الموضوع: درج ذكرياتي

معلش يا جماعة.. كنت رحت مشوار و لسه راجعة.. أرد بس ع الناس و افتح الدرج و نكمل جرد محتوياته مع بعض :)

المشاركة الأصلية كتبت بواسطة Hassan Khalil

ادي اخرة قراءة مواضيعك .. نقعد نقرا .. و بعدين يتقالنا .. مالكوا انتوا بدرج مكتبي فيه ايه ...
عقابا ليكي .. حتفتحي كل ادراج بيتكوا .. و احنا وياكي لغاية لما نوصل لدرج المطبخ ...

لاااااااااا ده إلا درج المطبخ.. ماليش علاقة بيه خااااااالص
انا كنت أقصد يعني مالكوا بدرج مكتبي يعني انا ليه شاغلاكوا بمحتويات درج مكتبي :)

المشاركة الأصلية كتبت بواسطة alijandroo

سيري يا نورماندي
يعني استمري
مستمتعين على الاخر :)

متعك الله بالصحة و العافية يا علي و أهلك آمين يا رب العالمين
:)

المشاركة الأصلية كتبت بواسطة Islam_galal

إلا درج المطبخ أنا أقترح يتبعت زي ماهو في مقابلة شهر 7

أننننننننننسى يا عمرو :)

المشاركة الأصلية كتبت بواسطة Nile_Storm

بعض النظر عن سرد مواضيعك الرائع
بس بجد احييكي علي افكارك
افكار جميله جدا

جزاك الله خيرا على الإطراء :)

المشاركة الأصلية كتبت بواسطة bee

موضوع جميل يا علا
عارفه انا لما قريت العنوان عجبني بجد
على فكره انا شايف ان الدرج بتاعك ده مفيهوش الحاجات الي انتي كاتباها بس
بالعكس أبسلوتلي هههههههههه :)
ده جواه حاجات ليها قيمة اكبر بكتير .. وهي المشاعر والذكريات الدفينة
يعني اي جواب من الي بتقولي عليهم دول .. بيفكرك بعمر بحاله وبأيام حلوة وتلاقيكي بتقولي يياااااااااااااااه كانت ايام جميلة ..
حتى الـ 250 جنيه ..
هتقولي كانت احلى واغلى مكافأة في حياتي ..
وشوية تسترسلي وتفتكري وتقولي انتي عملتي بيهم ايه يا علا .؟. ايه ده مش فاكره ؟؟
لا فاكره
وهلم جرا
الي اقصده انه بيرررررررررر ملوش قرار ..
ذكرياته المعنوية افخر واغلى من المادية ..
واسمحيلي اهديكي حاجه للموضوع ده



بحييكي على موضوعك

لا تحرمينا مواضيعك

تحياتي

تحليل صح للموضوع.. و صح جدا كمان :)
جزاك الله خيرا على الاهتمام بالموضوع و على الفهم العميق :)

المشاركة الأصلية كتبت بواسطة theking2690

بجد فكرة الموضوع حلوه جدا فعلا الذكريات شىء مهم معرفش انا بحب الحاجات اللى زى ديه جدا يعنى مثلا بفرح اوى لما الاقى كشكول ليا من ايام ابتدائى الشهادات بتاعتى و ساعات و الله بتوصل انى بلاقى امتحانات كمان


منتظرين بقيت الادراج وبعدين مطمنتاش طلعتى الرخصه و لا لسه

يعني انت زيي يا مصطفى.. طيب كويس اني مش لوحدي اللي كده احسن انا بدأت أشك في قواي العقلية

الرخصة؟ احتمال على يوم السبت ان شاء الله.

دعواتك :)

المشاركة الأصلية كتبت بواسطة MoToRiZeR

دحنا جيلنا ده هيشوف ايام سودة

فعلا. أقصد يعني ان آه الحياة زمان كانت أسهل من دلوقتي بكتيييييييير

المشاركة الأصلية كتبت بواسطة tmz9111

موضوع رائع

شكرا جزيلا على المتابعة :)

بسم الله الرحمن الرحيم نفتتح الدرج :)

روشتة بتاريخ 11/11/2003.. هو كان رمضان أيامها بييجي في شهر 11؟ أصلي فاكرة اوي اني لما رحت للدكتور ده كنا في رمضان.. كان عندي مشاكل في معدتي و طلع بعد كده ان القولون تعبان.. و لا يزال، بس الحمد لله مش عصبي و إلا كان زمانه اتدمر :)

هاحتفظ بالروشتة دي يمكن يجد في الأمر جديد :)
-------------------------------------------------------

ورقة متطبقة مرتين و في قاع الدرج.. بافتحها و انا مش عارفة خالص دي بتاعة ايه.. لقيتها عبارة عن ايميل بتاريخ 15/1/2005.. بابص على الإيميل المبعوت ليه لقيته الميل القديم بتاع الياهو بتاعني.. الأكاونت ده عملته سنة 1999 و توقفت عن استخدامه من فترة عشان السبام كتر فيه اوي و كمان لقط فايرس.

