الموضوع: للكبار فقط:تغيير بطاحة مساعد ميجان وفك جميع أجزاء العفشة والفرامل والكوبلن بنفسك

تعالوا نغير ( المساعد.... السوستة أو بطاحة المساعد )
أول حاجة من الأدوات الضرورية يكون معاك زرجينة لضغط السوستة شوف الموضوع الفاشل دا ... أوعى حد يستخدم الزرجينة دى
لازم زرجينة ألمانى أصلى اشتريها من التوفيقية أو من أى مكان من غيرها مش هتقدر تكمل المهمة
http://www.nilemotors.net/Nile/353296-a.html

نبدأ بتغيير البطاحة الشمال .... أكسر الدركسيون أقصى اليمين
Uploaded with ImageShack.us..طبعا لو البطاحة اليمين يبقى اكسر الدركسيون أقصى اليسار ... هوى مسامير العجلة
هنرفع العربية على كوريك العربية ... أنا استخدمت كوريك العربية ... بس تكون حذر... ناخد بالنا كويس من الفجوات المحددة لوضع الكوريك فى العتب من تحت وبيبقى مطبوع على العتبة أسهم من برا بيبقى تحتها مباشرة أماكن وضع الكوريك وطبعا حطيت طوبة ورا كل عجلة والأرض مستوية وبعد ما رفعت شديت فرامل يد جامد
ممكن كتطلع الاستبن وتحطه تحت العتبة كأمان مش أكتر لأن الكوريك العادى دا المفروض آخر تغير كاوتش وللعلم العربية كانت هتقع منى لولا ستر ربنا
بعد ما فكينا الكاوتش هنبدأ بفك كرتيرة الرفرف الجزء اللى فيه الغطاء اللى بنغير منه لمبة الفانوس بتبقى متثبتة بكلبسات متشدش الكلبسات شد الكرتيرة من الأطراف جامد الكلبسات هتنطر وتطلع معاك الكرتيرة كاركلها وطلعها على جنب
هنفك أجزاء الفرامل زى الموضوعين دول بالظبط http://www.nilemotors.net/Nile/354077-a.html
ممكن منفكش الديسك بس مجتش عليه عشان يسهل لنا الأمور واحنا بنفك المقص
www.nilemotors.net/Nile/354087-a.html
المساعد بيبقى فيه مسمار 18 وبيبقى راكب ما بين المسمار والمساعد حتة حديد بيبقى معدى فيها خرطوم زيت الفرامل اللى رايح للكاليبر نفك المسمار تماما عشان نحرر الكاليبر ونجيب طوبة ونحط الكاليبر عليها زى ما فى الصورة كدا دا مسمار المساعد وبعدين نركب المسمار تانى (لازم تركب المسمار تانى أحنا فكيناه عشان نطلع الحديدة اللى ماسك فيها خرطوم الفرامل )
Uploaded with ImageShack.us
Uploaded with ImageShack.us
وبعدين نشيل حساس السرعة بيبقى راكب ورا الدسك فى الكوبلن ومعدى من عند المقص بنشده علينا ونحركه يمين وشمال هيتخلع من الكوبلن من تحت ونركنه على جنب هو وكاليبر الفرامل نجيب طوبة ونحطهم عليها Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
بعدين هنفك تيش الدركسيون بس ناخد بالنا كويس قوى من الصامولة اللى بتزنقه ياريت منلفهاش أكتر من ربع لفة عشان لما تيجى تركبه تانى تبقى الزوايا مضبوطة
http://www.nilemotors.net/Nile/353942-tie-rod.html
بعدين هنفك تيش ال stabilizer bar التيش دا هيحتاج مننا مفتاح 16 زى تيش الدركسيون ومفتاح ألانكيه عادى ( لازم يكون معاك طقم ألانكيه عادى )
