الموضوع: درج ذكرياتي

المشاركة الأصلية كتبت بواسطة mo7amed_omara

موضوع رائع يا استاذة علا
ودايما كدة فى تقدم فى مواضعيك و فعلا اسلوبك حلوو قوووووووووووووى و انا حتابع درج المكتب دة يوميا لغاية ما يخلص :)

شكله قرب يخلص يا محمد.. بعد المغرب ان شاء الله نكمل دعبسة و نشوف ايه اللي لسه باقي :)

شكرا جزيلا على المتابعة و التشجيع

الكمبيوتر ضرب.. وبقالي يووووووووم كااامل مش متابع اخبار الدرج
بس واضح انه درج فاميلي سايز ... :)
في انتظار باقي الدرج ...
--------
علي فكرة ..واضح ان الاعضاء متفاعلين اوي مع الدرج .. و بصراحة بيبقوا مستنيين كل حلقة من الدرج بفارغ الصبر
في انتظار الحلقة القادمة من الدرج

رجعنا تاني للأظرف :)

ظرف عليه إسمي بالعنجليزي و عنواني.. أفتحه ألاقيه من فودافون بتاريخ 28 مارس 2007.. يعني قريب خالص، ساعتها كنت عملت انترفيو هناك عشان وظيفة في ال HR بس ما اختارونيش.. الجواب ده بأه عشان يقولوا لي اني ما اختارونيش.. و على فكرة انا عملت الانترفيو شهر يناير :)

Dear Ola,

Thank you for the interest you have expressed in employment opportunities with Vodafone Egypt Telecommunication S.A.E & the time you spent with us discussing the position that you applied for.

After careful reviewing your qualifications, they do not seem to closely match our current requirements.

Although we cannot offer further encouragement at this time, you expressed interest in Vodafone Egypt Telecommunication S.A.E is appreciated.

Should any position become available within the company for which you might qualify, we will contact you. Good luck in your future career.

Best regards.

Senior HR Manager, Talent Management.

و ما تسألونيييييييييش انا كتبت لكم الجواب كله هنا ليه :)
عموما خليه.. يمكن في يوم من الأيام أفكر أرفع عليهم قضية تعويض عن شحططي لحد القرية الذكية و ال50 جنيه اللي دفعتهم في السيتي كاب و يوم الأجازة اللي أخدته عشان اروح الانترفيو
-------------------------------------------------------
كارت عليه صورة عربية و مكتوب عليه: الحاج فلان الفلاني.. بيع - شراء - تأجير سيارات و رقم المحمول بتاعه.
ماعنديش أي فكرة أو حتى أمارة الكارت ده في درجي بيعمل ايه و لا أصله ايه.. انا أصلا لم أحتك بعالم السيارات إلا من كام شهر بس.. يبقى الحاج ده طلع لي منيييييييين في الدرج؟
برضه خليه يمكن ينفع في أي حاجة في يوم من الأيام :)

مفاجأة!!
سيارة 50 راكب مكيفة و مجهزة من الخلفاوي إلى مسجد الحصري 6 أكتوبر لحضور محاضرات قصص الأنبياء للأستاذ عمرو خالد
كل خميس كما سنقوم بعرض شرائط فيديو للأستاذ عمرو خالد. قيمة التذكرة 4 جنيه ذهابا و إيابا.
كما توجد سيارتين للإخوات فقط.
الحجز من اليوم.
مع تحيات وائل احمد
العنوان: شارع عبد الحميد الديب، الخلفاوي - شبرا.

الورقة دي لقيتها في الدرج متطبقة تطبيقتين، مع انها صغيرة اوي و مش طالبة معاها التطبقيتين دول. يرجع تاريخ الورقة دي لسنة 2001 لما كان عمرو خالد بيدي دروس في مسجد الحصري في 6 أكتوبر و لو حكيت للصبح عن الأيام دي مش هاخلص.. أيام صعب انها تتكرر تاني.. بس ربنا قادر على كل شئ. انا بس هاقول لكوا على موقف حصل معايا أول مرة أحضر هناك.. ساعتها أقنعت ماما اننا نروح بالعافية، كانت بتقول لي طيب و هانرجع ازاي بس يا بنتي؟ قلت لها ربنا هايدبرها ان شاء الله، و فعلا رحنا ركبنا ميكروباص من ميدان لبنان و نزلنا عند الجامع.. طبعا أيامها كانت 6 اكتوبر غير دلوقتي خالص.. حضرنا المحاضرة و كانت قصة سيدنا يوسف عليه السلام، تقريبا آخر جزء في السلسلة و يومها كنت حاسة اني مش على الأرض أصلا من روعة المكان و هدوءه و الخشوع اللي كنت حاسة بيه.. يومها لمست إحاطة الملائكة بينا لمس.

جينا بأه ساعة الرجوع كنا واقفين انا و ماما لوحدنا و مش عارفين احنا فين أصلا.. كانت أول مرة نروح 6 أكتوبر فمش عارفين ايه بيودي على فين.. و وقفنا شوية لحد ما الناس بدأت تقل في المنطقة و كله روح و احنا لسه واقفين مش عارفين نعمل ايه.. ساعتها سبحان الله جالي يقين و حاجة جوايا بتقول لي ربنا هايروحنا.. ربنا هايروحنا.. ربنا هايروحنا.. يقين ساعات بحاول أجيبه دلوقتي و مش باعرف

مافيش دقايق بنبص لقينا ناس قرايبنا من بعيد ما شفناهمش من زمان نقلوا اكتوبر قريب و ازيكوا و عاملين ايه و ايه اللي جابكوا هنا.. ما تيجوا.. اتفضلوا.. لأ الوقت متأخر.. طيب تعالوا نوصلكوا بالعربية.. و فعلا وصلونا لحد البيت.. ياااااااااه.. راح فين الإيمان و اليقين ده دلوقتي؟ حاسة اني بقيت من أقل حاجة باجزع و أقلق و اشيل الهم.. راح فين التوكل التام و التفويض بتاع زمان؟ :(