الموضوع: استلام رينو داستر - تقرير محايد

نسيت اقول حاجتين مهمين:
اول حاجة شكر واجب ل 3 اشخاص غاليين على قلبى و كان ليهم دور كبير فى اقناعى بالعربية و لم يوفروا اى مجهود لتعميم معلومات مهمة و مفيدة عن العربية و الموضوع ببساطة معاهم كان لية تدفع اكتر لما ممكن تدفع اقل و تاخد عربية حلوة و امكانياتها هى هى و يمكن اقوى من عربيات اغلى منها ب 30 و 35 الف جنية و الغاليين دول هم:
1- stonecold
2- bebo2000
3- Gogo
التلاتة دول ربنا يكرمهم و عاوز اشكرهم جدا.
الحاجة التانية نسيت اذكر فى المميزات ان اهم ميزة طبعا ان العربية 4x4 و بتقنية و تعليق و عفشة نيسان X-Trail و دى عفشة و تعليق مشهود لها بالكفاءة.

المشاركة الأصلية كتبت بواسطة bebo2000

لا شكر على واجب يا بيرو باشا والف مبروك وربنا يباركلك فيها
المهم ان يكون ادائها في السفر كويس علشان مشوار الغردقة وياريت تقولنا على تجربتك بيها في المشوار ده علشان طريق الغردقة مليان منحنيات ده غير الاعاصير اللى في الزعفرانة :c_laugh[1]::c_laugh[1]: باختصار هو طريق مختلف شويتين عن اغلب طرق مصر فياريت تشاركنا تجربتك علشان كلنا نستفيد

بص يا بيبو باشا - انا حياتى عموما كلها عبارة عن طريق سفر و علشان كدة الحاجة الوحيدة اللى ذاكرتها قبل ما اشتريها كانت العربية لانها شايلة اربع ارواح و لو كانت عربية ورق او خفيفة او مش متزنة تبقى مصيبة و علشان كدة بصراحة مفكرتش اصلا فى اغلب العربيات المنتشرة فى مصر و قطع غيارها متوفرة فعلا بس ربنا يسترها معانا حوادثها وحشة اوى و شوفت مناظر صعبة على الطريق و بلاش اذكرها
الحق يقال ان اللانسر عربية محترمة و كمثال انى مرة وانا راجع من الغردقة كنت بلعب فى الكاسيت و العربية حدفت منى يمين على الرملة - على ما مراتى قالتلى خد بالك كان الكاوتش الامامى اليمين خبط فى صخرة مدببة و للاسف قطعتة زى رقم 7 و فرغت الهواء كلة مرة واحدة و كنت ماشى 120 فى طريق مستقيم - راحت العربية واخدة خمس خمسات فى الطريق بالورب و انا ماليش اى سيطرة عليها و كل اللى فى بالى ان يارب العربية تتقلب ولا تغور فى داهية بس اطلع انا و العيال منها بخير.
الحمد للة و الغريب جدا ان العربية على سرعة كدة و خمس خمسات و اللة و مقلبتش لغاية ما راحت للجزيرة اللى فى النصف اللى بين الطريق اللى رايح و اللى جاى ووقفت.
طبعا من هنا بتيجى اهمية انك تبقى راكب عربية اتزانها محترم لانى اقسم باللة مرة عربية (من اياهم) قلبت منى انا و اصحابى قبل ما نطلع كوبرى الفنجرى و احنا على سرعة 40 - 50 لمجرد انها حدفت منة شمال فخبطت فى الرصيف الرفيع اللى فى النصف و قلبت فى الاتجاة المعاكس وربنا برضو ستر و العربيات اللى نازلة من الكوبرى اتفادتنا و طلعنا بخير.
المقدمة اللى فاتت دى علشان اقولك اهم حاجة عندى اية و على فكرة قبل ما اشترى الداستر سألتكم كتير و كمان دخلت على مواقع اجنبى علشان اعرف رأى الاروبيين فيها كمان و الحمد للة كان الكلام مريح لابعد الحدود.
نيجى بقى لموضوع السفر - العربية مش هقدر احكم عليها اوى فى موضوع الاتزان لانى مزودتش عن 135 و انت عارف كل ما تزود السرعة كل ما تحكم على اتزان العربية لكن اى عربية هتمشى كويس على سرعة 135
العربية الحمد للة يفرق معايا انها اوسع شوية و بالتالى الاولاد بدل ما كانوا بيناموا كل واحد على شباك - لأ الاتنين ناموا بالطول على الكنبة جنب بعض لانهم قالولى ان الكنبة اعرض شوية من اللانسر (هما صغيرين 10 و 7 سنين)
الحاجة التانية كانت استهلاك البنزين و بصراحة كان كويس 8.2 لتر/100 كيلو على سرعة 120 و دة استهلاك قريب اوى للانسر و السيدان عموما.
الشنطة الواسعة مهمة و كويسة للسفر.
الدريكسيون اتقل من اللانسر و حسيت ان البور فاصل تماما على السرعة العالية رغم انة فى اللانسر كان دايما زى المية على اى سرعة و كنت دايما بفضل مكلبش فية علشان الهواء المعاكس كان دايما بيأثر على اتجاة العربية و دة محستهوش اوى فى الداستر - بالعكس حسيت ان العربية مكلبشة فى الارض و دة مؤشر جميل على ثباتها.
الملفات بتاعة العين السخنة كنت حريص فيها جدا لانى لسة مش واخد على العربية بس كانت محترمة و باين انها محترمة حتى على السرعة المتوسطة.
الهواء ما فرقش معايا خالص لا فى الزعفرانة ولا راس غارب و يمكن يوميها ماكنش فى هواء جامد.
كمبيوتر الرحلات من الحاجات المفيدة جدا فى السفرو عجبنى جدا لان اول مرة اسافر بعربية بالمعلومات دى.
التكييف كان كويس اوى و عجب الاولاد اوى ان فيها تكييف بيخرج لهم من تحت الكراسى الامامية للراكبين بالخلف - طبعا الاول كانوا بيتخانقوا على الحتة اللى فى النصف علشان ياخدوا رشة تكييف - دلوقتى قاعدين مدلعين و التكييف واصل لحد عندهم و خاصة اننا بنسافر فى عز الظهر.
و انا راجع ان شاء اللة هزود شوية فى السرعة و اقدر احكم لك اكتر عليها من كل النواحى.
سلام مؤقت يا صديقى

