الموضوع: متظاهرو التحرير يحددون مطالبهم فى بيان اليوم لانهاء الاعتصام بالميدان

يا اساتذة لو هنتكلم عن طلبات الثورة يبقي نقطة نظام ونبدأ من اول السطر
المباديء الاساسية اللي قامت عليها الثورة في الاساس هي
عيش - حرية - عدالة اجتماعية
يعني دي المباديء الاساسية اللي المفروض ان الشعب اجمع عليها وقام علي اساسها سواء من بدايتها يوم 25 او انضمام الناس ليها يوم 28
اضيف عليها بعد كده الشعب يريد اسقاط النظام
ولكن المبادي الاساسية هي اللي المفروض تحكم تصرف الناس اللي اجمعت عليها
لو بصينا للمبدأ الاول - العيش -
الوضع الحالي انهيار اقتصادي بشكل مريع في كل المجالات يعني العيش اللي كنا بنطالب بيه لصالح الجميع اصبح بعيد المنال عن كثيرين من الشعب
المبدأ الثاني - الحرية -
اصبحت حرية البلطجية في الاعتداء علي الشعب
وحرية المخالفين للقانون بكافة مجالاته سواء مرور او بناء او اداب او اي فرع اخر
المبدأ الثالث العدالة الاجتماعية
لاحديث عنها الان في ظل انعدام الخيارات الاقتصادية لتحقيق تلك العدالة
عارف ان هيجي رد بأن هذه الخسائر تحدث في الثورات
ارد ماهو فكر المجموعات التي نصبت من نفسها متحدثين باسم الثورة لتحقيق مبادئها الاساسية
ماهي البرامج التي سوف تحقق تلك المباديء
ماهي الخطوات لتحقيق الامن التي خطاها المتحدثين باسم الثورة
الاجابة لايوجد
انحصرت كل المطالب في اسقاط النظام ورموزه 000وسقط النظام ورموزه
الجيش ميحكمش اكتر من سته شهور 00 خرج الجيش واكد علي انه لن يحكم
اجراء الانتخابات بسرعة لاستلام حكومة مدنية ووافق الجيش وجاري العمل
وتعديل الدستور لياتي رئيس جديد يعدل الدستور بالكامل بعد ذلك وجاري التعديل
اقالة جميع الوزراء القدامي في الحكومة الحالية 000 وتم
بدأت مطالب جديدة باسقاط كل من كان له علاقه بالنظام -- رغم ان الشعب المصري بكل وظائفه له علاقة بالنظام
ومطالب اخري بأن الجيش يشكل مجلس رئاسي مدني ( سوف يختلف الجميع علي اعضاء المجلس )
شيلو شفيق وكل الوزارة الحالية
حاكموا السابقين
شيلو رؤساء تحرير الصحف
مطالب 0000 مطالب
فين بقي المباديء الاساسية اللي خرج الشعب كله علي اساسها
لايوجد بدأت الشماعات 0000 علق علي شماعة الشرطة 0000 تبدأ الشرطة بالنزول 000 الناس تضربها في الشارع
الجيش يقبض علي بلطجية 0000 فضيحة علي النت ومطلوب توضيح
الناس عايزه تحقق استقرار لتحقيق الحد الادني من المبدأ الاول وهو العيش 000 لا الناس لازم تموت من الجوع وولادها ميلاقوش ياكلوا علشان يحسوا بطعم الحرية -- وده اقل تضحية ممكن يقدمها الناس للثورة انهم يجوعوا عيالهم
دا مجرد احساس الناس بالخطر علي اطفالهم من نزول المدارس عمل فزع وكل واحد عنده استعداد يقتل اي شخص يقرب من ابنه
يبقي الناس ممكن تضحي بتجويع عيالها من اجل الثورة
للاسف لو استمر الحال علي ما هو عليه يبقي عليه العوض في الثورة ومكاسبها لان الناس هتنقلب ضدها وهتبقي الثورة المضادة اللي الناس عاملها لبانة جايه من الثوار انفسهم مش من اتباع الوطني او من مؤيده مبارك زي مابيقولو

المشاركة الأصلية كتبت بواسطة misoalex

مش حقولك كل الى فى التحرير ملايكه
طبعا فيهم ناس وناس وناس

ومش عارف ليه حضرتك وناس هنا معتبرين الجيش اله او حاجه مقدسه مبتغلطش

طب ما الجيش اتهزم فى حروب قبل كده الى هى تخصصه وشغله الشاغل
انا مش بقلل من قيمه الجيش لاسمح الله الجيش بقياداته على عينى وراسى
بس دول بشر

اه بشر مش معصومين من الاخطاء ولا غيره وغيره
مهو كل حاجه محتمل ليها النجاح او الفشل
انتو ليه متخيلين ان خلاص احنا عملنا ثوره وخلاص نقعد فى البيت ونشوف شغلنا بقا بيتك بيتك

ازاى يعنى هو مين الى عمل ثوره احنا ولا الجيش

احنا طيب ليه مستكترين علينا اننا نتابع طلبتنا والى لازم ايوه لازم تتحقق
مستكترين علينا اننا نشتغل مع الجيش ونتابع الى بيحصل ونشوف ايه الى فى مصلحتنا وايه الى مش فى مصلحتنا

يعنى ايه تعمل ثوره وفيه مطالب وكلها شرعيه ومش اختراعات يعنى ومطلوب مننا اننا نتنازل عشان مصلحه ناس تانيه

