بالكمبيوتر و اللابات انا تحت امره ....
اخوكوا محمد ...

وعليكم السلام ورحمة الله وبركاته
منورنا يا استاذ محمد والله وياريت نشوفك علطول ونتشرف بيك في اقرب مقابلة ان شاء الله .
اولا انا الوحيد اللى اللى مش هاقدر افتح بوقي على الكيلو متر بتاعك لاني عربيتي عاملة 189000 كيلو . فأنت كده عربيتك بالنسبة ليا زيروووووووووووووو .
انا بضم صوتي لصوتك في موضوع كرفان الرحاب لاني جربتهم قبل كده وفعلا هما من الاخر نصابين .
موضوع فلتر البنزين ده بسيط ولا تقلق منه وهو فعلا مكانه تحت الكنبة داخل التنك بتاع البنزين بس صدقني الموضوع بسيط . واضح ان انت من سكان مدينة نصر او مصر الجديدة او التجمع بما انك روحت كارفان الرحاب . يعني جاري من الاخر . في مهندس اسمه هاني وهو عامل موضوع هنا معانا في المنتدى وكان شغال في غبور وفاتح مركز في جسر السويس وانا بصراحة بتعامل معاه وبثق فيه لانه فاهم هيونداي . لو حابب ممكن اقولك مكانه فين وهاخليه يعملك خصم كمان يا عم بما انك من getz club .
مرة تانية بقولك اهلا بيك ومنور الجروب .

المشاركة الأصلية كتبت بواسطة ruby1974

انا عضوة جديدة فى الجيتزاوية لسه شارية من كام يوم الجيتز
الحلوة بس خايفة وحاطة ايدى على قلبى خايفة تكون تكاليفها عالية

بس هى ماشاء الله حلوة ..
كنت عاوزة استفيد منكم اين اماكن الجيدة للصيانة
عندى الاريال بيتخلخلخ وعاوزة اثبته ففكاته ومش عارفةالخطو اللى بعدها ايه ..ممكن تقبلونى صديقة جيتزاوية جددية

اهلا بيكي يا روبي والف الف مبروك على الجيتزاية الجديدة وربنا يباركلك فيها ويرزقكك خيرها ويكفيكي شرها .
ماتخافيش تكالفيها مش غالية ولا حاجة . العادي يعني زيها زي كل العربيات . هي بس المشكلة ان ممكن قطع الغيار تكون مش منتشرة اوي يعني لكن موجودة لا تقلقي .
موضوع الاريال ده لو ملخلخ من القاعدة بتاعته انصحك تعملي مشوار لابو رواش خلف داندي مول عند غبور نفسه بس ادلخي قسم الهياكل مش الصيانة وهما يركبوه كويس عشان محدش يفتي ويبوظه . وقسم الهياكل مش هاتخدي فيه وقت خالص زي الصيانة ساعة زمن ان شاء الله ويكون كله تمام . لو عندك السبت اجازة ممكن تخطفيها .
منورة الجيتزاوية كلهم واي حاجة عايزة تعرفيها احنا كلنا هنا في خدمة بعض .

المشاركة الأصلية كتبت بواسطة se_coralsea

انا للاسف مسافر أعتبارا من بعد بكرة و حتي يوم 15 يوليو
نقدر نحدد موعد للمقابلة بعد ذلك و ليكن أبتداء من الخميس 19 يوليو مساء
و لو حتي كنا 2 مافيش مشكلة

تيجي بالسلامة يا باشمهندس وياريت تكون متواجد معانا ان شاء الله .

المشاركة الأصلية كتبت بواسطة ruby1974

أهلا بحضرتك يا باشمهندس سمير ..انا سعيدة بوجودى مع حضراتكو نادى الجيتز وقسم نجوم هيونداى..

الله يبارك فيك ..انا فرحانة بالعربية اوى الحمد لله وماشاء الله والف حمد وشكر لله تعالى
هى موديل 2008 ومواصفاتها زجاج كهرباء وتكييف و راديو سى دى و فرامل اى بى اس وباور .. والف حمد وشكر لربنا ..انا حبيتها اوى ..1600 سى سى.. عاملة 58000 كيلو


انا ساكنة فى الجيزة وشغلى فى المعادى
والحقيقة انا اخدتها وعاوزة اصونها واتابعها واحافظ عليها فى مواعيدها ...

شكرا مرة تانية لاهتمام حضرتك ..

