الموضوع: أول سنة حياة وظيفية - سيرة ذاتية

المشاركة الأصلية كتبت بواسطة Mohamed-Saoud

كلمينا بقى عن معامله الانجليز اللى بعتبرهم من أكتر الناس ذوقا و احتراما في معاملة الاخرين...
و بالمره وضحي للي متعاملش مع اجانب قبل كده الفرق بينهم و بين المصريين في الشغل

أهي دي بأه بالذات فعلا في الحلقات القادمة.. بس برضه يعني الناس دول مش ملايكة يعني و في أحيان كتير بيعملوا حاجات عكس تماما اللي همه بيبانوا عليها. عموما تابعنا و هتلاقي فيه كلام في الموضوع ده باستفاضة في حلقات قادمة بإذن الله

المشاركة الأصلية كتبت بواسطة birdybirdy

بجد بجد موضوع هايل جدا وعاجبني اوي اسلوبك لان دمه خفيف بجد وانا بقرأ موضوعك شريط حياتي الوظيفية برده مر قدام عينيا وافتكرت انا كمان المواقف اللي حصلتلي وقتها وكمية الانترفيوهات اللي عملتها ومازلت لحد دلوقتي بعملها.
بالمناسبة انا برده معايا ليسانس اداب وتربية انجليزي دفعة 2002 وشغالة بقالي اكتر من خمس سنين ومريت بحاجات كتير اوي من اللي بتحكي عليها زي موضوع عقدة الخواجة اللي هي اشتراط خريجي مدارس اللغات وموضوع الحجاب برده بس الحمد لله ربنا لما بيكرم حد بيكرمه من وسع فعلا.
وهابقي احكي حكايتي انا كمان عن الحياة الوظيفية دي بس بعد ماتخلصي حلقاتك ياعلا عشان الناس متتلخبطش.

وعايزة اقول للناس اللي بتقول دور علي واسطة او ادفع فلوس عشان تلاقي شغل ياجماعة ده رزق قبل اي شئ يعني ربنا كاتبه لناس معينة وفي وقت معين بس الصبر والاجتهاد هايوصلوك للي انت عايزه (لايضيع الله اجر من احسن عملا)
وانا عن نفسي اشتغلت في اكتر من شغلانة بدون واسطة نهائي والشغلانة الوحيدة اللي استعنت فيها بواسطة مكملتش فيها اسبوع على بعضه وسبتها.
وبرده انا زي علا فكرت اشتغل في التدريس وفعلا اشتغلت فيه اسبوع واحد ودورت تاني علي مدارس بس الحمد لله ان ربنا موفقنيش في مجال التدريس ده وهاقولكوا ليه بعدين
وحاليا انا شغالة في شركة كويسة والحمد لله الامور مستقرة وبيجيلي وظايف تانية ولما شركة بتطلبني انا اللي بقول طلباتي دلوقتي واحيانا اوافق اني اروح الانترفيو واحيانا مبروحش.
بس في سؤال مهم بقيت اسأله قبل ماروح اي انترفيو وهو (انا محجبة هل الشركة عندكوا بتتقبل ده ولا بتشترط اللي تمسك الPosition ده متكونش محجبة )
لاني بجد اتعرضت للموقف ده ياما وفي شركات رفضتني لمجرد اني محجبة.
عموما انا اسفة اني طولت عليكوا بس هابقي احكيلكم التفاصيل في حكايتي انا بقي بعد ماعلا تخلص ونشوف قصتها كاملة.

ربنا يكرمك يا رب.. انا أصلا متابعة كل مشاركاتك تقريبا وبتعجبني جدا

في انتظار قصة حياتك الوظيفية يا بيردي و يا ريت فعلا كل اللي عنده تجربة عن حياته الوظيفية يحكيها لنا.

المشاركة الأصلية كتبت بواسطة gade2

انا اداب انجليزى لسه طالع رابعه مكنتش عارف هاعمل ايه يعد اما اتخرج بس كل اللى انا عارفه انى مش هاشتغل مدرس لانى مش لاقى نفسى فيها (وده اعلب حال بتوع اداب انجليزى مش عارف ليه)
بس انتى رسمتيلى صوره للى ممكن يحصل معايا علشان ما اتصدمش
ربنا يكرمك
ويهدينى

لا إن شاء الله مافيش صدمات و لا حاجة.. بس على فكرة انا كمان لما كنت لسه في الكلية كنت باقول انا اشتغل مدرسة؟آآآآآآآآبدا :p

المشاركة الأصلية كتبت بواسطة ehab08

سبحان الله موقف مديرك حصل معايا بالظبط 11/1992 فى بداية حياتى الوظيفيه والفضل لله سبحانه وتعالى وضع فى طريقى مدير شهم شاب وهو برضه اللى أقترح نفس الأقتراح على وتغيرت حياتى الوظيفيه 360 درجه
بارك الله لهم جميعا ولكى على موقفك القوى

من أستغنى أغناه الله

الحمد لله يا إيهاب.. احنا لينا رب لا يغفل ولا ينام.. الحمد لله.