بزمتك دى اسمها ثوره ولا اسمها حتى نجحت

الجيش مش اله
وكل حاجه محتمل فيها النجاح والفشل
من حق من قاموا بالثوره أو حتى أيدوها من البيت يتابعوا ما يتم تحقيقه

بس هو حد أستنى لما يشوف الجيش نجح أو فشل
الطلبات اللى أطلبت أيه لسه ما أتحققش وأيه أترفض يتحقق
ترتيب تحقيق الطلبات أصحاب الشأن بس هما اللى يحددوه المهم أنه فى الأخر يتحقق لأن دى أولويات بلد والعبره بالنتيجه النهائيه

لو أي واحد مراته طلبت منه طلبات للبيت يشتريها المهم يجيبها ولا لازم مراته تقوله على ترتيب شرائها

طب الطلبات اللى الجيش فى نظر الناس مش موافق عليها فى المرحله دى أيه
هو موضوع شفيق يمشى وبس مفيش حاجه تانيه مرفوضه
وده داخل جوه موضوع الترتيب والجيش قالها أن مش دى وزارة الأنتخابات
والأنتخابات أتحدد ميعادها فى يونيو يعنى بعد شهرين
وممكن بكره تلاقيه مشى يبقى دوره فى الاولويات أنتهى

طب المحافظين والمسئولين و و و , كل ده جوه الترتيب

حد يقدر يقول الترتيب أزاى , الترتيب بس يكون من وجهة نظر اللى شايف البلد كلها من فوق

ده أمن قومى مش شويه حاجات بجيبها من السوبر ماركت فالترتيب مش مهم

كل الطلبات حتى الخياليه منها هتحقق بس فى دورها

حل المجلس العسكرى نفسه هيحصل بس فى دوره فى أول أكتوبر

نمشى ببطء بس صح أحسن ما نستعجل ونغلط ويبقى ما كسبناش حاجه بالبلدى نسلق المواضيع

التواريخ اللى كتبتها من جريده المصرى اليوم عدد النهارده الصفحه الرئيسيه

رجاء عند أقتباس كلامى للرد عليه يكون الكلام كله علشان ما يحصلش سوء فهم لأى نقطه

اقرأ مقال أ.فهمي هويدي اليوم في الشروق بعنوان
هل يصبح الجيش عبئا على الثورة؟

المشاركة الأصلية كتبت بواسطة misoalex

ولو هو مأخطأش مكانتش الاداره غيرت العنوان بتاع الموضوع

انا كتبت ان هاطلب من الادارة تغيره عشان الناس تسيب العنوان و تهتم بالخبر
و فعلا الادارة غيرته بعد شوية
انا مش شايف العنوان غلط و اعتقد ناس كتير موافقة علي كلامي
حضرتك شايف العنوان غلط...حقك و رأيك يحترم..... بس المشكلة اني لما باحترم اراء الناس الاقي الناس دي مش محترمة راي و بتتكلم معايا زي ما اكون انا عدو الثورة الأول
رغم اني رأي الشخصي ان الناس اللي عايزة تشيل حكومة شفيق و تزيح المجلس العسكري و تجيب بداله مجلس مدني هم دول الي اعداء الثورة اللي هيدمروها و يخلوها تفقد الدعم الشعبي و تتحول علي صراع علي من يكون موجود في المجلس الرئاسي

بأي حق تحاول مجموعة لا تمثل الا نفسها فرض اربعة مدنيين لحكم الشعب بدون انتخابات و فتح الباب للتناحر علي السلطة و انقسام الناس و ازاحة المجلس العسكري الذي يحظي بثقة و احترام غالبية الشعب

و علي فكرة الردود الانفعالية العصبية من ناس كثير علي كلام المعارضين لاستمرار الاعتصامات بتأكد ان في اهداف ورا اللي بيحصل و في محاولة لاسكات المعارضين....شوية يقولك دول اعداء الثورة (زي ما تكون الثورة مكتوبة باسمهم) و شوية يقولك تجاهلوهم وما تردوش عليهم

المشاركة الأصلية كتبت بواسطة cheetos_892005

المظاهرات الفئويه دي هي اللي لازم تتلم بالحزم فعلا

حتي دي الجيش و الشرطة مش هايعرفوا يسيطروا عليها في وسط الظروف اللي احنا فيها و الناس اللي قاعدة في البيون مستنية تسمع اي خبر ان الشرطة او الجيش بتضرب الشعب عشان تنزل جري علي ميدان التحرير
يوم الجمعة اللي فاتت لما الجيش بدا يفرق المتجمهرين في ميدان التحرير في وقت الحظر و اتقبض علي ناس كتير بتبيع مخدرات و معاها سنج و مطاوي اتكتب في المنتدي بتاعنا الموضوع ده اول ما تفريق المتظاهرين بدأ
http://www.nilemotors.net/Nile/203551-a.html
بص علي العنوان كويس و انت تفهم الناس ازاي مشحونة و ممكن بعد اي حادث او احتكاك تلاقي الناس كلها نزلت الشوارع و الله اعلم ايه اللي ممكن يحصل
لو حصل نزول للشارع و احتكاك مع الجيش او الشرطة علي نطاق واسع و في ظل الاوضاع الحالية و انتشار البلطجية و السلاح في كل حته يبقي اقدر اقولك ان النهب و السلب اللي حصل يوم 28-29 يناير هيبقي هزار جنب اللي ممكن يحصل اليومين دول