الموضوع: نتشة في 307

السلام عليكم,

أنا برضو عندى نفس المشكلة وسألت فى التوكيل اللى فى أبو رواش قالولى ده غالبا فرش فتيس بس لازم تروح بيها توكيل غمرة لأنه هو اللى فيه صيانة فتيس بس!!!..بس فعلا المشكلة دى مش موجودة على طول بس سمعت ان الموضوع بيتطور وتلاقى خبطة.
ربنا يسهل والمشكلة تطلع بسيطة لأانها واضح انها حاجة منتشرة.

تحياتى وياريت اللى عنده حل أو يعرف حد كويس غير التوكيل وبيفهم فالفتيس يقولنا

ألسلام عليكم
المشكله اللي عندك ان الفتيس محتاج طقم شنبر بيتكلف حوالي 500 - 700 جنيه
المشكله ديه محصلتش معايا بس حصلت لواحد صاحبي
فيه مركز محترم اسمه اوتو سيرفس في صقر قريش كنت بتعامل معاه
نصيحه لوجه الله و ماتفتكرش اني بكرهك في العربيه
العربيه ديه انا ماركبتش عربيه زيها
اللي كانت معايا 307sw هاي لاين 2007 عربيه خرافه بجد
قعدت معايا 7 شهور و صرفت عليها 10000 جنيه (علي فكره لمل جيت اشتريها فحصتها في مركز صيانه معتمد و ما كانش فيها الهوا)
بس الفتيس لوحده صرف حوالي 5000
و الباقي دينامو و مارش و مش فاكر
المهم هيا لو مفهاش مشاكل كتير يبقي استحمل
غير كده حاول تبيع

امادجو باشا انا فعلا بدور علي ناس من الحرفيين كانو شغالين في التوكيل و اول ما هوصل لحد فاهم هقولك
استاذ لودي طبعا انا عارف ان لو العربية مبهدلة هطلع عيني بس العربية ما شاء الله حالتها ممتازة وانا عن نفسي مش شايف فيها اي عيب غير النتشة دي و إن شاء الله هصلحها

المشكلة دى حصلت عندى من فترة و لما بصيت على العربية لقيت ان المياة كانت ناقصة و المياة بتاعت الرادياتير ليها دورة فى الفتيس
المهم انى من سعتها و الموضوع ده محصليش تانى الحمد لله
مشكلة الفتيس بتاع ٣٠٧ هى ضغوط الزيت و دى بيقصر فيها عوامل كتير
- الحرارة بتقصر على لزوجة الزيت و بالتالى برضه الضغط
- منسوب الزيت
- عمر الزيت لانه لازم يتغير
- بلوف النقل solenoid valve
- طقم الجوانات او السيل البيمنع تسريب الزيت

فى واحد فى الحرافيين اسمه محمد سمك و عنده الجهاز بتاع العربية هو فى شارع الرسيدس فى نصه تقريبا فى شارع جانبى لو سالت عليه هنالك حيقلولك فين

المشاركة الأصلية كتبت بواسطة shark_3li

السلام عليكم
انا معايا بيجو 307 موديل 2006 و بتعمل معايا حركة غريبة جدا . لما بكون ماشي في طريق زحمة وكل شوية بقف و امشي لو منقلتش الفتيس علي ال n وانا واقف وسبته علي ال d العربية بيكون فيها بوش كدة في دوسة البنزين يعني ادوس الار بي ام بيعلي لكن العربية مبتتحركش و مرة واحدة الاقي العربية نطت او نتشت و بدات تتحرك عادي الكلام ده بيحصل لما تكون العربية واقفه بس و مش دايما بيحصل. فانا كنت عايز اعرف كدة العيب من ايه و يتحل ازاي و اسف علي الاطالة.

المشاركة الأصلية كتبت بواسطة ramy01011

2 بيجو 307 1600 سي سي موديل 2006 نفس الحركة و تغير الفتيس في الوكالة تبع الضمان و بعدها بفترة رجع تاني
1 بيجو 307 موديل 2007 2000 سي سي نفس الحركة و تغير الفتيس في الوكالة تبع الضمان و بعدها بفترة رجع تاني
1 بيجو 308 موديل 2008 1600 سي سي نفس الحركة و تغير الفتيس في الوكالة تبع الضمان و بعدها بفترة رجع تاني

ده تاريخي انا و 2 اصحابي مغ عربيات بيجو غير مشاكل الحرارة . نصيحة لوجه الله اخلص منها بسرعة

انا معايا بيجو 308 و فعلا كان فيها النتشة زي اللي بتحصلك ديه بظبط و كل اللي عماته اني روحت مركز خدمة اسمه Auto Service (بجوار نادي السكة الحديد)
حكيت للمهندسة اللي مسؤلة عن المركز وردت وقالتلي في ساعتها ان فعلن في مشكلة في software بتاع 2008 ونزلتلي software 2010 في 5 دقايق و الحمد لله بقالها سنة العربية معايا وولا مرة حصلت النتشة دي تاني
ملحوظة: الليلة دي كلها على بعضها اتكلفت 100 جنيه

نسيت ااقولكم كمان ان انا قبل ماروح Auto service روحت قبليها مركز غمرة ولمل قولت للمهندس هناك على موضوع النتسة ولا جبلي اي سيرة عن موضوع software وقالي هنكشفلك على الفتيس

طيب انا لو حبيت اعالج المشكلة دلوقتي ابدا بالسوفت وير ولا ابدا بتغيير الزيت و البلوف؟
وكنت عايز اعرف برضه الزيت بيتغير علي كام لان العربية عاملة ٧٠٠٠٠ كيلو