الموضوع: عزل خراطيم ومواسير التكييف

المشاركة الأصلية كتبت بواسطة mido51eg

النهارده انا نزلت دورت على خراطيم العزل دي عند بتوع الثلاجات في المنطقة محدش منهم عنده وقالوا لي انها في شارع كلود بيك في رمسيس. ركبت المترو ونزلت رمسيس ودخلت شارع كلود بيك ، هناك محلات كتير بتبيع حاجات الثلاجات والغسالات ، سألت في محل لقيت الخرطوم موجود بييبقى قطعة طولها 2 متر بـ 6 جنيه جبتها واشتريت بـ 5 جنيه قفزان بلاستيك ورجعت على البيت وفتحت كبوت العربية وبدأت الشغل

1- قطعت قطعة من خرطوم العزل على قد الجزء المراد عزله من خرطوم التكييف وشقيتها بالطول وغطيت بيها خرطوم الفريون.
2- لفيت عليها القفزان البللاستيك بحيث تبقى محكمة.
3- شغلت التكييف مع العلم ان العربية كانت مركونة في الشمس والساعة كانت تقريبا 3 العصر.

المشاهدة :
1- الهواء الساقع خرج من الهوايات بعد حوالي 30 ثانية فقط من تشغيل التكييف علما بأنه كان بياخد حوالي من 2-3 دقيقة قبل كده
2- العربية سقعت من الداخل في وقت اقل من الاول والهواء كان شديد البرودة قدام الهوايات.
3- اتحركت بالعربية والملاحظ ان الحمل كان خفيف على الكومبريسور وكنت حاسس بكده من سحب العربية (النقطة دي محتاج اجربها تاني علشان اتأكد لأن ممكن الاحساس ده يكون نفسي).

النتيجة :
العزل فرق معايا جدا لأن خرطوم الفريون البارد كان مواجه لمروحة الردياتير ودي كانت مطلعة صهد في مواجهة الخرطوم.

كنت عاوز اعرف العربية اللي انت طبقت فيها الحوار ده عربية ايه اصل الوصلة اللي جاية من التلاجة للكباس عندي في الفيكترا a تحت مجموعة السير و من تحت الكباس ماشية جنب نار الفرن بتاع العربية و فعلاأ بتأثر ولا لأ في البرودة ؟ و أعزل الماسورة السخنة برضو ولا الساقعة بس علما بان السخنة هي اللي راحة للسربنتينة .

متابع

المشاركة الأصلية كتبت بواسطة mido51eg

العربية اللي طبقت عليها موضوع العزل فورد اسكورت 1300 ، انا عندي خراطيم مش مواسير لأن العربية كانت بتنزل مش مكيفة والوكيل كان بيركب التكييفات عنده ، العزل بيتم للماسورة او الخرطوم الباردين ، عندي خرطوم البارد كان جنب الفرن وفي مواجهة مروحة الردياتير اللي كانت بتخرج صهد في مواجهة الخرطوم ، وفعلا العزل فرق معايا جدا والحمد لله.

مممم انا نزلت ش كلود بيك و جبت متر صوف زجاجي عليه طبقة زي الفويل كدة و جبت كمان مترين خرطوم اسمه حاجة فلكس اللي هو بتاع مواسير تكييف البيت ده فارمافلكس باين . اعمل ايه بقي اشق الفارما فلكس و الفه على ماسورة البارد و بعد كده الف عليه الصوف الزجاجي و اقفل ب قفزان بلاستك الشريط دي البيضاء دي ولا ايه ؟ , عندي استفسارين ؟؟ القفزان دي تتحمل هبو الموتور ولا هتسيح هي و الخراطيم دي لان الراجل قالي الخراطيم ممكن تسيح لفها بالصوف الزجاجي عشان متسيحش انما قالي الافزان هتسيح هات لفه سلك نحاس افضل ؟؟ الكلام ده نظامه ايه ؟ و بعدين الصوف الزجاجي قالي يتحمل اقصي حرارة ممكنة هل ينفع الفه على مانيفولد العربيه علما بانه بيطلع صهد جامد جدا فا بيبقى صعب على المروحة اللي قدامه تبريد الردياتير جيدا. مشكور للمتابعة