الموضوع: تقرير مفصل عن تركيب فلتر k&n في الياريس + فيديو تسارع قبل وبعد الفلتر

السلام عليكم ورحمة الله وبركاته

قبل اي حاجة بشكر اخويا وحبيبي البشمهندس احمد (Yoko)

بصراحة ماقصرش معايا نهائيا وكان بيرد على كافة استفسارتي واسألتي وانا كنت مصدعه رسائل وتليفونات

وربنا يكرمه كان بيوضحلي كل حاجة بالتفصيل

ندخل في الموضوع

بقالي مدة دايخ على فلتر رياضي للياريس وهدفي هو تحسين الاداء ولو بالبسيط يعني كان اهم حاجة بالنسبة ليا ان الاداء بتاع العربية يتحسن مش مجرد صوت وخلاص

دورت هنا وهنا واكتشفت ان المشكلة ان حساس الهواء في الياريس راكب على العمة بتاعة الفلتر القديم وبالتالي بتحصل مشكلة لما تيجي تركب الفلتر

لحد ما في الاخر دلني احد الاعضاء في المنتدى هنا عن حماده غوزي وقالي روح وهو لو عنده الفلتر هيتصرف

بالفعل اتصلت بيه وقالي الفلتر موجود ورحت قابلت المهندس مؤمن بصراحة الراجل ده فاهم فاهم فاهم واشتريت الفلتر وشرحلي طريقة تركيب معينة عشان نبعد عن قصة حساس الهواء وحسيت من كلامه انه فاهم عشان كدة استريحتله نفسيا وقلت هبقى ارجعله اركب الفلتر

وبعد حوالي عشر ايام رحت لمحل حماده غوزي فرع مدينة نصر وقابلت المهندس مؤمن مرة تانية عشان نركب الفلتر

وتشاء الصدف اني اقابل نفس العضو اللى دلني عن فرع حماده غوزي موجود هناك وكانت صدفة جميلة بصراحة "Is1090"

ندخل في مرحلة تركيب الفلتر

اول حاجة دي شكل العمة القديمة بعد ماتفكت



يخربيت التراب اللى عليها

بعد كدة فكينا حساس الهوا وحطيناه جوة مسورة جديدة



على الجمب باين الفلتر القديم المتهالك <<< زمانه بيدعي عليا

ثم شلينا قاعدة العمة القديمة



بعد كدة جبنا الفلتر وحطيناه في كوع عشان ينزل لتحت لان مافيش مجال لتركيبه جوة الحوض بشكل مستقيم

والكوع اوريجينال K&N



ودي صورة موضحة الفلتر بالكوع بالماسورة اللى ماسكة حساس الهوا



وايد العبد لله <<< اقعد على جمب بس



كدة مافضلش غير اننا نحط الفلتر بالكوع بالماسورة اللى فيها الحساس في المسورة بتاعة العربية اللى داخلة على الماتور مباشرة

وبكدة يكون الفلتر ركب والحمد لله



ودي النتيجة النهائية بعد التركيب والتظبيط وربط حساس الهوا



الحمد لله التركيب خلص على خير والحمد لله برضوا ان مافيش مواسير اتعملت عمولة او اي حاجة كل الحجات اللى ركبت اوريجينال اخدها المهندس مؤمن من كيتات K&N جاهزة

نيجي بقى عند المرحلة الاهم وهي الاداء وهل حصل فرق في الاداء يستاهل الفلوس اللى اتصرفت والمجهود المبذول ولا لاء

اولا الفلتر صوته بسم الله ماشاء الله حاجة كدة تخض والاجمل انك لو ماشي هادي ومش بتحرق مش هتسمعله صوت نهائيا ومش هتحس انك ركبت فلتر هواء رياضي من الاساس

بس بمجرد تدي كيك داون تحس ان فيه وحش عايز يطلع من الماتور

اما بالنسبة لتحسين الاداء وده الاهم

انا ماحبتش اني احكم على الفلتر بالعبارات "حسيت ان الاداء اتحسن -- حاسس ان الاداء افضل ... etc " وغيره من الكلام اللى مش دقيق وكمان ممكن الواحد لمجرد الصوت يحس ان العربية بتسحب افضل وهي لا بتسحب افضل ولا نيلة

المفروض ان العربية عندي تجميعها من 0-100 في حدود 12-12.5 ثانية ده المعدل الطبيعي وفي احسن الاحوال 11.5

خاصا لان انا لما بعمل تجربة تسارع من الثبات ببدأ بالوضع D وبعدين بنقل من الفتيس على 2 زمن ومعاد النقلة للغيار التاني بتفرق في التسارع كتييييييير لدرجة اني لو عملت التسارع على الوضع D فقط بيبقى المعدل 14 ثانية ! ! ومش عارف السبب ! !