ده نفس موديل عربيتي بس طبعا مع اختلاف عداد الكيلو متر
بصي يا ستي
اولا انتي لازم تكوني عرفتي من البائع هو اخر مرة عمل صيانة امتى وغير الزيت امتى والفلاتر وتيل الفرامل .
ثانيا لو مفيش معلومات او مش مصدقاه يبقى لازم انتي تعملى الحاجات وتعملة ورقة صغيرة كده وتكتبي فيها انتي غيرتي امتى كل حاجة عشان تبقى عارفة او تكتبي note على الموبايل عندك ( انا عامل كده ) .
ثالثا بقى انتي عربيتك عاملة 58000 كيلو يعني هاتعملي صيانة ال60000 كيلو وده معناه تغيير الاتي :-
- طقم سيور كامل ( كاتينة وباور وتكييف ودينامو ) ودي حاجات مهمة جدا جدا خصوصا الكاتينة .
- تغيير بلية الشداد وبلية الكاتينة .
- تغيير البوجيهات وفلتر الهواء وفلتر البنزين والزيت وفلتر الزيت .
- الكشف على تيل الفرامل ولو محتاج يتغير يبقى لازم يتغير ( امامي وخلفي ) .

انا عن نفسي مش بثق في مراكز الخدمة المعتمدة لاني اتلسعت منهم قبل كده اكتر من مرة واكتشفت انهم اولا واخيرا يهمهم المكسب مش خدمة العميل . عشان كده انا برضه بنصحك في صيانة زي دي انك تروحي على التوكيل في ابو رواش عشان تبقي ضامنة اللى هايحصل وضامنة قطع الغيار الاصلية لان دي صيانة مهمة . بس في التوكيل هاتكلفك حوالى 2000 جنيه من غير تيل الفرامل . ( طبعا مبلغ مش ظريف )
ممكن تشتري الحاجات دي كلها من بره ( الاصلية برضه ) وهاتعمل حوالى 800 جنيه وتركبيها عند المهندس هاني اللى انا لسة قايل لمحمد عليه . ( انا لسة مغير كل اللى انتي هاتغيريه ده من اسبوع عنده ) ومحلات قطع الغيار موجودة جنبه في شارع جسر السويس .
طبعا كل ده بناء على ان صاحب العربية اللى انتي اشترتيها منه مغيرش الحاجات دي .
في معلومة بس عايز اصححها هي ان عربيتك مش abs زي كل عربياتنا وده من اكبر العيوب اللى في الجيتز . الا اذا عربيتك متركبلها abs وده صعب اوي .
ربنا يوفقك في اللى هاتعمليه وانا تحت امرك في اي حاجة .

المشاركة الأصلية كتبت بواسطة hamada2u2000

يا رجاله انا من دمياط معايا هيونداى جيتز 2005
العربيه عندى اتخبط الاكصدام اللى قدام المهم صلحته بس المشكلة ان الكارتيرة اللى قدام يمين ما نفعتش تركب تانى فدورت عليها فى دمياط عندنا ماليتهاش , نزلت بورسعيد ودورت على الكارتيرة مافيش برضه فا اعمل ايه واجيبها من فين علما انى صعب انزل القاهرة اليومين دول

اهلا بيك يا حمادة في الـ getz club والف سلامة على الجيتزاية بتاعتك .
بص يا باشا عشان ماتتعبش نفسك في حاجات كده مش هاتلاقيها بره خالص لان التجار مش بيشتروا قطع غيار تخلل عندهم ونظرا لان الجيتز مش كتير اوي وثانيا لانها تعتبر معداش عليها 20 سنة مثلا فمش بيجيبوا حاجات كتير منها زي الهيكل الخارجي وقطع الغيار المعمرة ( انا مش لاقي علبة الدركسيون وكل ماروح لحد يقولي ازاي جيتز وعلبة الدركسيون بتاعتها باظت )
عليك وعلى التوكيل والكارتيرا الامامية بتعمل في رنج 150 جنيه واشتري دماغك .
ولو مافيش جنبك توكيل انا ممكن اجبهالك ونشوف طريقة نوصلهالك دمياط .
وتحت امر جنابك يا باشا وياريت تبقى معانا علطول واهلا بيك مرة تانية .

المشاركة الأصلية كتبت بواسطة mada_76

اهلا بيك يا حمادة في الـ getz club والف سلامة على الجيتزاية بتاعتك .
بص يا باشا عشان ماتتعبش نفسك في حاجات كده مش هاتلاقيها بره خالص لان التجار مش بيشتروا قطع غيار تخلل عندهم ونظرا لان الجيتز مش كتير اوي وثانيا لانها تعتبر معداش عليها 20 سنة مثلا فمش بيجيبوا حاجات كتير منها زي الهيكل الخارجي وقطع الغيار المعمرة ( انا مش لاقي علبة الدركسيون وكل ماروح لحد يقولي ازاي جيتز وعلبة الدركسيون بتاعتها باظت )
عليك وعلى التوكيل والكارتيرا الامامية بتعمل في رنج 150 جنيه واشتري دماغك .
ولو مافيش جنبك توكيل انا ممكن اجبهالك ونشوف طريقة نوصلهالك دمياط .
وتحت امر جنابك يا باشا وياريت تبقى معانا علطول واهلا بيك مرة تانية .

لو أنت جبت الكارتيرة انا مستعد أوصلها للأستاذ / حمادة لو عندي مشوار قريب لدمياط