الموضوع: تحذير ونصيحة- محدش يشترى الصنى الجديدة لعدم توفر قطع الغيار ( تم حل مشكلة العضو )

المشاركة الأصلية كتبت بواسطة grader

السادة الكرام أعضاء المنتدى
السلام عليكم ورحمة الله و بركاتة

أخيرا وبعد حوالى شهر من ساعة الحادثة بتاعة الكلب :) و بعد تجاهل من نيسان حوالى أسبوعين حبيت أقول لكم ماذا حدث فى الموضوع بتاعى

بعد حوالى أسبوعين من الحادث و نتيجة لجهود الأخ الفاضل أحمد مصطفى له جزيل الشكر والعرفان لقيت حد من مصنع نيسان بيكلمنى و بيسألنى عن المشكلة الى أنا فيها و أعتذرلى بشده عن ما حدث معى من عدم توافر لقطع الغيار خلال الأسبوعين الأولين وشرحلى أن عدم توفر قطع الغيار ده نتيجة لمشاكل ادارية من نيسان اليابان وليس لهم دخل بها حسب ما قاله لى.

ثم أكدلى أنهم بصدد حل المشكله و أن هناك اجتماعات تجرى فى الوقت الحالى لحل هذة المشكلة نهائيا مع نيسان اليابان

وعلى أى حال وعدنى بتوفير قطع الغيار الى أنا محتاجها و ارسالها للسبع فى أقرب وقت ممكن

و فعلا وبفضل برضه متابعة أحمد مصطفى الى أول مرة أتشرف بمعرفته وعلى فكرة أنا ماكلمتوش و طلبت منه أى حاجة لكن هو الى اتصل بيا و عرض مساعدته وساعدنى فعلا بكل اخلاص. المهم وصل فعلا للسبع بعض قطع الغيار الناقصة بس أنا ما رضيتش أروح الا لما تتوفر باقى قطع الغيار عشان أتعطل مرة واحده بس

وامبارح المهندس المحترم وائل بيومى من السبع كلمنى و قالى ان الحاجة جت وممكن أروح أركبها وفعلا رحت وركبولى الحاجة الناقصة والحمد لله ربنا ستر و طلعت سربنتينة التكييف ما اتخرمتش والا كانت هتكلفنى لوحدها حوالى 3000 جنيه

والحمد لله العربية دلوقتى اتصلحت من الداخل بنسبة 95% (باقى بس الفبر الى بيبقى قدام وتحت الريداتير بس مش مؤثر على العربية دلوقتى وان شاء الله لما يتوفر هبقى أركبه) وناقص بس أركب الاكصدام الجديد وأرشه وهيبقى عند السبع ان شاء الله

أنا ياجماعة بشكر كل الناس الى ساعدونى لحد ما مشكلتى اتحلت سواء بالاتصال أو حتى بالتعليقات البنائة البعيده عن التعصب والى كانت فعلا هدفها المساعده مش أى حاجة تانيه

و بخص بالشكر الساده الكرام:

أحمد مصطفى: الى فضل متابع موضوعى بكل اهتمام و اخلاص بدون مقابل الا ثواب مساعدة الأخرين والى فضل يكلمنى حتى بعد ما المشكلة ما انتهت عشان بس يتطمن عليا

أحمد عصام the air divel الى بزل مجهود كبير و دورلى على قطع الغيار فى عمان وكان على استعداد انه يشيلهالى مخصوص من عمان و يجيبها بس لوجه الله برضه وبدون أى مقابل

بيشوى : الى راح وسألى على قطع الغيار فى شبين و ادانى نمرة مدير قطع الغيار فى مودرن عشان أسأله

الدكتور علاء : الى برضه دورلى على قطع الغيار و كان بيتعامل مع الموضوع كأنها عربيته مش عربيتى

وكمان الأخ المحترم الى قالى على القنطرة انها موجودة فى أوتو ايجيبت ولولاه كان زمان العربية لسة واقفة لحد دلوقتى وياريت لو نسيت حد مايزعلش منى

و كمان بشكر مركز صيانة السبع الى بالرغم من ان المشكله مش من عندهم ولا مسئولين عنها الا انهم عاملونى كأن هما الغلطانين وكانو فعلا فاهمين يعنى ايه خدمة عملاء محترمة وبخص بالشكر

المهندس وائل بيومى: الراجل ده عمل كل ما فى وسعة عشان مشكلتى وكان بيوليها اهتمام خاص وكان هو الى بيكلمنى من تليفونه وكمان كان بيكلمنى وهو فى أجازة وهو مش مضطر يعمل كده خالص وحتى لما كان مريض فى البيت كان بيكلمنى ويوصى عليا فى التوكيل. فعلا له جزيل الشكر

