الموضوع: درج ذكرياتي

المشاركة الأصلية كتبت بواسطة OlaOsman

الورقة دي بافتحها لقيتها بخط إيدي.. بدأت اقرا فيها قلبت علية مواجع الدنيا.. فعلا الدرج ده عامل زي صندوق الدنيا.. فيه العجب.

الورقة عبارة عن جواب كان بيمليهوني بابا الله يرحمه من 3 سنين عشان يبعته لرئيس الشركة اللي كان بيشتغل فيها من 40 سنة.. أيوه.. بابا الله يرحمه كان فقد تركيزه في أيامه الأخيرة و كان بيصر على حاجات هو شايفها صح جدا و مقتنع بيها و احنا كنا بنسمع كلامه عشان ما يزعلش.. قعدت جنبه كتبت له الجواب كله و مضاه.. يااااااااااه.. وحشتني إمضته اوي.. هي دي الإمضة اللي كانت بتبقى في شهادتي كل شهر و انا في المدرسة.

الورقة دي رجعتني لأيام مش باحب افتكرها و فكرت كتير أرميها عشان ما اشوفهاش تاني و اتنكد.. و فكرت.. أرميها و لا أخليها.. بس لما بصيت على الإمضة ما قدرتش أفكر تاني ارميها.. دي إمضة بابا بخط إيده يبقى ازاي افكر ارميها؟

لا طبعا مترميهاش ولا تفكرى حتى

كفاية بس لما تتأملى فى الخط و ان دي حاجة من ريحته .. أد ايه هتبقي غالية . انا كمان عندي نوتة تيليبفونات بخطه و حالتها اصلا يرثي لها و معظم النمر اللى فيها اتغيرت بس استحالة افكر ارميها

انا للاسف الميدالية الفضة بتاعة بابايا الله يرحمه وقعت من سلسلة المفاتيح و بجد قلبت الدنيا.. لا تتخيللي العياط و النكد اللى انا متنكداه لحد دلوقتى عليها

انا ام محمد
متابعة جيدة لكل مواضيعك الرائعة
وبقولك انتى انسانة رائعة

انا حامل الهم لما ادراج المكتب تخلص

آخر ورقه دى المفروض تشيليها فى مكان أمامك دايما عارفه ليه
عشان كل ما تشوفيها تفتكرى أن فى شخص عزيز عليكى محتاج للدعاء له والترحم عليه
أكيد الموضوع ده متعب بس فعلا مفيد علشان منطبلش دعاء لهم
رحم الله والدك ووالدى وكل موتى المسلمين والمسلمات
اللهم أغفر لهم
آمين

آه بمناسبة الدرج السحرى ده
آلآيش عندك ياأختى أهرام يوم 15/7/1996
وبالتحديد صفحة التلفزيون