الموضوع: درج ذكرياتي

المشاركة الأصلية كتبت بواسطة aif

اولا ده مش درج .... ده شانون 4 ادراج من الجحم الكبير :)
ثانيا ... هو انا كل ما اغيب يوم والا يومين عن المنتدى آجي الاقيكي عاملة موضوع عامل قلبان في المنتدى ؟؟؟؟
لأ وعاملة تمويه خداعي حربي لأغراض تكتيكية .... عاملة موضوع السريون عشان تغطي بيه علي الموضوع الأصلي التقيل .... ماشي يا علا ..خليكي انتي في خططك الحربية ...........

بس بجد موضوع شيق جدا ... انا متأكد انك خليتي كل الزملاء فتحو ادرجهم و رجعو سنين للماضي
انا لما باعمل الحركة دي ..... غالبا بتنتهي نهاية درامية .... باوصل دايما لجوابات وصور أمي الله يرحمها ..... ومش باقدر امسك دموعي ... مع انها توفيت من 14 سنة
الله يرحم امواتنا جميعا
بغض النظر عن الذكرايات المحزنة .... دايما الواحد لما يفتكر الماضي ... بيفتكر الجانب الجميل منه ...
سيري يا نورماندي ( لا مؤاخذة يا علي )

كنت هاقول لك ياللا انت كمان افتح درجك و ورينا فيه ايه.. انما طالما الموضوع ممكن ينتهي نهاية درامية يبقى بلاش.

معلش النهاردة أخدة أجازة من جرد محتويات الدرج بس التوقف ده مش هايطول بإذن الله :)

تابعونا :)

بجد اسلوب رائع و شيق لسرد الأحداث
بصراحة أنا حاسس انى بقرأ كتاب لكاتب رواىء بروفشينال
ده طبعا بخلاف ان الموضوع بجد جديد جدا و وبيحصلنا كلنا و مبناخدش بالنا
ربنا يكرمك

المشاركة الأصلية كتبت بواسطة Hassan Khalil

الكمبيوتر ضرب.. وبقالي يووووووووم كااامل مش متابع اخبار الدرج
بس واضح انه درج فاميلي سايز ... :)
في انتظار باقي الدرج ...
--------
علي فكرة ..واضح ان الاعضاء متفاعلين اوي مع الدرج .. و بصراحة بيبقوا مستنيين كل حلقة من الدرج بفارغ الصبر
في انتظار الحلقة القادمة من الدرج

هو مش درج فاميلي سايز و لا حاجة.. بس تخيل درج كله قصاصات ورق صغيرة مطوية.. أكيد هاياخد له أقله 3 أيام جرد :)

المهم الصبر.. الموضوع ده بيعلم الصبر

المشاركة الأصلية كتبت بواسطة amr mokhtar

بصراحة موضوع جميل اوى
و الحتة الأخيرة اللى انتى قولتيها دلوقتى بتفكرنى بنفسى فى الفترة دى كنت ماشى فى طريق التدين و كنت بسمعه كتيير اوى و فعلآ الراجل ده علمنى حاجات لسه بعمل بيها لحد دلوقتى رغم البعد اللى انا بعدته الفترة اللى فاتت

بس بجد المفروض نعمل مسلسل إسمه (الدرج) و يبقى سيسونز ... إحنا مش أقل منهم

عمرو خالد من الناس اللي سهموا في تغيير مسار حياتي للأفضل و الحمد لله، ممكن دلوقتي أتفق معاه في بعض الأشياء و اختلف معاه في البعض الآخر، انما المهم هو انه حط الأساس و ليفعل الانسان بنفسه بعد ذلك ما يشاء.

فكرة حلوة حتة مسلسل الدرج دي.. اشمعنى فريندز يعني

المشاركة الأصلية كتبت بواسطة Mohamed_SlvrLan99

Overqualified :)....

