سيدي الفاضل...
طبعا اسمحلي أولا أسجل اعتراضي علي أكتر من كلمة كاسلوب..
ثانيا أنا الحمد لله راكب من الابرة للصاروخ ومن أيام الكلية لدلوقتي ركبت كتير غير الحمد لله عربيات الاسرة. ومن أول ما اشتغلت بدأت تاني من الصفر يعني بعد الشخلعة بدأت بجولف 2 ومرورا بقي ببوينتر ولانوس وأفيو وحاليا الحمد لله سانديرو اوتو. ودول شاكب راكب كدة ركبتهم علي مدي سنتين فا مانسيتش أي حاجة ركبتها الحمد لله وعارف المقارنة بينهم.
بص أنا بعتبر السانديرو صفقة رابحة زي ما اعتبرت الباسات صفقة رابحة وزي ما بعتبر البي ام الفئة الخامسة صفقة رابحة. وعلي العكس مثلا الاوكتافيا A4 صفقة فاشلة والأفيو صفقة فاشلة جدااااااااا.
الموضوع كله اني مش بقارن كله ببعضه.. ماينفعش أقارن جولف 2 بباسات وأقول دي الجولف 2 دي كانت زبالة.. لأ الجولف 2 كويسة لأن ف رانج ال 30 ألف مافيش عربية زيها.. لو قارنت ال A4 والجيتا حتلاقي ال A4 تخسر بشكل شنيع (من وجهة نظري) أمام الجيتا ونفس الكلام الكورولا أمام الجيتا. اللي بيحدد كل عربية اللي معاها ف نفس السعر.
احنا كا مجموعة كبيرة جبنا السانديرو (أو اللوجان) الاوتو أيام ما كان سعرها في التمانينات. وقتها كانت العربيات المنافسة في الاوتو كالتالي:
فيرنا: من أسوأ السيارات الاوتو اللي حاتشوفها
بيكانتو: منافس قوي ولكن للأسف في فئة الحريمي والمشاوير داخل المدينة فقط.. كسيارة اسرة أو سفر مالهاش لازمة غير ان الموتور ضعيف جدااااااااااااااااااااا.
ساجا: متعادلة بين الاتنين في أي مقارنات لكن كاتوكيل EIM تكسب
FSV, FRV: صيني
i10: زي البيكانتو بامكانيات أقل
الأفيو: مع مراعاة فرق السعر حوالي 7 الي 8 آلاف.. عربية لعبة وعاملة زي عربيات البطاريات اللي بيجيبوها للأطفال وللأسف تشويه للانوس أكتر منها تجديد لها.
دول أشهر المنافسين.. أقرب حاجة ليهم الصني القديمة أول فئة اوتو كانت ب 93 لما كانت اللوجان ب 79 وكانت ب 96 لما كانت اللوجان ب 80.5.. طبعا لو حاندخل ف العيوب مش حانخلص كفاية تدخل علي قسم الصني وتقرأ. كمان مش حانسي البروتون جين 2 واللي بالنسبة لي كانت العربية المثالية لغاية ما قربت منها لقيت كل اللي راكبها بيشتكي من التوكيل والكماليات اللي بتعطل.. بس بصراحة اصحاب العربية دي بيحبوها جدا رغم كل ده. غير ان تمنها لما قررت أبصلها بقي 93 واللي للأسف كتير علي عربية ماليزي.