بتحط المفتاح ال 16 وتحط الألانكيه فى النص وتفك هتشوف بنفسك لما تفك ... التيش ليه صامولتين واحدة فوق وواحدة تحت ناخد بالنا كويس من أن المساعد فيه فتحتين نحفظ كويس الفتحة اللى راكب فيها التيش لأحسن تركبه فى الفتحة الغلط وانت بتجمع
بعدين نركب الكاوتش وننزل العربية عشان نقدر نخلع التيش لأن وانت رافع العربية السوستة بتبقى مفرودة وهو بيبقى مشدود
Uploaded with ImageShack.us
ودا التيش
Uploaded with ImageShack.us
Uploaded with ImageShack.us
طبعا أحنا فكينا الكرتيرة
هنفك الغطاء الحديد اللى فى الصور دا مربوط ب 4 مسامير ألانكيه نجمة ( طقم ألانكيه نجمة يكون معانا ) الغطاء دا موجود ناحية الشمال فقط يعنى لوهتفك البطاحة اليمين مش هتلاقيه
المسمارين اللى من تحت دول متثبتين فى قاعدة الرادياتير واللى فوق فى جسم العربية
Uploaded with ImageShack.us
Uploaded with ImageShack.us
Uploaded with ImageShack.us

بعدين هنفك قاعدة الرادياتير نبدأ أول حاجة بفك المصفحة فيها 5 مسامير ألانكيه نجمة أو مفتاح 10 عادى
بعدين بنزقها لقدام سنة هتلاقيها وقعت معاك
بعدين نفك الإكسدام ( ممكن متفكوش عادى بس أنا فكيته عشان ميعاكسنيش وأنا بفك وأربط صواميل القاعدة الحديد اللى شايلة الرادياتير )
http://www.nilemotors.net/Nile/330883-x_dam.html
Uploaded with ImageShack.us
نروح لكرتيرة الرفرف اليمين نخلعها وأحنا رافعين العربية برضه
ونفك المسمار اللى فى الصورة دا عشان نحرر قاعدة الرادياتير من الناحية اليمين
فكيته بصعوبة جدا بمفتاح 13 بس سخنته بولاعة من كتر ما هو كان معتل ! Uploaded with ImageShack.us
Uploaded with ImageShack.us
نرجع تانى لمكان شغلنا فى الجزء الشمال هنا بقى مش ضرورى نفك المسمار ال 13 دا
هنفك مسمار 18
نبص فى الصورة دى هى من الجزء اليمين لأن نسيت اصور فى الجزء الشمال بس مش هتفرق شايفين فى الصورة دى ورا السلك دا بيبقى فيه المسمار ال 18 اللى هنفكه Uploaded with ImageShack.us
بعد ما فكيناه
Uploaded with ImageShack.us
المسمار كان ماسك جامد وطبعا طويل جدا وبياخد وقت فى فكه
بعدين نروح للصورة اللى جاية دى بيبقى فيه من قدام مسمارين 18 من تحت فى قاعدة الرادياتير مفيش غيرهم واحد يمين وواحد شمال وبكدا نكون حررنا القاعدة عقبال ما نحرر فلسطين يارب
Uploaded with ImageShack.us
الرادياتير هينزل شوية بس متخافوش مش هيحصل حاجة ( بس واحنا بنركب ناخد بالنا أن الرادياتير من فوق داخل فى الكلبستين بتوعه البلاستيك ومن تحت فى الفتحتين المخصصين ليه بيبقى فيه حتتين جلد من تحت
وآدى قاعدة الرادياتير
Uploaded with ImageShack.us
أحنا فكينا القاعدة عشان نقدر نفك المقص لأن فيه مسمار للمقص لازم تفك القاعدة عشان تطلعه
طيب وفكينا المقص ليه ؟ عشان المساعد بتاع ميجان ليه جهاز مخصوص بيترفع بيه لما يجى يتغير ! أحنا مش معانا الجهاز دا هنضطر نفك كل حاجة !
