ادي ابني الجنسيه المصريه ولا لا؟؟

**mohamed_88sk** · 23-04-2008 11:25 PM

حقول لحضرتك حاجه لو تقدر تجيبله مصري ألماني بالترتيب يكون أفضل ، بس في حاجه أحب ألفت النظر ليها واحد كنت أعرفه فلسطيني كان أسمه محمد ووالده مش فاكر فالمهم البهوات عشان ياخدوا الجنسية الأمركية خلوهم يتخلوا عن أسماءهم من محمد لأي حاجه فالمحترم ده غير لمايكل،
ومتهيألي أميركا مفيهاش خانة ديانة ،معرفش بالنسبة لألمانيا إية لكن اللي أقصده أي جنسية عشان أخودها أغير أسمي مهما كانت ديانتي عن نفسي تغور أم الجنسية دي ،، شوف وربنا يلهمك الصواب وحسن التدبر والاختيار.

**araberphilosoph** · 23-04-2008 11:40 PM

متشكر جدا يا جماعه علي ارائكم
الاخ توت انا فاهم وجهه نظر حضرتك كويس و شايفها صح
هو عامه بياخد الجنسيتين اوبيفضلوا معاه لحد سن 18 وبعدين لازم يختار
وساعتها يبقي قراره هو مش انا
عموما هو الموضوع مجرد اوبشن موجود يعني مش هتضر في حاجه
لكن موضوع الانتماء ده اكبر من مجرد ورقه ولا بسبور الموضوع اكبر من كده ولازم يتزرع جواه
وعامه انا بسبب العنصريه الشديده في اوروبا لازم اسي له اختيار مفتوح لو الامور اتازمت به
اما الاستاذ اللي بيقوا ان مصر 80 مليون مش فارقه علي واحد اقول انا انا بتشرف اكون واحد منهم مش العكس واتمني ابني يكون مصري صرف والله بس الحال زي ما انته شايفين
وعموما سها اوي ان يرجع الجنسيه المصريه لو اتنازل عنها
والله المستعان!!
شكرا مجدددا

**crazylambada** · 23-04-2008 11:57 PM

بص انا مش حقول حضرتك شعارات
بس عمر ما الانسان بياخد جنسية علشان يشوف حيكسب من وراها ايه
لان ده في الاول و الاخر انتماء و انا مع استاذ توت في كل اللي قاله
حسالك ابسط حاجة شوف لما لاعب بيسيب الاهلي او الزمالك و الناس مش بتبقى طايقاه
ليه
لانهم عارفين انه بيبقى عنده انتماء لبناديه و ده بمثابة خيانة شديدة
و اخر حاجة شوف في كام عربي يتمنوا يبقوا مصريين بس علشان يعيشوا في مصر
كفاية انه يتقال عليك انك مصري
رافع راسك مش مذلول

**araberphilosoph** · 24-04-2008 12:05 AM

معلش يا استاذ crazylambada عرب ايه اللي عايزين يبقوا مصريين؟؟؟ غين دول؟؟
ولما يتقال اني مصري بابقى رافع راسي مش مذلول؟؟ مش عارف ممكن!!!

انا ميهمنيش المكسب بس مش عايز اهانه
بس ده كل الموضوع!!
مش عايزه يتقرف عشان جنسيته في بلده
بس!!

**crazylambada** · 24-04-2008 12:10 AM

لو انتا شايف ان بلدك مش مشرفاك خلاص انقذ ابنك منها ووديه لالمانيا
بس لما تلاقيه مفيهوش العادات المصرية
لما تحس انه غريب عنك
لما تلاقيه لهجته غير لهجتك
متندمش لانك انقذته من الوحل المصري
بس انتا عارف دي مش غلطتك دي غلطة الحكومة اللي خلت انتمائنا لبلدنا يوصل للمرحلة دي من التدهور
بس على فكرة انا عاوز اقول لحضرتك ان انا اقدر اخد الجنسية الامريكية ورافضها
ووالدي الله يرحمه ووالدتي رفضوها
و الوحيدة اللي اخدتها اختي لانها ولدت هناك بس
وربنا يعينك و تربية التربية الصالحة

**Nile_Storm** · 24-04-2008 12:14 AM

المشاركة الأصلية كتبت بواسطة araberphilosoph

متشكر جدا يا جماعه علي ارائكم
الاخ توت انا فاهم وجهه نظر حضرتك كويس و شايفها صح
هو عامه بياخد الجنسيتين اوبيفضلوا معاه لحد سن 18 وبعدين لازم يختار
وساعتها يبقي قراره هو مش انا
عموما هو الموضوع مجرد اوبشن موجود يعني مش هتضر في حاجه
لكن موضوع الانتماء ده اكبر من مجرد ورقه ولا بسبور الموضوع اكبر من كده ولازم يتزرع جواه
وعامه انا بسبب العنصريه الشديده في اوروبا لازم اسي له اختيار مفتوح لو الامور اتازمت به
اما الاستاذ اللي بيقوا ان مصر 80 مليون مش فارقه علي واحد اقول انا انا بتشرف اكون واحد منهم مش العكس واتمني ابني يكون مصري صرف والله بس الحال زي ما انته شايفين
وعموما سها اوي ان يرجع الجنسيه المصريه لو اتنازل عنها
والله المستعان!!
شكرا مجدددا

اخي انا لا اشكك في مصريتك بس بجد احنا في زمن مينفعش فيه ان المصري او العربي او المسلم عامه ياخد جنسيه تانيه

شوف العنصريه و التمييز و لا نحلال الخلقي هناك
احنا خايفين علي هويته ولولا حرصنا علينا مكناش ردينا
اخيرا اخشي ما اخشاه انه يتشبع بالطابع الاوروبي و يغلب عليه و ساعتها يرفض هويته المصريه
تقبل احترامي و شكرا

**MM_Mohsen** · 24-04-2008 12:27 AM

المشاركة الأصلية كتبت بواسطة حاتم سليم

أكبر ميزة للجنسية المصرية

ان ابنك يستطيع الترشح لرئاسة الجمهورية

فاذا كنت تخطط لابنك ان يترشح للرئاسة يوماً

فالجنسية المصرية ضرورية.