من الآخر لو عاوز تقارن اللوجان هات حاجة في سعر مايتعداهاش ب 5 آلاف مثلا وقارن.. انما تقارن في فروق توصل لفوق ال 15% من تمن العربية أكيد طبعا فيه فرق والا ماكنتش تبقي عربية أغلي (برجاء الملاحظة اني ماليش دعوة بالسعر حاليا أنا باتكلم وقت ما اشتريت)
بالنسبة لملاحظات حضرتك:
ثانيا عيوب العربية:
للاسف معظم مالكي اللوجان بيبقوا طالعين من عربيات اقل فى التكنولوجيا زي الفيات القديم واللادا اما لو كنت طالع من عربية معقولة هاتحس انك اخدت مقلب تمام اوي فى العربية دي نيجي بقى للعيوب بالتفاصيل
فيه ناس كتير نازلة لها من عربيات أعلي بمراحل.. بس علي الأقل فاهمين نظرية "القيمة مقابل السعر" فا مش متوقع انه مثلا حاينزل من فيكترا للوجان ويلاقي نفس الرفاهية
1- ابعاد العربية وخصوصا الشنطة تحسسك انك مش مسيطر على العربية فى الركن لانك تقريبا مش شايف حاجة من ضهر العربية
أنا معايا العربية من 5 شهور ولغاية دلوقتي ماركبتش حتي parking sensor وباروح بيها من موقعين لتلاتة يوميا والحمد لله مافيش أي مشكلة ف الركنة
2- دهان العربية ممكن بظافرك تشيله اسوا دهان عربية شوفته فى حياتي دهان شركة النصر بتاع 128 كان احسن 100 مرة
تصحيح.. دهان ال"اكصدامات" مش العربية كلها.. العربية عندي نص متشردي مصر راسمين عليها وعاملها بوليش وواكس مرتين ولا أي حاجة.. أما الاكصدامات بتتحك من أقل ترييح عليها وده أعترف بيه.. ممكن أبقي اشتريلها اكصدامات وأسيبها من غير رش منها شكل جديد ومنها توفير ههههههههه
3- سحب العربية زفت فى الطلعة لحد الغيار التاني وانا بقارنها ب عربيات 1300 زي اليارس الاوتو تتفوق بمراحل
ادي سنة كيك داون ف الطلعة وارفع رجلك لما توصل 30 مثلا حاتلاقيها ظبطت معاك.. غير انك برضه رجعت تقارن بالياريس اللي حاليا عدت ال 130 ألف.
4- الدركسيون تقل جدا تقريبا كدة كانه مفيش باور فيه والله ال 128 كان دريكسيونها العادي انعم
الدركسيون تقيل آه.. بس زيه زي عربيات كتير ممكن أقرب مثال هنا الصني.. بس مش زي 128 يعني.. علي الأقل أظبط ضغط العجلتين الأمامي وجرب تاني.. فيه موضوع برضه لو عرفت أعمله اني أغير زيت الباور بزيت كثافته أعلي أعتقد انه حايدي نتيجة فعالة جدا بس عاوز أسأل التوكيل لو فيه حاجة معتمدة أو ماتخرجش م الضمان.
5- الكرسيين اللى قدام ظهرهم بيلعب معاك مع الفرامل واللي مش مصدقني يشوف اي عربية لوجان هيلاقي الظهر بيتحرك ومالهاش حل فى التوكيل
6-
المشكلة مش موجودة عندي للأسف مش حاقدر أفيدك فيها
صوت موتور غبي خصوصا فى المطالع والكبس
صوت الموتور عالي من 2000 الي 3000 rpm
7- الكاوتش اللي العربية نازلة بيه لا يستحق تعريفة وممكن يسبب كوارث ودي ممكن تلاقوها فى مواضيع كتير فى المنتدى
معاك ف المسكلة دي بس العربية أساسا اقتصادية ولو عاوز انت كاوتش ألعي هات.. بس احقاقا للحق الفرامل لحقتني من حادثة قللت سرعة العربية من 110 الي حوالي 30 في 6 الي 8 متر وده انجاز ف عربية مافيهاش ABS.. ماعرفش اذا كنت أنا قيست المسافة غلط ولا الهوا كان عكس العربية وساعد ولا ايه بس المؤكد اني مش ححاول أجرب الموضوع ده تاني :D
8- المصيبة الكبرى العربية دي الفتيس بيعمل تنتيش مع الكبس على مزاجك فى الغيار التاني مكرر اللي الناس مش عارفة ايه لزمته ولما تهدي بالعربية تحس بتسليمة كل غيار للى اقل منه محستهاش فى اي عربية اوتوماتيك تانية
موضوع النتشة موجود ف كل الرينو حتي الفليونس ليه ماعرفش.. بس دي من أوائل الحاجات اللي المنتدي كله معترف بيها
9- سعر قطع الغيار مبالغ فيه جدا على سيارة زي دي
أقل مثال فوانيس اللي سعرها لا يتعدي 300 جنيه.. أسعار قطع الغيار أغلبها كويس جدا ولو قارنتها بالصني الي انت بنفسك ذكرتها (فرق سعر حوالي 12 الي 14 ألف) حتلاقي قطع الغيار الضعف أو اكتر..
10- العربية من شركة داتشيا الروماني بدعم فني من رينو وبتتجمع فى المغرب يعنى كوكتيل تعبان جدا!!