نروح لأول مسمار وصامولة فى المقص
المسمار اللى فى الصورة دا القاعدة بتاعته من تحت مقاس 18 ومن فوق مربوط فيه صامولة مقاس 18 برضه هنهوى الصامولة من فوق ونمسك بمفتاح ونفك بمفتاح هنركب الكاوتش وننزل العربية عشان تقدر تطلع المسمار لأن وانت رافع العربية السوستة بتبقى ضاغطة على المقص بيبقى مش واخد وضعه الطبيعى بعدين ترفع العربية تانى ( فاكرين لما فكيت أول مسمار بتاع المساعد وقلت نركبه تانى مكانه لأن مينفعش تنزل العربية والمسمار دا مفكوك غلط ) وبعدين نرفع العربية تانى !
ملحوظة هامة جدا ... وأحنا بنركب إن شاء الله دا أول مسمار تركبه افتكر دى كويس
Uploaded with ImageShack.us
Uploaded with ImageShack.us

هنبدأ نفك تانى مسمار فى المقص المسمار دا بيبقى صامولة 18 من ناحية والناحية التانية اللى هى مكان قاعدة الرادياتير قاعدة المسمار نفسه بتبقى 13 نريح الصامولة الأول وبعدين نمسك بمفتاح 13 من ناحية ونفك الصامولة بتاع المسمار من الناحية التانية
دى الصامولة Uploaded with ImageShack.us
نهويها بمفتاح 18 زى دا
Uploaded with ImageShack.us
بعدين نمسك من الجنب التانى بمفتاح 13 ونبتدى نفك خد معايا بتاع ربع ساعة فك Uploaded with ImageShack.us
شايفين المسمار طويل إزاى بس ناخد بالنا وأحنا بنركبه بعد ما نركب المسمار اللى فكيناه أول حاجة السوستة والمساعد بطبعهم بيبقوا متزحاين لبرا
يعنى لما نركب ال driveshaft تانى فى المساعد هنلاقى المقص عشان تدخله فى المنطقة اللى بيركب فيها المسمار دا محتاج تزقه بإيدك لجوا وفى نفس الوقت تضغط بإيدك التانية من تحت وتخلى أى حد يدخلك المسمار الطويل دا ويربط وناخد برضه إن المساعد بيبقى ليه بنز مينفع يركب غير صح بعد ما تركبه بتدق على ال drive shaft من تحت بشويش وتبص من الفتحة بتاع المسمار اللى فكيناه بتاع المساعد لحد ما تلاقى نفسك شايف الناحية التانية ومفيش أى عائق جوا كدا تربط مسمارك بأمان تام
Uploaded with ImageShack.us
كدا يبقى فاضل مسمار واحد ودا بيبقى ورا الدسك من تحت فى ال drive shaft مستخبى من تحت داخل بطريقة أفقية صامولة 16 من ناحية والناحية التانية صامولة 16 عشان كدا قلت نفك الديسك عشان نفك براحتنا
نفكه
هندق على المقص من عند المسمار دا بالراحة هنلاقيه ابتدى ينزل لأن المقص ليه بنز بيبقى داخل فى ال drive shaft والمسمار ال 16 دا بيزنقه عشان يثبته كويس مكانه لأن من غير المسمار دا هتمشى شوية على الطريقة وبعدين تلاقى نفسك اتقلبت بالعربية فنخلى بالنا لما نيجى نركب نركبه صح ونضمن إن البنز داخل كويس فى مكانه الموضوع مفهوش تهاون ودا المقص
Uploaded with ImageShack.us
وآدى ال drive shaft هندق عليها بأى طوبة أو بشاكوش بالراحة دقات متتالية هتبتدى تنزل بس خلى حد يمسهالك عشان تقيلة وحرام لو خبطت منك فى الأرض زى ما حصل معايا
Uploaded with ImageShack.us
Uploaded with ImageShack.us