طيب انت كده دبست نفسك.. هاتحكي لنا ايه اللي حصل في حياتك الوظيفية غيرها 360 درجة.. بس همه 360 و لا 180؟؟

جزاك الله خيرا على المتابعة و الصبر على القراءة

المشاركة الأصلية كتبت بواسطة AHMEDCAR

اسمحيلى يا اخت علا انتى بتقولى جزاكم الله خير و الصبر على القراءه بجد انتى بتشديتا للقرايه مش احنا اللى قاعدين و صابريين لحد ماتخلص الحلقات انا عن نفسى صريح و بقولك لو الموضوع ده ماعجبنيش مانتش هاكمله بجد انتى ليكى اسلوب رائع فى الكتابه بيشد الواحد كده طيب تعرفى انا كنت اجازه يوميين و النت بايض فى البيت المهم اتابع الحلقات ازاى ازاى
قمت هيله هوب نازل على النيت كافيه اللى جنب البيت بجد حسين و انا داخل على الموقع عموما انى داخل البيت والله و ياسلام لما قعدت و قريت بقيه الحلقات شعور تانى خالص بجد الواحد زى مايكون حس براحه نفسيه
شكرا ثم شكرا ثم شكرا على الموضوع الجميل ده

لية الشرف يا فندم اني يتقال على موضوعي كل الكلام الحلو ده و يا رب أكون فعلا عند حسن ظن الجميع

المشاركة الأصلية كتبت بواسطة ehab08

ياه حياتى الوظيفيه ده تاريخ قديم قوى أبتدى من 1984 لما كنت طالب فى أولى هندسه وتقريبا أشتغلت فى حياتى فى 5 وظائف مختلفه كليا عن بعضها منها مثلا كنت بوزع أعلانات فى النمسا سنة 1986 ولكن الحمد لله والشكر لله أجادت فيهم كلهم وده بتوفيق ربنا سبحانه وتعالى
المضحك بجد أن المهنه اللى ماعجبتنيش وأصريت أنى أغيرها كانت هى شهادتى الأصليه الهندسه المدنى
وبعدين المشكله أنى ماعنديش نفس أسلوبك اللذيذ فى كتابة المواضيع ولكن مافيش مانع من المحاوله
ولكن طبعا ده بعد ما تكتبى كلمة النهايه فى موضوعك الرائع ده وتحكيلنا على كل المواضيع الفرعيه اللى انتى قولتى انك حتتكلمى عليها بعدين
تصدقى بجد انا مش عارف همه 180 ولا 360 مع انى مهندس

بس بيتهيألى همه 360 عشان انا ما سبتش مجال عملى لمجال تانى بس انا غيرت مكان عملى اللى مكان تانى كان أقل فى كل حاجه بالنص تقريبا يعنى كان مرتبى وقتها حوالى 900 جنيه ورحت لمكان جديد مرتبى بالحوافز ودعوات الأهل كان 400 جنيه
بس الخبره كانت أضعاف أضعاف
أيه ده أنتى ضحكتى على وخليتنى أحكى قبل ما تكملى قصتك أنت

أتفضلى ياهانم كملى قصتك يالالالالالالا

لا يا باش مهندس.. ده كده اللي شوقتنا و شكلي كده هكروت باقي قصتي عشان أسمع قصتك

عموما انا خلاصِ، أعتبر باشطب أحداث أول سنة و ان شاء الله هانزل بباقي الحلقات سوووووووووون :)

و بدأت شغل في الشركة.. عدد اللي بيشتغلوا كانوا 4: أختكم، وسام، صاحبة الشركة و الأوفيس بوي.. هاشم.. نوبي.. كان عنده ساعتها 25 سنة.. طيوب و جدع اوي اوي اوي.. دبلوم صنايع قسم كهربا.. و طبعا زيه زي اي دبلوم التجارة.. مافيش شغل في تخصصهم.. فبيشتغلوا اي حاجة و كل حاجة.. بس كان شاطر و مخه مفتح اوي.. يا ترى فين أراضيه دلوقتي؟ سابنا سنة 2000 تقريبا و سافر السعودية.. فضل على اتصال بينا كام سنة بعد ما سابنا، بس بعد كده انقطعت اخباره.

اما وسام دي حكايتها حكاية.. اكبر مني بسنة و متخرجة قبلي بسنة.. نوع نادر من البشر.. صعب تقابل منه مرتين في حياتك.. اتعلمت منها كتير.. طيبة اوي و نقية لأقصى درجة.. على طول متحمسة و متعاطفة و مستعدة لأي مساعدة ايا كانت.. لما كان بييجي حد يقدم لنا السي في بتاعته (السيرة الذاتية) و تلاقي قدراته المهارية و التعليمية مش أد كده، كانت بتقعد معاه و تسمع حكايته و تحاول تساعده بكل الطرق.. طبعا ده مطلوب، بس مش كل واحد ييجي يقدم السي في ينفع تقعد معاه ساعة.. عشان كده صاحبة الشركة كانت دايما تقول لها مداعبة إياها: don't mother the candidates Wissam. يعني ما تبقيش ام لكل حد جاي يقدم السي في و تاخديه كحالة عشان كده مش هانخلص.