كل ده و لسه ما عرفتوش الميل ده فيه ايه.. هو سطر واحد بيقول Your HDP registration ID is 100028
انا قريت السطر ده و قلت ياااااااااااه.. ازاي انا لسه محتفظة بالميل ده لحد دلوقتي؟ بس بإذن الله مش هارميه.. أهو ده بأه مش هارميه يا شيكوا :)

ده باختصار هو الكونفيرميشن ميل بتسجيلي مع فريق Human Development Program المعروفين حاليا بإسم زدني :)
و لو تلاحظوا الرقم هتلاقوا الآي دي بتاعي رقم 28، يعني من أوائل الناس اللي سجلوا.. دلوقتي الأرقام عدت ال 50 الف ما شاء الله.
مش باقول لكم ما أقدرش أرميه :)

ورقة برضه مطوية.. بس شكلها قديم شوية.. الثنيات بتاعة التطبيقة بتاعتها بتقول كده.. الورقة فيها ما يلي:
جمعية إنقاذ الطفولة - جدول دروس اللغة الإنجليزية.
التاريخ: 18/8/2003
الجدول فيه اسم المدرس / المدرسة و ميعاد الحصة و أسماء الطلبة و سنتهم الدراسية.

ايه الحكاية بأه؟ الحكاية هو اني وقتها جالي ايميل بيعلن عن حاجة جمعية أصدقاء الطفولة لمدرسين في جميع المواد.. الجمعية هي عبارة عن دار أيتام و الولاد طبعا عشان مفيش بيت و لا اهتمام أسري فضايعين في الدراسة خالص و محتاجين تقوية في كل المواد، انا ساعتها الصراحة أما صدقت و قدمت عشان كنت محتاجة حاجة تشغلني وقتها و تكون تطوعية.. كنت وصلت لحالة من الرعب من إني يرسى بية الحال على اني باروح و باجي من الشغل و ربنا مش بيستخدمني في إفادة الناس بحاجة.. فده ساعتها كان طوق النجاة بالنسبة لي.

الحمد لله الفترة عدت على خير و اتحسنوا شوية في الانجليزي.. بس ما استمرتش معاهم عشان بعد المكان.. جسر السويس ده مكان تروح له ما تعرفش ترجع منه.. فعلا هو ده اللي كان حاصل و كنا في عز الصيف فاتشويت الفترة دي بصراحة.. بس الحمد لله ربنا عوضني بعدها بسنة بزدني و غيرها و.. و لقيت نفسي من تاني :)

خليها الورقة مش هارميها.. يمكن بعد كام سنة اشوفها و افتكر انا بديت العمل التطوعي ازاي و ربنا فتحها علية بعد كده ازاي :)

الورقة دي بافتحها لقيتها بخط إيدي.. بدأت اقرا فيها قلبت علية مواجع الدنيا.. فعلا الدرج ده عامل زي صندوق الدنيا.. فيه العجب.

الورقة عبارة عن جواب كان بيمليهوني بابا الله يرحمه من 3 سنين عشان يبعته لرئيس الشركة اللي كان بيشتغل فيها من 40 سنة.. أيوه.. بابا الله يرحمه كان فقد تركيزه في أيامه الأخيرة و كان بيصر على حاجات هو شايفها صح جدا و مقتنع بيها و احنا كنا بنسمع كلامه عشان ما يزعلش.. قعدت جنبه كتبت له الجواب كله و مضاه.. يااااااااااه.. وحشتني إمضته اوي.. هي دي الإمضة اللي كانت بتبقى في شهادتي كل شهر و انا في المدرسة.

الورقة دي رجعتني لأيام مش باحب افتكرها و فكرت كتير أرميها عشان ما اشوفهاش تاني و اتنكد.. و فكرت.. أرميها و لا أخليها.. بس لما بصيت على الإمضة ما قدرتش أفكر تاني ارميها.. دي إمضة بابا بخط إيده يبقى ازاي افكر ارميها؟