رينو داستر الشكل الجديد - الآن في مصر

**bebo2000** · 02-04-2012 07:38 PM

طاب يا رجالة مادام الموضوع طلع عام ومش عندي لوحدي ما تيجوا معايا نعتصم ونطالب ان اليوم فى مصر يبقى على الاقل 30 ساعة بدل 24
يعنى هى جت علينا ووقفت
على الاقل ده هايبقى اول مطلب فئوي هدفه ان الناس تلحق تعمل اللى وراها مش تبطل شغل

هه مين معايا في الاعتصام

**sead** · 02-04-2012 08:24 PM

بجد الف شكر للاستاذ بيبو والاعضاء للمعلومات القيمة دى عن العربية والفرش انا كان معايا لوجان مانوال وبعتها عشان اجيب اتوماتيك بس بعد التقرير الممتاز ده انا بدات افكر فى الداسترا بجد وربنا يسهل

**beeronasr** · 03-04-2012 10:30 PM

توكل على اللة ياباشا - العربية مكتوب عنها كلام جامد اوى فى اروبا - و انت عارف انهم مش بيهزروا فى تقييم العربيات

**bebo2000** · 08-04-2012 09:55 PM

انا كنت شغلت التكييف قبل كدة علشان اجربه لما جبت العربية بس طبعا الكلام ده كان في الشتاء والدنيا برد لوحدها فمش مقياس
المهم النهاردة وانا راجع من الشغل الجو كان نار فاشغلت التكييف لاول مرة في درجة حرارة عالية وعندى ملاحظتين

الاولى:- لاول مرة في حياتي اركب عربية سحبها بالتكييف زى من غيره انا طول عمرى متعود انى لما اشغل التكييف كانى بشغل نظام البطة البلدى بتاع العربية علطول تلاقى العربية ماتت منك ولو طريقك ماشى عجلة عجلة يبقى انت كدة وربنا معاك
لكن الداستر ولا الهوا مفيش اى فرق بس ده ممكن يكون بسبب العزم الكبير بتاع الغيارات لو حد معاه ال2*4 ممكن يفيدنا فى الموضوع ده لان عزم الغيارات بتاعتها زى اى عربية خمسة غيار

الملاحظة التانية:- مش عارف حاسس ان التكييف بتاع الافيو احسن منها بس مش متأكد لانى كنت راكن في الشمس والعربية مولعة وده بيخلى التكييف يبقى ضعيف شوية عموما انا هاجرب تانى في كذا وضع وهاشوف النتائج ولو حد فى المنتدى معاه داستر وجرب التكييف في الصيف يقولنا تقييمه برضه يمكن انا عندى مشكلة في التكييف

**beeronasr** · 09-04-2012 10:59 AM

خد بالك راجع درجة التبريد على اعلى تبريد ولا أقل؟ انا مش عارف درجات تبريد الداستر اية؟
وربنا يطمنك على موضوع السحب دة.
على فكرة - بناء على كلامكم عن موضوع اللون الاسود: امبارح اقنعت الحكومة بتغيير اللون و كلمت حسين فى الطارق و غيرت للفضى - يارب يكون جميل.

**hexll** · 10-04-2012 05:34 PM

بسم الله ما شاء الله
ربنا يباركلك فيها يا رب ويكفيك شر الطريق
شكرا على الافادة

**bebo2000** · 10-04-2012 08:23 PM

المشاركة الأصلية كتبت بواسطة beeronasr

خد بالك راجع درجة التبريد على اعلى تبريد ولا أقل؟ انا مش عارف درجات تبريد الداستر اية؟
وربنا يطمنك على موضوع السحب دة.
على فكرة - بناء على كلامكم عن موضوع اللون الاسود: امبارح اقنعت الحكومة بتغيير اللون و كلمت حسين فى الطارق و غيرت للفضى - يارب يكون جميل.

عارف يا beeronasr انا اساسا كان نفسي اجيب الفضي علشان فيه ميزة مفيش حد بياخد باله منها وهي ان كل العربيات الداستر المرايات بتاعتها فضى وبيبقى شكلها غريب لما بتبقى العربية بلون تاني
عاملة بالظبط كانهم اتكسروا وملقتش نفس لون العربية فجبت لون تانى لكن الفضي بيبقى كل العربية لون واحد
ربنا يكرمك وتستلم على خير وابقى طمنى عملت ايه اول باول

المشاركة الأصلية كتبت بواسطة hexll

بسم الله ما شاء الله
ربنا يباركلك فيها يا رب ويكفيك شر الطريق
شكرا على الافادة

العفو يا باشا والف شكر لك

**gogo2012** · 12-04-2012 02:27 PM

اذيكم يا جماعه اخباركم ايه اتمنى الكل يكون بخير واسف لعدم الكتابه بأنتظام لظروف العمل

**bebo2000** · 13-04-2012 12:32 PM

المشاركة الأصلية كتبت بواسطة gogo2012

اذيكم يا جماعه اخباركم ايه اتمنى الكل يكون بخير واسف لعدم الكتابه بأنتظام لظروف العمل

جوجو باشا واحشني يا راجل
كنت عاوز اسأل عنك من زمان بس قولت تلاقى الحال من بعضه انا برضه ذيك الدنيا ملخبطة معايا ومش لاقى وقت اعمل اى حاجة
بس المهم انك بخير ونشوفك قريب ان شاء الله

**beeronasr** · 18-04-2012 02:40 AM

[QUOTE=bebo2000;3874230198]عارف يا beeronasr انا اساسا كان نفسي اجيب الفضي علشان فيه ميزة مفيش حد بياخد باله منها وهي ان كل العربيات الداستر المرايات بتاعتها فضى وبيبقى شكلها غريب لما بتبقى العربية بلون تاني
عاملة بالظبط كانهم اتكسروا وملقتش نفس لون العربية فجبت لون تانى لكن الفضي بيبقى كل العربية لون واحد
ربنا يكرمك وتستلم على خير وابقى طمنى عملت ايه اول باول

ربنا يخليك يا بيبو باشا - لسة واصل امبارح من الغردقة و النهاردة ربنا اكرمنى و استلمت الداستر من الطارق - الحمد للة لونها طلع جميل و كانوا مخلصين كل الورق و طبعا اكنى راكب مركب و حاسس ان ابعادها مختلفة تماما عن اللانسر و كمان بقالى اربع سنين ماسقتش مانيوال فكنت عامل زى اللى اول مرة يسوق.
على فكرة التابلوة مش وحش اوى ولا حاجة و شكلة بالليل احلى بكتير من النهار.
بكرة الساعة 7 ان شاء اللة هروح مرور رابعة علشان الترخيص و ربنا يسهل.
وبالليل اروح لجينس كار اشوف موضوع الفرش و المسند لانة مهم اوى وطبعا حابب اشوفك قريب قبل ما اسافر.