عشان كدة تجارب التسارع عندي متفاوتة الطبيعي مابين 12-12.5 ثانية ومرة كنت لسه مغير زيت والعربية فايقة جدا عملت تسارع في 11.5 بس المرة دي ماتكررتش تاني مش عارف ليه

المهم برضوا عشان ماكونش حكمت على الفلتر بتجربة تسارع مر عليها اكتر من شهرين ومحدش عارف حالة العربية عاملة ازاي حاليا "سواء زيت ماتور - او بنزين او غيره اللى ممكن ياثر بشكل او باخر على التسارع"

قلت لازم اعمل فيديو تسارع قبل ماركب الفلتر مباشرة وبعد ماركب الفلتر فيديو تاني في نفس المكان ونفس التوقيت ونفس البنزين عشان اكون موحد كافة العوامل اللى ممكن تاثر على التسارع ويبقى العامل الوحيد اللى متغير هو فلتر الهواء

بالتالي هقدر احكم بشكل دقيق على اداء الفلتر

وقد كان قبل ماركب الفلتر بيوم رحت اعمل تجربة تسارع وكان النتيجة مخيبة للامال وجابلتي احباط شديد شديد شديد شديد

تسارع العربية 0-100 في : 13 ثانية ! ! ! العربية تكاد تكون ماتت عشان تجمع من 80-100 الى غير الطلعة اللى زي الكفتة

انا كان بقالي مدة حاسس ان صوت الماتور فيه خشونة وعالي والدنيا مش متظبطة بس ماكنتش متوقع انها تبعد اوي كدة 13 ثانية دي جابلتي احباط وقفلتلي اليوم بصراحة

----

نسبنا بقى من الرغي ده ونخلينا في المهم بعد تركيب الفلتر

بعد ماركبت الفلتر مباشرة حسيت ان العربية تقيييييييييييييييلة ولازم ادوس عشان تجري

واستغربت جدا ! ! الناس كلها بتركب فلتر بتحس بتحسن انا احس ان الدنيا تبوظ اكتر ماهي بايظة

قلت يمكن احساس عشان الصوت والواحد مش واخد عليه لان صوته قوي بصراحة

فقلت اروح اعمل تجربة تسارع كدة اشوف الدنيا فيها ايه ومع الاسف نفس النتيجة المحبطة

روحت البيت وكلمت ابوحميد "Yoko" قلتله اني ركبت الفلتر ومش حاسس باي فرق نهائيا

قالي ان حساس الهواء بيبقى محتاجة يتظبط يعني على سبيل المثال قالي في عربيته اللينا بياخد 20 دقيقة سواقة وبعد كدة يتظبط مع الفلتر الجديد الى غير اني محتاج اني افصل سالب البطارية عشان اعمل ريستارت لل ECU عشان يظبط الدنيا من الاول

دخلت بعدها على موقع تويوتا ياريس << منتدى خاص بتويوتا ياريس بس فيه ناس فاهمين على الاخر

كلمتهم وسالت على موضوع حساس الهواء ده اذا كان بيحتاج Readjustment بعد ماتركب فلتر هوا جديد ولا لاء

قالو هو بيظبط نفسه لوحده بس بمجرد حطيت صورة الفلتر الجميع كان عايز ينزل عليا ضرب نار

وكانت النصائح كلها اني افصل سالب البطارية + اني لازم لازم لازم انضف حوض الماتور من كمية التراب البشعة اللى عليه لانها ماثرة بشكل او باخر على عمل الفلتر

وقد كان فصلت سالب البطارية لمدة 10 دقائق وبعدين طلعت نضفت الماتور بالهوا وغسلته بالفوم

ومن هنا بدات احس بفرق للاحسن

اول فرق حسيت بيه ان العربية بقت بتدخل في الريد زون ! ! وبتنقل عند 6.5-7 ! وبتوصل ل7000 لفة بسهولة جدا لدرجة انك مش هتحس انك دخلت في الريد زون الا لو بصيت على ال RPM

مش عارف ليه ومش عارف هل ليه ضرر على العربية ولا لاء ودي حاجة انا مستغربلها

مع العلم حتى ولو نقلت بالفتيس من D الى 2 بتفضل مكملة على الغيار الاول طول مانت دايس بنزين ومش بتنقل الا عند 6.5-7 بعكس في الاول بمجرد تلمس الريد زون تنقل علطول

العربية حسيت الاستجابة بقت احسن خاصا على ال RPM العالي

وتوجهت لعمل تجربة تسارع عشان نقطع الشك باليقين ونشوف حصل تحسن قد ايه

والحمد لله النتيجة مرضية نوعا ما بالنسبة للاحباط اللى كان جالي قبل كدة

العربية عملت تسارع 0-100 : 11.8 ! وطبعا ده تحسن جميل الحمد لله

وانا حاسس انه ممكن يكون فيه احسن مستقبلا ان شاء الله لو نضفت الماتور تنضيفة عدلة تانية و افك حساس الهوا وانضفه من الاول

الى غير اني بفكر اغير مكان الفلتر وانزله لتحت شوية عشان ابعد عن حرارة الماتور

بس الحمد لله تحسن 1.2 ثانية دي حاجة ماكنتش متوقعها "بعيدا عن العربية اصلا حالتها في الكفتة الا ان لو رجعت لحالتها الطبيعية مع بقاء معدل التحسن ده هتبقى حاجة جميلة"

دي صورة الفلتر بعد مانضفت الماتور "هو لسه بصراحة محتاجة تنضيفة كمان"



وده فيديو تسارع العربية قبل الفلتر مباشرة <<< ايوة اقصد النتيجة المحبطة

Befor Filter - YouTube

وده فيديو تسارع العربية بعد تركيب الفلتر وتنضيف الماتور ومايلزم

Toyota Yaris 1.3 L Acceleration with K&N Air Sport Filter - YouTube

وان شاء الله هيبقى فيه تحسن بعد التنضيفة التانية ولو غيرت مكان الفلتر

والف شكر ليكم ,,,