Uploaded with ImageShack.us
كدا حررنا المقص وال drive shaft من البطاحة والسوستة والمساعد

نطلع فوق نرفع الكبوت
الغطاء دا اللى فوق البطاحة فيه مسمار بلاستيك نخلعه
( المساميرأو الكلبسات دى خلعها بيتم عن طريق انك تجيب مفك وتلف سن المسمار ربع لفة عكس اتجاه عقارب الساعة هتلاحظ انه بينطر معاك سنة بسيطة لفوق هتجيب مفك تان وترفع بيه المسمار اللى فى النص وتشيل المسمار الكلبسة كلها على بعضها )
Uploaded with ImageShack.us
بعدين نرفع الغطاء بإيدنا هنلاقى 3 مسامير مقاس 13 وفيه بنز أبيض بارز دا دلييل البطاحة عشان لما تيجى تركب أول ما تدخل البنز الأبيض دا فى مكانه كدا معناه أن ال 3 فتحات اللى فى البطاحة قصاد ال 3 فتحات اللى فى جسم العربية وتركب مساميرك بسهولة
هتفك ال 3 مسامير دول وانت رافع الغطاء الفبر بإيدك أو أزنقه بمفك اسنده بيه
ومع تالت مسمار خلى حد يمسكهالك عشان متقعش بالسوستة بالمساعد
وواخدين بالنا فى الصور ان فيه صامولة فى النص متجيش عندها نهائى دلوقتى أيااااااااااااااااااااااا اااااك تيجى عندها دلوقت ! عشان لو فكيتها هووب السوستة هتلفت ومعرفش ممكن تعمل إيه بس هى مضغوطة بشكل يزعل قوى
Uploaded with ImageShack.us
وآدى البطاحة بالسوستة بالمساعد
Uploaded with ImageShack.us
هنا يأتى دور الزرجينة الألمانى عدد 2 زرجينة ألمانى أصلى
بنلم بيهم الياى أو السوستة
أنا استعملت الزرجينات المفتكسة بتاعتى وياريتنى ما استعملتها غلبتنى المسامير هرشت وهناك مسمار اتكسر من الضغط عليه وطار بس معورنيش الحمد لله
غير ان الزرجينات الىل كنت عاملها كانت طويلة شوية رحت قصرتها عند الحداد وعملت 2 تانى بعد فشل ال 2 الأولانيين
Uploaded with ImageShack.us
جيت أفك الزرجينات القديمة معرفتش كانوا الحديد والمسامير ماسكين فى بعض بصورة بشعه
بعد محاولة بطولية قدرت افك واحدة والتانية سبتها
وركبت الزرجينات الجديدة بتوع الحداد القصيرين وهااااتك يا ربط برضه المسامير هرشت برغم انها المرة دى كانت مسامير صلب !
وبعدين كنت قلقان برضه لأن السوستة مكنتش مضغوطة قوى بس كانت مضغوطة اللى يشوفها يقول خلاص دى فقدت قوتها
نيمت المساعد
وبدأت أفك الصامولة بتاع البطاحة بالراحة
الصامولة مقاس 18
ولازم يكون معاك طقم الانكيه عااااااااااااادى مش نجمة حتثبت بيه المسمار اللى مربوطة فى الصامولة وتبدأ تفك
طبعا المفتاح ال 18 يبقى زى دا بالضبط اللى هو بيبقى آخره نازلة بزاوية عشان تقدر تدخل للصامولة لأنها نازلة لجوا شوية فى البطاحة
Uploaded with ImageShack.us
مع آخر لفة للصامولة وأنا حاطط قلبى على إيدى هههههههه
طارت الصامولة وطارت البطاحة بس أنا كنت عامل حسابى ومنيم السوستة على جنبها وكنت بفك بحذر
البطاحة طارت 2 متر وخبطت فى الحيط ووقعت أرض أرض
برغم إنى كنت ضامم السوستة شوية كويسين شايفين السوستة بعد ما انفجرت برضه كانت مضمومة قد إيه !
