في يوم من ذات الأيام روحت للبنزينة بتاعة موبيل اللي عندنا في طنطا
عارفين روحت للبنزينة ليه؟؟
تخيلوا كده روحت في اليوم ده بالذات للبنزينة دي بالذات ليييييه؟
يعني رايح عشان اشتري جوافة؟!!!
عشان أفوّل بنزين طبعا .. مش عايزة فكاكة يعني
المهم بعد ما فولت جا الراجل يقفل باب التانك .. الباب مرضاش يقفل
يحاول معاه كذا مره .. بس الباب كان له رأي آخر
مش مقفول يعني مش مقفول
[img2]http://img252.imageshack.us/img252/6396/44118082.jpg[/img2]
قلت اصطبحنا واصطبح الملك لله
طلعت بالعربية عجلتين قدام عشان ماعطلش اللي ورايا
لقيت اللسان اللي بيشبك في الباب داخل لجوه ومش راضي يطلع ..
[img3]http://img213.imageshack.us/img213/9682/96368402.jpg[/img3]
[img2]http://img267.imageshack.us/img267/1406/90771728.jpg[/img2]
قعدت أحاول معاه وأحايل فيه لحد ربنا ما كرمه ونتعه بالسلامة
وقفلت الباب وقفل والحمد لله
طبعا زي ما انتوا عارفين .. القصة عمرها ما بتنتهي معايا بالساهل كده
في يوم تاني من ذات الأيام التانية .. روحت بنزينة التعاون
طبعا عارفين أنا روحت في اليوم ده بالذات للبنزينة دي بالذات لييييه؟
بالظبط .. يا سلام عليكم ... عشان اشتري جوافة طبعا هههههه
المهم بعدما اشتريت الجوا...... قصدي بعد ما فولت
جا الراجل يقفل باب التانك .. أتاري الباب لسه مصمم على رأيه الأولاني .. ومش راضي يقفل
بس المره دي أنا عارف هاعمل إيه .. شديت اللسان لبره وقفلت الباب
نفس الحوار ده اتكرر في يوم تالت من ذات الأيام
بس المره دي كان في فرق جوهري ومحوري عن المرتين اللي فاتوا
طبعا الوضع ده ماينفعش .. اللسان هيفضل يعلق كل مره كده
قلت أحط نقطتين زيت على اللسان عشان يسهل المسائل .. ويخلص المشاكل
وفي يوم رابع من تلك الأيام روحت البنزينة عشان أفول ..
جا الراجل يقفل الباب .. والباب دماغة ناشفة ومصمم على كلمته .. مش قافل يعني مش قافل
طلعت اللسان تاني وقفلت الباب
قلت طب أعمل إيه .. يمكن الزيت اللي حطيته يكون لم تراب خلى اللسان يعلق أكتر
طب جرب تنضفه بشوية جاز يا معلم
خدت شوية جاز في سرنجة وروحت العيادة بتاعتي وعملت فيها جراح وقعدت أنضف اللسان في فترة العيادة كانت خالية فيها من الزباين
وأجرب أدخل اللسان عشان يطلع لوحده .. مفيش فايدة لازم أنا اللي أطلعه بإيدي
أنضف تاني وأجرب .. بردو مفيش فايدة
أنضف تالت وأجرب .. أوببببااااااا
العربية بلعت اللسان كله من لغاليغه باللي حواليه
[img2]http://img822.imageshack.us/img822/3676/26485655.jpg[/img2]
أدخل صابعي وراه عشان أجيبه .. ألمسه بس بيتزق لجوه أكتر
قلت مابدهاش جيبت Artery forceps بتاع الجراحة من العيادة وأحاول أجيبه .. يبعد أكتر
[img2]http://img856.imageshack.us/img856/5561/25622091.jpg[/img2]
كان لازم أعمل فيه ناصح يعني؟؟؟ .. جيت أكحلها عميتها
طيب أروح لمين عشان يطلع اللسان
أروح التوكيل ..... لأااااااااااااااا
قررت أني أكمل نصاحة للآخر .. ويا إما أنا يا إما اللسان النهارده
بس أنا مش عارف الحته اللي فيها اللسان دلوقتي دي تبع إيه بالظبط .. وأوصل لها منين
يا ترى تانك البنزين هيحتاج يتفك ولا إيه النظام؟
قلت أفك الفرش بتاع الشنطة كده وأشوف
كانت أول مره أفك الكلبسات اللي مثبته الفرش ومكنتش أعرف بتتفك ازاي
بس الفكاكة بتخلص كل حاجة
[img2]http://img252.imageshack.us/img252/3448/64431653.jpg[/img2]
[img2]http://img263.imageshack.us/img263/5856/50916849.jpg[/img2]
فكيت الكلبسات وزيحت الفرش ودخلت إيدي .. لقيت سلك طويل وفي آخره اللسان
السلك ده هو اللي موصل اللسان بالدراع اللي بنشده عشان نفتح التانك
[img2]http://img600.imageshack.us/img600/4020/73315664.jpg[/img2]
[img2]http://img707.imageshack.us/img707/2778/77428604.jpg[/img2]
شديت السلك وطلعت اللسان من لغاليغه وبقى بين إيديا وجها لوجه
لقيت المسألة كانت مش محتاجة زيت .. ولا جاز
المشكلة كانت إن السوستة اللي بتزق اللسان مش راكبة في مكانها كويس
[img2]http://img39.imageshack.us/img39/4118/26739383.jpg[/img2]
[img2]http://img171.imageshack.us/img171/6134/89762763.jpg[/img2]
ركبتها ببساطة .. ورجعت اللسان مكانه ببساطه .. وقفلت الفرش والكلبسات ببساطة .. وقفلت الباب بمنتهى البساطة
أفتح وأقفل تاني .. زي الفل
خدت نفَس عميق كده وأنا حاسس بنشوة الانتصار
لأني قبلها على طول كنت حاسس بخيبة الأمل عشان كل ما أكحلها تبوظ أكتر
بس المهم اللي يضحك في الآخر
وقفت بقى وأنا مبسوط من نفسي أتخيل إني كنت روحت بيها التوكيل .. كنت هاضيع يوم بحاله ويقولولي هتدفع كشف كذا ومصنعية كذا وضريبة مبيعات كذا واتفضل حضرتك في الاستراحة وبعدين يقولولي القطعة عايزة تتغير ومش موجودة دلوقتي وهنجيبها بعد أسبوع و... "في جاموسة مستنياك يا دكتور" .. قاطعني صوت البنت اللي شغالة في العيادة صحاني من الحلم اللي كنت بحلمه
سيبت العربية ولسانها اللي بقى تمام
وروحت للجاموسة لقيت عندها حمى قلاعية ولسانها متدمر
قلت اللهم صلي عالنبي .. هو أنا خريج طب بيطري .... ولا ألسن !!!
المفضلات