وسام فضلت معانا 7 سنين.. كنت حاسة اني مش باتعامل مع زميلة لية في الشغل.. انا كنت باتعامل مع اخت كبيرة و ام حنينة اوي و حد حاطك في عينيه طول ما انت معاه في الشغل.. تطمن علية دايما لما تكون حاجة مضايقاني.. تفضل تنصحني اني أوفر فلوسي عشان ماحدش هاينفعني.. يا بت يا خايبة شيلي لك قرش عشان تعرفي تعملي لنفسك حاجة.

والدتها اتوفت بعد شهر ما انا استلمت الشغل.. مامتها كانت كل حاجة في حياتها.. ما خففش عنها صدمة وفاة امها إلا وجود خطيبها جنبها (اللي هو زوجها دلوقتي).. انما كانت بتجيلها نوبات عياط ما كنتش بابقى عارفة اعمل لها ايه.. الله يرحم والدة وسام و والدي و كل امواتنا يا رب و يرزقهم الجنة.

وسام سابتنا شهر 5 سنة 2005 و راحت اشتغلت في مكان اكبر.. هي ما كانتش عايزة تمشي.. بس هي عايزة تكبر عن كده و المكان مش متيح لها الفرصة دي.. فعن طريق واحدة كانت تعرفها قبل كده لقت الوظيفة اللي هي فيها دلوقتي.. مكان ما شاء الله اكبر من اللي كانت فيه بكتير و احسن الحمد لله.. ربنا يكرم وسام كمان و كمان يا رب، هي تستاهل كل خير. وسام معاها طلفين: ادهم و فريدة.. زي العسل ما شاء الله.. ربنا يحفظهم لها يا رب

اما عن صاحبة الشركة فهي ست زي ما قلت قبل كده انجليزية، عايشة في مصر مع زوجها المصري بقالها حوالي 22 سنة.. بتعرف تتكلم عربي كويس، بس برضه مكسر و مش بتستعمله إلا مع السواق بتاعها مثلا او الأوفيس بوي او مع اي حد مش بيعرف يتكلم انجليزي، عشان كده بتحرص ان كل اللي بيشتغلوا معاها يكونوا بيعرفوا يتكلموا انجليزي كويس. الست بصراحة محترمة جدا في تعاملاتها مع اللي بيشتغلوا معاها في الشركة.. نظامها انجليزي في التعامل.. يعني حقي و حقك.. لو جت مرة تطلب حاجة زيادة عن الشغل بتطلبها كأنك بتعمل فيها معروف.. ما تطلبش مني حاجة الا و تبدأ الجملة ب please و تنهيها بThank you و بعد ما اعمل لها الحاجة - حتى و لو في صميم الشغل لازم تقول لي Thank you very much.

اللي يشتغل جد معاها و يدي وقته و مجهوده للشغل تعامله احسن معاملة و كأنه واحد من العيلة، مش بيشتغل عندها.. و اللي يقصر تلفت نظره مرة و اتنين و تلاتة و تصبر.. لحد ما تدي إنذار أخير و بعدين لو العوج لسه مستمر فهو برة الشركة مع أخذه كامل حقوقه (حصلت مع اتنين تقريبا خلال ال 9 سنين اللي فاتوا) انما عموما هي انسانة جدا و طيبة القلب و ما تحسش و انت بتتكلم معاها ابدا انها صاحبة المكان اللي انت بتشتغل فيه.

يمكن المعاملة مع الأجانب عموما مريحة في انهم سلسين في التعامل، يعني انت مش مضطر تقول لرئيسك في الشغل يا مستر فلان او مسز فلانة.. او حضرتك و سعادتك و تحت امرك و أحلام سعادتك أوامر.. و شلوت سعادتك دفعة للأمام وكل النفاق ده، عشان همه اللي بيفرق معاهم الشغل مش الكلام.. محترمين في الحتة دي همه الصراحة و عموما موضوع التعامل مع الأجانب ده هانفرد له مساحة لوحدها عشان انا اصلي اتعاملت في شغلي ده مع حوالي 10 أجنبيات مروا على الشركة و دلوقتي همه 4 كلهم من أوروبا.. اتعلمت ايه؟ استفدت ايه؟ مشاكلهم ايه في مصر و مشاكلنا معاهم ايه؟ هل همه فعلا احسن مننا في كل حاجة؟ أخلاق، انضباط، صدق و وضوح في التعامل.. الخ الخ الخ؟ و لا زي كل البشر فيهم برضه دقات كده مش اللي هي؟ عموما.. هانشوف