[URL=http://imageshack.us/photos/my-images/18/dsc02178s.jpg/][/URL]Uploaded with [URL=http://imageshack.us]ImageShack.us[/URL

طبعا كدا مش هقدر أجمعها غير بزرجينة أصلية معنى إنها نطرت إنك مش هتقدر تجمع البطاحة الجديدة
لازم زرجينة تانية ..... المركز اللى أنا لفيت على كل الصنايعية ولا واحد فيهم عنده زرجينة نضيفة وآخر واحد الله يجازيه طلع استغلالى قال لى 70 جنيه وتستعمل الزرجينة طيب ورينا يا ريس زرجينتك من ضيق عقله ميعرفش أن زرجينته كبيرة قوى مهما ضم فيها مش هتجيب السوستة اللى معايا
بس هو أفادنى ضمها شوية بالزرجينة بتاعته وبعدين رحت لحداد يفورلى الزرجينات القديمة بتاعتى لأنى مكنتش قادر أفك المساميرهرشت وساحت فى الحديد من كتر الضغط مع الربط !
وجبتهاله وقلت له زرجينتك مش هتجيب وهو يقول لى أهم حاجة أنك هتدفعلى فى الآخر ..... المهم معرفش يعملها وهو بقاله عمره كله فى الشغلانة دى
لحد ما ربنا هدانى لميكانيكى دلنى على الريس ممدوح وما أدراك ما الريس ممدوح
شخص غريب جدا سريع الحركة فى كل حاجة عنيف لسانه زى البلسم ...
حضرتك الريس ممدوح ؟
أيوة ... طيب أنا عايز أجمع السوستة دى
حطها عندك يابنى
كان راكب عربية ركنها وجالى بسرعة من غير حتى ما يسألنى إيه اللى حصل ومبصليش حتى مسك السوستة والمساعد ونده على 2 من الصبيان اللى عنده عيال فى ابتدائى 2 جايين بيجروا بيتنافسوا على مين اللى هيزرجن السوستة
فى ثوانى اترزجنت وركبتها مكنش راضى ياخد فلوس والله وقال لى 10 جنيه وخدها بالعافية
بس هزقنى فى الآخر شوية كويسين وقال لى إياك أشوف وشك هنا تانى ههههههه بجد مش بهزر
قلت له هو أنا جابنى غير الزرجينة ... قال لى غور هاتلك واحدة مرطرطة فى التوفيقية يلا بقى إمشى مش فاضيلك
خدت بعضى ومشيت وأنا محتار فى شخصية الراجل دا وأسلوبه فى التعامل وسرعته الفائقة فى الشغل ودقته وضميره وكلامه العسل
وآدى آخرة اللى يمشى ورا افتكاساته فى كل حاجة !
بالنسبة للبلى القديم
فكيته وشحمته زى ما فى الصور كدا بشحم رولمان بلى أهلية ب 12 جنيه أنضف حاجة لقيتها فى المحل اللى كنت واقف فيه بس كل ما يكون أغلى كل ما يكون أحسن طبعا بس مش بالضرورة يعنى بس متروحش تجيب شحم ب 5 جنيه وتحطه فى المنطقة دى عشان الشحم الرخيص بيسيح
Uploaded with ImageShack.us
Uploaded with ImageShack.us
Uploaded with ImageShack.us
دى صورة المساعد بالكاوتشة بتاعته
ناخد بالنا وأحنا بنركب السوستة بيبقى ليها دليل اللى أنا مشاور عليه فى طبق المساعد عبارة عن سن حديد بارز لفوق مش هتتوه عنه وهى عمرها ما ينفع تركب غير بالوضع دا
نفس الكلام الطبق البلاستيك من فوق ( اللى بيبقى جواه البلى ) بيبقى فيه دليل لسن السوستة من فوق
السوستة من فوق تختلف عن تحت
من تحت بيبقى فيها خرطوم جلد عشان الخبطة تبقى حنينة شوية
Uploaded with ImageShack.us
Uploaded with ImageShack.us
Uploaded with ImageShack.us