ايمن نور برضه عملها .. و ... ربنا يفك حبسه !
الدكتور نعمان جمعه .. رشح نفسه و عملوله مغرس و فضيحة و طلعوه من الحزب بتدبير " موافى "!

مش عارف ايه القضية طالما يقدر يحتفظ بجنسيتين و معاه باسبورين .. يخش اى بلد فى العالم و هو
حاطط رجل على رجل بالباسبور الالمانى و لا يحتاج شنجن و لا بنجن و يتجنب المهانه فى السفارات
الاجنبية و حتى العربية ..
و بعدين الانتماء ده مش ورق رسمى مكتوب .. ممكن لو يقدر يفيد بلده الاصلى بأى شئ يعمله من غير
ما يكون معاه حتى الجنسية فما بالك ان ممكن يحتفظ بالجنسيتين ..
اليهودى فى اى بلد فى العالم بيفيد اسرائيل حتى لو معهاوش الجنسية الاسرائيلية .. و فى مصريين ولاد عرب بيبيعوا
الغاز لاسرائيل بأقل من سعر التكلفة و لمدة 25 سنه لقدام و الشعب مش لاقى العيش ... كرم حاتمى مالوش مثيل فى الدنيا !

لو اتمسك لا قدر الله فى مظاهرة ممكن يطلب السفير الالمانى و ياخد حقه و يخرج .. لو عايز يعمل يزنس حيلاقى مزايا اكتر ..
فى دول تشترط عدم وجود جنسية اخرى لتمنح جنسيتها لكن اذا كانت المانيا مش منها خليه محتفظ بيها
ممكن يكون له مزايا الجنسيتين و يتجنب مساؤى الجنسية المصرية ..

اخر الامثال اللى سمعناها : مصر مش هى امى ... مصر مراة ابويا ! :)

**أبومعاذ** · 24-04-2008 01:26 AM

يا جماعة تعالو نحسبها بالسيناريوهات ونشوف ايه احسن سيناريو للولد نفسه:
1- مصري و جنسيته مصرية و عايش في المانيا و ابوه سايبه يتربى على الاعراف الاوروبية و من غير تدين
2- مصري و جنسيته مصرية و عايش في المانيا و ابوه عرف يربيه صح و يغرس فيه تقاليدنا و يعلمه ان خالقنا مطلع علينا و شايفنا و هايحاسبنا.
3- مصري جنسيته المانية و عايش في المانيا و متربي كانه الماني
4- مصري جنسيته المانية و عايش في المانيا بس متربي صح

طبعا محدش هيختلف معايا ان الاختيارات 1 و 3 مرفوضة لانه اكيد مش عايز يلاقي ابنه جايب صاحبته معاه البيت و مخبي مسدس في الدولاب و بيشرب ماريجوانا عشان مش معاه يجيب هيرويين

طيب الاختيار رقم 2
انا شايف ان الاختيار ده معناه مواطن ملوش تمن عند الحكومة بتاعته طبعا دا لو موجود في مصر ولو موجود في اي دولة في العالم فاحتمال كبير اوي يلاقي تفرقة عنصرية على اساس اللون او الدين او الشكل .....الخ

الاختيار رقم 4 معناه انه مواطن الماني متربي تربية كويسة و ليه كل مميزات الالمان يعني لو موجود في مصر مينفعش ان حد من البهوات بتوع الامن و الامان يرذل عليه لمجرد انه مش عاجبه شكله او اي حاجة تانية من الحاجات المعفنة اللي اي حد فينا ممكن يتعرض لها في جمهوريتنا المحروسة ولو موجود برا مصر هيتعامل على اساس انه الماني و اكيد هتبقى معاملتهم ليه احسن من معاملتهم للمصري

بخصوص العرب اللي عايزين الجنسية المصرية هما فعلا في ناس كدا بس عشان البيزنس و الفلوس و المصالح وبس مش عشان حبهم لمصر او انهم يفتخرو بانهم مصريين مثلا و كفاية انك تتعامل مع اي جنسية عربية في بلدهم هناك و انت تعرف انهم بيعاملونا معاملة زي الزفت إلا من رحم الله طبعا
المواطن الوحيد اللي ميقدرش يلجأ لسفارة بلده و هو برا هو المصري لأن غالبا السفارة بتيجي عليه دا كان في واحد مصري في السعودية كان قرفان من كفيله و نفسه يرجع البلد راح للسفارة عشان ترجعه مصر قاموا سلموه للسلطات السعودية
رأيي انك تخليه بالجنسية الالمانية على الاقل هتضمنله الكرامة و عدم الاهانة بس ياريت ميبقاش الماني قلبا و قالبا