انا بقي حصل لى موقفين فى يوم واحد مش ممكن انساهم ...
رايحين الجامعه الصبح و اخدنا الملف بعد الجامعه وراجعين علشان نركن ونبص نلاقى كمين معمول قبلها ب 20 متر تقريبا ... الكمين ده معمول علشان كانوا بيدوروا على سواق نص نقل هربان تقريبا ومش بيوقفوا الملاكى خالص فاحنا هدينا قبل الكمين علشان الزحمة بس والعربية جت عند الظابط ووقفت !!! مردتش تدور !! والله العظيم العربيه وقفت مرة واحدة ومردتش تدور ابدااااا والظابط بيقول اطلعوا والعربيه مش بتدور يلا يا ابنى انت وهو اطلعوا .. وهى حالفه ما تدور ... الظابط شك فينا .. فقال للى كان سايق هات ورينى الرخصة وقعدنا ندور على الرخصة بتاع ربع ساعة لحد ما الظابط تأكد ان احنا الهربانين .. وفى الاخر الرخصة طلعت فى جيب الفرش بتاع الكرسي من ورا كان واحد مسطول بيشوفها وحطها ونسيها .. هههههههههههههههههههه ووقفنا الشارع كله يوميها ....
الموقف التانى بقي ده ساظل اضحك عليه طوال حياتى ....
ماشيين فى شارع هنا جمبنا والشارع ده ضيق شوية والطريق اللى جاى زحمه جدا وفى قدامنا عربي نص نقل واقفه رحنا واقفين وراها بتاع 10 دقايق والشارع مش عايز يمشي ابدا الناحية التانيه هى اللى بتمشى بس وفى حوالى 15 عربية ورانا وكلهم كلاكسات بيب بيب بيب واحنا عمالين كلاكسات للى قدامنا علشان مش بيتحرك ...اخر ما زهقت رحت نازل له انا وصاحبي خبطنا على العربية الاول ومش راضي يمشي برده .. رحنا طالعين نشتم فيه واحنا بنشتم فيه بنبص لاقينا ان مفيش حد فى العربية والعربية راكنه اصلا مش ماشية !!! وال 15 عربية قعدوا يشتموا فينا احنا .. فاكرينا بنهرج ..
الشارع كله قعد يضحك بتاع اسبوع على الموقف ده والموقف ده الناس كلها لسه فاكراه ومش ممكن انساه من كمية الضحك ..
المفضلات