ودى السوستة من تحت بس أنا حطيت على الخرطوم بتاعها طبقة سيليكون ( حركة ملهاش أى تلاتين لازمة بس أنا عملت كدا وخلاص ) بس لما جيت أركب شلت الطبقة دى
Uploaded with ImageShack.us

المرحلة اللى أحنا وصلنا ليها فى الفك تسمح لنا بفك الكوبلن
هو مش محتاج غير إنك تشد ال drive shaft عليك لبرا وتحركها يمين وشمال هيطلع معاك هو راكب نظام بنز فى الفتيس برضه ودا شكله
Uploaded with ImageShack.us
طبعا هو معزول بكاوتش جلد شيك عليه لو كان مقطوع تبقى بجد مشكلة ودا معناه ان الكوبلن بتاعك هيبوظ فى أقرب وقت لأن الشحم هيفضى أسلم حل لو لقيته مقطوع شوف الفتحة المقطوع منها وهات أغلى نوع شحم رولمان بلى واحقنه جواه بحقنه وبعدين قفله بسيليكون حرارى وأدعيلى
وناخد بالنا كويس إن كاوتش الكوبلن الأصلى بيبقى عليه 2 قفيز متبرشمين مينفعش يتفكوا غير مرة واحدة يعنى لو فكيت واحد منهم هتضطر انك تغيره بقفيز عادى والله أعلم
ودى صورة الكوبلن من جوا والبنز اللى بيركب فى الفتيس مباشرة
Uploaded with ImageShack.us

ودى الحتة اللى بيركب فيها حساس ال abs طبعا الكوبلن مقلوب عشان أعرف أصورها لأنها من تحت
Uploaded with ImageShack.us
وحساس السرعة دا اساسا عبارة عن حتة بلاستيك عامل زى الحساس اللى فى المرايا اليمين بس شكله مختلف طبعا ووظيفته مختلفة بس كله بلاستيك

قبل ما أركب عملت شوية حاجات بسيطة لكن مهمة جدا جدا
بصوا يا جماعة الأتياش بشكل عام عبارة عن حتة حديد فى نهايتها مفصلات بتتحرك
يعنى تيش الدركسيون فيه مفصلة واحدة بتتحرك يمين وشمال فقط
تيش ال stabilizer bar فيه مفصلتين واحدة راكبة فى المساعد والتانية راكبة فى ال stabilizer bar نفسه ودول بيتحركوا فى كل الاتجاهات
عشان يحافظوا على سلاسة الحركة دى المفصلات دى لازم يكون حواليها شحم والشحم دا لازم يغطيه جلد والجلد مع الوقت والاستعمال بيبوظ ويسرب الشحم ويبوظ التيش
أنا اللى كان عندى كان فيه جلدة مشققة وجلدة مقطوعة وعملتهم بالسيلكون الحرارى عشان أحافظ عليهم

ونفس الكلام للمقص
Uploaded with ImageShack.us
Uploaded with ImageShack.us
Uploaded with ImageShack.us
ناخد بالنا من الصورة دى كويس أنا مشاور بالأحمر على حتة حديد كدا دى بتبقى راكبة فوق البنز بتاع المقص اللى بيبقى راكب فى ال drive shaft ودى بيتعلق عليها سلك حساس السرعة مهما جدااااااااااااااااااا
Uploaded with ImageShack.us
Uploaded with ImageShack.us
Uploaded with ImageShack.us

نبدأ خطوات التركيب بعد ما جمعنا السوستة والمساعد والبطاحة الجديدة وربطنا الصامولة بتاع البطاحة ال 18 كويس جدا
هنركب البطاحة نشوف الدليل بتاعها ونركبها ونخلى حد يربط لنا المسامير أيديا وجعتنى وأنا ماسكها بركبها لأنى كنت بركب بنفسى
بعد ما ربطنا ال 3 مسامير
نعدل المساعد لو مكنش معدول عشان نبدأ نركب فيه ال driveshaft اللى أ حنا خلعناها بالكوبلن ( طبعا بعد ما ركبناها بالكوبلن فى الفتيس )