الاوتوماتيك مافيهاش غير أجزاء بسيطة جدا اللي بتتجمع ف المغرب منهم الفرش الداخلي وكدة.. أما الموتور والعفشة والأساسات جاية من رومانيا وعشان كدة الاوتو بياخد وقت طويل ف التصنيع عن المانيوال.
وفى النهاية احب اقول ان دة تقييمي كاحد ملاك العربية اللي انا مستاء منها جدا
واكيد واحد هايقولي انت لشتريتها ليه هاقوله مكانش فيه ليها اي بديل بالسعر دة ومساحة الصالون دي
ونصيحة لاي حد مقدم على شراء العربية دي بلاش وفيه بدايل تانية احسن لان اللوجان هيا التطور الطبيعي للعربية الادا
انت بنفسك معترف انها الاحسن في فئتها.. يبقي انت مستاء من فئة السيارات الاقتصادية ككل.. يعني حضرتك ممكن تبدأ من الفانتازيا وطالع عشان تتفادي العيوب وتبقي مرتاح في العربية.. انما مش حاتدفع 80 ألف ومتوقع تاخد مرسيدس.. حضرتك بتخالف نفسك!!
طبعا انا عارف ان فيه بعض الاعضاء هايخشوا يهاجموا علشان صعبان عليهم الفلوس اللي دفعوها او الاقساط اللي عليهم بس انا بوجهلهم رسالة وبقولهم انتوا كنتوا السبب في ان ناس كتير تلبس العربية دي وبلاش دفاع وخلاص وياريت اللي هايخش يدافع يكتب ايه العربيات الاوتوماتيك اللي ساقها قبل كدة وكام الف كيلو يعني مايكونش خد لفة بعربية ويقارنها باللوجان
عندك بي ام فئة تالتة وفئة خامسة واوكتافيا وباسات حبة حاجات تشرح القلب أهيه.. وعندك صني (مش فترة طويلة كانت ايجار) وفيرنا وأفيو من فئات قريبة.. طبعا هي أحسن اختيار ف نفس الفئة ومش من الطبيعي اني أقارنها بالفئات الأعلي.. علي قد فلوسك مد رجليك زي ما بيقولو.
وحاجة كمان بس.. لو علي الفلوس "اللي دفعناها وزعلانين أوي عليها" بسعر العربية الحالي احنا نبيع عربياتنا بنفس السعر اللي اشترينا بيه زمان وكأننا ركبنا العربية ببلاش.. يعني أنا سألت ع السانديرو امبارح ف الطارق ب 97 أوتو.. أنا كنت جايبها اوتو 2013 ب 83 وعاملة حاليا 3000 كيلو.. يعني أبيعها ب 87 ف ظرف يومين وأبقي كسبان ايه رأيك؟ بس أنا حابب العربية ومش حابيع.. ياريت تكون فهمت انها مش نقطة فلوس.
أما اننا "لبسنا ناس كتير".. طلعلي نقطة واحدة انت قولتها ماتكلمناش عليها ف المنتدي هنا مرات ومرات!! وأي حد بيفكر يشتري أول 4 نقاط بتتقاله "نتشة الفتيس - الدهان - الموتور صوته علي - الكاوتش" فا اللي جايب عارف العيوب. وحضرتك مجرب الروماني قبل كدة وكاتب تقرير عنها متهيألي يعني ايه اللي خلاك تجيب حاجة مش حاجباك عن تجربة؟ ولا هو ازاحة اللوم عن نفسك وارضاء ضميرك بانك تحسسنا ان المنتدي هو السبب في "الوقعة اللي وقعتها"؟
واخيرا كلمة لكل واحد بيفكر فى العربية دي الفرق بينها وبين الصني الجديدة اصبح 10000 جنيه او حتى ال بي واي دي فرق بسيط جدا .....اشتري نفسك واشتري حاجة منهم او خليك فى الفيات او اللادا اللي انت راكبها بدل ما يتخرب بيتك صيانة وسعر اعادة بيع زي الزفت
وأحب أقول لكل من حايشتري الصني الجديدة ان مبيعاتها قلت فوق ال 90% ف السعودية عن القديمة لأنها "عربية جميلة جدا"
وبقول للناس اللي بتطبل للعربية دي وهية عارفة انها لاتستحق اتقوا الله وشكرا
اسلوب زي الزفت ماكنش المفروض يترد عليه غير باسلوب مثله ومش عارف المشرفين ازاي سايبين الجملة دي كدة
وعليكم السلام ورحمة الله وبركاته
المفضلات