الموضوع: استلام رينو داستر - تقرير محايد

المشاركة الأصلية كتبت بواسطة gogo2012

الف مبروك على الداســـتر
معلش جت متأخر شويه
بالنسبه لصوت الحزام ممكن تركب الحزام على الكرسى فى وضع دائم وبكده تكون اتخلصت من الزن فى المسافات القصيره
حاجه تانيه من وسائل الامان الى اكتشفتها . لو انت مشغل السياره بالمفتاح بدون ريموت وانت بره السياره او جواها حاول تقفل او تفتح بمفتاح الريموت هتلاقيه موش شغال ......
ومتنســـــاش الحزام امان

ربنا يخليك يا جوجو باشا و دايما كدة تدخلاتك ايجابية جدا - طول ما انا مسافر طبعا لابس الحزام - بي فى مكان داخلى (جوة فندق مثلا) و لمسافة قصيرة و طريق داخلى بصراحة الحزام ملوش لازمة و صوتة عالى لدرجة مستفزة - بس فكرتك خلصت الموضوع كدة نهائيا.
الاكتشاف التانى برضو جديد و العربية بأمانة جميلة فى وسائل الامان و شكرا جزيلا ليك يا مستر جوجو على مداخلاتك و افاداتك المتكررة

المشاركة الأصلية كتبت بواسطة sa6ry

ربنا يبارك ليك ويرزقك خيرها ويبعد عنك شرها

بعد اذنك عشان بفكر اشتري داستر, بس ساعات لما شوفت تقفيلها خوفت

انا كنت عاوز اعرف

عزل العربية كويس؟
الباب بيقفل كويس ولا لازم ترزعه .

التقفيل في المجمل اخباره ايه معاك؟ وعلي السرعات العالية في تسريب هواء .الخ؟

متشكر يا باشا - اللة يبارك فى حضرتك.
عزل العربية كويس جدا لانك لو مقفل الزجاج مش بتسمع حاجة من برة و الابواب عليها طبقتين كاوتش واحدة دايرة على الباب من برة و التانية لافة علية من جوة و لذلك مقارنة مثلا باللانسر البومة 2008 اللى معايا - بأمانة عزل الداستر احسن.
الباب لازم تزقة شوية مش ترزعة يعنى تزود الزقة الخفيفة بتاعة باب اللانسر لانة بيقفل براحة لكن الداستر لازم تزود الزقة شوية و يمكن دة بسبب الطبقتين كاوتش اللى على الباب.
التقفيل فى المجمل تمام و مافيش اى تسريب هواء داخل للعربية على اى سرعة عالية.
تقبل تحياتى و اى خدمة انا تحت امرك.

الف مبروك .. ربنا يبارك لك فيها و يحفظهالك.

تقرير ممتاز.

المشاركة الأصلية كتبت بواسطة jackson_75

ألف مبروك يا باشا علىى العربية وربنا يديك خيرها ويكفيك شرها , أنا على فكرة شغال فى السياحة وعايش فى جنوب سيناء وكنت بفكر أجيب واحدة زيها وأرخصها سياحة وعلى فكرة لما قرأت تعليق حضرتك على العربية وتعليقك على خناقة الأولأد بالجلوس فى الحتة اللى فى النص ضحكت جداً لأن أولأدى من نفس المرحلة العمرية اللى بيها أولأدك ولأنى برده كان معايا لأنسر قبل كده وكمان شغال فى السياحة وبسافر كتير .. شفت بقى الصدف (((-:
عامتاً أنا عاوز أسال حضرتك سؤال مهم ( هو المارش فى العربية نظام سوستة للأمام ولأ نظام مارش للخلف زى التويوتا ومعظم العربيات )
كمان عاوز أعرف هل حضرتك جربت تدوس بيها فى الرمال وتجرب الدفع الرباعى عامل أيه؟!
مبروك مرة أخرى وفى أنتظار الرد وربنا يحوش عنك العين ويسترها معاك ومع أولأدك ,, تقبل تحياتى

يا باشا اللة يبارك فيك و يكرمك و يوفقك فى مشاكل السياحة اللى بنشوفها عندنا من ساعة الثورة المجيدة!!
صدفة جميلة طبعا و فعلا اوجة التشابة كتيرة حتى فى خناقة الاولاد.
مارش العربية بتاعتى سوستة لفوق و شمال و دة لانها 4x4 و 6 نقلات عادية .
بصراحة مجربتهاش خالص فى الصحراء و لا رمال كتيرة - جربتها بس مع خاصية ال4x4 على رملة سطحية فى ارض غير ممهدة فقط - كانت كويسة بس دة مش اختبار ليها لان اى عربية سيدان كانت تقدر تمشى عليها - و بعدين بصراحة انا مش جايب ال 4x4 علشان ادخل بيها الصحراء - انا جايبها علشان التصفح الحديدى اسفل العربية و العفشة المختلفة بتاعة نيسان x-trail اللى موجودة فى ال 4x4 بس مش السحب الامامى.