الموضوع: تجربة شد مع verna

المشاركة الأصلية كتبت بواسطة lanos2004

هههههههههههه شوف حتى لو انا من صفر الى 100 فى 17 ثايه مش مهم عندى خالص انا اهم حاجه استهلاك البنزين تخيل 100 كيلو 7 لتر وعلى سرعه 120 يا سلام فيه حاجه بالشكل دة

ما انت قولت شغاله تاكسى ، ودي 1500 بس هو انا اللى هقولك ما انت سيد العارفين دي فيها فرق 100 سي سي على ال1600 ، دة خلاف انها 2 كامة و 16 صباب
اكيد هتوفر شوية سي سي فرق بردو ،
ومش هقولك بتستهلك كام على 100 علشان الموضوع كدة طول هههههههه
انت عندك جين وبرسونا وشركة بروتون كلها واكيد عارف استهلاكها فى السفر كويس ;)

مش هتكبروا دماغكوا بقى؟

المشاركة الأصلية كتبت بواسطة eng f3lix

مش هتكبروا دماغكوا بقى؟

أنا معاك فعلا.

و الله العظيم تلاتة الجين 2 حلوة .... و الفيرنا حلوة ..... و الياريس حلوة ...... و اللانوس حلوة .

كل عربية فيها مميزات و عيوب
و أنا مجرب الأربع عربيات اللي فوق و الأربعة حلوين ....... أعشق الجين 2 أكثرهم .

إنما كلها عربيات بتودينا و تجيبنا و خلاص بقى .

--------------------------------------------
الأستاذ لانوس 2004 ......... ذكر مميزات عربيته بأمانه و فعلا كل اللي قاله صحيح و على قوة موتوره الراجل معاه 2 شهود ..... بالاضافة ان عربيته خفيفة فلازم تجميعها يكون عالي ...... ربنا يباركله و يستر طريقه.

الفيرنا عربية أقتصادية و تجميعها حلو جدا لغاية 120 إلى 130 كم - س ...... ثبات و هاندلنج في البطاطا و لكن أنا شايف أن الناس فاهمة العربيات غلط في مصر أساسا ........ يا أخوانا أسرع طريق في مصر هو 120 كم -س
و لوأحنا في دولة محترمة و فيها شرطة محترمة و حكومة محترمة ......... مكناش هانشوف ناس بتمشي 160 و 170 على طرق غير مُصممة أطلاقا لكدا .
و بالتالي و بناءا عليه ........ الفيرنا حلوة و عائلية و تقضي الغرض منها .
الياريس .... لسة مجرب واحد الشهر اللي فات أوتوماتيك
نعومة في السحب ........ و نعومة في العفشة رهيبة ........ يقابلها ثبات مش كويس خالص و العربية مع أي رياح أو مطب هوا بتروح و تيجي ....... و التقفيل عادي جدا و بلاستيك في بلاستيك يا أستاذ لانوس مش عارف أنت مش عاجبك تقفيل الجين 2 و مكوناتها الداخلية ليه ........ مع ان الياريس ما تفرق عنها في شئ .....
و ميزة كمان من مميزات الياريس مع أنها 1300 ....... أن العربية مع التحميل مش متأثرة قوي بالتحميل و دي حاجة حلوة وواضح أن الموتور كويس و قوي و كمان مساعده خفة الوزن .

الجين 2 (محبوبة البروتونيين ) عربية برضه عادية زيها زي العربيات التانية اللي في الدنيا و الله .
مميزاتها الثبات و الهاندلنج و الشكل و السعر مقابل المُنتج نفسه ...
و بالنسبة للموتور ........ برضه الموتور عادي يعني 1600 زيه زي أي موتور 1600

الفروق بس علشان أوضحها للناس
الفتيس بيفرق جامد يا رجاله
فتيس الجين 2 نفسه طويل ......... يعني بيطلع أقصى عزم عند 4000 لفة في الدقيقة بعكس الفيرنا و اللانوس و زيه زي الياريس .
طيب ده بيفرق في أيه ؟
بيفرق في السحب على سرعات صغيرة تحت 120 ..........هاتلاقي اللي راكب فيرنا أو جيتز أو ماتركس (علشان فيهم نفس أنظمة الموتور و الفتيس ) سحبه حلو قوي قوي تحت 120 خصوصا لو اللي راكب سواق جامد و بيعرف ينقل صح لو راكب مانوال .

نيجي بقى للسرعات العالية .... هاتلاقي الجين 2 و الياريس لسه فيهم علشان تصميم الفتيس ... و نقلاته و نقط خروج العزم .

فمين يفرق عن مين في الجري ......... و لا بتفرق
و لو الفيرنا سبقت عربيات الدنيا كلها مش هايخليها أحسن عربية في الدنيا
و لو الجين 2 سبقت عربيات الدنيا كلها برضه مش هايخليها أحسن عربية في الكون .
و عندنا الجيتز ...... نفس موتور الفيرنا و نفس الفتيس و بتعلم على أي عربية علشان وزنها خفيف
يبقى قوة مقابل وزن أعلى من عربيات في نفس الفئة بسبب الوزن (خصوصا لما تكون القوة متقاربة ) يعني 110 إلى 100 حصان .
و العربية مش أحسن عربية علشان فيها عيوب الثبات و الهاندلنج أقل من عربيات تانية كتير .

فرجاءا ........... كبروا دماغكم و العربيات و الله العظيم كلها حلوة و أهم حاجة أنها بتقضي الغرض منها و هو تقضية المشاوير
لما الحكومة تقتح تراك سباقات .......... أبقوا روحوا سابقوا هناك براحتكم
إنما في الشوارع و الطرق اللي الغلابة بيشموا فيها زيي كدا
أبوس أيديكم و رجليكم ......... أتقوا الله فينا .

بمناسبة أرقام الجين 2 من 0 إلى 100
أنا جربت بالمانوال حوالي عشرة مرات
أفضل رقم على ما أتذكر وصلتله هو 11 ثانية على الغيار الأول و الثاني فقط و لا أعتقد أنها ممكن تجيبهم في أقل من 10 ثواني
على الطرق المستقيمة .........أفضل رقم 11 ثانية
ممكن على طرق فيها منازل توصل لرقم أفضل و لكن على طريق مستقيم لا أعتقد أنها ممكن تجيبهم في أقل من 10 ثواني على أقصى تقدير .......... و الله أعلم .
و مجربتش بالأوتوماتيك خالص و مش هاجرب ...... هو أنا هاعمل العربية حقل تجارب و لا أيه ؟

الموضوع كوميدي أساسا مش عارف هو قلب ليه كدة ؟!