المهندس محمد عمر: قدم كل ما يمكن عشان أبقى راضى وكان مهذب ومتعاون جدا معايا

المهندس منعم: صبر عليا جدا لأنى الصراحة كنت قلقان ان العريية ماتتصلحش كويس بس هو فضل صابر على الطلبات الغريبة بتاعتى بدون ملل

على فكرة أنا بشكر فى السبع لأن ليا تجارب سيئة مع عربيتى القديمة مع توكيل مش هذكر اسمة عشان كده ملاحظ فرق المعاملة

مش عارف المسانده الى لاقيتها هنا دى موجوده فى كل الأقسام التانية ولا لأ بس الصراحة أنا ما كنتش أتخيل كل هذا الدعم من القائمين على قسم نيسان والأعضاء

مرة أخرى شكرا لكم جميعا و أتمنى أن أرد شىء من مساعدتكم ليا

أستأذنكم انى أطلب من الادارة يحطو التعليق ده فى أول الموضوع عشان الى يدخل يشوف ملخص للقصة كلها بدل ما يقرو 27 صفحة لحد ما يعرفو نتيجة الى حصل . وكمان هستأذنكو أطلب من الادارة ان بعد يومين كده يقفلو التعليق على الموضوع عشان أعتقد كده مفيش كلام تانى يتقال خاصة و أن الموضوع دخل فيه شوية صراعات بعيده عن هدف الموضوع بس بعد يومين عشان كل الى عايز يقول حاجة يقولها

والسلام عليكم ورحمة الله وبركاتة

الحمد لله
معلش يا استاذ انس
انا بس كان حازز فى نفسى شوية ان الناس بتدخل تخبط فى الناس التانيه و خلاص بدل ما ندور على حل و نحن يا اخى لا نتملق احد احنا عايزين مشاكلنا تتحل
مشكلتك يا انس هيا مشكلتنا كلنا
انا واحد من الناس باروح و باجى بالعربية و الى الان عامل 8000 كيلو
و ممكن فى لحظة تقع الفاس فى الراس و اكون فى مكانك
و انا عاذلرك فى كل الىى قلته و فى اى سوء تفاهم حصل لانك راجل فى مشكلة و كرب و العربية لسه بشوكها ما لحقتش تفرح بيها و كمان تكلفة الاصلاح و كمان عدم توافر قطع غيار

و الله يا رجل انى كنت اصبت بحالة من النكد منعتنى من التواجد فى المنتدى و بعد ما كنت اسهر كل ليلة ارد على الاعضاء و انكش فى ده و ادردش مع ده
استمتع بقراءة موضوع او ارتب لعمل موضوع جديد
اصبحت امر مر الكرام كده كل كام يوم ( ماليش نفس ادخل بس الشوق يغلبنى)

بقيت عامل زى واحد عنده مشكلة فى بيته و طفشان منه

و الى زاد و غطى ما يحدث للبلاد و العباد ( انا ساقن فى منطقة بالقرب من منطقة قصر الاتحادية)
لدرجة ان الواحد اصبح عايز يطفش من البلد كلها ( اللهم ارحمنا و ارحم مصر و اهلها )
بلدنا عامله زى شخص كريم و اللى فى جيبه مش ليه و عشان كده اهلها ياما اتبهدلوا و جاعوا و اتغربوا بينما الخير كله هنا... و يوم ما البلد الكريمة ما قررت خيرها يكون ليها و لاهلها ما عرفتش على الاقل الى الان
لكن صبرا جميلا

رجوعا للموضوع الاصلى اهنئك على ان الموضوع اقترب من نهايته و ان القطع بدات تيجى تباعا و فاضل شوية حجات بسيطة و الحكاية تخلص

العربية الان بقالها 5 اشهر من ساعة ما بدات تتسرب الى السوق و بدات الناس تحجزها و اعتقد لسه امامها الى ان يصبح عمرها سنة فى السوق لحاد ما تجد كل شىء متوفر بيسر
و فى زات الوقت هتكون السيارة انهت فترة الاختبار المبداى فى السوق المصرى
يعنى هيكون اتعرف العربية دى تستاهل فلوسها و مريحة ولا لا بتستحمل شوارعنا ولا لا
موفرة فى البنزين ولا لا ( و ما ادراك ما البنزييييييييييين)

انا واحد من الناس لما اخترت العربية كان قالقنى ان العربية لسه جديدة
لكن احساسى ان منتدى نيسان يوم ما اقع فى مشكلة سيساندنى شجعنى بشكل لاااااا يمكن ان تتخيله