هندق عليها بحاجة من تحت عشان تدخل فى المساعد ونستعين ب wd40 ولو مفيش عادى وحركها بإيدك يمين وشمال بسيط هى مش هتروح وتيجى على مزاجك يعنى بس هتساعدك فى إنك تطلعها لفوق
لحد ما تلاقى المسمار دخل فى مكانه وطلع من الناحية التانية ( مسمار المساعد اللى فكيناه اللى بيبقى راكب وراه الحديدة اللى ماشى فيها خرطوم زيت الفرامل منركبوش دلوقت إحنا هنركب المسمار دا صورى عشان نعرف نكمل الشغل
بعدين جاء دور المقص أول حاجة هنركبها هو البنز بتاع المقص اللى بيركب فى ال drive shaft من تحت اللى هو فيه الحديدة اللى بيركب فيها سلك حساس السرعة زى ما وضحتها فوق وأوعى حد ينساها
هندق لى المقص من الطرف دا بأى حاجة من تحت عشان البنز يدخل فى مكانه
أنا صورتلكم شكل الفتحة اللى بيدخل فيها البنز وأنا خالع الكوبلن
Uploaded with ImageShack.us
بعدين ندخل المسمار ال 16 اللى فكيناه ونربط صامولته ونربطه كويس جدا الحتة دى لازم نعملها بإتقان يا جماعة لأنها أخطر حتة
والبنز لو مدخلش فى مكانه كويس تبقى كارثة بعد ما ربطنا صامولته ومسماره كويس جدا
بعدين نربط أول مسمار فكيناه فى المقص
بعدين نربط المسمار الطويل الرخم دا
Uploaded with ImageShack.us
ودا هيحتاج إنك تزق المقص لجوا بال drive shaft لأن السوستة بوضعها الطبيعى فى تصميمها أنها بتبقى زايحة المقص لبرا
بعدين ندخل المسمار وتفضل تربط فيه ربع ساعة وتجمع عليه كويس جدا
بعدين هنفك المسمار بتاع المساعد ونركب فيه الحديدة بخرطوم زيت الفرامل ونربطه تانى كويس جدا
بعدين نركب ال تيل والطنابير ( أرجع للموضوع بتاع فك التيل والطنابير والديسك )
بيقولوا إن فى كل مرة تفك فيها الكاليبر لازم تحط مادة معينة معرفش إيه هى على مسامير الكاليبر ؟
وبعدين ننزل العربية على الأرض وتركب تيش ال stabilizer bar لأنك مش ه تعرف تركبه وانت رافع العربية طبعا لأن السوستة هتبقى ضاغطة على المقص ومنزلاه لتحت والمساعد هيبقى مش فى وضعه الطبيعى
لازم تنزل العربية وتركبه وتعلق صواميله بعدين ترفع العربية
وتفك العجلة تانى
وتربط صواميله زى ما ذكرنا قبل كدا هتستخدم ألانكيه عادى عشان تثبت بيه المسمار اللى بتتربط عليه السوستة
يا جماعة هى الفيشة دى بتاع إيه موجودة فى الجزء الشمال بس ومش راكب فيها حاجة ؟
Uploaded with ImageShack.us
وبعدين بنركب كل حاجة تانى من اكسدام لمسامير لكل حاجة فكيناها فى أماكنها وكل حاجة مشروحة فى موضوعها
الأدوات المستخدمة :
2 زرجينة ألمانى
2 مفتاح 18 واحد مشنشر وواحد عادى
1 مفتاح 13
طقم ألانكيه نجمة
طقم ألانكيه عادى
مفتاح 10
مفك عادى
مفتاح 22 ودا ليه صامولة وحيدة وهى صامولة زنق تيش الدركسيون
وهذه بعض الصور من واقع العمل
Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
Uploaded with ImageShack.us
أعذرونى إن أخطأت أو نسيت شئ الموضوع مجهد جدا
الحمد لله

مجهود رائع