المشاركة الأصلية كتبت بواسطة land_cruiser

الف مبروك يا فندم و ربنا يديلك خيرها و يكفيك شرها. هو بالنسبه لحكايه الاشاره دى حضرتك اتاكد مع مالك تانى للعربيه منها علشان دى مش منطقيه علشان اللى انا فهمته انها كده بتعمل زى الانتظار و اعتقد انها ممكن تتظبط و تانى حاجه عايز اسأل حضرتك عليها ايه اخبار الكلاكس معاك و مكانه؟

ألف شكر يا باشا - ربنا يبارك فى حضرتك.
بالنسبة للاشارة انا بقصد ان مثلا لما حضرتك ترفع دراع الاشارة لفوق علشان تدخل يمين - المفروض السهم اليمين اللى فى التابلوة ينور - بدل كدة بتلاقى الاتنين بينوروا - لكن برة العربية الفوانيس اليمين هى اللى بتنور بس - يعنى دى حاجة مش بيلاحظها غير السواق لكن العربية شغالة اشارات عادى جدا من برة و هى نازلة كدة و تصميمها كدة و بصراحة المفروض انها كانت تبقى زى الطبيعى و توريك فى التابلوة انت مدى اية - يعنى لو دراعك خبط الاشارة غلط - مش هتبقى عارف من التابلوة انت مدى اشارة يمين ولا شمال و لا انتظار - دى كل القصة بس من برة محدش حاسس بحاجة و الحياة جميلة.
موضوع الكلكس بالنسبة لى زى موضوع زراير الزجاج - الاوبشن موجود بس مكانة مختلف فلازم طبعا تتلخبط فى الاول و تحط ايدك على الباب ترفع الزجاج و تفتكر ان المكان اتغير و لا تضرب كلكس من الدركسيون تلاقية مش بيضرب فتضحك على نفسك و ترجع للدراع - بس بصراحة الموضوع موضوع تعود بس مش اكتر.

المشاركة الأصلية كتبت بواسطة ahmed1006

الف مبروك

اللة يبارك فيك يا باشا