و الله يا محمد مش بالضرورة.. ممكن أكون under qualified أو ممكن السمت بتاعي ما يتناسبش مع فودافون.. أصل كل شركة بتحط الستاندرد بتاعها فيما يخص التعيينات الجديدة و الموضوع على فكرة فيه جزء كبير من ال liking و ال disliking، خصوصا كمان اني رايحة على وظيفة recruitment و اللي عملت لي الانترفيو مش بتعمل انترفيو لواحدة هاتشتغل في الشركة و خلاص، لأ دي بتعمل انترفيو لواحدة هاتبقى زميلة ليها في نفس القسم، يعني لازم تعجب بيها قبل كل شئ.

المشاركة الأصلية كتبت بواسطة islambana

تسلم ايديكي يا استاذه علا
ونرفع القبعه لمواضيعك المتميز وأحييكي علي اسلوبك الفريد

سلمت من كل سوء يا إسلام و جزاك الله خيرا على الإطراء :)

المشاركة الأصلية كتبت بواسطة dental__h

بجد اسلوب رائع و شيق لسرد الأحداث
بصراحة أنا حاسس انى بقرأ كتاب لكاتب رواىء بروفشينال
ده طبعا بخلاف ان الموضوع بجد جديد جدا و وبيحصلنا كلنا و مبناخدش بالنا
ربنا يكرمك

انا عن نفسي اللي عاجبني في الموضوع هو انه وليد اللحظة و الحمد لله لاقى استحسان الناس على الرغم من انه يعتبر موضوع شخصي، يعني المفروض انه مايهمش ناس كتير في حاجة.

نورت الموضوع يا فندم :)

المشاركة الأصلية كتبت بواسطة etrawy

موضوع متميز ورائع أ/علا
اسلوبك جميل وشيق فعلا بستمتع بقراءة مواضيعك
وللأسف معنديش درج ذكريات
لاننا انتقلنا الى شقة تانية
بس اما بروح الشقة القديمة بفتكر ايام زمان
تحياتى

تحفة جدددددددددددددا الصور دي اللي عاملة اسم نايل موتورز :)
ما تحطها في توقيعك احسن عشان تبقى باينة في كل مشاركاتك :)

جزاك الله خيرا على مشاركتك :)

على فكرة احنا برضه عزلنا من بيتنا القديم من حوالي 4 سنين و اللي في الدرج ده اتشال بحاله من هناك لهنا.. يعني الورق المطوي ده ما اتفتحش تقريبا من ساعة ما اتحط و دي أول مرة افتحه هنا معاكم على الهواء مباشرة :)

ورقة كرتون مطوية زي message in a bottle بالظبط.. قبل ما افتحها خمنت انها تكون شهادة تقدير أو حاجة مرتبطة بالدراسة.. و فعلا فتحتها لقيتها عبارة عن الOath او القسم اللي كلنا خدناه في حفلة تخرج دفعة 1997، كلية الآداب قسم اللغة الانجليزية جامعة عين شمس. الحفلة دي اتعملت في مركز المؤتمرات بمدينة النصر، قاعة خفرغ :)

ده نص القسم.. مع انه مش قسم و لا حاجة.. دي حاجة كده زي كلمات تحفيذية أو motivational quotes

Did is a word of achievement
Won't is a word of retreat
Might is a word of bereavement
Can't is a word of defeat
Ought is a word of duty
Try is a word of each hour
Will is a word of beauty
Can is a word of power
Do the best you know
The very best you can
Keep on doing it to the end

طبعا الكلام ده محطوط في إطار زي ما يكون شهادة تقدير بكل الزخارف المحوطة الكلام و مختوم بختم جامعة عين شمس و مكتوب عليه أسم المتخرج و كان ملفوف بشريطة حمرا كان شكلها حلو، بس مش عارفة راحت فين دلوقتي.

لسه انا كمان محتفظة بالكاب أو البرنيطة دي أم دلاديل نازلة منها مش عارفة اسمها ايه، ولسه محتفظة بالصور و منزلاها ع الفيس بوك كمان :)