الموضوع: الزعيم لصيانة السيارات الألمانية....فتح ورشة جديدة فى صقر قريش

الف شكر للاستاذ حسين وللاستاذ محمود على الردود والمسانده
انا قابلت النهارده محمد الزعيم في الحرفيين والحمد لله رجعنا الكبالن وجبنا غيرهم
وبكره ان شاء الله هروحله بعد الشغل عشان يركبهم وهبلغكوا الأخبار
ادعولى بالخير

أ/abaza2107

يا باشا لا شكر على واجب ، والحمد لله انك رجعت الحاجة واخدت الحاجة الى حضرتك عايزها وان شاء الله منتظرينك بعد ما تركب الكوبلن تقولنا على اية الاخبار والدنيا فرقت فى العربية معاك ؟

أ / hossamalsadik
صباح الفل يا باشا وانا منتظر مع حضرتك الاخبار بعد ما يركب الكوبلن ، تحياتى لحضرتك ولشخصك الكريم .

المشاركة الأصلية كتبت بواسطة singary

في البداية أحب أشكر قوي الاستاذ حسين اللي عرفنا على ورشة الزعيم اللي بجد طلع شخص محترم وساعدني في شراء العفشة كلها تقريبا . ويارب يكون كويس في تركيب الحاجات
يوم الجمعة اللي فاتت روحت ورشة الزعيم وخليته كشف على العربية. العربية من خمس شهور كانت محتاجة الأتي :
1-مساعد أمامي
2-بطاحة
3-علبة دريكسيون
لكني فضلت سايب الحاجات دي لغاية لما جمعت شوية فلوس عشان اقدر انزل اشتري. وكمان قريت موضوع ورشة الزعيم وقلت اتوكل على الله. كلمت الزعيم وحددت الميعاد معاه وكشف على العربية, وكانت المفاجأة ان العربية محتاجة الحاجات دي.

1- 2مساعد أمامي
2- تيل أمامي
3- قواعد موتور
4- 2مساعد خلفي
5- ماستر فرامل
6- طرمبة بنزبن بجوانها
7- جلب مقصات

طبعا كان قراري طالما فتحنا كدة فمفيش قدامي غير اني اجيب الحاجات دي استيراد, وهو اللي اكده الزعيم عشان الجديد معظمه صيني. طيب أنا عارف ان الحاجات دي تتجاب من الحرفيين لكن منين في الحرفيين و الطريق لجسر السويس انا معرفوش- انا اصلا باتوه في المعادي (: -
طبعا بعد ما أكد زميلنا (egman) على ان الراجل ده كويس و بيروح يجيب الحاجة فقولت خلاص هنزل اشتريها معاه. بس برده كلمت واحد زميلي عشان يلاغيني على الأسعار ومكان هناك كويس في الحرفيين اشتري منه. اتفقت مع الزعيم على النزول يوم السبت اللي فات وفعلا عديت عليه في الميعاد وروحنا الحرفيين وفي الطريق ان الحاجات اللي هنشتريها كتير وانا في واحد صاحبي قالي على محل في شارع مرسيدس هناك بتاع واحد اسمه"أسامه" كويس. والرجل بصراحة كان محترم قالي انا عايز اوفرلك اي حاجه بس تكون حالة الحاجه كويسة. وفعلا روحنا لاسامة بس للاسف كان قافل فروحنا لواحد يعرفه جبنا منه علبة الدريكسيون وماستر الفرامل وقواعد الموتور. وملقيناش الجانبين وباقي الحاجة
بعد كده لفينا حبه حلويين ملقناش حاجه و بعدين واحنا ماشين شوفنا محل اسمه فتحي عدس بصرحة الراجل ممتاز فتحلنا المخزن وقالنا نقوا اللي انتوا عايزينوا وقد كان بفضل الله... اشترينا جانبين امامين و2 مساعد خلفي بالدشم ومساعدين الشنطة وفاضل جلب المقصات اتفق ان هو هيجبهالي. واتحركت من هناك على 11 كدة. وان شاء الله هروحله بكرة عشان يركب الحاجه وربنا يستر و يكملها على خير

طبعا انا عارف ان أهم حاجه الأسعار عشان كدة من عيني كل حاجه و سعره المتوقع و السعر الفعلي اللي اشتريناها به فالشيت الكسيل المرفق في حاجات انا مفصلتش فيهم بس عرفت اسعارهم للمعرفة يعني هكتبهم و هلونهم بلون مختلف


ملاحظات على الزعيم
شخصية محترمة جدا ومهذب وأول مرة اسمع من صنايعي كلمة "أسف" خمسين الف مرة.
هوا اللي كان بيفاصل عشان انا مبعرفش افاصل بس كان عندي فكرة عن الاسعار. وكان الحاجة اللي مبرضاش على سعرها بقوله لأ والحاجه اللي بسعر رخيص وأي كلام كان هو بينفض وياخدني ويمشي.
طبعا الحاجات هو اللي منقيها وربنا يسهل وتكون كويسة
شاكله فاهم جدا وده طبعا اللي قالهولي صاحبي من الكلام اللي حاكتهولي عشان انا بيني وبينكم معلوماتي على قدي في الحاجات دي
بيعامل الناس كويس و يديك معطر وانت ماشي وكدة

اتمني تكون المعلومات دي مفيدة وربنا يعينكوا ويعنا
للأسف انا حاولت ارفع اسعار الحاجه بس للاسف معرفتش لا باكسلاية ولا بورد ولا باي حاجة

يا استاذي الفاضل لا شكر على واجب ، انا الى سعيد جدا ان حضرتك ارتحت فى المعاملة هناك واخدت شغل مظبوط ومعاملة محترمة ، والحمد لله ان لموضوع نال اعجاب حضرتك وثقتك وان الكلام طلع مظبوط ؟

والف مبروك على الحاجات الجديدة الى اتغيرت فى العربية ، ويا ريت يا باشا تقولنا انطباعك على اشغل بعد ما جربت العربية ؟

وكمان تنقلنا تجربتك فى شراء قطع الغيار وتقولنا جبت كل حاجة بكام علشان يبقى مرجع للناس فى معرفه اسعار قطع الغيار الاستيراد اول باول ؟

تحياتى لحضرتك ومنتظرين رد حضرتك باذن الله تعالى على خير ،،

السلام عليكم
انا روحت النهارده لمحمد الزعيم بعد الشغل وركبنا الكوبلن القصير وطلع هوا الحمد لله
لكن الكوبلن الطويل طلع برده قصير بس الحمد لله الزعيم فور الكوبلن الي كان في العربيه شال القطعه الداخليه والخارجيه وكذلك فور الكوبلن القصير الأستيراد وركب القطعتين الأستيراد في عمود الكوبلن بتاع العربيه الأساسي وركب زي الفل وطلعنا جربنا والحمد لله تمام العربيه مسكت نفسها
وبعد كل ده مرضيش يحاسبني وقالى ده من الحساب القديم
وعقبال المره الجايه غيار الزيت وتغيير التيل والبوجيهات بعد 1000 ك
محمد الزعيم فعلا شخصيه محترمه وامينه وبيحافظ على العربيه كانها بتاعته
الف شكر ليه ولأستاذ حسين الي عرفنا عليه والف شكر لكل الأعضاء الي ساهموا في الموضوع
والى اللقاء في المرحله القادمه
اخوكم احمد